Malaquías 3

1Nukën ꞌIbu kamabi kushiñu ax ka ësai kia: “ꞌËn kana an ꞌën bana ñuiti uni xutin, usa ꞌixun ka unikama ꞌën bana ñuixunkëx bai mëniokësa ꞌitánun sinanamikin ñuixunti ꞌikën. Nukën ꞌIbu Dios ami mitsun kainkë ax ka ënuax basimashi anuxun a rabiti xubunu bëbati ꞌikën. ¡A mitsun kainkë uni ax ka uisai kikë kara achúshi ñu ꞌakë kikë bana ax ꞌikë kixun, anbi mitsu ñuixuni aia!”

2ꞌAínbi kara, ¿uin anúan ꞌuti nëtë a sënë́nkëbë ax ukëbëtan tënëti ꞌik? ¿Usa ꞌain kara uix ñu ꞌatima ꞌai ꞌuchakëma ꞌaish a bëtánain anubi niti ꞌik? Ax ka tsi ërë́tia iskësa ꞌaish nukama upí ꞌinun mëníonux ꞌuti ꞌikën; ꞌianan ka jabonan chukakëxun chupa chua tërëkakësa usaribi okin nun ꞌucha tërë́kati ꞌikën. 3Dios an ka kamabi sacerdote Levítan rëbúnkikamaribi upí ꞌinun mëníoti ꞌikën, manë uxua ꞌimainun kuri tsi ërë́kënu ꞌarukëx xuiti upíira ꞌikë usaribi ꞌitanun ꞌati ꞌikën. Usakin ꞌakëxun ka atun Dios uisakin ñu ꞌinánkin ꞌati kara usakinbi ꞌaxunti ꞌikën. 4Usakia a ꞌinaínshiti ñukama Judá ꞌimainun Jerusalénnu ꞌikë unikaman ꞌinánkëx kuëënti ꞌikën, bëráma ñu ꞌinainshikëx bëtsi nëtëkaman ꞌiásabi kuëënti ꞌikën.

5Ësai ka Dios kamabi kushiñuira ax kia: ꞌËx kana uisa ñukama kaina mitsun ꞌa kixun isi uti ꞌain. Isanan kana anuxuinshi an ñunshinan ꞌamikëxun ñu ꞌati sinánkë, an aín xanumabi bëtsi unin xanu aín nami ꞌakë, axa këmëi usai ka ñu ꞌiti ꞌikë kiax kikë ꞌimainun tëmixunbi an ñu mëëmikë unikama kupíokëma ꞌimainun, raëmëkë xanukamakëñun ꞌibuñumakë tuákama ꞌianan an bëtsi menu tsókë unikama ꞌatima okë ꞌimainun, an ꞌëmi rakuënkin ꞌëx kikësabiokin ꞌakëma akamaribi kana ꞌatima oti ꞌain.

Usakin Dios kamaira ꞌinankimabi ñu ꞌinánti ñuikë bana

6“ꞌËx kana Dios ꞌain. Usa ꞌaish kana uisaibi i bëtsiorakatima ꞌëx ꞌiásabi ꞌain. Usa ꞌixun kana ꞌën ká banakama manukima Jacobnën rëbúnki Israel unikama ꞌikë mitsu masókëma ꞌain. 7Mitsux kamina ꞌën kakësokin ꞌën bana ꞌaíma ami manúkan, mitsun chaitiokëkamaxa ꞌën kakësoi ꞌima ꞌën banami manúkan usaribiti ꞌëmi manukan. Usa ꞌain kana ꞌëx Dios kamabi kushi ꞌixun mitsu kain: ¡Mitsux kamina ꞌëmi sinanatëkënti ꞌain, usai ꞌia kana ꞌën mitsu ꞌakinti ꞌain! ꞌaínbi kamina mitsux ësai kikanin: ¿uisa kupí karanuna an kakësokin ꞌati ëanx mimi sinántëkënti ꞌain? 8Usa ꞌain kana ꞌëx ësai kin: ¿Achúshi unin kara Dios ꞌikë ꞌë paránkin mëkamaisa tanti ꞌik? ¡Usa ꞌain kamina mitsun ꞌë paránkin mëkaman! Usakin ꞌë ꞌaínbi kamina ñukákanani kikanin: ¿A ñu ꞌakin karanuna mi mëkaman? ¡Mitsun kamina ꞌë kamaira ꞌinankimabi ꞌinánti a ꞌimainun, a ꞌinánti nankë manë kuríki a uiti ꞌitsa ꞌinánti kara atibi ꞌinankima ꞌë mëkaman! 9Kamabi menu ꞌikë ꞌën unikama mitsun kamina ꞌë ꞌinánti ñukama mëkamatin. Usa ꞌain kana ꞌëx Dios ꞌixun mitsu ꞌatimakin sinánxunti ꞌain.

ꞌËx Dios kamabi kushiñu ꞌixun kana ësokin mitsu kain:

10Mitsun kamina kamaxunbi anuxun ꞌë rabiti xubunu nankë ñu upíira a kamaira ꞌinankimabi ꞌë ꞌinánti nankë a ꞌë nanxunti ꞌain, usakin ꞌakëbë ka sacerdote ꞌimainun levitakaman piti ꞌitsaira ꞌiti ꞌikën. Usakin a ñu ꞌakin kamina ꞌë tanti ꞌain, tankëxun kana ꞌëx kikësokin ꞌakin naíkamë ꞌëo xëkuëkama xëókikëbë ꞌikësa ꞌinua mitsunu a piti ñu ꞌaisamaira ꞌinun ꞌimiti ꞌain.

11ꞌImianan kana atun ñu ꞌapákëkama ꞌimainun uvas ꞌapákëkama aribi an ñu këñukëkama an masókin pikin këñunun ꞌamitima ꞌain.

12Kamabi menu ꞌikë unikaman ka a unikama ka upí tsotia kixun mitsu kati ꞌikën, mitsux kamina achúshi me unin kuëën irakë a bitankëx anu ꞌiti ꞌain. ꞌËx Dios kamabi kushiñu ꞌaish kana ësai kian.”

Diosan Israel unikama nuiba ñuikë bana

13Ësai ka Dios kia: Mitsux kamina ꞌatima banainra ꞌëmi banai kikan. Usai kibi kamina ësai ñukákanani kikanin: ¿Uisai karanuna mimi banai nukamax kian? 14Ësai kamina mitsux kian: Diosan ñu mëëti ꞌakë ax ka ñankáishibi ꞌakë ꞌikën. ¿Añu karanuna aín bana kikësokin ꞌanan Dios kamabi kushiñu an isnun kixun uni ñukë ꞌain ꞌakësa okin chupa pañuax nikin a ꞌinánti biti ꞌain? 15Nukaman kananuna axa rabiakakë unikamaxa kuëënia isanan, an ñu ꞌatima ꞌakë unikama axa ñuñu ꞌia isan, usai ꞌikin ka atun uisa kara oia iskatsi kixun Dios tania, usakin tankëxubi ka an uisabi okin ꞌatima oima.

16Usa ꞌain ka an Dios rabikë unikama atúxbi ësai kánani kiakëxa, kia ka atúxa kikë bana a bëmë́kin kuakëxa. ꞌIanan ka Diosan ismainunbi achúshi kirikanu an rabikë unikaman anë kuënëokëxa, a ka an Dios rabikë unikaman sinánti ꞌikën.

17Kamabi kushiñuira Dios ax ka ësai kia: ꞌËn kana anua a unikama ꞌënan ꞌitëkënti achúshi nëtë mënion. Usakin ꞌakin kana achúshi unían an ñu mëëkinkë aín bëchikë nuibakë usaribi okin atu ꞌën nuibati ꞌain. 18Usa ꞌain kamina mitsun amiribishi uisa ñux kara upí ꞌikë, uisa ñux kara upíma ꞌikë a ꞌunankanti ꞌain, ꞌimainun kana uin kara Dios ꞌikë asérabi ꞌë rabia, uin kara ꞌë rabima akamaribi ꞌunánkanti ꞌain.

Currently Selected:

Malaquías 3: cbrPB

Highlight

Copy