Malaquías 2

1“Usa ꞌain ka Diosan sacerdotekama ënë banax ka bërí mitsunan ꞌikë kixun kaia: 2Mitsun kamina ꞌëx kikësabiokin ꞌanan asérabi ꞌë rabikanti ꞌain. Usakin ꞌaiama kana ꞌën mitsu ꞌatima okin sinánxunti ꞌain. Usa ꞌainbi mitsun ꞌën kikësokin ꞌaiama okin, kana sacerdote ꞌixunmi bikë ñukama aribi mitsu bikuanti ꞌain, usa ꞌain kana ësokin mitsu ꞌati pëuan mitsun kamina ꞌë rabitisama tankanin.” Usai ka Dios kamabi kushiñuira ax kiaxa.

3“Usa ꞌain kana ꞌën sacerdote ꞌikëbi anua chikínkin aín bëmánanu Israel unikaman ꞌë xaroxuntia bëkë ñuina puikë anubi mitsun bëmánanu ꞌati ꞌain. ¡Usakin pain ñuinakan puin ꞌatankëxun kana ꞌakëñunbi mitsu chikínti ꞌain! 4Usa ꞌain kamina mitsun ꞌunánti ꞌain, ꞌën ënë bana ësaia Levítan rëbúnkikamax ka usai ꞌiti ꞌikë kixun achúshi ñu ꞌa ax ka anubi ꞌikë kixun ꞌunánti ꞌikën.” Kiax ka Dios kamabi kushiñu ax kiaxa.

5Ësairibi ka Dios kiakëxa: ꞌËn achúshi ñu ꞌaxunkë an ka Levítan rëbúnkikama upiti tsónun ꞌimiakëxa, ꞌimikëxun ka an rakuë́ti uisaibi ꞌikima ꞌë rabiakëxa.

A kana ꞌëx kikësoibi ꞌëmi rakuëkian ꞌë rabinun ꞌinánkën, usakin ꞌakëxun ka Levítan ꞌëmi rakuë́kin ꞌën kakësabiokin ꞌë rabiakëxa.

6Usakin ꞌakëxun ka Levítan rëbúnkinën upí ñuishi uni ꞌunánmiakëxa, usakin ꞌunánmikëx ka unikama ꞌatimati banama ꞌikën. Usai ꞌi upiti tsóti ka ꞌën kakësabi oi ꞌi ꞌëmishi katamëakëxa, usai atux ꞌikania oí ka unikamaribi atun ꞌakë ꞌatima ñu ëni upiti tsókankëxa.

7Ax ka sacerdotekaman uni ꞌëa ꞌunánun ꞌunánmiti ꞌikën, usa ꞌain ka kamabi unikamax atunu an ꞌunánminun kuanti ꞌikën, atux ka an ꞌën bana ñuikë unikama ꞌikën, atux ka Dios kamabi kushiñuira aín bana ñuikë unikama ꞌikën.

8ꞌAínbi kamina sacerdotekama mitsun upí ñu ꞌati a manukin ꞌë ënkan; usa ꞌain ka mitsun ꞌatimakin ꞌunánmikëx ꞌitsaira uni ꞌatimati tsotia. Usakin kamina mitsun ꞌën Levítan rëbúnki kamabëtan achúshi ñu ꞌa ax kikësabiokin ꞌakaniman. 9Usa ꞌaínbi kamina mitsun ꞌën kakësabiokin ꞌakëma ꞌain, ꞌimainun kamina ꞌën bana ꞌunámikin bëtsi uni ꞌakësaribi okin, kamabi atu sënë́nbi ꞌunánmi kikëma ꞌain, usa ꞌain kana ꞌënribi kamabi unikaman mitsu timakin ꞌatima onun ꞌamiti ꞌain. Kiax ka kamabi kushiñu Dios ax kiaxa.

Diosan Israel unikama bëtsi ñu rabikë xanu bixuma ꞌanun kanan aín xanubë ënanaxma ꞌinun ka bana

10¿Kamabi nukamax karanuna achúshi papañushima ꞌain, ax kara Dios an nu kamabi unio ꞌama ꞌik? ¿Uisa kupín karanuna nukamax bëtsi bëtsibë paránankin, nun chaitiokë kamabëtan Diosan ꞌa achúshi ñu a ꞌaisama oin? 11Judánu ꞌikë unikaman ka Diosan kakësabiokin ꞌaíma, ꞌimainun ka ꞌaisama ñu ꞌatimaira Jerusalénnuxun ꞌanan Israelnuxunribi ꞌakania. Judánu ꞌikëkaman ka Diosan bëruaiñama ꞌakësa okin anuxun a rabiti xubu upíira ꞌatima oxa, Judánu ꞌikë unikaman ka bëtsi ñu rabikë xanukama aribi atun xanu ꞌiti biaxa. 12¡Uisati kara Nukën ꞌIbun usakian nun menuxun an ñu ꞌatima ꞌakëma a uisa uni kara ꞌixúan Nukën ꞌIbu kamabi kushiñu ꞌinaínshiti ñu bëxunkëxunbi chikintima ꞌikën!

13ꞌAínbi kamina mitsun ꞌaisamaira okin ꞌakanin: usakin ꞌai ꞌitsaira inkin kamina anuxun Dios ñuina xaroxunti a ꞌitsaira mitsun bëunan buchutisa oi ꞌin, i kamina chaiira masá nuitutin, usai kamina Diosan mitsun ñukama bëxunkëxunbi upíokin kuëënkin bisama tankëbë inkanin. 14¿Usa ꞌaínbi kamina mitsux ñukákananin kin uisa kupín kara Diosan nun ꞌinainshikë ñu bitsima kikanin? Diosan ka bëná ꞌixunmi mitsun biti xanu usakin kana mi ñu ꞌaxunti ꞌai kixun ká ꞌixunbi ꞌaxunkëma a ꞌunánxa. ¡Abëmi ꞌikë xanu ꞌikë kamina mitsun ꞌën kana mi uisabi otima ꞌai kixun kakën! 15¿Ax kara Dios achúshi abia uni uniokin aín nami ꞌanan aín bëru ñunshinribi ꞌama ꞌik? ¿Asérabi kara Diosan mitsun rëbúnkikama ainan ꞌia upí ꞌikani kuëëntëkënti ꞌimiti ꞌik? ¡Usa ꞌain kamina mitsun nami bërúankin, bëná ꞌixun bikin min xanu ká bana a manukin ꞌatima otima ꞌain! 16Israel unikaman Dios kamabi kushiñu ax ka ësai kia: “¡Mitsúnbi kamina min nami bërúankati ꞌain, usai ꞌikin kamina min xanu ꞌatima otima ꞌain, ꞌën kana kamabi uni an aín xanu ënkë a kuëënima, usai ꞌi ka uni anunbi ꞌatimati ꞌuchaia!”

Diosan anúan atu ꞌati nëtë ꞌikëbëtan Israel unikama mëníoti ñuikë bana

17Nukën ꞌIbu Dios ka mitsun bana kuati atsanxa; usa ꞌaínbi kamina mitsux ñukanani kin: “¿Uisai karanuna nun bana kuatia Dios numi atsanun nukamax kian?” Mitsux kamina ësai kikan, Diosan ka ñu ꞌatima ꞌakë unikama a upí isia, ꞌimainun ka atubë kuëënia. Mitsun kamina Dios an ka ꞌupiokin ñu ꞌaima kixun sinánkanin.

Currently Selected:

Malaquías 2: cbrPB

Highlight

Copy