परेरीत 12

पतरस चमत्कार कर द्वारा जेहल ले छुटथे

1ओही घरी में हेरोदेस राजा हर, कलीसिया कर तनिक मईनसे मन ला धएर के ले गईस अऊ सताए बर सुरू करीस। 2ओहर यूहन्ना कर भाई याकूब ला तलवाएर ले माएर दारीस। 3जे घनी ओहर देखीस कि यहूदी मईनसे मन ढेरेच खुस होवत हवें, त ओहर पतरस ला भी धरुवाए लेहीस; ओ दिन हर अखमीरी रोटी कर दिन रहीस। 4हेरोदेस राजा हर ओके ला धएर के जेहल में हुरेक देहीस, चाएर-चाएर झन सिपाही मन ला चारों पहर में राखीस, ए सोंएच के कि फसह तिहार कर पाछू, ओके ला मईनसे मन कर आगू में पूछ-ताछ करे बर लानबो। 5जेहल में पतरस हुरकल रहीस, बकिन कलीसिया कर मईनसे मन ओकर बर पूरा मन लगाए के, परमेस्वर जग पराथना करत रहीन।

6जे घनी हेरोदेस हर राजा, ओके मईनसे मन कर आगू में पूछ-ताछ करे बर लनोईया रहीस, ओकर आगू राती पतरस हर दुई ठन संखरी ले बांधल, दुई झन सिपाही मन कर मझारे सूतत रहीस; अऊ पहरादार मन जेहल कर देख-रेख करत रहीन। 7तब अचाकन परभू कर एगोट दूत हर आए ठड़होईस अऊ ओ बईंगरा में इंजोर चमकीस। ओहर पतरस कर पांजर में हाथ राएख के ओके जगाईस अऊ कहीस, “उठ, हालू उसराओ” अऊ ओकर हाथ ले संखरी हर खुईल के गिर गईस। 8तेकर सरगदूत हर ओकर जग कहीस, “कनिहां ला बांएध ले अऊ अपन पनही ला पहिर ले” पतरस हर ओही कस करीस। फेर सरगदूत हर ओकर जग कहीस, “अपन ओढ़ना ला पहिर के मोर पाछू होए ले।” 9पतरस हर निकेल के ओकर पाछू गईस, बकिन ए समेझ नई पाईस कि जे जाएत सरगदूत हर करत हवे, ओहर सहीच कर लागे, बलकि ओहर सोंचीस कि मंए दरसन देखत हों। 10तेकर ओमन पहिलो अऊ दूसर पहरादार जग ले निकेल के ओ लोहा कर दुरा जग पहुंचीन, जेहर सहर कती रहीस, ओ दुरा हर ओमन बर अपने-आप उघेर गईस, एकरले ओमन निकेल के एगोट गली ला पार करीन, त तुरतेंच सरगदूत हर, ओके छोंएड़ के चएल देहीस।

11तेकर पतरस हर होस में आए के कहीस, “अब मंए सचाई ला जाएन गए हों कि परभू हर अपन सरगदूत ला भेज के, मोके हेरोदेस कर हाथ ले बचाए लेहीस अऊ यहूदी मन मोर ऊपरे जेला करे बर सोंचे रहीन, ओहूच में ले मोके बचाईस।”

12जे घनी ओहर ए बात ला समेझ गईस, त ओहर यूहन्ना जेला मरकुस कहत रहीन, ओकर दाई, मरियम कर घरे गईस, उहां ढेरेच बगरा मईनसे मन जुईट के पराथना करत रहीन। 13जे घनी ओहर बाहरी दुरा कर केंवारी ला ठोंकत रहीस, त रुदे नांव कर एक झन दासी हर देखे बरीक आईस। 14पतरस कर गोएठ ला चिनके, ओहर ढेरेच खुसी कर मारे दुरा ला नई उघारीस, बकिन कुदत-कुदत भीतरी कती गईस अऊ बताईस कि पतरस हर दुरा में ठड़होईस हवे। 15ओमन ओकर जग कहीन, “तंए बऊराए गए हस का?” बकिन ओहर जोर देके गोठियाईस कि एहर सही हवे, त ओमन कहीन, “ओकर सरगदूत होही।” 16बकिन पतरस हर ठोंकते रहीस, तेकर ओमन केंवारी ला खोलीन अऊ ओके ला देख के अचमहों में पएर गईन। 17तेकर पतरस हर ओमन के देख के इसारा करीस कि कले-कस रहा, अऊ ओमन ला बताईस कि परभू ओके ला कोन कस ओ जेहल ले बाहरी निकाएल लानीस। फेर ओहर कहीस, “याकूब अऊ भाई मन ला ए गोएठ ला बताए देईहा” तेकर ओहर निकेल के दूसर जघा चएल देहीस।

18भिनसरहा सिपाही मन में ढेरे हलचल मएच गईस कि पतरस कर का होईस। 19जे घनी हेरोदेस राजा हर ओके खोजीस, त नई पाईस फेर पहरादार मन कर जांच कएर के, ओमन ला मरुवाए बर अगियां देहीस, तेकर पाछू हेरोदेस हर एहूदिया जिला ला छोंएड़ के, कैसरिया सहर में रहे लागीस।

हेरोदेस हर मएर जाथे

20हेरोदेस राजा हर सूर अऊ सएदा सहर कर मईनसे मन ले ढेरेच नराज रहीस, एकरले उहां कर मईनसे मन एक मन होए के, ओकर जग मिले बर गईन। राजा कर नोकर बलासतुस नांव कर मईनसे ला अपन कती मेराए के, ओमन हेरोदेस राजा जग सांती कर पराथना करीन, काबरकि राजा कर देस ले ओमन कर जीयन-खान चलत रहीस। 21ठहरावल दिन में हेरोदेस राजा हर, राजा कर ओढ़ना ला पहिर के राएज गदी में बईठीस अऊ ओमन जग गोठियाए लागीस। 22तेकर मईनसे मन किरलाए उठीन, “एहर तो मईनसे मन कर गोएठ नहीं बकिन कोनो देंवता कर गोएठ लागे।” 23ओहीच घनी परभू कर एगोट दूत हर, तुरतेंच ओके मारीस, काबरकि ओहर परमेस्वर कर महिमा नई करीस अऊ ओहर किरा पएर के मएर गईस। 24बकिन परमेस्वर कर बचन हर बढ़ते अऊ फइलते गईस। 25जे घनी बरनबास अऊ साऊल अपन सेवकाई ला पूरा कएर दारीन, त यूहन्ना जेला मरकुस कथें, ओकर संगे यरूसलेम ले फिरीन।

Currently Selected:

परेरीत 12: SGJ

Highlight

Copy