Mateo 14

Juan, an uni nashimicë, ax bama

(Mr 6.14-29; Lc 9.7-9)

1Usa ꞌain ca unicaman Jesús ñuiquin chanioia Galileanu ꞌicë unicaman ꞌapu, Herodes, an cuacëxa. 2Cuaquin ca Herodesnën ratúquin, an ñu mëëmicë unicama cacëxa:

—Jesús, ax ca Juan, an uni nashimicë, a ꞌicën. Bamaxbi ca baísquiaxa. Usa ꞌixun ca uni itsían ꞌacëma ñu ꞌaia.

3-4An Juan aín uni tëbíscamia ꞌaish ca usai Herodes quiacëxa. Ësai ca ꞌiacëxa: Herodes, an ca aín xucën Felipenën aín xanu, Herodías, a biacëxa. Usa ꞌain ca —minmi a xanu biti ca ꞌaisama ꞌicë —quixun Juanën Herodes cacëxa. Cacëxun ca Herodesnën aín unicama Juan bimiacëxa. Bimixun ca nëamixun sipuamiacëxa.

5Aín unicaman Juan ꞌanun ꞌamitisa tanquinbi ca camabi unían —Juan an ca Nucën Papa Dios quicë bana nu ñuixunia —quixun sináncë ꞌain —ꞌëmima nishcania —quixun sinánquin ꞌamiama ꞌicën. 6Usa ꞌaínbi ca anúan bacë́an nëtën Heródesnën camicëx uxúan unicaman pimainun, Herodíasnën tuá xanu xuntacu ax upiti bairani ransacëxa. Usai ꞌia isi ca Herodes chuáma tani cuëëancëxa. 7Cuëënquin ca xanu xuntacu cacëxa:

—Añu ñu caramina mi ꞌinánun ꞌë ñucati a cana asérabi mi ꞌinánti ꞌain. Sinanatëcëntimoquin cana ashiquin mi cain.

8Cacëxun aín tita pain ñucátancëxun ca aín titaxa quicësabi oquin cacëxa:

—Juan, an uni nashimicë, a tëbíscamixun camina ꞌë aín maxcá manë xampami ꞌinánti ꞌain.

9Usaquian cacëxun cuaquin masá nuituiraquin ca Herodesnën ꞌaisama tancëxa. ꞌAisama tanquinbi ca —sinanatëcëntimoquin cana mi cain —quixuan cacë sinánan anu ꞌicë unicamanribia cuacë cupí usoquian xanu xuntacu ꞌinánun aín uni cacëxa. 10Caquin ca sipunuabia Juan tëbíscanun quixun aín unicama xuacëxa. 11Xucëx cuanxun tëbíscabëtsinquin bëxun ca aín maxcá manë xampami xanu xuntacu ꞌináncëxa. ꞌInáncëxun buánxun ca aín tita ꞌináncëxa.

12Usoquian tëbíscacë bixun maínbiani cuanxun ca Juanën ꞌunánmicë unicaman Jesús ñuixuancëxa.

Jesusan ꞌaisamaira ꞌaish, cinco mil uni pán pimia

(Mr 6.30-44; Lc 9.10-17; Jn 6.1-14)

13Usaquian Juan ꞌacëa aín unicaman ñuixuncëx ca Jesús anuax nuntin cuanx anua uni ꞌicëma menu cuancëxa. Usa ꞌain ca —anu ca Jesús ꞌicë —quixuan chanioia cuabiani bëtsi bëtsi ëmanu ꞌicë unicamax men anua Jesús ꞌicë anu cuancëxa. 14Usaía ꞌitsa unia riquiancëbë manë nuntinuax ꞌibúquianquin ca unicama timë́cë isquin Jesusan atu nuibacëxa. Nuibaquin ca ꞌinsíncë unicama pëxcüacëxa. 15Usaquin ꞌacëbëa bari xupíbucëbëtan ca aín ꞌunánmicë unicaman anu cuanxun Jesús cacëxa:

—Bari ca xupíbutia, ënë mex ca anu uni ꞌicëma me ꞌicën. Ënu ꞌiaxma unicama cuantánun camina cati ꞌain. Cuanxuan ꞌuri ꞌicë ëmacamanua atun piti bitánun camina xuti ꞌain.

16Cacëxun ca Jesusan cacëxa:

—Ca cuantima ꞌicën. Mitsun ca piti ꞌinan.

17Cacëxun ca aín ꞌunánmicë unicaman cacëxa:

—Nun piti ñura ca mëcën achúshi pán ꞌimainun tsatsa rabë́ishi ꞌicën.

18Quia ca Jesusan cacëxa:

—Ënu ca ꞌë bëxun.

19Cacëxuan bëcëbëtan ca Jesusan basinua bucubunun quixun unicama cacëxa. Cacë́xa bucubucëbëtan ca Jesusan mëcën achúshi páncëñun tsatsa rabë́ bixun manámi bësuquin isquin Nucën Papa Dios —asábi ca —catancëxun pán tucapaxun aín ꞌunánmicë unicama ꞌináncëxa. ꞌInáncëxun ca anu ꞌicë unicama pán mëtícaquin ꞌináncëxa. 20ꞌInáncëxun biquin ca unicama camaxunbi pucháquin piacëxa. Pucháquin pia sënë́an ca usai ꞌiisa ꞌaímabia tëxëcë piti aín ꞌunánmicë unicaman mëcën rabë́ ꞌimainun rabë́ caquí buácaquin biacëxa. 21An pucháquin picë nucë bënëcamax ca ꞌaisamaira ꞌaish, cinco mil uni ꞌiacëxa. Atúinshima xanu ꞌimainun xucamanribi ca pucháquin piacëxa.

Jesús parúmpapa camánanën niquiani cuan

(Mr 6.45-52; Jn 6.16-21)

22Usotancëxun ca an tsiánquianquin unicama cabianmainuan, atux pain manë nuntinu cëñúruquiani ꞌucë manan cuanun quixun Jesusan aín ꞌunánmicë unicama xuacëxa. 23Xutancëxun anu ꞌicë unicama cabiani ca Jesús axëshi matánu Nucën Papa Diosbë banai cuancëxa. Nucën Papa Diosbëa banamainun ca bari cuabuacëxa. Bari atsíncëbëa baquíshcëbë Jesús axëshi anu ꞌimainuan 24aín ꞌunánmicë unicama manë nuntinu ꞌiruquiani parúmpapa nëbë́tsi cuania ca suñúonpitan cuaínsamoquin bëcacëxa. Bëcaia ca bëchunanribi tucáncaquin manë nuntinua rëútisoquin ꞌacëxa. 25Usomainuan pëcaracëbë ca parúmpapa camánanën niquiani Jesús atunu cuancëxa. 26Parúmpapa camánanën niquiania Jesús cuania isi ca atun bëmánan pëqui racuëti —ñunshin sapi ca —quiax ratuti sharárui quiacëxa.

27Usai quia ca Jesusan atu cacëxa:

—Camina cushicanti ꞌain. Racuëaxma ca ꞌit, ꞌë cana ꞌain.

28Cacëxun ca Pedronën cacëxa:

—Mix camina asérabi Nucën ꞌIbu ꞌain. Usa ꞌixun ca ꞌëx parúmpapa camánanën niquiani minu cuanun ꞌë cat.

29Cacëxun ca Jesusan cacëxa:

—Ca ut.

Cacëx ca Pedro manë nuntinuax ꞌibúquiani parúmpapa camánanën niquiani Jesúsnu cuancëxa. 30Cuanibi ca suñúan upitan parúmpapa bëchúaian isi racuëti nanë́buti cuëncëni quiacëxa:

—Cana bacamiquin, ꞌë ca bitsi ut.

31Cuëncë́nquia cacëxun biquin ca Jesusan cacëxa:

—¿Uisacatsi caramina ꞌën mi parúmpapa camánanën nicuatsinimi ꞌënu unun ꞌimicëxbi ꞌëmi catamëtiman? Camina ꞌëmi sináncëmasa ꞌain.

32Jesúsbëa Pedro manë nuntinu ꞌirucëbë ca suñúan nëtë́acëxa. 33Nëtë́cëbëtan ca manë nuntinu ꞌicë unicaman a tanáin rantin puruni tsóbuti ami sinánquin Jesús cacëxa:

—Mix camina asérabi Nucën Papa Diosan Bëchicë a ꞌain.

Genesaret menuxuan Jesusan ꞌinsíncë unicama pëxcüa

(Mr 6.53-56)

34Parúmpapa ꞌucë manan cuanx ca Genesaret cacë menu bëbacëxa. 35Bëbaia isquin ca a menu ꞌicë unicaman —axa ucë ux ca Jesús ꞌicë —quixun ꞌunánquin a menu ꞌicë unicaman ꞌunánun chaniocëxa. Chaniocëbëtan ca uni ꞌinsíncëcama Jesúsnu bëacëxa. 36Bëcëxun ca ñucë unicaman Jesús cacëxa:

—Min chupa cuëbíshi ca nu ticamit. Ësaquin caquin ticaíshi ca ꞌinsíncë unicamax pëxcúacëxa.

Currently Selected:

Mateo 14: cbrPB

Highlight

Copy