Mateo 10

Aín ꞌunánmicë unicama ꞌiminuxun Jesusan mëcën rabë́ ꞌimainun rabë́ uni caísa

(Mr 3.13-19; Lc 6.12-16)

1Usa ꞌain ca Jeusasan aín ꞌunánmicë uni mëcën rabë́ ꞌimainun rabë́ a timëxun cacëxa:

—ꞌËn cushi cana mitsu ꞌinanin. Anun camina ñunshin ꞌatima uninua chiquíanan uni ꞌinsíncëcamaribi pëxcuti ꞌain.

2A usaquin cacë unicamax ca ꞌiacëxa Simón ꞌicëbi Pedroribi cacë, ꞌimainun aín xucën Andrés. ꞌImainun ca Zebedeonën bëchicë Jacobo cacë a ꞌimainun aín xucën Juan ꞌiacëxa. 3Raírinëx ca Felipe cacë ꞌimainun Bartolomé cacë ꞌimainun Tomás ꞌimainun Mateo, an ꞌapu buánmiti curíqui bicë, acama ꞌiacëxa. ꞌImainun ca Jacobo, Alfeonën bëchicë, a ꞌimainun Lebeo ꞌicëbi Tadeoribi cacë a ꞌiacëxa. 4ꞌImainunribi ca Simón axa judíos unibun rabanan nëëti banacë, a ꞌimainun Judas Iscariote, an Jesús uni ꞌinan, a ꞌiacëxa.

Unicama bana ñuixunun Jesusan aín ꞌunánmicë unicama xua

(Mr 6.7-13; Lc 9.1-6; 10.3-11)

5Aín ꞌunánmicë unicama caístancëxun ca unicama bana ñuixuntanun xunuxun Jesusan ësaquin cacëxa:

—Camina anu judíosma unibu ꞌicë nëtënu cuantima ꞌain. Samaria nëtënu ꞌicë ëmacamanuribi camina cuantima ꞌain. 6Israel unicama axa ꞌëmi sinánti ꞌaíshbi ꞌëmi sináncëma acama ꞌëmi sinánun ꞌaquini camina cuanti ꞌain. Atux ca ꞌëmi catamëcëma ꞌaish ꞌibuñuma carnerosa ꞌicën. 7Cuanquin camina —anúan Nucën Papa Diosan mitsu ainan ꞌimiti nëtë ca ꞌurama ꞌicë —quixun caquin bana ñuixunti ꞌain. 8Ñuixuanan camina ꞌinsíncë unicama pëxcüanan uni bamacë baísquimianan an aín nami chëquímicë ꞌinsínñu uni asábi ꞌitëcënun pëxcüanan uninua ñunshin ꞌatima chiquínti ꞌain. ꞌËn cana anúnmi uni ꞌaquinun cushi ꞌinánquin mitsu cupíomicëma ꞌain. Usa ꞌain camina mitsúnmi ꞌaquincë uni cupí ñucátima ꞌain.

9Curíqui camina buántima ꞌain. 10Camina burasa ió anun min ñu buánti bitima ꞌain. Camina rabë́ tari ꞌimainun bëtsi taxaca ꞌimainun min tsati buántima ꞌain. An unicama ꞌaquincë uni a ca a ꞌaquincë unin aín piti ꞌimainun aín cuëëncë ñu ꞌinánti ꞌicën. Usa ꞌain camina ñu buanima usashi cuanti ꞌain.

11Cuanx ëmanu bëbaquin camina isti ꞌain, ui unin cara upí oquin min bana ñuixuncëxun cuaisa tania. A unin xubunushi camina ñantan ñantan ꞌuxti ꞌain, anúnmi a ëmanuax cuanti nëtëa utámainun. 12Anu ꞌiti xubunu atsíntancëx camina —chuámashi ca ꞌican —cai anu ꞌicë unicamabë nuibananti ꞌain. 13Usaími ꞌicëbë ca a xubunu ꞌicë unicama mitsubë upí ꞌixun min bana cuati mitsúxmi anu ꞌicë cupí cuëëni chuámashi ꞌiti ꞌicën. ꞌAínbi ca mitsubë upí ꞌiisama tanquin an mitsun bana cuaisama tancë unicamax usai ꞌitima ꞌicën. 14Uinu ꞌicë ëmanu ꞌicë unicaman cara, uinu ꞌicë xubunu ꞌicë unicaman cara mitsu biisama tanan mitsun bana cuaisama tania, anuax cuani camina anu ꞌicë unicaman, mitsun bana cuatíma ca Nucën Papa Diosan iscëx ꞌaisama ꞌicë quixun ꞌunánun, mitsun taxacanu ꞌicë me cupúcë tacabiani bëtsi ëmanu cuanti ꞌain. 15Asérabi cana ꞌën mitsu cain, Sodoma ëmanu ꞌicë unicama ꞌimainun Gomorra ëmanu ꞌicë unicama ca aín bana cuaisama tancë cupí Nucën Papa Diosan castícancëxa. Usamaira oquin castícancë ca an a ëmanu ꞌicë unicama mitsu bicëma cupí ax ꞌiti ꞌicën.

Mitsumi ca uni nishti ꞌicë quixun Jesusan aín ꞌunánmicë unicama ca

16ꞌËn cana carnero ꞌinúan nëëcë nëbë́tsinu ꞌicësaribi ꞌinun mitsu xutin. Nëëquin ca ꞌinúanën carnero binuxun bëarati ꞌicën. Usaribi oquin ca axa mitsumi nishcë unin mitsu ꞌatimocatsi quixun sinánti ꞌicën. Usaquian sináncëbë camina bërúancati ꞌain, runu ꞌicësaribiti. Bërúancanan camina axa mitsumi nishcë uni ami nishi abë ꞌatimonantima ꞌain, numacuru ꞌicësaribiti. 17Axa mitsumi nishcë unicaman ca judíos unibunën ꞌapucamanu mitsua ꞌatimonun buánti ꞌicën. Usonan ca anua judíos unicama timë́ti xubucamanuxun mitsu rishquiti ꞌicën. Usa ca uni ꞌicë quixun ꞌunani camina ami catamëtima bërúancati ꞌain. 18ꞌËn bana uni ñuixuncë cupí ca unin mitsumi nishquin judíosma unibunën ꞌapunu mitsu buánti ꞌicën, ami mitsu ñui manánuxun. Usocëxunbi camina a ꞌapucama ꞌimainun judíosma uniburibi ꞌën mitsu ꞌunánmicë banacama ñuixunti ꞌain. 19A unicaman mitsu ꞌapunu buáncëxun camina racuë́quin —uisai carana quiti ꞌai —quixun sinánan —uisa banan carana cati ꞌai —quixun sinántima ꞌain. Nucën Papa Diosan ca mitsúxmi banacëbëtainshi uisaquin caramina cati ꞌai quixun mitsu sinánmiti ꞌicën. 20Usa ꞌain camina ꞌunánti ꞌain, mitsúnbi sináncë banan camina banatima ꞌain, Nucën Papa Diosan Bëru Ñunshin Upitan sinánmicëx camina quiti ꞌain.

21ꞌËmi sináncëma unin ca axa ꞌëmi sinania oquin aín xucë́nbi an uni ꞌaminun quixun ꞌapu ꞌinánti ꞌicën. Usaribi oquin ca aín papan ami nishquin aín bëchicëbi an uni ꞌaminun ꞌapu ꞌinánti ꞌicën. ꞌImainun ca usaribi oquin aín bëchicënën ami nishquin aín papabi an uni ꞌaminun ꞌapu ꞌinánti ꞌicën. 22Mitsúxmi ꞌëmi sináncëbë ca axa ꞌëmi sináncëma unicamax mitsumi nishti ꞌicën. Usa ꞌaínbi ca an uisa ñu cara ꞌicëbëtanbi ꞌëmi sinánquin ëncëma unicamax Nucën Papa Diosan nëtënu ꞌëbë ꞌiti ꞌicën. 23Achúshi ëmanuxun bana ñuixuniabi unin mitsun bana cuaisama tanquin bëtsi bëtsi ocëx camina bëtsi ëmanu cuanti ꞌain. Anuxunribi bana ñuixunia unin mitsu bëtsi bëtsi ocëx camina anuaxribi bëtsi ëmanu cuanti ꞌain. ꞌËn cana asérabi mitsu cain, anu Israel unibu ꞌicë ëmacamanuxun mitsun unicama bana ñuixuncëma pain ꞌain cana ꞌëx uni ꞌinux Nucën Papa Diosnuax uá ꞌëx utëcënti ꞌain.

24Unin ñu ꞌunánmicë uni an ca an a ꞌunánmicë uni inuima. Usaribiquin ca an uni ñu mëëxuncë uni an, an a ñu mëëmicë uni inuima. 25Mitsux ꞌën ꞌunánmicë unicama ꞌain ca axa ꞌëmi nishcë unicamax mitsumiribi nishti ꞌicën. Atúan ꞌë bëtsi bëtsi ocësaribi oquin ca mitsuribi bëtsi bëtsi oti ꞌicën. Atun ꞌë ñunshin ꞌatimanën cushi, Beelzebú, caquin anëquin ca mitsúxmi ꞌën unicama ꞌicë, mitsuribi usaribi oquin anëti ꞌicën.

Uími caranuna racuë́ti ꞌai quiáxa Jesús quia

(Lc 12.2-9)

26Ësaquinribi ca Jesusan aín ꞌunánmicë unicama bana ñuixuntanun xuquin cacëxa:

—Unían mitsu bëtsi bëtsi ocëxbi camina an mitsu bëtsi bëtsi ocë unicamami racuë́tima ꞌain. Unían uni itsi paránxun ñu ꞌacëxbi ca camabi unían ꞌunáncë ꞌiti ꞌicën. Usaribiti ca unían ñu upí unë́xun ꞌacëxbi camabi unían ꞌunáncë ꞌiti ꞌicën. 27ꞌËn mitsu imë́ribi cacë banacama camina camabi unían cuanun ñuiti ꞌain. Ñuianan camina mitsun xubunuxun ꞌën mitsu cacëcamaribi camabi unían cuanun ëmánxun ñuiti ꞌain. 28An uni bëtsi bëtsi oquin bamamicë unicamami camina racuë́tima ꞌain. Usoquin ꞌaquinbi ca unin bëru ñunshin bamamitima ꞌicën. Usa ꞌain camina usa unimi racuëtima Nucën Papa Dios, an uni aín cushínbi bamamianan aín bëru ñunshínribi manë tsi anuaxa xënibua ꞌaínbi tëmërati anua ꞌinun ꞌimiti amishi racuë́ti ꞌain.

29ꞌIsáratsu ca cupíma ꞌicë unin curíqui ꞌitsamaratsu anun maruquin rabë́ biti ꞌicën. Chamaratsu ꞌaísha aín cupí ꞌitsamashi ꞌicëbi ca Nucën Papa Diosan camabi ꞌisá achúshi achúshi isia. Usaquian bërúancë ꞌaish ca Nucën Papa Dios cuëëncëbëma bamaima. 30An ꞌisácama bërúancë Nucën Papa Diosan ca mitsuribi camabi ꞌunánan uiti buñu caramina ꞌai quixun ꞌunania. 31Mitsux camina ꞌisásamaira ꞌain. Usa ꞌain ca ꞌisá chamaratsucama ꞌacësamaira oquin Nucën Papa Diosan mitsu bërúanquin isia. Usa ꞌain camina unían mitsu bamamisa tancëxbi racuë́tima ꞌain.

—ꞌËx cana Jesúsnan ꞌai —quiax quicë uni ñuicë bana

(Lc 12.8-9)

32Ësaquinribi ca Jesusan aín ꞌunánmicë unicama cacëxa:

—Axa an ꞌën bana cuacëma unicaman cuanun ꞌë ñui, —ꞌëx cana Jesusan uni ꞌain —quicë uni a ñuiquin cana ꞌënribi, —ax ca ꞌën uni ꞌicë —quixun ꞌën Papa Dios naínu ꞌicë a cati ꞌain. 33Usa ꞌaínbi cana axa ꞌëmi rabini, —ꞌëx cana Jesusan unima ꞌain —quicë uni a ñuiquin, —ax ca ꞌën unima ꞌicë —quixun ꞌën Papa Dios naínu ꞌicë cati ꞌain.

Axa ami sináncëma unix ca Jesusan unimi nishti ꞌicë quicë bana

(Lc 12.51-53; 14.26-27)

34Ësaquinribi ca Jesusan aín ꞌunánmicë unicama cacëxa:

—ꞌËx uá ꞌain ca camabi unix bëtsibë bëtsibë nuibananti ꞌicë quixun mitsun sináncëxbi ca usama ꞌicën. ꞌËx uá ꞌain ca axa ꞌëmi sinántisama tancë unicaman axa ꞌëmi sináncë unicama nuibatíma, ami nishquin ꞌatimoisa tanti ꞌicën. 35ꞌËx uá ꞌaían ꞌëmi catamëcëbë ca bëtsi bëtsi unix aín papami nishti ꞌicën. Usaribiti ca xanu raírinëx ꞌëmia catamëcëbë aín titami nishti ꞌicën. ꞌËx ënë nëtënu uá ꞌaían ꞌëmi catamëcëbë ca xanux aín ñemi nishti ꞌicën. 36Usa ꞌain ca axa ꞌëmi catamëtia oquin unin aín aintsibi ꞌatimoti ꞌicën.

37ꞌËn unicaman ca aín papa, aín tita nuibati ꞌicën. Nuibatibi ca atu nuibacësamaira oi ꞌëmi sinánti ꞌicën. Usai ꞌëmi sináncëma ꞌaish ca ꞌën unimasa ꞌicën. Usaribiti ca ꞌëmi sináncësamaira oquian aín bëchicë nuibacë uni ax ꞌën unimasa ꞌicën. 38—A ꞌai bamanuxunbi cana Jesúsmi catamëti bana ënquinma ꞌai —quixuan an sináncëma uni ax ca ꞌën uni ꞌitima ꞌicën. 39Uix cara aín cuëëncësa oquin ꞌai ënë nëtënu upitax tsótishi sinania ax ca Nucën Papa Diosnan ꞌitima ꞌicën. Usa ꞌaínbi ca uinu ꞌicë unin cara ënë nëtënushi upitax tsóti sinánquinma ꞌëmi catamëquin ꞌëx quicësabi oquin ꞌaia ax ainan ꞌaish Nucën Papa Diosan nëtënu abë ꞌiti ꞌicën.

Uicama cara Nucën Papa Diosan cupíoti ꞌicë quicë bana

(Mr 9.41)

40Ësaquinribi ca Jesusan aín ꞌunánmicë unicama cacëxa:

—An mitsun bana cuacë uni an ca ꞌën banaribi cuatia. An ꞌën bana cuacë uni an ca Nucën Papa Dios, an ënë nëtënu ꞌë xua, aín banaribi cuatia. 41Asérabi ꞌënan ꞌixuan ꞌën unin ꞌë ñuiquin bana ñuixunia cuaquin ca uni itsin sinánti ꞌicën, —a banax ca asérabi Nucën Papa Diosan sinánmicëxa quicë ꞌicë —quixun. Usaquin sinani ca a bana quicësabi oi ꞌiti ꞌicën. Usa uni ca an bana ñuixuncë unia iscësaribi oquin Nucën Papa Diosan upí isia. Usaribi oquin ca an upí uni isquin —ax ca asérabi Jesúsmi catamëcë uni ꞌicë —quixun sinánquin a nuibaquin aín bana cuacë uni a Nucën Papa Diosan upí isia, upí uni iscësaribi oquin. 42Ax ꞌën uni ꞌaísha ꞌëmi upiti catamëcë ꞌicëmabi axa shimaia isquin —ax ca Jesucristonën uni ꞌicë —quixun sinánquin ꞌumpax ꞌináncë uni a ca Nucën Papa Diosan upí isia.

Currently Selected:

Mateo 10: cbrPB

Highlight

Copy