परेरीत 11

पतरस हर अपन दरसन ला फरी-फरी बताथे

1तेकर परेरीत मन अऊ भाई मन जेमन एहूदिया जिला में रहत रहीन, सुनीन कि गैर यहूदीयो मन परमेस्वर कर बचन ला माएन लेहीन हवें। 2बकिन जे घनी पतरस हर यरूसलेम सहर में आईस, तब यहूदी बिस्वासी मन ओकर जग बंहसा-बंहसी करे लागीन, 3“तंए काबर गैर यहूदी मन कर घरे जाए के खाए?”

4तब पतरस हर ओमन ला सुरू ले सबेच बात मन ला कएह सुनाईस, 5“मंए याफा में पराथना करत रहें, त मोके झपकी आए गईस, तब एगोट दरसन ला देखें कि एगोट बड़खा चदर सहींक, कांही जाएत हर चाएरो कोनहा ले गठीयावल, अगास ले उतेर के मोर जग आईस। 6जे घनी मंए ओला धियान से देखें त भुईं कर चाएर गोड़वा जानवर मन, जंगल कर जानवर, पेट कर बल रेंगोईया जीव अऊ अगास कर चराई मन ला देखें, 7अऊ एहूच गोएठ ला सुने, ‘ए पतरस! उठ, मार अऊ खा।’ 8बकिन मंए कहें, ‘नहीं परभू, नहीं, काबरकि कांही खराब, अऊ असुध चीज ला मंए कभों नई खाए हों।’ 9बकिन अगास ले दूसर दाएर गोएठ सुनाईस, ‘जे चीज ला परमेस्वर हर सुद्ध ठहराईस हवे, ओला तंए असुध झईन कह।’ 10तीन दाएर एही कस होईस, तेकर ओ सब जाएत ला फेर अगास में ऊठाए लेहीस। 11तेकर तुरतेंच तीन झन मईनसे, जेमन ला कैसरिया सहर ले मोर जग भेजल गए रहीस, जे घर में मंए रहें, ओ घर कर दुरा में आए के ठड़होए गईन। 12तेकर पबितर आत्मा हर मोके ओमन कर संगे, बिगर संका कर जाए बर कहीस। ए छव भाईयो मन मोर संगे होए लेहीन अऊ हमरे ओ मईनसे कर घरे गएन। 13त ओहर हमके ला बताईस कि एक झन सरगदूत ला अपन घरे ठड़होवल देखीस, जेहर ओकर जग कहे रहीस, ‘याफा में एक झन मईनसे ला भेज के समोन, जेला पतरस कथें बलूवाए ले। 14ओहर तुमन जग एकस गोएठ कही, जेकर चलते तंए अऊ तोर घर कर मईनसे मन उद्धार पाहीं।’ 15जे घनी मंए गोठियावत रहें, त पबितर आत्मा हर ओमन कर उपरे ओही कस उतरीस, जेकस सुरू में हमर उपरे उतरे रहीस। 16तब मोके परभू कर ए कहल बचन कर सुरता आईस, यूहन्ना हर तो पानी ले बतिस्मा देहे रहीस, बकिन तुमन पबितर आत्मा ले बतिस्मा पईहा। 17अगर परमेस्वर हर ओहू मन ला ओही दान देहीस, जेला हमके परभू ईसू मसीह में बिस्वास करे ले मिले रहीस, त मंए कोन होथों कि परमेस्वर ला रोएक सकों?” 18एला सुईन के ओमन कले-कस रहीन अऊ परमेस्वर कर बड़ाई कएर के कहत रहीन, “तब तो परमेस्वर हर गैर यहूदीयो मन ला पाप ले मन फिराए के, अमर जिनगी पाए कर दान देहीस हवे।”

अंताकिया कर कलीसिया

19इस्तिफनुस कर मरे कर पाछू जे सताव हर होवत रहीस, ओकर चलते तनिक बिस्वासी मन इते-ऊते होए गईन, त ओमन फिरत-फिरत फीनीके, साईपरस अऊ अंताकिया सहर में पहुंचीन, बकिन यहूदी मन कर छोंएड़ कोनो आने झेमन ला बचन नई सुनात रहीन। 20बकिन ओमन में ले तनिक झेमन साईपरस अऊ कुरेनी कर रहोईया रहीन। ओमन अंताकिया में आए के, यूनानियों मन ला परभू ईसू कर सुघर खभेर कर गोएठ मन ला सुनावत रहीन। 21परभू कर सामर्थ ओमन कर संगे रहीस, अऊ ढेरेच मईनसे मन बिस्वास कएर के, परभू कती फिरीन।

22जे घनी ओमन कर चरचा यरूसलेम कर कलीसिया में पहुंचीस, त ओमन बरनबास ला अंताकिया सहर में भेजीन। 23त ओहर उहां पहुंच के, परमेस्वर कर किरपा ला देख के, ढेरेच फुरमा होईस अऊ सबेच झन ला उत्साहित करत रहीस कि तन-मन लगाए के परभू में बने रहा। 24बरनबास हर एगोट बढ़िहां मईनसे रहीस, ओहर पबितर आत्मा अऊ बिस्वास ले भरल पूरल रहीस। फेर ढेरेच मईनसे मन परभू में आए मिलीन।

25तेकर बरनबास हर साऊल ला खोजे बर, तरसुस सहर में चएल देहीस। 26जे घनी ओकर जग भेंटाईस, त ओके ला अंताकिया सहर में लानीस, अऊ एकस होईस कि बरनबास अऊ साऊल एक बछर तक कलीसिया में मिलत रहीन अऊ ढेरेच मईनसे मन ला सीखावत रहीन। चेला मन सबले आगू अंताकिया सहर में “मसीही” कहाईन।

27ओही घनी तनिक अगमजानी मन, यरूसलेम ले अंताकिया आईन। 28ओमन में ले अगबुस नांव कर एक झे मईनसे हर, पबितर आत्मा कर अगुवाई ले ठड़होए के बताईस कि सबेच जघा में ढेरे अकाल परही। ओ अकाल हर महाराजा, कलोदियुस कर राएज कर समय में परीस। 29तेकर चेला मन बिचार करीन कि सब झे अपन-अपन अवसान कर अनुसार, एहूदिया में रहोईया भाई मन कर मदेत करे बर कांही भेजा। 30त ओमन एहीच कस करीन; बरनबास अऊ साऊल कर हाथ में अगुवा मन जग भेंट ला भेज देहीन।

Currently Selected:

परेरीत 11: SGJ

Highlight

Copy