Lucas 4

Ñunshin ꞌatimanën ꞌapúan Jesús ꞌatima ñu ꞌamiti sinan

(Mt 4.1-11; Mr 1.12-13)

1Juanëan Jordán bacanuxun nashimicëbë abë ꞌixun ca Nucën Papa Diosan Bëru Ñunshin Upitan Jesús anu uni ꞌicëma menu cuanti sinánmiacëxa. 2Cuanx ca cuarenta nëtën anu ꞌiacëxa. Anua ꞌicë ca ñunshin ꞌatimanën ꞌapun ñu ꞌaisama ꞌamicatsi quixun caraishiacëxa. Anu ꞌixun ca a nëtëcaman Jesusan ñu piama ꞌicën. Ñu piima ca panancëxa. 3Panancë isquin ca ñunshin ꞌatimanën ꞌapun ꞌatima ñu ꞌamicatsi quixun ësaquin cacëxa:

—Asérabi Diosan Bëchicë ꞌixun ca ënë maxax pán ꞌinun cat.

4Cacëxun ca Jesusan cacëxa:

—Ësai ca Nucën Papa Diosan bana cuënëo quia: “Pán piishi ca uni tsótima ꞌicën”.

5Usotancëxun ca amiribishi tantëcëncatsi quixun ñunshin ꞌatimanën ꞌapun aín bashi chairucë manan Jesús buáncëxa. Buántancëxun ca anuxun camabi me ꞌimainun a menu ꞌicë ëmacama cuainacëa bënë́nquinshi ismiacëxa. 6Ismiquin ca cacëxa:

—Ami iscë mecama ꞌimainun ami iscë ëmacama ꞌimainun anu ꞌicë ñucama ënëx ca ꞌënan ꞌicën. Usa ꞌicë cana ui carana ꞌinántisa tani a, aín ꞌibu ꞌimiquin, ënë ñucama ꞌinánti ꞌain. 7Rantin puruni tsóbuquinmi min dios ꞌicë ꞌë rabicëxun cana ënë mecama ꞌimainun ënë menu ꞌicë ëmacama ꞌimainun anu ꞌicë ñucama mixmi aín ꞌibu ꞌinun mi ꞌinánti ꞌain.

8Usaquian cacëxun ca Jesusan cacëxa:

—Ñunshin ꞌatimanën ꞌapu, ënuax ca cuantan. Nucën Papa Diosan bana cuënëo ca ësai quia: “Min ꞌIbu Diosëshi camina rabiti ꞌain. Rabiquin camina ashi ax cuëëncësabi oquin ñu ꞌaxunti ꞌain”.

9Usotancëxun ca amiribishi tantëcëncatsi quixun ñunshin ꞌatimanën ꞌapun Jesús Jerusalénu buáncëxa. Buántancëxun ca anu ꞌicë anuxun Nucën Papa Dios rabiti xubu aín mascuan manáinra sënë́n buánruacëxa. Buánrutancëxun ca cacëxa:

—Mix asérabi Diosan Bëchicë ꞌaish ca ënuax nuánquianx menu nipacët. 10Diosan bana cuënëo ca ësai quia:

Nucën Papa Diosan ca mia bërúanun quixun aín ángelcama xuti ꞌicën. 11Atun bërúancëxmi maxáxmi tachacaxma ꞌinun ca aín mëcënan mi biti ꞌicën.

12Usoquin cacëxun ca Jesusan cacëxa:

—Ësairibi ca Nucën Papa Diosan bana cuënëo quia: “Nucën ꞌIbu Diosan cara ꞌë ië́miti ꞌicë iscatsi quixun camina a tantima ꞌain”.

13Usaquian Jesusan cacëx ca anúan Jesús tantëcënti ꞌaíma ꞌain, ñunshin ꞌatimanën ꞌapu, tantëcëni ucatsi quiax, Jesús ëbiani cuancëxa.

Galilea menu Jesús cuantëcëan

(Mt 4.12-17; Mr 1.14-15)

14Usaquian ꞌacëx ca Jesús, bëtsi ñu sinanima Nucën Papa Diosan Bëru Ñunshin Upitan cushioquin sinánmicëxëshi, Galilea menu cuantëcëancëxa. Cuanxa bëbaia ca Galilea ꞌimainun a ꞌurama ꞌicë mecamanu ꞌicë unicamanribi a ñuiquin chaniocëxa. 15Anua judíos unicama timë́cë xubu itsi xubu itsinu cuanquin ca Jesusan anu timë́cë unicama bana ꞌunánmiacëxa. Usoquian ꞌaia ca camaxunbi a rabiacëxa.

Jesús Nazaret ëmanu ꞌiá

(Mt 13.53-58; Mr 6.1-6)

16Anuaxa canicë Nazaret ëma, anu ca Jesús cuancëxa. Cuanx bëbatancëx ca anun ñu mëëtima nëtëa ꞌicëbë anua judíos unicama timë́cë xubunu cuancëxa, axa anun ñu mëëtima nëtën ꞌicësabi oi. Cuanx atsíanx ca unicaman cuanan Nucën Papa Diosan bana cuënëo ñui niruacëxa. 17Niruia ca an a quirica bërúancë unin Isaíasnën cuënëo bana a atu ꞌaxunun quixun ꞌináncëxa. ꞌInáncëxun biquin ca aín catanua ësai quicë bana bariquin mëraquin atun cuanun quixun ꞌaxuancëxa:

18Nucën ꞌIbu Diosan xucëx ꞌënu uax ca aín Bëru Ñunshin Upí ꞌëbë ꞌicën. An ca aín Bëru Ñunshin Upí ꞌinánquin cushioquin ñuñuma unicama upí bana anúan atux Nucën Papa Diosnan ꞌi cuëënun ñuixuanan, axa masá nuitucë unicama upí oquin sinánminun ꞌë caxa. ꞌImainun ca sipuacë ꞌaíshbia upitax chiquíncë ꞌinun ꞌimianan bëxuñu unicama bëxuñuma ꞌinun ꞌimianan bëtsi bëtsi ocë unicama bëtsi bëtsi ocëma ꞌiminun ꞌë caxa. 19ꞌImainun ca anúan atun ꞌIbu Diosan nuibaquin ꞌaquinti nëtë ca uaxa quixun unicama canun quixun ꞌë caxa.

20Usaia quicë bana ꞌatancëxun mapuquin, an a quirica bërúancë uni ꞌinani ca tsóbuacëxa. Tsóbutia ca a xubunu timë́cë unicaman ënquinma abi isacëxa. 21Usoquin iscëxun ca Jesusan cacëxa:

—Bërí ca anun ënë bana quicësabi oi ꞌiti nëtë uaxa.

22Cacëxuan cuati ca anu ꞌicë unicamax cuëëni —aín bana ca asábi ꞌicë —quianan —axa quicë banax ca upíira ꞌaish uni itsin banasama ꞌicë —quiax quiacëxa. Usai qui ca —¿Josénën bëchicë ꞌaíshbi cara usai banain? —quiax canancëxa. 23Canania ꞌunánquin ca Jesusan cacëxa:

—Mitsun sapi camina ësaia uni quicë bana anun ꞌë caisa tanin: “Mix rucuturu ꞌaish ca mixbi pëxcút”. Usaquin caquin camina ꞌë cati ꞌain: Minmi Capernaúm ëmanuxun ñu ꞌaia nun cuacë usaribi oquin camina anuaxmi canicë me ënuxunribi ꞌati ꞌai quixun.

24Canan ca Jesusan cacëxa:

—Mitsun usaquin ꞌë cati sináncë ꞌaínbi cana asérabi mitsu cain, an Nucën Papa Dios quicë bana uni ñuixuncë unían, anuaxa canicë menuxun bana ñuixunia, ca anu ꞌicë unicaman cuaisama tania. 25Ësaquinribi cana asérabi mitsu cain, bëráma ca Elías an Nucën Papa Dios quicë bana unicama ñuixuncë ꞌiacëxa. Elías anu ꞌain ca rabë́ ꞌimainun achúshi bari ꞌitancëxa mëcën achúshi ꞌimainun achúshi ꞌuxën ꞌuí ꞌibúcëbëma, piti ꞌaíma ꞌain, unicama ꞌacëñuma ꞌiacëxa. 26Usai ꞌimainuan ꞌitsa casunamëcë xanu ꞌaínbi ca raírima, Sidón cacë menu ꞌicë ëma, Sarepta cacë, anu ꞌicë casunamëcë xanu achúshi, ashia ꞌaquinun Nucën Papa Diosan Elías xuacëxa. 27ꞌImainun ca Eliseonëxribi an Nucën Papa Dios quicë bana unicama ñuixuncë ꞌiacëxa. Axa anu ꞌain ca an nami chëquímicë ꞌinsínñu uni ꞌitsa a nëtënu ꞌiacëxa. ꞌItsa ꞌaínbi ca Siria cacë menu ꞌicë uni achúshi, Naamán cacë, ashi Nucën Papa Diosan ꞌamicëxun Eliseonën aín nami upí ꞌitëcënun ꞌimiacëxa.

28Jesusan usaquin cacëxun cuati ca anu ꞌicë unicamax xuamati ami nishacëxa. 29Nishi niruquin ca a ëmanua chiquínbianquin anua a ëma ꞌicë matá chairucë sënë́ncënu anuxun titicacatsi quixun Jesús buáncancëxa. 30Usaquin sinánquian buáncancëxbi ca Jesús a unicama nëbë́tsinuax atu ëbiani cuancëxa.

Ñunshin ꞌatimañu uni Jesusan pëxcüa

(Mr 1.21-28)

31Nazaretnuax cuanx ca Galilea menu ꞌicë ëma itsi, Capernaúm, anu cuancëxa. Cuanx bëbatancëxun ca anun ñu mëëtima nëtën anua judíos unicama timë́ti xubunu atsínxun, anu ꞌicë unicama bana ꞌunánmiacëxa. 32An xuá ꞌixun ca Jesusan Nucën Papa Diosan cushínbi bana ñuixuancëxa. Usai banaia cuati ca anu ꞌicë unicamax ratuti —usa bana cuacëma cananuna ꞌai —quiax quiacëxa.

33Usa ꞌain ca anu uni achúshi ñunshin ꞌatimañu ꞌiacëxa. Usa ꞌixun ca munuma cuëncë́nquin ësaquin cacëxa: 34—Jesús Nazaretnu ꞌicë, ¿min caina nu uisoti ꞌain? ¿Mix caramina nu cëñui uan? ꞌËn cana mi ꞌunan. Mix camina ainan ꞌaish Diosnuax ucë, a ꞌain.

35Quia ca Jesusan cacëxa:

—Ca nëtët. Ënë uninuax ca chiquít.

Usaquian cacëx ca ñunshin ꞌatima a uni menu nipacëmi, anu ꞌicë unicaman ismainunbi, chiquíacëxa, uisabi oíma. 36Usoia isi ca anu ꞌicë unicamax ratúacëxa. Ratuti ca atúxbi canani quiacëxa:

—¿Uisa bana cara ënëx ꞌic? Ënë unix ca ñunshin ꞌatimanënbia cuaisabi oi cushin banaia. Uninuax, ca chiquít, quixuan cacëx ca chiquitia.

37Usoquian Jesusan ꞌacë ñucama ñuiquin ca Capernaúmnu ꞌicë unicamainshima a ꞌurama ꞌicë menua ꞌicë ëmacamanuxunribi camaxunbi chaniocëxa.

Simón Pedronën nachia Jesusan pëxcüa

(Mt 8.14-15; Mr 1.29-31)

38Anua judíos unicama timë́ti xubunuax cuanx ca Jesús Simonan xubunu bëbai anu atsíancëxa. Atsinia ca Simonan nachia ꞌitsisan ꞌi ꞌinsían, anu ꞌicë unicaman —Simonan nachi caramina nu pëxcuxuntima ꞌai —quixun cacëxa. 39Cacëx anua racácënu cuani, ami bësui ñanáquian, aín ꞌitsis nëtë́nun cacëxëshi ca Simonan nachi pëxcúacëxa. Usaquian Jesusan ꞌacëxëshi pëxcuti niruxun ca atu pimiacëxa.

Uni itsicamaribia Jesusan pëxcüa

(Mt 8.16-17; Mr 1.32-34)

40Bari cuabucëbëa bëbaquíshbucëbëtan ca a ëmanu ꞌicë unicaman, uni ꞌinsíncëcama bëtsi bëtsi ꞌinsínñu an pëxcunun Jesúsnu bëacëxa. Bëia ca camabi, aín mëcënan ramëquin, pëxcüacëxa. 41Ñunshin ꞌatimanëxribi ca ꞌitsa uni ꞌinsíncënuax chiquíacëxa. Chiquiti munuma cuëncëni ca quiacëxa:

—Mix camina Diosan Bëchicë ꞌain.

Quiabi ca Jesusan —ca nëtë́t —caquin ñunshin ꞌatima banamiquinma nëtë́miacëxa. Atúxa Jesús ax ca Cristo, a Nucën Papa Diosan xucë a ꞌicë quixun ꞌunáncë ꞌaíshbi usai quiti ca Jesús cuëëanma ꞌicën. Usa ꞌain ca atúxa quiabi nëtë́miacëxa.

Galilea menuxun Jesusan bana ñuixuan

(Mr 1.35-39)

42Usoquin ꞌoonx ca pëcaracëbë Jesús Capernaúmnuax cuanx anu uni ꞌicëma menu bëbacëxa. Axa cuancë a caxu a baribiani cuanx ca Capernaúmnu ꞌicë ꞌitsaira uni anua Jesús ꞌicë anu bëbaquin a mëracëxa. Mëraquin ca —nu ëbiani camina cuantima ꞌai —quixun cacëxa. 43Cacëxun ca Jesusan cacëxa:

—Uicamax cara ꞌëmi catamëtia acama ca Nucën Papa Diosan ainan ꞌimia quixun camabi uni ñuixunun ca Nucën Papa Diosan ꞌë xuaxa. Usa ꞌixun cana mitsuishima, camabi ëmanu ꞌicë unicamaribi a bana ñuixuni cuanti ꞌain.

44Usaquin ca Jesusan an Capernaúmnu ꞌicë unicama cacësabi oquin, Galilea menu ꞌicë ëmacamanu cuanxun, anua judíos unicama timë́cë xubucamanuxun uni bana ñuixuancëxa.

Currently Selected:

Lucas 4: cbrPB

Highlight

Copy