Lucas 5

Jesusan ꞌamicëxuan unin tsatsa ꞌaisamaira bia

(Mt 4.18-22; Mr 1.16-20)

1Parúnpapa Genesaret cuëbía Jesús ꞌain ca Nucën Papa Diosan bana ñuixunia cuaisa tani ꞌaisamaira uni chëcaisaira oquin tsitsiruacëxa. 2Usoquian chëcaisaira ocëxun ca manë nunti rabë́, uniñuma, parúnpapa cuëbí masi ꞌurama tëcërëcacë isacëxa. Isanan ca an tsatsa bicë aín ꞌibu rabë́ an anuax ꞌibúxun atun rica chucaia isacëxa. 3Iscë́xa anua ꞌicë manë nunti achúshinëx Simónan ꞌain, anu ꞌiruquin ca Jesusan ꞌuriratsua buánun quixun Simón cacëxa. Cacëxuan buan, anu tsóbuxun, ca Jesusan baca cuëbía timë́cë unicama bana ñuixuancëxa. 4Ñuixunquin sënë́ontancëxun ca Jesusan Simón cacëxa:

—Baca nëbë́tsi ꞌuri ca manë nunti buánxun anuxun rican.

5Cacëxun ca Simonan cacëxa:

—Cananuna ꞌuxti tëaquin tsatsa biquinmabi ꞌuran ricánëtin. Usa ꞌaínbi cana minmi ꞌë cacëxun ꞌën rica saracatëcënti ꞌain.

6Usoquin Jesusan cacëxun aín rica saracaquin bacanu nëpúquin ca tsatsa ꞌaisamaira biacëxa. Bicë́xa tsatsa ꞌaisamaira ꞌain ca aín rica tëatisa ꞌiacëxa. 7Usaía ꞌia isquin ca Simónbëtan abë ꞌicë unicaman nunti itsinua ꞌicë unicama mëcënan sanánquin —nu ca ꞌaquini ut —quixun cacëxa. Cacëx uxun ca camaxunbi tsatsa biquin puruquin nanë́ntisaira oquin a manë nunti rabë́ buácacëxa. 8Usoquian ꞌaia isi ratúquin ca Simón Pedronën aín bëmánon rantin purúnquin —ꞌëx cana ꞌuchañu uni ꞌain. Usa ꞌain camina ꞌë ëbiani cuanti ꞌai —quixun Jesús cacëxa.

9Simón Pedro ꞌicësaribiti ca abë ꞌicë unicama atun bicë tsatsacama isi ratuti uisa uni cara Jesús ꞌicë quixun sinani sináncasmacëxa. 10Jacobo ꞌimainun Juan, Zebedeonën bëchicë, an Simón Pedrobëtan tsatsa bicë, axribi ca ratuti sináncasmacëxa. Sináncasmaiabi ca Jesusan Simón Pedro cacëxa:

—Racuë́axma ca ꞌit. Mix an tsatsa bicë uni ꞌixunbi camina bërí ꞌën ꞌimicëxun Nucën Papa Diosan bana ñuixunquin uni ꞌëmi sinánmiti ꞌain.

11Usaquian Jesusan cacëxun menu aín nunti rabë́ rancatancëxun a ëbiani ca ami sinani Jesúsbë cuancëxa.

Jesusan an aín nami chëquimicë ꞌinsínñu uni pëxcüa

(Mt 8.1-4; Mr 1.40-45)

12Jesúsa Galilea menu ꞌicë ëma achúshinu ꞌain ca axa an aín nami chëquimicë ꞌinsinan ꞌaisamaira oquin aín nami chëquimicë uni anu ꞌiacëxa. A unin ca a mërai a tanáin rantin puruni bëúnpucuquin Jesús cacëxa:

—Mix cushi ꞌixun camina ꞌaisa tanquin ꞌë pëxcuti ꞌain.

13Cacëxun aín mëcënan ramëquin ca Jesusan ꞌinsíncë uni cacëxa:

—Cana mi ꞌati ꞌain. Min nami ca upí ꞌitëcëni motia.

Usaquian cacëxëshi moti ca aín ñucë nëtë́acëxa. 14Usaria pëxcutia ca Jesusan cacëxa:

—ꞌËn mi pëxcucë ñuiquin camina uinu ꞌicë unibi catima ꞌain. Caíma cuanxun camina min nami pëxcúcë judíos sacerdote ismiti ꞌain. Ismianan camina Nucën Papa Dios rabiquin Moisés quiásabi oquin a ñu ꞌinánti ꞌain, camina asérabi pëxcúa quixuan camabi unin ꞌunánun.

15Usoquian Jesusan —ꞌën mi pëxcucë ënë ñuiquin uni caxunma ca ꞌatan —quixun canbi ca camaxunbi Jesusan ꞌacë ñucama ꞌimainun a ꞌinsíncë uni pëxcucë aribi ñuiquin chaniocëxa. Usaquian chaniocëbë ca ꞌaisamaira uni Jesusan bana ñuixunia cuaisa tani anu Jesús ꞌicënu riquiancëxa. ꞌInsíncë unicamaxribi ca a pëxcunun quiax anu riquiancëxa. 16Usaía ucëbëbi ca Jesús anu uni ꞌicëma menu aín Papa Diosbë banai cuancëxa.

Nicëma uni Jesusan pëxcüa

(Mt 9.1-8; Mr 2.1-12)

17Nëtë itsían xubunuxun Jesusan bana ñuixuncëbë ca fariseo unicama ꞌimainun an Moisésnën cuënëo bana uni ꞌunánmicë unicamaribi anu tsócë ꞌiacëxa. Acamax ca Galilea menu ꞌicë ëmacama ꞌimainun Judea menu ꞌicë ëmacama ꞌimainun Jerusalénuaxribi ricuatsincë ꞌiacëxa. Usa ꞌain ca bana ñuixuanan ꞌinsíncë unicama pëxcunun Nucën Papa Diosan cushiocë Jesús ꞌiacëxa. 18Jesusan bana ñuixunmainun ca raírinën uni achúshi ñucë nirucuaínquinbi tancëma bacë́tinu racácë bëacëxa. Bëquin ca sináncëxa, —xubunu atsínmiquin cananuna anua Jesús ꞌicë anu nanpáti ꞌai —quixun. 19Sináncëbëbi ca ꞌitsa unia tsitsíruan, anun atsínmiti ꞌaíma ꞌiacëxa. Atsínmicasmaquin ca tapitinën buáruxun xubu manánxun aín tapuacë a bërúaratancëxun anun aín bacë́tinën bëpáquin, anu ꞌicë unicama nëbë́tsi, Jesusan bëmánon nanpácëxa. 20Nanpáquin ca —Jesusan ca ënë uni pëxcuti ꞌicë —quixun aín nuitu mëu sináncëxa. Sinania atun sinan ꞌunánquin ca Jesusan ñucë uni cacëxa:

—Min ꞌuchacama ca tërë́ncë ꞌicën.

21Usaquian caia cuaquin ca an Moisésnën cuënëo bana ꞌunáncë unicama ꞌimainun fariseo unicaman sináncëxa: ¿Uisa uni cara ënëx ꞌic? Ax ca anúan Nucën Papa Diosaxëshi quiti banan banaia. Ax ca ꞌaisama ꞌicën. Uinu ꞌicë unínbi ca ꞌucha tërë́ntima ꞌicën. Nucën Papa Diosan cuni ca ꞌucha tërë́nti ꞌicën. 22Usaquian sinania ꞌunánquin ca Jesusan cacëxa:

—¿Uisacasquin caramina mitsun usaquin sinanin? 23ꞌËn cana uni ñucë —min ꞌuchacama ca tërë́ncë ꞌicë —quixun cananbi —niruquiani ca cuantan —quixunribi cati ꞌain. 24Nucën Papa Diosan cushínbi ꞌën ënë uni pëxcuia isquin camina asérabi ꞌunánti ꞌain, uni ꞌinux Nucën Papa Diosnuax uá ꞌën cana unin ꞌucharibi tërë́nti ꞌai quixun.

Caquin ca racábucë uni cacëxa:

—ꞌËn cana mi cain, niruquiani ca min bacë́ti bibiani min xubunu cuantan.

25Cacëxëshi niruquin aín bacë́ti bibiani ca Nucën Papa Dios rabibiani aín xubunu cuancëxa, anu ꞌicë unicaman ismainunbi. 26Usai niruquiani cuania isi ratuti ca Nucën Papa Dios rabi —ësa ñu cananuna isáma ꞌai —quiax quicancëxa.

Jesusan Leví aín uni ꞌinun ca

(Mt 9.9-13; Mr 2.13-17)

27Usaquin ꞌatancëx anuax cuanquin ca Jesusan Leví cacë uni anuxuan ꞌapu buánmiti curíqui bicë anua tsócë mëracëxa. Mëraquin ca cacëxa:

—ꞌËn mi ꞌunánminun ca ꞌëbë cuani ut.

28Cacëxëshi niruquiani ca aín ꞌati ñucama ëbiani Jesúsbë cuancëxa.

29Jesúsbë cuantancëxun ca Levitan, Jesúscëñun aín ꞌunánmicë unicamaribi canan piti ꞌitsa ꞌamitancëxun aín xubunuxuan abëtan pi unun ꞌitsa uni camiacëxa. Camicëx uxun ca Levísaribi ꞌitsa uni an ꞌapu buánmiti curíqui bicë ꞌimainun usa uni raíriribi, camaxunbi Jesús ꞌimainun aín ꞌunánmicë unicamabëtan mesanu tsóxun piacëxa. 30Usaria isquin ca fariseo unicama ꞌimainun an Moisésnën cuënëo bana ꞌunáncë unicaman atu ꞌatimaquin ñuiquin Jesusan ꞌunánmicë unicama cacëxa:

—¿Uisa cupí caramina mitsun an ꞌapu buánmiti curíqui bicë unicamabëtan pianan ꞌuchañu unicama raíribëtan pianan xëain?

31Caia ca Jesusan cacëxa:

—Paë tancëma uni, ax ca rucuturuan a ronti cuëënima. Paë tancë uni, ax cuni ca rucuturuan a ronti cuëënia. 32Usaribiti cana an —ꞌëx cana upí ꞌai —quixun sináncë unicama a ꞌënan ꞌinun cai uáma ꞌain. Ama, an —ꞌën ñu ꞌatima ꞌacë cupí, ꞌën nuitu upíma ꞌaish cana ꞌëxbi upí ꞌitima ꞌai —quixun sináncë unicama a cuni, upí ꞌinúxa sinanati ꞌënan ꞌinun cai cana ꞌëx uacën.

Uisacasquin cara aín ꞌunánmicë unicama samáquinma piia quixun Jesús ñucácan

(Mt 9.14-17; Mr 2.18-22)

33Usai quia ca fariseo unicama ꞌimainun axa abë ꞌicë unicaman Jesús ñucáquin cacëxa:

—Juanëan ꞌunánmicë unicaman ca bëtsi bëtsi nëtën Nucën Papa Diosbë banaquin pima samatia. Usaribiti ca fariseonëan ꞌunánmicë unicamaxribi ꞌia. ¿Usa ꞌaínbi cara uisacasquin min ꞌunánmicë unicaman pianan xëain?

34Cacëxun ca Jesusan cacëxa:

—¿An biti xanua unin biti nëtën caramina pi unun camicëxa ucë axa abë nuibanancë unicama masá nuituquian pima ꞌinun ꞌimiti ꞌain? Camina ꞌimitima ꞌain. 35Ësa ca. An xanu biti unin xanu biquin abëtan pi unun camicëx ca axa abë nuibanancë unicama masá nuitutima abë cuëënia. Xanu bibiani cuanquian a unin ëbiancëxun cuni ca axa abë nuibanancë unicaman masá nuituquin pitima ꞌicën. Usaribiquin ca ꞌën ꞌunánmicë unicama ꞌëbë ꞌixun masá nuituti samáquinma piia. Unían ꞌë bicëxun ꞌën ëbiancëxun cuni ca masá nuituquin pitima ꞌicën.

36Usaquin canan ca aín banaxa fariseo unicaman uni ꞌunánmicë banasama ꞌain, aín banabë fariseonëan ꞌunánmicë bana mëscúti rabanan Jesusan ësaquinribi a unicama cacëxa:

—Ca ësaribi ꞌicën. Nun aintsi uinu ꞌicë xanúnbi ca aín chupa ió tëaima, anun aín chupa xëni cëxëti. Tëaquin aín sani bicëx ca chupa ió ax ꞌatimatia. ꞌImainun ca a chupa iotan sanix chupa xëni iscësama ꞌia. 37Ësaribi ca. Ui unínbi ca ñuina xacá anu ꞌunpax chumusa oquin ꞌacë, axa xëni ꞌain, anu ñu chëcacë ꞌaruima. Anu ꞌarucëxunbi ca ñu chëcacë ax cubini uruquin ñuina xacá xëni a tucaia. Axa tuquicëbë ca chëcaxun anu ꞌarucëxa cubíncë ñu ax tutuqui nëtëtia. 38Usa ꞌain ca ñu chëcacë ñuina xacá chumusa oquin ꞌacë iónushi ꞌaruti ꞌicën. 39Bëráma chëcacë ñu ꞌaxun —ax ca upí ꞌicë —quixun sinánquin ca unin bëría chëcacë ñu ꞌaisama tania.

Usaquin ca Jesusan cacëxa.

Currently Selected:

Lucas 5: cbrPB

Highlight

Copy