Mateo 15

Aín nuitu upíma cupía unin ꞌatima ñu ꞌacë bana

(Mr 7.1-23)

1Fariseo unicamabëtan ca an Moisésnën bana ꞌunáncë unicamanribi Jerusalén ëmanuax ricuatsini uxun Jesús cacëxa: 2—¿Uisacasquin cara min ꞌunánmicë unicaman nucën rara quiá bana tanimin? A bana quiásabi oi ꞌiquinma ca mëchucaxunmashi piia.

3Cacëxun ca Jesusan atu ñucáquin cacëxa:

—¿Uisacatsi caramina mitsux mitsun rara quiá bana tanibi Nucën Papa Dios quiásabi oi ꞌiman? 4Nucën Papa Dios ca ësai quiacëxa: “Min papan bana, min titan bana camina cuati ꞌain”. ꞌImainun ca ësaribiti quiacëxa: “Axa aín papa, aín tita ñui ꞌatimati banacë uni a camina bamamiti ꞌain”. 5Usa ꞌaínbi camina mitsux ësai quin: Unin ca aín papa, aín tita ësaquin cati ꞌicën: Mi ꞌinánti ꞌixunbi cana ꞌën mi ꞌinánti ñucama Nucën Papa Dios ꞌinan. 6Axa usai quicë uni an aín papa aín tita ñu ꞌaquintima ca asábi ꞌicë quiax camina mitsux quin. Usai quiquin camina mitsun raran ñuiá bana ashi sinánquin Nucën Papa Diosan bana quicësabi oquin ꞌaiman. 7Mitsux camina cëmë ꞌain. Isaíasnëan mitsu ñuiquin cuënëo bana ca ësai quia:

8Ënë unicaman ca aín cuëbitanshi ꞌë rabia, ꞌixunbi ca aín nuitu mëu ꞌë sinanima. 9Nucën Papa Diosan bana isa quixun ca unínbi ñuicë banaishi unicama ñuixunia. Usa ꞌixun ca ñancábi ꞌë rabia.

Isaíasnën cuënëo bana quicësabi oi camina mitsux ꞌin.

10Catancëxun ca ësaquinribi Jesusan cuënxun unicama cacëxa:

—ꞌËn, bana ñuimainun ca upí oquin cuacan. 11Aín ñu picë cupíma, aín nuitunën ꞌatimaquin sinania, aín cuëbitan upíma banan banacë a cupí ca Nucën Papa Diosan uni upíma isia.

12Usaquian caia ca aín ꞌunánmicë unicaman Jesús nëbë́tsioraxun cacëxa:

—¿Caramina isan, fariseo unicamx ca usaquinmi unicama ñuixunia cuati mimi nishaxa?

13Cacëxun ca Jeususan cacëxa:

—Uicamax cara Nucën Papa Dios naínu ꞌicë an ainan ꞌimicëma ꞌicë, acamax ca asérabi ainanma ꞌaish abëma ꞌiti ꞌicën, aín tapúncëñunbi ëchícëxa i ꞌicësaribiti ñancáishi ꞌiti ꞌicën. 14Fariseo unicamaxa nishiabi camina isëshiti ꞌain. Atun Nucën Papa Diosan bana uni itsi ꞌunánmiti ꞌixunbi ca uisai cara quia quixun ꞌunanima. Ca bëxuñu unisa ꞌicën. Bëxuñu unin abë bëxuñu uni itsi buáncatsi quixun ꞌaíbi ca bëxuñu ꞌixun uin cuanti cara quixun ꞌunanima, a rabëtaxbi aman cuanx quininu nipacëti ꞌicën.

15Usai quia cuaquinbi ca Pedronën Jesús cacëxa:

—Unían picë ñu ñui quicë bana ax cara uisai quicë ꞌicë quixun ca nu ñuixun.

16Cacëxun ca Jesusan cacëxa:

—¿Mitsúnribi caramina ꞌën cacëxun ꞌën bana cuatiman? 17Unían ñu aín cuëbitan picëx ca aín pucunuishi atsinia. Atsíntancëx ca amiribishi chiquitia. ¿A caramina ꞌunaniman? 18Usa ꞌaínbi ca uni masáquin sinani ꞌatimati banaia. Aín nuitu upíma ꞌain ca usai banaia. Usa ꞌicë Nucën Papa Diosan iscëx ca uni ꞌatima ꞌicën. 19Aín nuitu mëu ca unin ꞌatima ñu ꞌati sinania, uni ꞌati, aín xanuma ꞌaínbi xanubë ꞌiti, xanu cuaioti, uni itsin ñu mëcamati, cëmëi uni itsimi manánti, uni itsi ñui ꞌatimati banati. 20An usa ñucama ꞌacë unicama ca Nucën Papa Diosan iscëx upíma ꞌicën. Mëchucaxunma picë ꞌaíshbi aín sinan upí ꞌicë ca Nucën Papa Diosan uni upíma isima.

Judíosma xanu Jesúsmi catamëa

(Mr 7.24-30)

21Anuax cuanx ca Jesús anua Tiro cacë ëma ꞌimainun Sidón cacë ëma ꞌicë a menu bëbacëxa. 22Bëbaia ca anu ꞌicë Cananea xanu, an anu cuanquin munuma banaquin Jesús caráishiacëxa:

—Mix camina Nucën ꞌIbu, Davitan rëbúnqui ꞌain. Usa ꞌixun camina ꞌë ꞌaquinti ꞌain. ꞌËn ini tuá ca anua ñunshin ꞌatima ꞌain ꞌitsaira paë tania.

23Caquian caráishicëxunbi ca Jesusan cáma ꞌicën. Caiama oquin ca aín ꞌunánmicë unicaman a rapasu cuanquin —an ca cuëncë́nquin nu nuia. Camina a cuantánun cati ꞌai —quixun cacëxa.

24Usaquian cacëxun ca Jesusan xanu cacëxa:

—Judíosma unibuma, judíos unicamaishi ami sinanaminun ca ꞌën Papa Diosan ꞌë caxa. Axa ꞌura cuancëa ꞌaracacë ñuina aín ꞌibun bëtëcëncësaribi oquin judíos unibu ami sinánun quixun canun ca Nucën Papa Diosan ꞌë caxa.

25Cacëxun cuaquinbi ca a tanáin rantin puruni tsóbuquin a xanun cacëxa:

—Camina ꞌën tuá ꞌë pëxcuxunti ꞌain.

26Cacëxun ca —judíos unicama pain ꞌaquini cana uacën —quixun sinánquin Jesusan ësaquin cacëxa:

—Tuá xura pimiti bixunbi camun pimiti ca ꞌaisama ꞌicën.

27Cacëxun ca a xanun cacëxa:

—Usa ca. Usa ꞌaínbi ca cuënan tëmúxun aín ꞌibúan rëupatia piti sani camunan piia.

28Cacëxun ca Jesusan cacëxa:

—Mix camina asérabi ꞌëmi catamëti ꞌën mi upí oquin ꞌaquinun quiax ꞌëmi sinan. Usa ꞌain ca mix cuëëncësabi oi ꞌiti ꞌicën.

Quixuan cacëbëshi ca aín ini tuá pëxcúacëxa.

Galilea menuxuan Jesusan uni ñucëcama pëxcüa

29Anu Tiro ꞌimainun Sidón ꞌicë me anuax cuanx ca Jesús parúmpapa Galilea ratábiani matá menu mapëracëtancëx anu tsóbuacëxa. 30Anua tsotan ca anu ricuatsinquin ꞌaisamaira unin, uni ꞌinsíncë ꞌitsaira bëacëxa. Axa aín niti bëtsicë uni ꞌimainun aín bërumi ñucë ꞌimainun pabë ꞌimainun banañuma, a unicama ꞌimainun bëtsi bëtsi ꞌinsinan ꞌicë unicamaribi a tanáin bëia ca Jesusan pëxcüacëxa. 31Pëxcucëx ca banañuma unicamax banacëxa. Banamainun ca axa aín quisi aín pëñánmi ñucë unicamaxribi pëxcúacëxa. Pëxcúmainun ca axa aín niti bëtsicë unicamax upiti niacëxa. Aín bërumi ñucë unicamanribi ca bëoquiquin isacëxa. Usaia ꞌia isquin ca anu ꞌicë unicaman uisa uni cara ënëx ꞌicë quixun sinani cuëënquin chuáma tanquin Nucën Papa Dios, a Israel unicaman rabicë, a rabiacëxa.

Jesusan ꞌaisamaira ꞌaish, cuatro mil uni pán pimia

(Mr 8.1-10)

32ꞌItsa uníxa timëcamë ꞌëocë ꞌain ca aín ꞌunánmicë unicama cuënxun Jesusan atu cacëxa:

—Ënë unicamax ca ënu rabë́ ꞌimainun achúshi nëtë ꞌëbë ꞌicën. Usa ꞌaish ca a atun piti ñuñuma ꞌicën. Usa ꞌain cana ꞌën atu ꞌitsaira nuibaquin ꞌaquinsa tanin. Cuaníbima atux bainuax bëënania, usa ꞌain cana ñu naracamixunma xuisama tanin.

33Cacëxun ca aín ꞌunánmicë unicaman cacëxa:

—¿Ënëx ca anu uni ꞌicëma me ꞌicën. ¿Uinua caranuna ënë unicaman pimiti piti biti ꞌain?

34Cacëxuan Jesusan —¿uiti pánñu caramina ꞌain? —quixun ñucácëxun ca aín ꞌunánmicë unicaman —ënu ca mëcën achúshi ꞌimainun rabë́ pán ꞌimainun ꞌitsamashi tsatsaratsu ꞌicë —quixun cacëxa.

35Usaquin cacëxun ca Jesusan axa timëcamë ꞌëocë uni menu tsóbunun quixun cacëxa. 36Usoxun ca páncamacëñun tsatsaribi bixun Nucën Papa Dios —asábi ca —catancëxun a piti ñu tucapaxun aín ꞌunánmicë unicama ꞌináncëxa. ꞌInáncëxun ca anu ꞌicë unicama pinun mëtícaquin ꞌináncëxa. Aín ꞌunánmicë unicaman a unicama ꞌináncëx cëñútisa ꞌaíshbi ca a piticamax cëñúama ꞌicën, 37a unicaman pucháquin picëxbi. Camáxbia puchácëbëtan ca Jesusan ꞌunánmicë unicaman mëcën achúshi ꞌimainun rabë́ caquí buácaquin tëxëcë piti biacëxa. 38An a piti picë nucë bënëcama ca ꞌitsaira ꞌaish cuatro mil ꞌiacëxa. Atúinshima xanu ꞌimainun xucamanribi ca pucháquin piacëxa. 39Usoquin pimitancëxun a unicama —cuanmainun ca cuan —quixun cabiani ca Jesús manë nuntinu ꞌiruquiani cuanx Magdala cacë menu cuancëxa.

Currently Selected:

Mateo 15: cbrPB

Highlight

Copy