Malaquías 1
1
1Ënë banax ka Diosan an aín bana ñuikë Malaquías usakia aín uni Israelkama kanun ka bana ꞌikën.
Diosan Israel unikama nuiba ñuikë bana
2Ësai ka Dios kia: ꞌËn kana mitsu nuibatin. ꞌAínbi kamina mitsun ësokin ꞌë kain: ¿Uisaxun karanuna min kamina nukama nuibati kixun ꞌunánti ꞌain? Kakëxun ka Diosan atu kaia: ꞌËn kana mitsu xukë́n rabë́ ꞌikëbi nuibakën, nuibakin kana Esaú ꞌimainun Jacob aira abëtan ñu ꞌati kuëënxun nuibakën, 3ꞌakin kana Esaú ashi nuibati kuëëanma ꞌain. Usa ꞌain kana anua Esaú ꞌikë me axa bashi me niñu ꞌikëbi anu uni ꞌikëma me ꞌinun ꞌimiakën, usakin ꞌimikëbë ka a menu ñuina raëkëma kamaishi bërí anu ꞌikë kiax ka kia.
4Esaúnën rëbúnki edomitakama ax ka kisatani ësai kiti ꞌikën: “Nukamax kananuna numi nishkë unikaman këñúkë ꞌian, ꞌaínbi kananuna amiribishi nun ëma birutëkënti ꞌain kiax ka kiti ꞌikën,” ꞌaínbi ka Dios kamabi kushiñu an atu kati ꞌikën: “Mitsun kamina amiribishi birutëkënti ꞌain, ꞌaínbi kana amiribishi ꞌën rurupatëkënti ꞌain.” Usakin ꞌakë ka unin a me anua uni ñu ꞌatima ꞌakëishi tsókë kakin a me anëti ꞌikën, anëanan ka amia Dios sënënima nishkë me kakin anëti ꞌikën. 5Mitsun kamina mitsun bërúnbi isti ꞌain, isi kamina kiti ꞌain: “¡Nun Diosan ka ax chaiira ꞌixun anua nun mekama sënënakëkë abi inuia!”
Malaquíasnën sacerdotekama atun ꞌakësabi okin ꞌakinma ñuina ꞌatimakin xaroia ka ñuikë bana
6Ësokin ka Dios kamabi kushiñu an sacerdote unikama kaia: Aín bakë bëchikë bëbukaman ka aín papakaman kakëxun kuati ꞌikën, ꞌimainun ka an ñu mëmikë uni aín banakama an ñu mëëxunkë atúnribi kuati ꞌikën. Usaribiti kana ꞌëx mitsun papa ꞌain, ¿Uisa kupín kaina mitsun ꞌën kakëxun kuaisamatankanin? ꞌËx kana an mitsu ñumëmikë uni asa ꞌain, ¿uisa kupín kaina ꞌën kakësokin mitsun ꞌaisamatankanin? Mitsun kamina ꞌë istisama tankanin, usai ꞌibi kamina mitsux ësai kikanin: ¿Añu ꞌaxunkima karanuna mi timan? 7Mitsun kamina anuxun ꞌë ñuina xaroxunkë anu piti ꞌën kuëënkëma a ꞌë bëxunkanin, usakin ꞌaibi kamina ñukákanani kikanin: ¿Uisa ñu ꞌatima ꞌakin karanuna nun mi ꞌatimon? Mitsun kamina anuxun ꞌë ñuina xaroti anuax ꞌëmi rakuë́ti upiti ꞌëmi sinánkinma ꞌë ꞌatimoin. 8Usa ꞌain kamina mitsun ñuina bënxuñu ꞌianan tsasikëkama ꞌimainun axa ꞌinsínkëkama a ꞌë anuxun xaroti anuxun xaroxunkë ax isa upí ꞌikë kixun sinánkë anun kamina ꞌë ꞌatimokan. ¡Usa ꞌain kamina a ñuinakama mitsun ꞌapukamanu buánti ꞌain! ¡buántankëxun kamina mitsun ꞌinánkëxun kara ꞌinainshikë ñukama a atun kuëënkin bitsia kixun isti ꞌain! 9Mitsun kamina Dios nukama nuibanun kixun abë banakin kati ꞌain. ꞌAínbi kamina usakin a ꞌinánti ñu a ꞌinánkin Diosan ka a ñukama upíokin bitsia kixun mitsun sinánkantima ꞌain. Dios kamabi kushiñu ax ka ësai kia: 10“¡Uisati kara mitsu achúshinën anuxun Dios rabiti xubu xëpútikama xëpútima ꞌikën, anuxunma ꞌë ñuina xaroxunti anu ñankabi tsi bimitëkënkania usa ꞌain! ꞌËn kana mitsu nuibakëmapan ꞌain, ꞌianan kana mitsun ꞌë ꞌinaishikë ñukama abi bitëkëntima ꞌain: 11Kamabi me kuainakëanu tsókë unikaman ka ꞌë rabia; ꞌimainun ka kamabi menuxun ꞌë rabikin ro sanuira xaronan ñu upíirabukama aribi a isi ꞌëx kuëëntisabi okin upíokin ꞌaia. 12Usa ꞌaínbi kamina mitsun, anuxun ꞌë ñuina xaroxunti ax isa ꞌën mesasa ꞌikë kixun sinánkin ꞌë ꞌatima okanin, usa ꞌain ka anuxun ꞌë ñuina xaroxuntinu ꞌikë pitikama a pikinma timakë ꞌiti ꞌikën. 13Mitsux kamina ësai kikanin: ¡Nukamax kananuna ësokin ñu ꞌakëkama ënën atsan! Usai kikin ka ꞌë timakania. Usai ꞌikinbi ka ñuina mëkamakë ꞌimainun vaca ꞌatimai nikë ꞌimainun ꞌinsínkë akama ꞌë ꞌinánti bëi ꞌëx isana a ñuinakama ꞌinánkëx kuëënti ꞌai kiax kikania. 14¡Usa ꞌain ka ꞌatima okë ꞌiti ꞌikë uni an ꞌë paránkin aín ꞌarakakë ñuina upí ꞌaxunkatsi kixun sinánxunbi aín ñuina ꞌatimakë xaroxunkë a uni ax ꞌiti ꞌikën! ꞌËx kana ꞌapuira a ꞌain, usa ꞌain ka kamabi menu ꞌikë unikama ꞌëmi rakuë́tia.” Ësai ka Dios kamabi kushiñuira ax kiaxa.
Currently Selected:
Malaquías 1: cbrPB
Highlight
Share
Copy
Want to have your highlights saved across all your devices? Sign up or sign in
© 1978, 1995, 2008, 2022 Wycliffe Bible Translators, Inc. All rights reserved.
