मरकुस 15

ईसू ला राएजपाल पीलातूस जग लानीन

(मत्ती 27:1-2; 11:14; लूका 23:1-5; यूहन्ना 18:28-38)

1बड़े बिहाने यहूदी अगुवा मन अऊ यहूदी कानहूंन कर सिखोईया मन अऊ मुख याजक मन अऊ पूरा महा सभा मिल के बात बिचार करीन, तेकर ईसू ला बंधूआए के ओमन राएजपाल पीलातूस कर हाथ में सोंएप देहीन। 2पीलातूस हर ईसू जग पूछीस, “का तंए यहूदी मन कर राजा लागस?” ईसू हर जबाब देहीस, “तंए खुद कहत हस।” 3मुख याजक मन ईसू कर उपरे ढेरेच बात कर दोस लगात रहीन। 4पीलातूस हर ईसू जग पूछीस, “का तंए कांही जबाब नई देअस, देख, एमन तोर उपरे ढेरेच बात कर दोस लगात हवें?” 5ईसू हर फेर कांहीच जबाब नई देहीस, एला देख के पीलातूस हर ढेरेच अचमहों होईस।

ईसू कर मीरतू दंड कर अगियां

(मत्ती 27:15-26; लूका 23:13-25; यूहन्ना 18:39; 19:16)

6तिहार कर घरी में पीलातूस हर कोनो एक झे कएदी ला, जेला मईनसे मन चाहत रहीन, ओला ओमन बर छोंएड़ देहत रहीस। 7बरअबा नांव कर एक झन कएदी हर जेहल में रहीस, जेहर रोमी सरकार कर बिरोध में लड़ाई-झगरा करे रहीस अऊ कोनो मईनसे ला मरुवाए देहे रहीस। 8अऊ मईनसे कर भीड़ हर ऊपर जाए के पीलातूस जग बिनती करे लागीन, “जईसना तंए हमर बर करत आए हस, ओइसने कर।” 9पीलातूस हर कहीस, “का तुमन चाहथा कि मंए तुमन बर यहूदी मन कर राजा ला छोंएड़ देवों?” 10काबरकि ओहर जानत रहीस कि मुख याजक मन ईसू ला इसगा करे कर चलते धरुवाईन हवें। 11बकिन मुख याजक मन मईनसे मन ला उकसाईन कि बरअबेच ला ओमन बर छोंएड़ दे। 12एला सुईन के पीलातूस हर ओमन जग फेर पूछीस “त जेला तुमन यहूदी मन कर राजा कहथा, ओकर मंए का करों?” 13तेकर ओमन फेरेच किरलाए के कहे लागीन, “कि ओके कुरूस में चघाए के मरुवाए दे” 14बकिन पीलातूस हर ओमन ला कहीस, “काबर, एकर में का दोस हवे?” बकिन ओमन अऊ किरलाए के कहीन, “ओला कुरूस में चघाए के मरुवाए दे।” 15तेकर पीलातूस हर भीड़ ला खुस करे बर बरअबा ला छोंएड़ देहीस अऊ ईसू के कोड़ा मरुवाए के कुरूस में चघाए बर सोंएप देहीस।

ईसू कर मजाक उड़ाथें

(मत्ती 27:27-31; यूहन्ना 19:2-3)

16सिपाही मन ईसू के राएजपाल कर गढ़ी कर भीतर#15:16 ओ जघा ला परोटोरियुन कहत रहीन, अंगन में ले गईन अऊ सिपाही मन कर सबेच दल ला बलाईन। 17तेकर ओमन ईसू ला भंटा रंग कर ओढ़ना ला पहिराईन अऊ कंटा कर मुकुट बनाए के ओकर मूड़ी में पहिराईन, 18अऊ ओमन ईसू कर मझाक उड़ाए के ओके जोहारे लागीन, “ए यहूदी मन कर राजा, पालंगी।” 19ओमन ओकर मूड़ ला बड़खा लाठी में मारत रहीन अऊ ओकर ऊपरे थूंके लागीन अऊ ठेहुनाए के ओके जोहारे लागीन। 20जब ओमन ओकर मजाक कएर दारीन, तेकर ओकर उपरे ले भनटा रंग कर ओढ़ना ला उताएर के, ओकरेच ओढ़ना ला पहिराईन, अऊ ओके ला कुरूस में चघाए बर बाहरी कती ले गईन।

ईसू ला कुरूस में चघाथें

(मत्ती 27:32-44; लूका 23:26-43; यूहन्ना 19:17-27)

21कुरेन गांव कर समोन जेहर सिकंदर अऊ रूफूस कर दाऊ रहीस, ओहर गांव कती ले आवत रहीस, त ओमन ओके धएर के, ईसू कर कुरूस ला डोहे बर कहीन। 22ओमन ईसू के गूलगूता नांव कर जघा में ले गईन, जेकर मतलब हवे, “खोपड़ी” कर जघा। 23उहां ईसू के मूर दावा मेराल #15:23 मूर दावा दूखान ला कम करे कर काम में आत रहीस अंगूर कर रस देहे लागीन, बकिन ओहर ओला नई पीस। 24तब ओमन ईसू ला कुरूस उपरे चघाईन अऊ ओकर ओढ़ना बर चिट्ठी बांटीन कि काके ला का मिलही अऊ ओमन ओकर ओढ़ना ला बांएट लेहीन। 25ओमन ईसू ला कुरूस में चघाईन, ओ घनी दिन कर करीबन नवो बजे रहीस। 26अऊ ओकर बिरोध में एकस चिट्ठी लिख के ओकर उपरे टंगवाए देहीस, “यहूदी मन कर राजा।”

27ओमन ईसू कर संगे दुई झन डांकू मन ला कुरूस में चघाईन, एक झन ला ओकर जवनी कती अऊ दूसर ला ओकर डेरी कती। 28(तब पबितर किताब कर ओ बचन “ओहर पापी मन कर संगे गनाही” ओहर पूरा होईस।) 29अऊ डगर रेंगोईया मन, अपन मूड़ी ला हिलाए-हिलाए के ओकर निंदा करत कहत रहीन, “ए मंदिर कर गिरोईया अऊ तीन दिन में बनोईया! 30कुरूस ले उतेर के अपन आप ला बचाए ले।” 31ओईसनेच मुख याजक मन अऊ कानहूंन कर सिखोईयो मन, ओकर मजाक उड़ाए के एक दूसर ले कहीन, “एहर आने झेमन ला बचाईस, बकिन अपन आप ला बचाए नई सकत हवे। 32ए इसराएल कर राजा, मसीह, अब कुरूस ले उतेर आ कि हमरे देख के बिस्वास करी।” अऊ जेमन ला ओकर संगे कुरूस ऊपरे चघाल गए रहीन, ओहूच मन ओकर निंदा करत रहीन।

ईसू कर मिरतु

(मत्ती 27:45-56; लूका 23:44-49; यूहन्ना 19:28-30)

33मझेनी कर घरी में सबेच देस में अंधार छाए गईस अऊ अंधार करीबन तीसर जुआर तक रहीस। 34तीसर जुआर ईसू हर रोसे चिकेर के कहीस, “इलोई, इलोई, लमा सबकतनी?” जेकर मतलब हवे, “ए मोर परमेस्वर, ए मोर परमेस्वर, तंए मोके काबर छोंएड़ देहे हस?” 35जेमन ओजग ठड़होए रहीन, ओमन में ले तनिक झेमन ओला सुईन के कहीन, “सुना, ओहर एलियाह ला चिकरत हवे।” 36अऊ एक झन हर कुदत रुवा ला अमट मेरावल अंगूर कर रस में बोएथ के अऊ लाठी में लपेट के ओके ला पीए बर देहीस अऊ ओहर दूसर झेमन ला कहीस, “रुईक जा, हमरे देखबो कि एलियाह हर एके ला बचाए बर आथे कि नहीं।” 37तेकर ईसू हर रोसे किरलाए के अपन परान ला छोंईड़ देहीस। 38त परमेस्वर कर मंदिर कर परदा हर ऊपर ले खालहे तक चीराए के दुई टुटका होए गईस। 39अऊ जे सुबेदार हर ओजग ठड़होए रहीस, जब ओहर ईसू ला किरलाए के परान छोंड़त देखीस, त कहीस, “फूरोंच में ए मईनसे हर परमेस्वर कर बेटा रहीस।” 40तनिक सवांगीनो मन दुरीहां ले देखत रहीन, ओमन में मगदलीनी कर रहोईया मरियम, छोटे याकूब अऊ योसेस कर दाई मरियम अऊ सलोमी मन रहीन। 41जब ईसू हर गलील जिला में रहत रहीस, त ए सवांगीन मन ओकर पाछू होए लेहे रहीन अऊ ओकर सेवा-जतन करत रहीन। अऊ ढेरेच सवांगीनो मन, जेमन ओकर संगे यरूसलेम ले आए रहीन, ओहू मन ओ जग रहीन।

ईसू ला मठ में राखथें

(मत्ती 27:57-61; लूका 23:50-56; यूहन्ना 19:38-42)

42ओ दिन हर तियारी कर दिन रहीस, जेहर बिसोए कर दिन ले पाछू होथे, एकरले जब सांझ होए गईस, 43त अरमतियाह कर रहोईया यूसुफ हर आईस, जेहर बड़खा सभा कर सदस रहीस अऊ परमेस्वर कर राएज कर डगर देखत रहीस। ओहर हिमेत कएर के पीलातूस जग गईस अऊ ईसू कर लास ला मांगीस। 44पीलातूस हर एला सुईन के अचमहों होईस कि ईसू हर एतना हालू कईसे मएर गईस, एकरले पीलातूस हर सिपाही ला बलाए के पूछीस, “का एके मरे ले केतना जुआर होवथे?” 45जब ओहर सिपाही कर जरिये, ईसू कर मरे कर खभेर ला जाएन लेहीस, त लास ला यूसुफ ला देहे देहीस। 46तब यूसुफ हर एगोट मखमल कर चदर ला बेसाए के लानीस अऊ ईसू कर लास ला उताएर के ओही चदर में लपेटीस अऊ एगोट चटाएन कर कोड़ल मठ में राखीस अऊ मठ कर दुरा में एगोट पखना ला ढांएप देहीन। 47मगदलीनी कर रहोईया मरियम अऊ योसेस कर दाई मरियम देखत रहीन कि ईसू कर लास ला कहां राखीन हवें।

Currently Selected:

मरकुस 15: SGJ

Highlight

Copy