Lucas 3

II. GALILEA MENUXUAN JESUSAN UNICAMA BANA ÑUIXUAN (3.1-9.50)

Anu uni ꞌicëma menuxuan an uni nashimicë, Juanën uni bana ñuixuan

(Mt 3.1-12; Mr 1.1-8; Jn 1.19-28)

1Tiberio anun Romanuxun ꞌapu ꞌimicancë nëtëa quince baritia ꞌicëbë ca Poncio Pilato Judea menu ꞌicë unicaman ꞌapu ꞌiacëxa. Usai ꞌimainun ca Herodes Galilea menu ꞌicë ꞌapu ꞌiacëxa. ꞌImainun ca Herodesnën xucën, Filipo, ax Iturea me ꞌimainun Traconíte menu ꞌicë ꞌapu ꞌiacëxa. ꞌImainun ca Lisanias cacë uni, ax Abilinia cacë menu ꞌicë ꞌapu ꞌiacëxa. 2Usaía ꞌimainun ca Anás ꞌimainun Caifás a rabëtax judíos sacerdotecaman cushi ꞌiacëxa. ꞌImainun ca Zacaríasnën bëchicë, Juan, axa anu uni ꞌicëma menu ꞌicë, a Nucën Papa Diosan aín bana sinánmiquian unicama bana ñuixunun quixun ꞌimiacëxa. 3ꞌImicëx cuani Jordán cacë baca rapasu ꞌicë mecamanu cuanquin bana ñuixuni ca ësai quiacëxa:

—Sinanaquin mitsun ꞌuchacama ëni Nucën Papa Diosmi sinani camina nashimicë ꞌiti ꞌain, mitsun ꞌuchacama tërë́ncë ꞌinun.

4Usai ca Juan quiacëxa, a ñuiquian an Nucën Papa Dios quicë bana unicama ñuixuncë, Isaíasnën cuënëosabi oi, ësai quicë:

Anu uni ꞌicëma menuxun munuma bana ñui ca a unix ësai quia: Nucën ꞌIbu ca aia, camina axa anun uti bai mëníoquin racanacësaribi oi aín bana cuanux sinanati ꞌain. 5Matá nancë́cëcamax ca natacacácë ꞌiti ꞌicën, aín bashicama ꞌimainun matácama ca bëtsibëtan sënën ꞌiti ꞌicën, bai tëntúncëcamax ca racanacë ꞌiti ꞌicën, bainu ꞌicë quinicama ca natacacácë ꞌiti ꞌicën. 6Usoquian ꞌan ca ax uti ꞌicën. Axira ucëbëtan ca camabi unin, uisaira oquin cara Nucën Papa Diosan, unicama ꞌaquinquin ainan ꞌinun ië́miti ꞌicë quixun isti ꞌicën.

7Usa ꞌain ca Juanën atu nashiminun ꞌaisamaira uni anu riquiancëxa. Riquianxa bëbacë ca Juanën cacëxa:

—Mitsux ꞌatima ꞌixun uni paráncë ꞌaish camina mitsun raracama ꞌiásaribiti, runu an uni picë, asa ꞌain. ¿Usa ꞌicë cara anúan Nucën Papa Diosan ꞌaisama unicama atumi nishquin masóti nëtën masócë ꞌitin rabananmi sinananun quixun uin mitsu cax? 8Unían mitsu asérabi sinanacë ꞌai quixun ꞌunánun camina ñu ꞌaisama ꞌati ënquin upí ñuishi ꞌati ꞌain. —Nux Abrahamnën rëbúnqui ꞌaish cananuna Nucën Papa Diosan iscëx upí ꞌai —quixun sinánxunma ca ꞌacan. Asérabi cana mitsu cain, ꞌaisa tanquin ca Nucën Papa Diosan ënë maxáxbi bëtsi oquin Abrahamnën rëbúnqui ꞌimiti ꞌicën. 9Ësa ca. A rëti aín manë ruë tuíanx a rapasu niracëquin ca an upí oquin tuacëma icama rëtancëxun xanania unin tsin nëënia. Usaribi oquin ca bënë́nquinshi mitsúxmi sinanati ami sináncëma ꞌicë Nucën Papa Diosan mitsu ꞌati ꞌicën.

10Juanëan usaquin ñuixunia cuaquin ca anu ꞌicë unicaman —¿Nucën Papa Dios cuëëncësabi oi ꞌinuxun caranuna añu ꞌati ꞌai? —quixun Juan ñucáquin cacëxa. 11Cacëxun ca Juanën cacëxa:

—Uix cara cutun rabë́ñu ꞌicë an ca cutúnñuma uni aín cutun achúshi ꞌinánti ꞌicën. Uix cara pitiñu ꞌicë an ca pitiñuma uni paná ꞌinánti ꞌicën.

12An ꞌapu buánmiti curíqui bicë unicamaxribi ca an atu nashiminun quiax Juanu cuancëxa. Cuanx bëbaxun ca cacëxa:

—¿Nucën Papa Dios cuëëncësabi oi ꞌinuxun caranuna añu ꞌati ꞌain?

13Cacëxun ca Juanën cacëxa:

—Uiti curíquimi binun cara mi caxa, ashi camina ꞌapu buánminuxun biti ꞌain.

14Suntárucamanribi ca anu cuanxun Juan ñucáquin cacëxa:

—¿Nunribi caranuna añu ꞌati ꞌain?

Ñucácëxun ca cacëxa:

—Camina unin ñu ꞌimainun aín curíqui mëcamatima ꞌain, mëëxun ꞌanan camina paránxunribi unin ñu mëcamatima ꞌain, camina cëmëi ami manánxunribi unin ñu bitima ꞌain. Mitsun ñu ꞌati cupía ꞌapun curíqui ꞌináncëxun camina ꞌatimati banaquinma cuëënquin ashi biti ꞌain.

15Ësoquian Juanën bana ñuixunia an cuacë unicaman ca —ënë uni sapi ca Cristo, axa uti nun caíncë, a ꞌicë —quixun cuëënquin sináncëxa. 16Sinania ca Juanën anu ꞌicë unicama cacëxa:

—ꞌËn cana mitsu ꞌumpaxan nashimin. Usa ꞌaínbi ca ꞌësamaira uni ꞌë caxu aia. Axa upíira ꞌaish cushiira ꞌain cana ꞌëx asaribima ꞌaish ami rabini a ꞌurama ꞌitima ꞌain. Usai ꞌiquin cana aín taxacabi tubuxuntima ꞌain. Axira uquin ca uni aín Bëru Ñunshin Upíñu ꞌinun ꞌimiti ꞌicën. ꞌImiquin ca tsi rëquirucënëan ñu ꞌacësoquin aín cushin aín nuitunua sináncë ñu ꞌatimacama a cëñuquin uni upí ꞌimiti ꞌicën. 17An ñu ꞌapácë unin ꞌacësaribi oquin ca ꞌati ꞌicën. Ca ësa ꞌiti ꞌicën. Unin ca ñu bëru trigo ꞌapatia. ꞌApátancëxun ca bimia bitsia. Bitancëxun ca bucúnxun chacaia. Chacaquian tacaia ca aín xacá suñun amo putia. Pucëbë ca aín bëru ax tiquia. Usai ꞌia bërúanxun bixun bucúntancëxun ca aín xacácama tsi rëquirucë bënántisamanën nëënia. Usaribi oquin ca axa uti an aín ꞌacë ñucama ꞌunánquin, upí unicama abëa ꞌiti bianan ꞌatimacama a atun ñu ꞌatima ꞌacë cupí bimi xacá nëënti pucësa ꞌimiti ꞌicën.

18Usaquin bana ñuixuanan unicama ꞌësëquin ca Juanën Jesús ñuiquin a cuatia cuëënun bana ñuixuancëxa. 19Ñuixuanan ca ꞌapu Herodes cacë an aín xucënan xanu, Herodías cacë, a bianan bëtsi ñu ꞌatimaribi ꞌacë ꞌicë —minmi ꞌacë ñu ax ca ꞌaisama ꞌicë —quixun Juanën ꞌapu Herodes a cacëxa. 20Usaquian cacëxunbi sinanaquinma ñu ꞌatimaira ꞌatëcënquin ca Herodesnën Juan sipuanun aín unicama cacëxa.

Juanëan Jesús nashimia

(Mt 3.13-17; Mr 1.9-11)

21Sipuacëma pan ꞌixun unicama nashimianan ca Juanën Jesúsribi nashimiacëxa. Nashimicëx aín Papa Diosbë banacëbë ca naí panárabëacëxa. 22Usacëbë ca Nucën Papa Diosan Bëru Ñunshin Upí numacuru iscësa ꞌaish uax anu ꞌiruacëxa. Usaía ꞌicëbëtan ca Jesusan naínuaxa banaia cuacëxa, ësai qui:

—Mix camina ꞌëx amiira sináncë bacë bëchicë ꞌain. Mimi sinani cana chuámarua tani cuëënin.

Jesusan chaitiocëcama ꞌimainun aín raracamaxa ꞌiá

(Mt 1.1-17)

23Unicama pain bana ñuixuanan ꞌaquini ca treinta baritiañusa Jesús ꞌiacëxa. Unicaman sináncëx ca Josénëx aín papa ꞌiacëxa. José ax ca Elínën bëchicë ꞌiacëxa. 24Elí ax ca Matatnën bëchicë ꞌiacëxa. Matat ax ca Levitan bëchicë ꞌiacëxa. Leví ax ca Melquín bëchicë ꞌiacëxa. Melqui ax ca Jananën bëchicë ꞌiacëxa. Jana ax ca Josénën bëchicë ꞌiacëxa. 25José ax ca Matatíasnën bëchicë ꞌiacëxa. Matatías ax ca Amosnën bëchicë ꞌiacëxa. Amós ax ca Nahumnën bëchicë ꞌiacëxa. Nahum ax ca Eslinën bëchicë ꞌiacëxa. Esli ax ca Nagainën bëchicë ꞌiacëxa. 26Nagai ax ca Maatnën bëchicë ꞌiacëxa. Maat ax ca Matatíasnën bëchicë ꞌiacëxa. Matatías ax ca Semeinën bëchicë ꞌiacëxa. Semein ax ca Josénën bëchicë ꞌiacëxa. José ax ca Judánën bëchicë ꞌiacëxa. 27Judá ax ca Joananën bëchicë ꞌiacëxa. Joanan ax ca Resan bëchicë ꞌiacëxa. Resa ax ca Zorobabelnën bëchicë ꞌiacëxa. Zorobabel ax ca Salatielnën bëchicë ꞌiacëxa. Salatiel ax ca Nerín bëchicë ꞌiacëxa. 28Neri ax ca Melquin bëchicë ꞌiacëxa. Melqui ax ca Adinën bëchicë ꞌiacëxa. Adi ax ca Cosamnën bëchicë ꞌiacëxa. Cosam ax ca Elmodamnën bëchicë ꞌiacëxa. Elmodam ax ca Ernën bëchicë ꞌiacëxa. 29Er ax ca Josuénën bëchicë ꞌiacëxa. Josué ax ca Eliezernën bëchicë ꞌiacëxa. Eliezer ax ca Jorimnën bëchicë ꞌiacëxa. Jorim ax ca Matatnën bëchicë ꞌiacëxa. 30Matat ax ca Levitan bëchicë ꞌiacëxa. Leví ax ca Simeonën bëchicë ꞌiacëxa. Simeón ax ca Judatan bëchicë ꞌiacëxa. Judá ax ca Josénën bëchicë ꞌiacëxa. José ax ca Jonanën bëchicë ꞌiacëxa. Jonán ax ca Eliaquimnën bëchicë ꞌiacëxa. 31Eliaquim ax ca Meleanën bëchicë ꞌiacëxa. Melea ax ca Mainanën bëchicë ꞌiacëxa. Mainán ax ca Matatanën bëchicë ꞌiacëxa. Matata ax ca Natanën bëchicë ꞌiacëxa. 32Natán ax ca Davitan bëchicë ꞌiacëxa. David ax ca Isaínën bëchicë ꞌiacëxa. Isaí ax ca Obednën bëchicë ꞌiacëxa. Obed ax ca Booznën bëchicë ꞌiacëxa. Booz ax ca Salan bëchicë ꞌiacëxa. Sala ax ca Naasonën bëchicë ꞌiacëxa. 33Naasón ax ca Aminadabnën bëchicë ꞌiacëxa. Aminadab ax ca Aramnën bëchicë ꞌiacëxa. Aram ax ca Esromnën bëchicë ꞌiacëxa. Esrom ax ca Faresan bëchicë ꞌiacëxa. Fares ax ca Judatan bëchicë ꞌiacëxa. 34Judá ax ca Jacobnën bëchicë ꞌiacëxa. Jacob ax ca Isaacnën bëchicë ꞌiacëxa. Isaac ax ca Abrahamnën bëchicë ꞌiacëxa. Abraham ax ca Tarénën bëchicë ꞌiacëxa. Taré ax ca Nacornën bëchicë ꞌiacëxa. 35Nacor ax ca Serugnën bëchicë ꞌiacëxa. Serug ax ca Ragaunën bëchicë ꞌiacëxa. Ragau ax ca Pelegnën bëchicë ꞌiacëxa. Peleg ax ca Hebernën bëchicë ꞌiacëxa. Heber ax ca Salan bëchicë ꞌiacëxa. 36Sala ax ca Cainanën bëchicë ꞌiacëxa. Cainán ax ca Arfaxadnën bëchicë ꞌiacëxa. Arfaxad ax ca Semnën bëchicë ꞌiacëxa. Sem ax ca Noénën bëchicë ꞌiacëxa. Noé ax ca Lamecnën bëchicë ꞌiacëxa. 37Lamec ax ca Matusalenën bëchicë ꞌiacëxa. Matusalén ax ca Enocnën bëchicë ꞌiacëxa. Enoc ax ca Jarednën bëchicë ꞌiacëxa. Jared ax ca Mahalaleelnën bëchicë ꞌiacëxa. Mahalaleel ax ca Cainanën bëchicë ꞌiacëxa. 38Cainán ax ca Enosnën bëchicë ꞌiacëxa. Enós ax ca Setnën bëchicë ꞌiacëxa. Set ax ca Adanën bëchicë ꞌiacëxa. Adán ax ca Nucën Papa Diosan bëchicë ꞌiacëxa.

Currently Selected:

Lucas 3: cbrPB

Highlight

Copy