मरकुस 3

ईसू हर झुराल हाथ कर मईनसे ला चंगा करथे

(मत्ती 12:9-14; लूका 6:6-11)

1ईसू फेर यहूदी मन कर धरम सभा कर घर में गईस अऊ उहां एगोट मईनसे रहीस, जेकर हाथ हर झुराए गए रहीस। 2अऊ ओजग कर तनिक मईनसे मन ईसू कर ऊपरे दोस लगाए बर मोका खोजत रहीन, एकरे बर ओमन ए देखत रहीन कि ओहर पबितर दिन में ओके ला चंगा करथे कि नहीं। 3ईसू हर ओ मईनसे ला कहीस, “मंझारे ठड़होए जा।” 4तेकर ईसू हर ओमन ला पूछीस, “का यहूदी कानहूंन कर अनुसार पबितर दिन में, भलाई करे बर ठीक हवे कि बुराई करे बर, जीव ला बचाए बर कि खतम करे बर?” बकिन ओमन चुपचाप रहीन। 5ईसू हर ओमन कर बजर मन ला देख के उदास होए गईस अऊ गुसाए के ओमन ला देखीस अऊ ओ मईनसे ला कहीस, “अपन हाथ ला लमाओ।” त ओहर लमाईस अऊ ओकर हाथ हर बढ़िहां होए गईस। 6तेकर फरीसी मन तुरतेंच बाहरी निकेल के, हेरोदी मन#3:6 जेमन हेरोद राजा कती रहीन ओमन ला हेरोदी मन कहत रहीन। कर संगे ओकर बिरोध में सलाओ करे लागीन कि ओके कईसे मरूवाई।

मईनसे मन ईसू कर पाछू होथें

7ईसू हर अपन चेला मन कर संगे, बड़खा दह कती गईस अऊ गलील जिला कर मईनसे मन कर बड़खा भीड़ हर ओकर पाछू होए लेहीस। 8ओकर अचमहों काम कर बारे में सुईन के एहूदिया जिला, यरूसलेम सहर अऊ इदूमिया ईलाका अऊ एरदन नदी कर ओ पार, सूर अऊ सएदा गांव कर आस-पास ले, एगोट बड़खा भीड़ोच हर ओकर जग आईन। 9ईसू हर अपन चेला मन ला कहीस, “ढेरेच भीड़ कर चलते, एगोट नानबड़ डोंगा ला मोर बर तियार राखे रईहा कि भीड़ हर मोर ऊपरे ढोंसाए झईन जाए।” 10ओहर ढेरेच झेमन ला चंगा करे रहीस, एकर चलते बेमरीहा मन ओके छुए बर ढोंसाए जात रहीन। 11जब दुस्ट आत्मोच मन ईसू ला देखत रहीन, त ओकर आगू में गिर जात रहीन अऊ किरलाए के कहत रहीन, कि तंए परमेस्वर कर बेटा लागस। 12बकिन ईसू हर ओमन ला ढेरेच चेताए के कहीस, “झईन बतावा कि मंए कोन लागों।”

ईसू हर बारह झन परेरीत मन ला चूनथे

(मत्ती 10:1-4; लूका 6:12-16)

13फेर ईसू हर पहार ऊपरे चएघ गईस अऊ जेमन ला ओहर चाहत रहीस ओमन ला बलाईस अऊ ओमन ओकर जग आईन। 14तब ईसू हर बारह झन ला चुईन के ओमन ला परेरीत कहीस कि ओमन ओकर संगे-संगे रहें अऊ ओहर ओमन ला परचार करे बर भेज सके, 15अऊ ओमन दुस्टआत्मा मन ला निकाले कर अधिकार राखें। 16ओ बारह झन एमन रहीन, समोन जेकर नांव ईसू हर पतरस राखीस। 17अऊ जबदी कर बेटा याकूब अऊ याकूब कर भाई यूहन्ना, जेमन कर नांव ओहर बूअनरगिस राखे रहीस, जेकर मतलब होथे गरज कर बेटा, 18अऊ अंदरियास, फिलीपुस, बरतुलमे, मत्ती, थोमा अऊ हलफई कर बेटा याकूब, तदए अऊ समोन कनानी जेला उतसाही कथें, 19अऊ यहूदा इसकरोती जेहर ईसू ला धरूवाए देहीस।

ईसू हर परमेस्वर कर सामर्थ ले सैतान ला हराथे

(मत्ती 12:22-32; लूका 11:14-23; 12:10)

20तेकर ईसू हर घरे गईस, त अईसना भीड़ जुईट गईस कि ईसू अऊ ओकर चेला मन खायो बर नई सकीन। 21जब ईसू कर परिवार कर मईनसे मन एला सुनीन, त ओके घरे ले जाए बर आईन, काबरकि मईनसे मन कहत रहीन कि ओकर दिमाग हर ठीक नईए।

22यहूदी कानहूंन कर सिखोईया मन, जेमन यरूसलेम ले आए रहीन एकस कहत रहीन, “ओकर उपरे सैतान हवे,” अऊ “ओहर दुस्टआत्मा मन कर मुखिया जेला बालजेबुल कथें, ओकर मदेत ले दुस्टआत्मा मन ला निकालथे।”

23एकरले ईसू हर ओमन ला लिघे बलाए के अहना में कहीस, “सैतान हर सैतान ला कईसे निकाले सकही? 24अगर कोनो राएज में फूट होए जाथे, त ओ राएज हर कईसे माढ़े रईह सकथे? 25अगर कोनो परिवार में फूट होए जाथे, त ओ परिवार हर कईसे माढ़े रईह सकथे? 26एकरे ले अगर सैतान हर, अपनेच बिरोध में होए के फूट डालही, त ओहर कईसे बने रईह सकथे? एकस होही त ओकर आखरीए होए जाही।”

27“बकिन कोनो मईनसे हर, कोनो बलवान मईनसे कर घर में ढुईक के, ओकर धन ला तब ले लुटे बर नई सके, जब ले ओ बलवान मईनसे ला बाएंध नई लेही। तेकर पाछू ओहर ओकर धन ला लुटे बर सएक देही।”

28“मंए तुमन ला फूरोंच कहथों कि मईनसे मन कर सब पाप अऊ परमेस्वर कर निंदा जेला ओमन करथें, छमा कएर देहल जाही। 29बकिन जेहर पबितर आत्मा कर बिरोध में निंदा करथे, ओला कभोंच छमा नई करल जाही, बकिन ओहर ओ पाप ले अईसना दोसी ठहरही, जेला हमेसा बरीक सहे बर परही।” 30ओजग तनिक झेमन कहत रहीन कि ओकर उपरे दुस्टआत्मा हवे, तेकर ले ईसू हर ओमन ला ए बात बताईस।

ईसू कर दाई अऊ भाई मन

(मत्ती 12:46-50; लूका 8:19-21)

31तेकर ईसू कर दाई अऊ ओकर भाई मन आईन अऊ बाहरी ठड़होए के, ओके बलाए बर एक झन ला भेजीन। 32एगोट बड़खा भीड़ ईसू कर चाएरो कती बईठे रहीन अऊ ओमन ओके कहीन, “देख, तोर दाई अऊ तोर भाई मन बाहरी तोके खोजत हवें।” 33ईसू हर ओमन ला पूछीस, “मोर दाई अऊ मोर भाई मन कोन लागें?” 34ओहर अपन चाएरो कती बईठल भीड़ ला देख के कहीस, “देखा, एमन मोर दाई अऊ मोर भाई मन लागें। 35काबरकि जे कोनो हर परमेस्वर कर ईछा ला पूरा करथे, ओही हर मोर भाई, बहिन अऊ दाई लागे।”

Currently Selected:

मरकुस 3: SGJ

Highlight

Copy