मरकुस 4

बिहन बुनोईया कर अहना

(मत्ती 13:1-9; लूका 8:4-8)

1ईसू हर फेर बड़खा दह कर धरी में उपदेस देहे लागीस अऊ ओजग अईसना भीड़ जुईट गईस कि ओहर बड़खा दह में एगोट डोंगा कर ऊपरे चएघ के बईठ गईस अऊ भीड़ कर मईनसे मन दह कर धरी में ठड़होए रहीन। 2ईसू हर ओमन ला अहना में ढेरेच अकन बात ला सिखावत रहीस अऊ अपन उपदेस में ओमन ला कहीस, 3“सुना, एक झन बुनोईया हर बिहन बुने बर निकलीस। 4बुनत घनी तनिक बिहन हर डगर कर धरी में गिरीस अऊ चराई मन आए के खाए देहीन। 5तनिक बिहन हर पखनोरीया भुईं में गिरीस, जिहां ओला बगरा माटी नई मिलीस अऊ ओहर हालुच जाएम गईस, काबरकि ओजग गहील माटी नई रहीस, 6त जे घनी बेर उगीस, त ओहर भुरटाए गईस अऊ जएर नई धरे कर चलते झुराए गईस। 7तनिक बिहन हर भूंदरा में गिरीस अऊ भूंदरा हर बाएड़ के ओला ढांएक देहीस अऊ ओहर नई फरीस। 8बकिन तनिक बिहन हर बढ़िहां भुईं में गिरीस अऊ ओहर जामीस अऊ बढ़िहां फर फरे लागीस अऊ कोनो तीस गुना, कोनो साएठ गुना अऊ कोनो हर सवो गुना फर फरीस।” 9तब ईसू हर कहीस, “जेमन सुने बर तियार हवें, ओमन सूईन लें अऊ समझ लें।”

अहना कर मतलब

(मत्ती 13:10-17; लूका 8:9-10)

10जब ईसू हर एके झन रहीस, तब ओकर बारह चेला अऊ ओकर सुनोईया में ले तनिक झेमन, ओ अहना कर बारे में पूछीन। 11ईसू हर ओमन ला कहीस, “तुमन ला तो परमेस्वर कर राएज कर गहील गियान देहल गईसे, बकिन बाहरी कर मईनसे मन बर सब बात ला अहना में बताल जाथे। 12तेकर ले बढ़िहां हवे कि

ओमन देखथें, बकिन देखे नई सकें,

ओमन सुनथें बकिन नई समझें,

अईसना झईन होए कि ओमन परभू कती फिर आएं

अऊ ओहर ओमन कर पाप ला छमा करे।#यसायाह 6:9,10 ”

13तब ईसू हर ओमन ला पूछीस, “का तुमन ए अहना ला नई समझा? त फेर अऊ अहना मन ला कईसे समझीहा? 14बुनोईया हर परमेस्वर कर बचन ला बुनथे। 15तनिक मईनसे मन डगर कर धरी में गिरल बिहन कस हवें, जब ओमन सुनथें, तब सैतान हर तुरतेंच आए के ओ बचन ला जेला ओमन में बुनल गए रहीस, उठाए के ले जाथे। 16दूसर झेमन ओ बिहन कस हवें, जेला पखनोरीया भुईं में बुनल जाथे, ओमन बचन ला सुईन के तुरतेंच खुसी कर संगे माएन लेथें। 17बकिन गहील में जएर नई धरे कर चलते, ओमन तनिक दिन बर रथें। परमेस्वर कर बचन में बिस्वास करे ले तकलीफ अऊ सताव आथे, त ओमन तुरतेंच छोंएड़ देथें। 18अऊ जे बिहन ला भूंदरा में बुनल गए रहीस, ओमन एमन लागें जेमन बचन ला सुनथें, 19बकिन संसार कर चिंता, धन कर लालच अऊ दूसर चीज कर लोभ ओमन में समाए के बचन ला दबाए देथे अऊ ओमन फर नई लानें। 20अऊ जे बिहन ला बढ़िहां भुईं में बुनल गए रहीस, ओहर एमन लागें जेमन बचन ला सुईन के माएन लेथें अऊ सुघर फर फरथें, कोनो हर तीस गुना, कोनो हर साएठ गुना, अऊ कोनो हर सवो गुना।”

ढेबरी कर अहना

(लूका 8:16-18)

21ईसू हर ओमन ला कहीस, “तुमन ढेबरी ला बाएर के खटीया कर तरी राखे बर नई लाना, बकिन अवंठा ऊपरे मड़हाए बर लानथा। 22काबरकि जे चीज हर लुकाल हवे, ओला देखाल जाही अऊ जे बात हर दबीस हवे, ओला सब झन कर आगू में परगट करल जाही। 23अगर कोनो हर सुने बर तियार हवे, त ओहर सुईन ले अऊ समझ ले।”

24फेर ईसू हर ओमन ला कहीस, “सवाचेती रहा कि तुमन का सुनथा। जे नाप ले तुमन नापथा, ओहीच नाप ले तुमनो बर नापल जाही अऊ तुमन ला बगरा देहल जाही। 25काबरकि जेकर जग हवे, ओके अऊ देहल जाही अऊ जेकर जग नईए, ओकर जग ले ओहू ला ले लेहल जाही, जेला ओहर सोंचथे कि ओकर जग हवे।”

जमोईया बिहन कर अहना

26फेर ईसू हर कहीस, “परमेस्वर कर राएज हर एकस हवे, जेकस कोनो मईनसे हर बिहन ला भुईं में बुनथे। 27ओहर राती सूतथे अऊ दिन में जागथे अऊ ओ बिहन हर अपने-अपन जामथे अऊ बाड़थे, तबो ले मईनसे हर नई जाने। 28भुईं हर अपने-अपन फर लानथे, आगू जएर आथे, तेकर बाएल अऊ बाएल में बिहन होथे। 29बकिन जब दाना हर पाएक जाथे, तब ओहर तुरतेंच हेंसूआ ला लानथे, काबरकि लुए कर समय हर आए गईस हवे।”

सेरसों कर बिहन कर अहना

(मत्ती 13:31-32,34; लूका 13:18-19)

30फेर ईसू हर कहीस, “हमरे परमेस्वर कर राएज ला काकर कस ठहराई अऊ कोन अहना में ओला समझाई? 31ओहर सेरसों कर बिहन कस हवे, जेला भुईं में बुनल जाथे, ओ बिहन हर भुईं कर सबले छोटे बिहन में ले एक हवे। 32बकिन बुने कर पाछू ओहर सब रूख ले बाएढ़ के बड़खा होए जाथे अऊ ओकर अईसना बड़खा-बड़खा डार निकलथे कि अगास कर चराई मन, ओकर छाए में बसेरा कएर सकथें।”

33ईसू हर ओमन ला परमेस्वर कर बचन ला समझे बरीक, एकस ढेरे अकन अहना ला कहीस अऊ जेतना ओमन समझत रहीन, ओतना ओमन ला सिखात रहीस। 34बिगर अहना कर ओहर ओमन ला कांही नई कहत रहीस, बकिन एकेच झन में ईसू हर अपन चेला मन ला, सब गोएठ कर मतलब समझात रहीस।

ईसू गररा-घांटा ला सांत करथे

(मत्ती 8:23-27; लूका 8:22-25)

35ओहीच दिन जब बेर हर बूईड़ गईस, त ईसू हर अपन चेला मन ला कहीस, “आवा, हमरे बड़खा दह कर ओ पार जाई।” 36ओमन भीड़ ला पाछू छोंएड़ के डोंगा में चघीन, जेमें ईसू हर चघे रहीस अऊ ओमन ईसू ला अपन संगे ले गईन अऊ ओकर संगे अऊ मईनसे मन दूसर डोंगा में जात रहीन। 37तब एगोट बड़खा भारी गररा-घांटा आईस अऊ पानी कर बड़खा लहरा उठीस, एकरे चलते पानी हर डोंगा में ढूके लागीस अऊ डोंगा हर बुड़े बर करत रहीस। 38बकिन ईसू हर डोंगा कर पाछू में, मूड़सेरी कएर के सूतत रहीस। तब चेला मन ओके उठाए के कहींन, “ए गुरूजी, का तोके ला कोनो फिकर नईए कि हमरे बूईड़ जाथन?” 39तब ओहर उईठ के गररा-घांटा ला घुड़काईस अऊ पानी कर लहरा ला कहीस, “चुप रह अऊ माएढ़ जा,” अऊ गररा-घांटा हर माएढ़ गईस अऊ एकदम सांत होए गईस। 40त ईसू हर कहीस, “तुमन काबर डरात हा? का तुमन ला अझेर ले बिस्वास नईए?” 41बकिन ओमन ढेरेच डराए गईन अऊ एक दूसर झन ले कहे लागीन, “एहर कोन लागे कि गररा-घांटा अऊ लहरोच हर ओकर बात ला मानथें?”

Currently Selected:

मरकुस 4: SGJ

Highlight

Copy