Mateo 9

Uni ñucë niruquinbi tancëma Jesusan pëxcüa

(Mr 2.1-12; Lc 5.17-26)

1A menuaxbi nuntin cuantëcëntancëx ca Jesús aín ëmanu bëbacëxa. 2Bëbacëbëa ꞌitsa uni timë́cëbëtan ca raírinën uni achúshi ñucë nirucuaínquinbi tancëma bacë́tinu racánxun bëacëxa. Bëquin ca —Jesusan ca ënë uni pëxcuti ꞌicë —quixun aín nuitu mëu sináncëxa. Sinania atun sinan ꞌunánquin ca Jesusan ñucë uni cacëxa:

—Chuámashi ca ꞌit. Min ꞌuchacama ca tërë́ncë ꞌicën.

3Usaquian caia cuaquin ca anu ꞌicë an Moisésnën cuënëo bana ꞌunáncë uni raírinën sináncëxa: Ënë unix ca anúan Nucën Papa Diosaxëshi quiti banan banaia. Ax ca ꞌaisama ꞌicën. Nucën Papa Diosan cuni ca ꞌucha tërë́nti ꞌicën. 4Usaquin sinania ꞌunánquin ca Jesusan cacëxa:

—¿Uisacasquin caramina mitsun usaquin sinanin? 5ꞌËn cana uni “Min ꞌuchacama ca tërë́ncë ꞌicë” quixun cananbi “Niruquiani ca cuantan” quixunribi cati ꞌain. 6Nucën Papa Diosan cushínbi ꞌën ënë uni pëxcuia isquin camina asérabi ꞌunánti ꞌain, uni ꞌinux Nucën Papa Diosnuax uá ꞌën cana unin ꞌucharibi tërë́nti ꞌai quixun.

Caquin ca Jesusan racábucë uni cacëxa:

—Niruquiani ca min bacë́ti bibiani min xubunu cuantan.

7Cacëxëshi ca niruquiani aín xubunu cuancëxa. 8Usai niruquiani cuania isi ca anu ꞌicë unicama racuë́acëxa. Racuë́quin ca —Nucën Papa Diosan aín cushi ꞌináncëxun ca ënë unin ñucë uni pëxcüanan aín ꞌuchacama tërë́anxa —quixun sinánquin Nucën Papa Dios rabiacëxa.

Jesusan Mateo aín uni ꞌinun ca [Ënëx ca an ënë quirica cuënëo Mateo, abi ꞌicën.]

(Mr 2.13-17; Lc 5.27-32)

9Usobiani cuantëcënquinbi ca Jesusan Mateo cacë uni anuxuan ꞌapu buánmiti curíqui bicë anua tsócë mëracëxa. Mëraquin ca cacëxa:

—ꞌËn mi ꞌunánminun ca ꞌëbë cuani ut.

Jesusan cacëxëshi ca Mateo niruquiani ami sinani abë cuancëxa. 10Cuanquin ca Jesúscëñun aín ꞌunánmicë unicama aín xubunuxun pi cuanun Mateonën buáncëxa. Buáncëbë atúxribi atubë cuanx ca an ꞌapu buánmiti curíqui bicë unicama ꞌimainun an fariseocaman bana tancëma uni raírinëxribi atubëtan pi bucüacëxa. 11Jesúsbëtan a unicaman piia isquin ca aín ꞌunánmicë unicama fariseo unicaman ñucáquin cacëxa:

—¿Uisa cupí cara an mitsu ꞌunánmicë unin an ꞌapu buánmiti curíqui bicë unicamabëtan pianan ꞌuchañu unicamabëtan pin?

12Usai quia cuaquin ca Jesusan cacëxa:

—Paë tancëma uni, ax ca rucuturúan a ronti cuëënima. Paë tancë uni, ax cuni ca rucuturúan a ronti cuëënia. 13Usaribiti cana ꞌën an —ꞌëx cana asábi ꞌai —quixun sináncë unicama a ꞌëmia catamënun cai uáma ꞌain. Ama, an —ꞌën nuitu ꞌaisama ꞌaish cana ꞌëxbi upí ꞌitima ꞌai —quixun sináncë unicama a cuni upí ꞌinúxa ꞌëmi catamënun cai cana ꞌëx uacën. Usa cana ꞌëx ꞌai quixun sinánquin camina ꞌunánti ꞌain, uisai quicë cara Nucën Papa Diosan bana ënëx ꞌicë quixun: “Unían ꞌë rabianan aín ꞌucha tërë́ncë ꞌinuxun ꞌaracacë ñuina rëxun xaroia isi cuëëncësamaira oi cana atun uni itsi nuibaquin ꞌaquinsa ꞌicë ꞌaquinia isi cuëënin”.

Pima samáti ñuiquin ñucácëxun Jesusan uni ca

(Mr 2.18-22; Lc 5.33-39)

14Usa ꞌain ca Juan, an uni nashimicë, aín ꞌunánmicë unicaman anu cuanxun Jesús cacëxa:

—Nux cananuna Nucën Papa Dios sinani bëtsi bëtsi nëtën pima samatin. Fariseo unibunëxribi ca usaribiti pima samatia. ¿Usa ꞌaínbi cara uisacasquin min ꞌunánmicë unicaman samáquinma pin?

15Cacëxun ca Jesusan cacëxa:

—¿An biti xanua unin bicëma pan ꞌain cara axa abë nuibanancë unicama ax a unibë ꞌaish masá nuituti ꞌic? Ca masá nuitutima ꞌicën. Ca ësa ꞌicën: An xanu biti unin xanu biquin abëtan pi unun camicëx ca axa abë nuibanancë unicama masá nuitutima abë cuëënia. Xanu bibiani cuanquian a unin ëbiancëxun cuni ca axa abë nuibanancë unicaman masá nuituquin pima. Usaribiquin ca ꞌën ꞌunánmicë unicama ꞌëbë ꞌixun masá nuituti samáquinma piia. Unían ꞌë bicëxun ꞌën ëbiancëxun cuni ca masá nuituquin pitima ꞌicën.

16Catancëxun ca aín banaxa fariseo unicaman uni ꞌunánmicë banasama ꞌain, aín banabë fariseonëan ꞌunánmicë bana mëscúti rabanan Jesusan ësaquinribi a unicama cacëxa:

—Ca ësaribi ꞌicën. Nun aintsi uinu ꞌicë xanúnbi ca chupa xëni, chupa sani iotan aín tuquicë a ꞌunuima. Usocëxbi ca chupa xëni ax chëqui anun ꞌunucë ió ax nipacëtia. Usai ꞌi ca aín tuquicë ax chaia. 17Ësaribi ca: Ui unínbi ca ñuina xacá anu ꞌumpax ꞌaruti chumusa oquin ꞌacë, axa xëni ꞌain, anu ñu chëcacë ꞌaruima. Anu ꞌarucëxunbi ca ñu chëcacë ax cubini uruquin ñuina xacá xëni a tucaia. Axa tuquicëbë ca chëcaxun anu ꞌarucëxa cubíncë ñu ax tutuqui nëtëtia. Usa ꞌain ca ñu chëcacë, ñuina xacá chumusa oquin ácë iónushi ꞌaruti ꞌicën, asábi ꞌinun.

Xanu ꞌinsíncë pëxcüanan Jesusan Jaironën bëchicë bamacëbi baísquimia

(Mr 5.21-43; Lc 8.40-56)

18Juanën ꞌunánmicë unibubëa Jesús banacëbëbi ca anua judíos unicama timë́cë xubunu ꞌicë ꞌapu, Jairo cacë, ax uacëxa. Uquin ca aín bëmánon rantin purúnquin Jesús cacëxa:

—ꞌËn ini bëchicë ca bërí bamaxa. Bamacëbi camina mix ꞌëbë cuanxun a ramëti ꞌain. Min ramëcëxëshi ca asábi ꞌinux baísquiti ꞌicën.

19Cacëx niruia abë cuancëbë ca aín ꞌunánmicë unicamaxribi Jesúsbë cuancëxa.

20-21Cuaniabi ca xanu achúshi ñucë, ax mëcën rabë́ ꞌimainun rabë́ baritia imia ꞌaíshbi aín imi nëtë́cëma, an —aín chupa ticaishi cana pëxcúti ꞌai —quixun sinánquin, a caxu cuanquin Jesusan chupa cuëbí ticacëxa. 22Ticaia tani niracëti cuainacëquin ca Jesusan a xanu mëraquin cacëxa:

—Camina chuámarua ꞌiti ꞌain. ꞌËn cana mi pëxcuti ꞌai quixun asérabi sinani camina pëxcúan.

Cacëxëshi ca pëxcúacëxa.

23Usobiani cuanx ca anua judíos unicama timë́ti xubunu ꞌicë ꞌapu, Jairo, aín xubunu bëbacëxa. Bëbaquin ca Jesusan, xanu ñucë a maíncëbëtan an ꞌati unicaman pacun bana otishi ꞌixun caínmainun ꞌaisamaira uni rarumati sharatia cuaquin isacëxa. 24Usaria isquin ca Jesusan cacëxa:

—Ënuax ca chiquít. A xu xanu ca bamacëma ꞌicën. Ca ꞌuxaxa.

Ësaquian cacëxunbi ca ꞌusáncancëxa. 25ꞌUsáncëxunbi anu ꞌicë unicama xubu ëman xutancëx ca Jesús anua xu xanu ꞌicë anu atsínxun aín mëcën biacëxa. Bicë́xëshi ca tsoruacëxa. 26Usa ꞌain ca Jesusan usaquin ñu ꞌaia anu ꞌicë unicaman chanioia a menu ꞌicë unicaman cuacëxa.

Bëxuñu uni rabë́a Jesusan bëpë́xcüa

27Usobiani anuax cuaniabi ca uni bëxuñu rabëtan Jesús caticabianquin munuma cuëncë́onquin cacëxa:

—Davitan rëbúnqui, nu nuibaquin ca nu pëxcut.

28Cacë́xa xubunu atsíncëbë ca a bëxuñu uni rabëtaxribi ꞌatsínquiani Jesús rapasu cuancëxa. Cuania ca Jesusan cacëxa:

—¿Mitsun caramina sinanin, ꞌën cana mitsu pëxcuti ꞌai quixun?

Cacëxun ca a unin cacëxa:

—Camina nu ꞌati ꞌain.

29Cacëxun ca Jesusan aín bëru mëëquin cacëxa:

—Mitsúnmi ꞌën cana mitsu bëmënioti ꞌai quixun sináncësabi oquin cana mitsu ꞌati ꞌain.

30Usaquian cacëx ca bënëtishi bëmëniocacëxa. Bëmëniocatia ca Jesusan cacëxa:

—Unían ꞌën mi ësoquin ꞌacë ënë ꞌunánxunma ꞌanun camina ui unibi ñuixuntima ꞌain.

31Usaquian Jesusan cacëxunbi ca a uni rabëtan cuanquin a nëtënu ꞌicë unicama chaniocëxa.

Banañuma unia Jesusan banamia

32Bëxuñu ꞌicëa pëxcucë uni rabëtaxa cuancëbëtan ca uni raírinën achúshi uni ñunshin ꞌatimanëan banañuma ꞌimicë a Jesúsnu bëacëxa. 33Bëia ca Jesusan a uninua ñunshin ꞌatima chiquíancëxa. Chiquíncëbë ca a uni banañuma ꞌiá ꞌaíshbi banacëxa. Usaria isi ca anu ꞌicë unicamax ratuti quiacëxa:

—Nun nëtë Israel anuxunbi ca uínbi ësa ñu isáma ꞌicën.

34Quia unicama ratúmainun ca fariseo unibunëx quiacëxa:

—Ñunshin ꞌatimanën ꞌapun cushínshi ca ënë unin ñunshin ꞌatima chiquinia.

Jesús uni bana ñuixuni bëtsi bëtsi ëmanu caun

35Usotancëxun ca ëma chacamanu ꞌimainun ëma chucúmaracamanuribi cuanquin anua judíos unicama timë́ti xubucamanu atsínquin anu timëtia Jesusan bana ñuixuancëxa. Bana ñuixunquin ca —ꞌëmi catamëcë unicama ca Nucën Papa Diosan ainan ꞌimiti ꞌicë —quixun caquin upí bana unicama ñuixuancëxa. Ñuixuanan ca uni ñucëcamaribi pëxcuquin an paëocëcama tërë́caxuancëxa. 36Uinu cara Jesús ꞌicë anubi ca ꞌaisamaira uni ꞌiacëxa. Usai ꞌia an atu Nucën Papa Dios ñuiquin ꞌunánmianan ami sinánun ꞌaquinti ꞌaíma ꞌain ca axa piánancë ñuinacan ubíocëxa ꞌaracacë ñuina, an a bërúanti aín ꞌibu ꞌaíma ꞌain, bënëti sináncasmai ꞌicësaribiti ꞌiacëxa. Usaia ꞌia atu isquin ca Jesusan a unicama nuibacëxa. 37Nuibaquin atu ꞌaquinsa tanquin ca Jesusan aín ꞌunánmicë unicama cacëxa:

—ꞌAisamaira uníxa ëmi sinánti ꞌaínbi ca an atu ꞌëmi sinánun ꞌaquinti uni ꞌitsamashi ꞌicën. Usa ꞌaish ca naënua ꞌaisamaira ñu bimi ꞌaínbia an biti uni ꞌitsamashi, usaribi ꞌicën. 38Usa ꞌain camina Nucën Papa Dios, axa ꞌëmi sináncë unicaman ꞌibu, a ñucáti ꞌain, an uni ꞌëmi sinánun ꞌaquinti unia ꞌitsa xunun, bimi ꞌibu unían an bimi biti uni xucësaribi oquin.

Currently Selected:

Mateo 9: cbrPB

Highlight

Copy