Málikɔ 6
6
Ɓato á ka Najalɛ́ti ɓákámɓeeki Yéso
(Ɔna phɔtɔ Mat 13.53-58; Lók 4.16-30)
1Mbusa í, Yéso áotóka k'ɔ́ma ndɔ, áoga na Najalɛ́ti nji nde ɗámɔti kau, ɓagoigi nɛkɛ ɓáomɓea. 2Aɓi ye esa á saɓáto, Yéso áokpanga phɛá suɓi éndu nɛɓɔ á madondanɔ ka nyɔngɔ á Mokonga. Cɔ, ɓunde ɗáɓátú ɔɔ́ka ɓɔphɛi ndɔ ɗáɓáɓiki. Ɓáotangaaga, ɓáogea te: «Mogaa nde atóki na kema nde bui wani? Nkpa sina mmbé amophi kɔɓɔɔngɛ na ɓukpɛkpɛ á tɔtɔkisa ketangaɔ ɓínde? 3Nna phɔ́ nto á ɓɔi á mɔphɛkɔ aámbé? Muna Malía#Ɔna Yoá 6.42, muna-amakɛ na Yakɔ́ɓɔ, Yɔ́sɛ, Yúda na Simɔ́ni? Cɔ, ɓáwákɛ ɓáná ka ɔlɔ asu?» Kaɓondɔ unge, ɗáɓákámɓeeki.
4Mpɔ, Yéso áǒgea te: «Mɔtu-nyɔngɔ ndea Mokonga ana ɓokutú ɔma bui, nna gǎkɛ ně ka nji nɛkɛ á ɓɔkɔtɛana, ka ɓato á k'ékita nɛkɛ na ka ɓato á k'ékombo nɛkɛ#Ɔna Lók 4.24; Yoá 4.44.» 5Wa, Yéso ɗákátɔki ye tɔtɔkisa ka ketangaɔ, tɔndɔ nndɔ á bisa á njaga akɛ gǔ á ɓasambi ɗanga-ɗanga ka amisa á ka ɓɔ. 6Â phɔtɔ kotangaaga ka nyɔngɔ á ɓakpa ndɔ ɓána kángá ɓeekea.
Yéso aéteki ɓateki nɛkɛ
(Ɔna phɔtɔ Mat 10.5-15; Lók 9.1-6)
Mbusa, Yéso áotimba nji bui nde a bîbíbí á Najalɛ́ti n'aǒgoisaga ɓakpa. 7Áɔ̌ɓɔphana ɓateki nɛkɛ nkama na ɓaɓɛ (12), áǒteka ɓaɓɛ-ɓaɓɛ, áǒɓopha kɔkɔta gǔ á ɓansombo. 8Áǒsosea gea te, ɓákabɛɗɛmbɛ ka kema ka tamba. Ɓábɛɗɛ ndiu tɔ motumbɔ. Ɓákabɛɗɛmbɛ mokati, maiɓɔta na imɔna suɓi á njombi nɛɓɔ. 9Ɓáɔ́lɛ ɓiato. Ɓákaɔ́lɛmbɛ gǎkɛ ngɔ́mbɛ á k'égogo iɓɛ. 10Yéso â goto ǒngoɗea te: «Aoɓá na ɓokiɗi ɔma moci, ikani suɓi éndu nde ɓánosesi kau na ka ɓî ɓɔmɛande.
11A gǎkɛ oɓá na ɓákánosesi ka nji moci na ɓákáɔnɔ́ɔ́ka, tókani ɓei, ciciagani mpusu á oɗo bui nde a k'écinji anu#Ɔna Eku 13.51 ka ubisa aɓɔ gea te nyɔngɔ ěguiaeka.» 12Mbusa í, ɓateki ɓáoga, ɓáɔ̌tɔmia ɓakpa te: «Kětiani tambea anu ájeɗe.» 13Ɓáǒɓeaga ɓansombo ɓásii suɓi á ɓakpa, ɓáǒsia ɓato á kukuwa ɓásii gamba, ɓáoama#Ɔna Yak 5.14.
Kukuwa á Yoáni-Mɓatisi
(Ɔna phɔtɔ Mat 14.1-12; Lók 9.7-9)
14Ka mbenɔ ndɔ, moamɛ Ɛlɔ́dɛ#6.14 Wani ande Ɛlɔ́dɛ Antipási mmbé ɗátú moamɛ ka Galiláya. ɗáɔ́ki na ɓáɔyɔngaga ka phɔa Yéso nga, ina akɛ ɗáúbikani ɔma bui. Ɓakpa moci-moci ɓáɔyɔnga gea: «Yoáni-Mɓatisi ajujúki ka kukuwa. Kaɓondɔ unge, ana ɓukpɛkpɛ á tɔtɔkisa á ketangaɔ.» 15Ɓuangbo ɓáogea te: «Ande Elía.» Ɓunɛngbo goto te: «A ɓea ká ɓaɔtu-nyɔngɔ ndea Mokonga á kala.» 16Ɛlɔ́dɛ, ɓî aɔ́ki ye na ɓáɔyɔnga nyɔngɔ á Yéso, áogea te: «Ai! Ande Yoáni-Mɓatisi! Mmbɔ netenisima mɔ̌ akɛ aámbɔ ajujúki ka kukuwa!»
17Nga, Ɛlɔ́dɛ aámbé ɗáeteki ɓakpa ɓándungɛ Yoáni. Áongisisa suɓi á mekakɔ na ɓámɓóege. Ɛlɔ́dɛ ɗági ɓo ka nyɔngɔ á nkakɛ Ɛlɔdía, mmbé muna-amakɛ Philípɔ ɗámuki phɔ́ mosá. Mbusa í, Ɛlɔ́dɛ â goto omuka. 18Yoáni ɗángoɗi Ɛlɔ́dɛ te: «Kákeni ómukɛ nka muna-amakɔ#Ɔna Ɓlw 18.16; 20.21.» 19Ɛlɔdía áoɓá na ngíní ka phɔa Yoáni, áokaɓa kusisa akɛ. Ɗákátɔki gǎkɛ. 20Nga, Ɛlɔ́dɛ ɗáomɓánga Yoáni. Ɗáúbi gea te, Yoáni ande nto á koɗoni na nto á kanga ɓojeɗe. Kaɓondɔ, áonamba. Mbenɔ nde ɗáɔ́ki, áotangaaga ka ɓoabi ndea Yoáni nanga ɓî ɗáokonda ɔ́ka á yɔnga akɛ phɛɛ.
21Cɔ, esa moci, Ɛlɔdía áɔtɔa mbenɔ ánjá ámoa Yoáni. Ɗátú ka jaí á kanisia esa á ɓɔkɔtɛana á Ɛlɔ́dɛ, ɓî ɗáɔɓɔngisia eea ka ɓakɔta á emani ndea Ɛlɔ́dɛ na ɓakɔta á koɓoamɛ nɛkɛ na ɓakɔta á Galiláya, ɓáokiɗia ka jaí kau. 22Wa, nseka ndea Ɛlɔdía áongia ka maseye, áoɓina mosá á ɓakpa ɓɔbu. Mɓina kau áɔmɓɔngɛa Ɛlɔ́dɛ na ɓakpa nde ɗátú na ɓɔ ka maseye. Mpɔ, Moamɛ Ɛlɔ́dɛ áongoɗea nseka ndɔ te: «Ɔ́mɔmɛma kema nde okondi, nekophande.» 23Ɛlɔ́dɛ â phɔtɔ kɔɔpha gea: «Kema bui nde ɔmɔmɛmande, nanga áɓá gbútuka á koɓoamɛ nɛmɔ, nekophande.» 24Mpɔ, nseka ndɔ, áojuana, áongoɗea amakɛ te: «Kema sina nde okondi nɛ́mɛmɛ?» Amakɛ áonsikisia te: «Mɛma tɔ mɔ̌ á Yoáni-Mɓatisi.»
25Nseka ndɔ áokamisaga sikianaga kuɓî Ɛlɔ́dɛ aɔ. Aɔmɛma gea: «Nekondi kɛ̌kɛnde, ómopɛ mɔ̌ á Yoáni-Mɓatisi k'ɔphɛphɛ nde kádǔmani.» 26Ɛlɔ́dɛ áoɓá na ngomi phɛɛ. Nanga ɓó, ka nyɔngɔ á ɔphá nde ɗáɔphí mosá á ɓato á jaí, moamɛ ɗákákondi ye kpɛma na mɔ̌ á Yoáni. 27Kɛ̌kɛndɔ tɔ áonteka nto émani moci ka ɓunde ɗáɓáonamba. Áonsosea gea te, ábikɛ na mɔ̌ á Yoáni-Mɓatisi. Nto émani ndɔ áoga, áotena mɔ̌ akɛ ka mekakɔ, 28áobika na mɔ̌ ndɔ k'ɔphɛphɛ nde kádǔmani, áomopha nseka. Mpɔ nsɛka ndɔ áoga omopha amakɛ. 29Ɓî ɓagoigi ndea Yoáni ɓáɔ́ki ye nyɔngɔ ndɔ, ɓáobika ɔbɛɗa mǒnda akɛ. Ɓáoga oúmba ú.
Yéso aǒisa ɓǒko ɛlɛphu ɓɔku (5.000)
(Ɔna phɔtɔ Mat 14.13-21; Lók 9.10-17; Yoá 6.1-14)
30Mbusa í, ɓateki ndea Yéso ɓáosikianaga, ɓáodondanaga ka mpɛphɛ akɛ. Ɓáɔntɔmiaga ekuma bui nde ɗáɓági n'índe á phɛá á ɓakpa. 31Mpɔ, Yéso áǒngoɗea te: «Bikani sasanu, ɓéikɛ ka mpɛphɛ, ka nkanda ɓóumbiɛ ábɔa.» Nga, ɓakpa ɓásii ɗáɓáokiɗia, na ɓunɛngbo ɓáoga. Yéso na ɓagoigi nɛkɛ, ɓákaɓɛ ye na mbenɔ á eaga. 32Kaɓondɔ, ɓáokambea ka koko, ɓáoga sasaɓɔ ka nkanda. 33Ɓî ɓakpa ɓásii ɓáɔni ye gǎkɛ Yéso na ɓagoigi na ɓásɛi, ɓáoúba ɔma nde ɓáge. Ɓáǒɓea na ɓáɔnyɛ́nya n'ecinji kubi. Ɓáǒtenisia mbangɔ, ɓáokiɗia mosá. Ɗáɓátóki ka ntanga-nji bui. 34Ɓî Yéso aki ye ka koko, áɔɔna usɛsɛ ángbó á ɓakpa, áǒkuia ngomi nga, ɗáɓátú ɓea ɓamɔgɔgɔ kángá á mɓondigi. Kaɓondɔ, áokpanga goisaga aɓɔ kema ásii.
35Ɓî esa ɗágɔgɔmani, ɓagoigi nɛkɛ ɓáondonda, ɓáongea te: «Ɓe wani ka nkanda. Esa agɔgɔmani. 36Cɔ, ójisa ɓakpa nde ka gea, ɓágasombɛ ka ɓɔ eea ka motumbe na ka nji nde a bîbíbí.» 37Yéso â gǎkɛ ǒsikisia te: «Ɓenu sasanu, óɓophani eea!» Ɓagoigi ɓáonsikisia: «Okondi gea, ɓetógɛ sombɛ mokati á imɔna#6.37 Ka matú ndɔ, imɔna moci ɗátú ophendɔ á ekuma á mbɛɗanigi moci k'ésa moci. Ɔna Mat 20.2 mia iɓɛ (200) na ɓéɓophɛ ɓɔ ɓáeɛ?» 38Yéso â gǎkɛ ǒɓúsia te: «Ɓona mokati ángaáni? Gǎni ɓɔ́ɔnjiɛ.» Ɓáoga oúsianaga. Ɓáúbi ye, ɓáogea: «Ɓena mokati ɓɔku na ɓasú ɓaɓɛ.»
39Mpɔ, Yéso áǒsosea te, ɓáéikisɛ ɓakpa ɓɔbu k'étúnda-etúnda k'ɔ́ma nde ana manganga. 40Ɓáoika k'étunda-etúnda. Etúnda moci áoɓá na ɓakpa mia moci (100), etúnda nɛngbo áoɓá na ɓakpa nkama ɓɔku (50). 41Yéso áɔbɛɗa mokati ɓɔku na ɓasú ɓaɓɛ, áoenga na koba, áonsega Mokonga k'ɛ́mɛmi. Áoɓunaga mokati ndɔ, áǒɓopha ɓagoigi ka gea, ɓágabɛ ka ɓakpa. Yéso â phɔtɔ ǒngoɗea ɓagoigi nɛkɛ ɓégabeɛ ɓakpa ɓɔbu ɓasú ndɔɔ. 42Ɓɔbu ɓáoeaga, ɓáokúta. 43Ɓagoigi ɓáodondanisaga due á mokati na ɓasú. Due ndɔ ɗátúmi jɔ nkama na iɓɛ (12)#Ɔna 2 Ɓam 4.42-44. 44Sɔsɔɓɛ á ɓakpa nde ɗáɓáí mokati ndɔ, ɓǒko ɗáɓátú ɛlɛphu ɓɔku (5.000).
Yéso aotamba gǔ á etǔ
(Ɔna phɔtɔ Mat 14.22-33; Yoá 6.15-21)
45Kɛ̌kɛndɔ tɔ, Yéso áǒsosea ɓagoigi nɛkɛ ɓákambeɛ ka koko, ɓágɛ mosá. Ɓájabɛ na Bɛtɛsaída. Yɛ, áojiga mbusa ka ɔkɔana na ɓakpa. 46Mbusa á ɔkɔana na ɓɔ, áoɓamba mamba k'aphe á mɛma á Mokonga. 47Aɓi ye ɔgɔgɔ, koko áoɓá ka měme étǔ Yéso sasakɛ n'a phɔ́tɔ kubi. 48Ɗáɔni gea, ɓagoigi nɛkɛ ɓáotambaga phɛɛ ka nyɔngɔ nde maiphianɔ ɗátú ǒjisa mbusa. Ka ɔsa á kɔkɔ, Yéso áǒbîmisia n'aotamba gǔ á etǔ, áokonda phaoa aɓɔ. 49Ɓî ɓagoigi ɓámɔni Yéso n'aotamba gǔ á etǔ, ɓáoúba te ande oketi. Ɓáokoga 50nga, ɓɔbu ɗáɓámɔni, ɓáoɓá na kɔɓɔɓɔkɔ phɛɛ. Kɛ̌kɛndɔ tɔ, Yéso áɔyɔnga na ɓɔ áǒgea te: «Bisani měma anu! Eme aámbɔ, ɓókoɓangɛmbɛ!»
51Mpɔ áokambea ka koko ndea ɓagoigi, maiphianɔ áɔphɔnga. Ɓagoigi ɓâ gǎkɛ oyayama phɛɛ. 52Nga, ɗáɓákáengekisi kantíti á ketangaɔ á ɓikisa á mokati, ka nyɔngɔ nde měma aɓɔ ɗátú akpɛ.
Yéso aéamisi ɓato á esambɔ na Gɛnɛsalɛ́ti
(Ɔna phɔtɔ Mat 14.34-36)
53Cɔ, Yéso na ɓagoigi ɓájabi ye, ɓáodunduisa koko ɓî ɓákiɗi ka Gɛnɛsalɛ́ti. 54Ka juana aɓɔ suɓi á koko, kɛ̌kɛndɔ tɔ ɓakpa ɓáonengekisa Yéso. 55Wa, ɓáophanjekana mbangɔ ka nji bui ka tɔ̌mia á nyɔngɔ á kiɗia á Yéso. Mpɔ ɓáokpanga kumba á ɓasambi k'éka, ka gǎ na ɓɔ kuɓî ɓáɔ́ki gea Yéso aɔ. 56Cɔ, ɔma bui nde Yéso ɗátúongia, kaɓɛ ntanga-nji, nji, na motumbe, ɓáǒbisa ɓato á esambɔ ka ntanga. Ɓáonɗengemisaga Yéso gea, ambe ɓakpa ɓátódungɛ phɔ́ ɛɔkɔ á bɔngɔ nɛkɛ. Ɓakpa ɓɔbu ɓunde ɗáɓátúodunga, ɓáoama.
Currently Selected:
Málikɔ 6: KMW
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
