परेरीत 24

पौलुस हर फेलिक्स राएजपाल कर आगू में जाथे

1पांच दिन कर पाछू, हनन्याह महायाजक हर कईयो झे यहूदी सियान मन ला अऊ तिरतुलुस नांव कर वकील ला संगे लेके, कैसरिया सहर में आईस अऊ ओमन राएजपाल कर आगू में पौलुस कर बिरोध में दोस लगाईन। 2जे घनी पौलुस ला बलाईन ओही घनी, तिरतुलुस ओकर उपरे दोस लगाए के कहे लागीस, “ए महा परतापी फेलिक्स, तोर चलते हमरे मन ढेरेच बढियां ले रहत हवन अऊ तोर परबंध ले ए जाति कर ढेरे बुराई हर सूधरत जाथे। 3एला हमन हर जगहा अऊ हर किसीम ले धनबाद कर संगे मानथन। 4बकिन तोके ला अऊ दुख देहे बर नई चाहत हों, एकरले मंए तोर जग बिनती करथों कि तंए मोर एक-दूई बात ला सुईन ले। 5हमन ए मईनसे ला बहकोईया अऊ दुनिया कर सबेच यहूदी मन कर मझार में, झगरा करोईया अऊ नासरी मन कर दल कर मुखिया पाए हवन। 6ओहर परमेस्वर कर मंदिर ला असुध करे बर चाहत रहीस, बकिन ओके ला धएर लेहेन; हमन ओके ला अपन कानहूंन कर अनुसार दंड देहे रहतेन। 7बकिन सिपाही मन कर मुखिया लूसिया हर, हमर हाथ ले ओके ला जबरजसती ले गईस। 8ओहर बिरोधी करोईया मन ला तोर आगू में आए बर अगियां देहीस, ए सबेच गोएठ ले जेकर बारे में हमन ओकर उपरे दोस लगाथन, तंए खुद ओकर जांच कएर के जाएन जाबे।” 9यहूदीयो मन तिरतुलुस वकील कर साथ देके कहीन, “ए गोएठ हर पूरा तरह ले सच हवे।”

पौलुस हर फेलिक्स राएजपाल ला जबाब देथे

10जे घनी राएजपाल हर पौलुस ला गोठियाए बर इसारा करीस, ओही घनी पौलुस हर जबाब देहीस, “मंए जानथों कि तंए ए जाति कर ढेरे बछर ले नियाओ करत हस, एकरले मंए हिमेत धएर के अपन जबाब देहथों। 11तंए खुद जाएन सकत हस कि जब ले मंए यरूसलेम में पराथना करे बर आए हों, मोके ला बारह दिन ले बगरा नई होईसे। 12ओमन मोके ला मंदिर में आखिर धरम सभा कर घर में अऊ सहर में ककरो जग बंहसा-बंहसी करत अऊ भीड़ लगात कभों नई भेंटीन हवें। 13ओमन ओ गोएठ ला, जेकर बारे में ओमन अब मोर उपरे दोस लगाथें, तोर आगू में सही साबित नई कएर पाहीं। 14बकिन मंए तोर आगू में एला माएन लेहत हों कि जे डगर ला ओमन गलत डगर कथें, ओहीच रीती ले मंए अपन पूरखा मन कर परमेस्वर कर सेवा करथों अऊ जे गोएठ हर यहूदी कानहूंन अऊ अगमजानी मन कर किताब में लिखल हवे, ओ सब में बिस्वास करथों। 15मंए परमेस्वर कर उपरे असरा करथों, जेला ओमन कथें कि धरमी अऊ अधरमी दुनो जी उठहीं। 16एकरले मंए हमेसा ए कोसिस करथों कि परमेस्वर अऊ मईनसे मन कती ले मंए हमेसा निरदोस रहों। 17ढेरे बछर कर पाछू मंए यरूसलेम सहर में, अपन मईनसे मन बर दान पहुंचाए अऊ भेंट चघाए बर आए रहें। 18ओमन मोके ला मंदिर में यहूदी धरम कर हिसाब ले सुद्ध पाईन अऊ बिगर भीड़ कर संगे अऊ बिगर झगरा करत भेंट चघात पाईन। बकिन हओ, एसिया ले कईयो झे यहूदीयो मन रहीन, एहर ओमन बर सही रहीस। 19अगर ओ यहूदी मन जग मोर बिरोध में कोनो बात हवे, त एजग तोर आगू में आए के मोर उपरे दोस लगातीन। 20एकस नई रहतीस, त तंहीच बताओ कि मंए महा सभा कर आगू में ठड़होए रहें, त ओमन मोर उपरे का अपराध पाईन? 21ए एगोट बात कर छोंएड़, ‘मंए ओमन कर मझार में ठड़होए के किरलाए के कहे रहें: मरल मन कर जी उठे कर बारे में, आएज तुमन कर आगू में बयान होवथे।’”

22फेलिक्स हर जेहर ए डगर कर गोएठ ला सही-सही जानत रहीस, ओमन ला ए कहिके टाएल देहीस, “जे घनी सिपाही मन कर मुखिया लूसियास हर आही, ओही घनी तुमन कर गोएठ कर फईसला करहूं।” 23त ओहर सुबेदार ला अगियां देहीस कि पौलुस ला तनिक जुआर बरीक छुट देके, ओकर पहरा करीहा अऊ ओकर संगता में ले अगर कोनो सेवा करे बर चाही, त ओके ला झईन रोखीहा।

फेलिक्स राएजपाल अऊ दुरसिला कर आगू में पौलुस

24तनिक दिन कर पाछू, फेलिक्स हर अपन परानी दुरसिला जेहर एगोट एहूदिनी रहीस, ओके ला संगे लेके आईस, अऊ पौलुस ला बलाए के ओ बिस्वास कर बारे में, जेहर मसीह ईसू में हवे, ओकर जग सुनीस। 25जब पौलुस हर उहां धरमीपन, भलाई, संयम, अऊ अवईया नियाओ कर बारे में चरचा करत रहीस, ओही घनी फेलिक्स हर डराए के कहीस, “अझेर तो तंए जा! मोका मिलही, त मंए तोके फेर बलाहूं।” 26ओके ला पौलुस जग ले पईसा मिले कर असरा रहीस, एकरले पौलुस ला बलाए-बलाए के गोठियावत रहीस। 27जब दुई बछर बीत गईस, त पुरकियुस फेसतुस हर, फेलिक्स कर जघा में आईस। बकिन फेलिक्स हर यहूदी मन ला खुस करे कर बिचार में, पौलुस ला जेहल में ही छोंएड़ देहीस।

Currently Selected:

परेरीत 24: SGJ

Highlight

Copy