परेरीत 25

पौलुस हर फेसतुस राएजपाल कर आगू में जाथे

1फेसतुस राएजपाल हर पद पाए के, कैसरिया में पहुंचीस अऊ तीन दिन कर पाछू, यरूसलेम सहर में गईस। 2तब मुख याजक अऊ यहूदी मन कर मुखिया मन, ओकर आगू में पौलुस कर बिरोध में दोस लगाईन। 3ओमन फेसतुस जग बिनती कएर के, दया करे बर कहीन कि पौलुस ला यरूसलेम सहर में लाने कर उपाय करुवाए, काबरकि ओमन ओके ला डगर में मरुवाए देहे कर ताक में रहीन। 4फेसतुस हर जबाब देहीस, “पौलुस हर कैसरिया सहर कर पहरा में हवे अऊ मंए उहां खुद हालु जाहूं।” 5फेर कहीस, “तुमन कर अगुवा मन मोर संगे जाएं अऊ ए मईनसे हर कांही गलत काम करीस होही, त ओकर उपरे दोस लगाएं।”

6ओमन कर मझार में आठ-दस दिन रएह के, फेसतुस राएजपाल हर कैसरिया सहर में चएल देहीस अऊ दूसर दिन नियाओ कर सिहासन में बईठ के, पौलुस ला लाने बर अगियां देहीस। 7जब ओहर आईस, त जे यहूदी मन यरूसलेम ले आए रहीन, ओमन लिघे ठड़होए के ओकर उपरे ढेरेच दोस लगाईन, जेकर सबूत ओमन नई पूराए सकत रहीन। 8बकिन पौलुस हर जबाब देहीस, “मंए तो यहूदी मन कर कानहूंन, चाहे मंदिर चाहे कैसर महाराजा कर बिरोध में कोनो अपराध नई करे हों।” 9तब यहूदी मन ला खुस करे कर बिचार ले, फेसतुस हर पौलुस ला कहीस, “का तंए यरूसलेम जाए बर चाहत हस? ओजग मोर आगू में, तोर ए मुकदमा निपटाल जाही।”

10पौलुस हर कहीस, “मंए कैसर महाराजा कर नियाओ कर सिहासन कर आगू ठड़होए हों, मोर मुकदमा कर एही जग फईसला होए बर चाही। मंए यहूदी मन कर बिरोध में कांही गलती नई करे हों, जेला तंए बढ़िहां ले जानथस। 11अगर मंए दोसी हों अऊ मरुवाए देहे लाएक कर कांही काम करे हों, त मरे बर नई डराओं, बकिन जे गोएठ कर दोस मोर उपरे लगाथें, अगर ओमे ले कोनो गोएठ हर सही नई होईस, त कोनो मोके ओमन कर हाथ में सोंएप नई सकत हवे, मंए कैसर महाराजा जग बिनती करत हों।” 12तब फेसतुस हर, मंतरी मन कर सभा कर संगे गोठियाए के जबाब देहीस, “तंए कैसर महाराजा जग बिनती करे हस त, ओकरे जग जाबे।”

राजा अगरिपा कर आगू में पौलुस हर जाथे

13तनिक दिन कर पाछू, अगरिपा राजा अऊ ओकर बहिन बिरनीके, कैसरिया सहर में आए के फेसतुस जग भेंटाईन। 14ओमन ओजग ढेरे दिन रहे कर पाछू, फेसतुस हर पौलुस कर बारे में अगरिपा राजा ला बताईस, “एगोट कैदी हवे, जेके ला फेलिक्स राएजपाल हर छोंएड़ देहीस हवे। 15जब मंए यरूसलेम में रहें, त मुख याजक अऊ यहूदी कर अगुवा मन, ओकर बिरोध में दोस लगाईन अऊ चाहीन कि ओला दंड देहे कर अगियां देहल जाए। 16बकिन मंए ओमन ला जबाब देहें कि रोमी मन कर ए रिवाज ना लागे कि कोनो मईनसे ला दंड देहे बर सोंएप दें, जब ले ओके अपन उपरे दोस लगोईया मन कर आगू में ठड़होए के, अपन उपरे लगाल दोस कर बारे में, बयान देहे कर मोका नई मिल जाए। 17जब ओमन इहां जूटीन, त मंए तनिको अबेर नई करें, बकिन ओकर बिहान दिन नियाओ कर सिहासन में बईठ के, पौलुस ला लाने बर अगियां देहें। 18जब ओकर उपरे दोस लगोईया मन गोठियाए बर ठड़होईन, त ओमन अईसना कोनो दोस नई लगाईन, जेकस मंए समझत रहें। 19बकिन ओमन अपन धरम कर बारे अऊ ईसू नांव कर कोनो मईनसे कर बारे में बहस करत रहीन, जेहर मएर गईस अऊ पौलुस हर ओके जीयत बतात रहीस। 20मोर समझ में नई आवत रहीस, कि ए बात कर छान-बीन कईसे करों? एकरले मंए पूछें, ‘का तंए यरूसलेम जाबे कि ए बात मन कर फईसला होए सके?’ 21बकिन पौलुस हर अपन मुकदमा कर फईसला, कैसर महाराजा जग करे कर बिनती करीस, एकरले मंहूच अगियां देहें कि जब ले मंए ओके ला महाराजा कर आगू में नई ठड़हुवाहूं तब ले ओके ला पहरा में राखल जाए।” 22त राजा अगरिपा हर फेसतुस ला कहीस, “मंए खुद ए मईनसे कर बात ला सुने बर चाहथों।” फेर फेसतुस हर कहीस, “तंए काएल ओकर बात ला सुईन लेबे।”

23ओकर बिहान दिन जब अगरिपा अऊ बिरनीके ढेरे संपेर-पखेर के आईन अऊ सिपाही मन कर मुखिया अऊ सहर कर मुखिया मन कर संगे दरबार में पहुंचीन, त फेसतुस राएजपाल हर पौलुस ला लाने कर अगियां देहीस अऊ ओमन पौलुस ला ले आनीन। 24तेकर फेसतुस राएजपाल हर कहीस, “ए राजा अगरिपा अऊ हमर जग बईठल सजन-सीयान मन, तुमन ए मईनसे ला देखथा, जेकर बारे में सबेच यहूदी मन यरूसलेम में अऊ इहां कैसरिया में भी किरलाए-किरलाए के कहीन, कि एकर जीयत रहाई ठीक नईए। 25बकिन मंए ए जाएन लेहें कि एहर मरुवाए देहे कर लाएक कांही गलती नई करीसे अऊ जबकि ओहर महाराजा जग बिनती करे रहीस, एकरले मंए एला रोम देस में भेजे कर फईसला करें। 26मोके ला अईसन कांही बात हर नई सूझीस, कि मंए एकर बारे में अपन मालीक जग कांही लिख के भेजों, एकरले मंए ओके तोर आगू में अऊ खास कएर के, ए राजा अगरिपा तोर आगू में लाने हों कि जांचे कर पाछू मोके कांही लिखे बर मिले। 27काबरकि कोनो कैदी कर उपरे जे दोस लगावल हवे, ओला बिगर बताए, बड़खा राजा जग भेजे में मोके बेकार लागथे।”

Currently Selected:

परेरीत 25: SGJ

Highlight

Copy