Lucas 16

An ñu mëëxuncë unían uni upí oquin ñu ꞌaxuncëma bana

1Jesusan ca aín ꞌunánmicë unicama ësaquinribi cacëxa:

—Ësa ca. Ñuñu uni achúshinën ca aín uni achúshi aín ñua upí oquin bërúanun quixun caxa. Canbi ca uni itsin ami manánquin, an a uni ñu mëëmicë uni caxa: Min unin ca min ñu bërúanquinma nëtë́mia quixun. 2Cacëxun cuatancëxuan unun quixun camicëxa ucë ca an a ñu mëëmicë unin aín uni caxa: Mimi ca uni manania. ¿Uisa cupí cara usa ꞌic? Cana mi chiquínti ꞌain. Cuanuxun camina anumi ꞌën mi bërúanxunun cacë ꞌën ñucama cuënëocë quiricacama ꞌë bëxúnti ꞌain. 3Cacëxun ca an ñu mëëxuncë unin sinánxa: ¿ꞌË chiquíncëxun carana añu ꞌati ꞌain? ꞌËx cushiirama ꞌixun cana me naëquin ñu mëëtima ꞌain, ꞌëa ñu ꞌinánun uni catimi cana rabínti ꞌain. ¿Añu carana ꞌati ꞌain? 4Ënuax chiquítancëxun carana unían aín xubunu ꞌinun ꞌë binun añu ꞌati ꞌai quixun cana sinanin. 5Sinántancëxun camicëxa aia ca a unin an a ñu mëëmicë uni ribíncë unicama achúshi achúshi ñucáquin ax paían ucë uni caxa: ¿Uiti caramina an ꞌë ñu mëëmicë uni ribinin? 6Ñucácëxuan —cien bidones xënin cupí cana ribinin —quixun cacëxun ca caxa: Bënëtishi tsóbuquin ca anu minmi ribíncë ñucama cuënëocë quirica ënë nianan min ribin ënë́xa ꞌitsamashi ꞌitánun bëtsi quiricanu cincuentashi cuënëot. 7Catancëxun ca aia bëtsiribi ñucáxa: ¿Uiti caramina min an ꞌë ñu mëëmicë uni ribinin? Ñucácëxuan —cien burasa trigo aín cupí cana ribinin —quixun cacëxun ca caxa: Anu minmi ribíncë ñucama cuënëocë quirica ënë nianan ca min ribin ënë́xa ꞌitsamashi ꞌitánun bëtsi quiricanu ochentashi cuënëot. 8Usaquin ca an a ñu mëëxuncë unin ꞌaxa quixun ꞌunánquin ca an a uni ñu mëëmicë unin sinánxa: An ꞌë ñu mëëxuncë unin ca uisai cara curíquiñuma ꞌaíshbi ꞌiti ꞌicë quixun sinánxun ñu ꞌaquin ꞌë paránti sinánxa quixun.

Ësaquin catancëxun ca Jesusan cacëxa:

—An ënë menushi upitax bucuti sináncë unin ca aín cuëëncësari ꞌiti upí oquin ꞌunania, Nucën Papa Diosmi sináncë unían ꞌacësamaira oquin. 9ꞌËn cana mitsu cain, mitsun curíqui anun camina uni itsi ꞌaquinsa ꞌicë ꞌaquinti ꞌain. ꞌAquincëx mitsubë nuibanancë ꞌianan ꞌënan ꞌaish bamatancëxun ca mitsúxribimi ꞌëbë ꞌinun, ꞌën ꞌiti anuxun mitsu caínti ꞌicën.

10ꞌItsama curíquiñu ꞌixunbia nëtë́miquinma upí oquin sinánquin, anun upí ñu ꞌacë uni an ca ꞌitsa curíquiñu ꞌixun usabi oquin upí oquin sinánquin nëtë́miquinma anun upí ñu ꞌati ꞌicën. ꞌImainun ca ꞌitsama curíquiñu ꞌixunbia nëtë́mianan upí oquin sinánquinma anun ꞌaisama ñu ꞌacë uni, an ꞌitsa curíquiñu ꞌixun usabi oquin nëtë́mianan anun ꞌaisama ñu ꞌati ꞌicën. 11Usaribi oquin ca mitsun curíqui anun upí oquin sinánquin ñu ꞌaquinma nëtë́miananmi, mitsux cuëëncësa oquinshi ñu ꞌacë ꞌicë Nucën Papa Diosan aín unicama ꞌunánmicësa oquin ꞌunánmima ꞌianan aín unicama ꞌamicësa oquin ñu mëëmitima ꞌicën. 12An mitsu cacësabi oquin ꞌaquinmami, aín ñu ꞌimainun aín curíqui nëtë́mianan upí oquin bërúanxuncëma ꞌicë ca uínbi minan ꞌinun ñu ꞌimainun curíqui mitsu ꞌinántima ꞌicën.

13Ënëx ca ësa ꞌicën: Achúshi unin ca rabë́ uni ñu mëëxuntima ꞌicën. Rabë́ uni ñu mëëxuncë ꞌixun ca bëtsishi nuibaquin upí oquin ñu ꞌaxuanan bëtsi nuibatima ꞌicën, ca achúshinën bana cuaquin bëtsían cacëxun aín bana parë́ti ꞌicën. Usaribiti ca uni curíqui ꞌimainun bëtsi bëtsi ñumishi sináncë ꞌaish Nucën Papa Diosmi upiti sinanima.

14Usaía quia cuaquin ca fariseo unicaman atux ꞌitsa curíquiñu ꞌiti cuëëncë ꞌixun, aín bana cuaisama tani a ñui ꞌatimati banaquin Jesús ꞌusáncëxa. 15ꞌUsáncëxun ꞌunánquin ca Jesusan cacëxa:

—Mitsux isamina upí ꞌai quixuan unin isnun quixun camina mitsux cuëëncë ñuishi ꞌain. Usa ꞌaínbi ca Nucën Papa Diosan mitsun nuitu mëúmi sináncë a ꞌunania. Ax isa upí ꞌicë quixuan unin sináncë uni a ca Nucën Papa Diosan aín nuitu ꞌunánquin upíma isia.

Moisésnën cuënëo banacama ꞌimainun Jesúsmi catamëti uni Nucën Papa Diosnan ꞌiti bana

16Ësaquinribi ca Jesusan cacëxa:

—Juan ucëma pan ꞌain ca Moisés ꞌimainun an Nucën Papa Dios quicë bana uni ñuixuncë unicaman ꞌë ñuiquin unicama ñuixuancëxa. A unicama caxu uquin ca Juanën ꞌë ñuiquin, axa utia judíos unicaman caíncë, ax ca uaxa quiquin unicama ñuixuanxa. Usa ꞌain ca ꞌënribi, ꞌëmi catamëcë unicama ca Nucën Papa Diosnan ꞌiti ꞌicë quixun ñuixunia cuanan ꞌën ñu ꞌaia isi ꞌaisamaira unix Nucën Papa Diosnan ꞌiti sinania.

17Naí ꞌimainun mecama cëñúcëbëbi ca Nucën Papa Diosan bana aín unicaman cuënëo, axëshi —usai ca ꞌiti ꞌicë —quiá ꞌain, usabi ꞌiti ꞌicën.

Jesusan unin aín xanu ëntima ñuia

(Mt 19.1-12; Mr 10.1-12)

18An aín xanu ënxun xanu itsi bicë uni ax ca ꞌuchaia, aín xanuma ꞌaínbi xanu itsibë ꞌia ꞌicësaribiti. ꞌImainun ca an uni itsin ëncë xanu bicë uni axribi ꞌuchaia, uni itsin xanubëa ꞌicësa ꞌaish.

Lázaro ꞌimainun ñuñu uni ñuicë bana

19Jesusan ca ësaquinribi cacëxa:

—Ënëx ca ësa ꞌicën. Achúshi uni ñuñuira ꞌaish chupa upíira upí minanën pucucësa ꞌimainun xapu ꞌacësa pañucë ꞌianan ꞌaisamaira piti upíira upíñu ꞌixun camabi nëtën upí oquin pucháquin picë ꞌiacëxa. 20A unin xubu xëcuë tanáin ca ñuñuma uni, Lázaro, aín naminua ꞌitsaira cuñu, ax anu racácë ꞌiacëxa. 21Xubu tanáin racáxun ca mesa tëmúxun ñuñu unían piti tëxëocë rëupatia uni itsían a ꞌinánun quixun caíancëxa. Cainia ca ꞌuchíticama uxun aín cucama biáxcacëxa. 22A ñuñuma uníxa bamaia ca ángelcaman anu Abraham ꞌicë anu buáncëxa, buáncëx ca Abrahambë ꞌiacëxa. Usa ꞌain ca ñuñu uni axribi bamacëxa, bamacë ca maíncancëxa. 23Usa ꞌixun ca a ñuñu unin anua uni ꞌaisamaira paë tani tëmërati anu ꞌixun ꞌuracëo Abrahamcëñun Lázaro isacëxa. 24Isi cuëncë́nquin ca cacëxa: ꞌË ca ꞌaquin, Abraham. ꞌËx cana ënë tsinuax ꞌaisamaira paë tanin. Aín mëcën rëbu ꞌunpaxan chabóxuan ꞌën ana matsioi unun ca Lázaro xut. 25Cacëxun ca Abrahamnën ñuñu ꞌiá uni cacëxa: Mix bamacëma pain ꞌaish camina Lázaronëxa ñuñuma ꞌianan ꞌinsíncë ꞌaish nuibacamainun mix ꞌitsa ñuñu ꞌianan ꞌinsíncëma ꞌaish upitax tsoócën. Usai ꞌiá ꞌaíshbi ca bërí mixmi ꞌaisamaira paë tani tëmëramainun Lázaro ax asábiira ꞌicën. 26ꞌImainun ca anu mix ꞌicë ꞌimainun anu nux ꞌicë nëbë́tsi nancë́cë nëmíinra ꞌicën. Usa ꞌain ca unix ënuax anu cuainsa tanibi anu cuancasmati ꞌicën, ꞌimainun ca uni anuax ënu uisa tanibi utima ꞌicën. 27Usaquin cacëxun ca ñuñu unin cacëxa: Axa ënu uisama ꞌain camina Lázaro ꞌën papan xubunu xuti ꞌain. 28ꞌËx cana mëcën achúshi xucë́nñu ꞌain. Atúxribi ënu paë tani tëmërai uaxma ꞌinuan, uisa cara ënu ꞌicë quixun atu canun camina Lázaro xuti ꞌain. 29Cacëxun ca Abrahamnën cacëxa: Atux ca Moisés ꞌimainun an Nucën Papa Dios quicë bana uni ñuixuncë unicaman cuënëo bana anu ꞌicë quiricañu ꞌicën. A isquin ca ꞌunánti ꞌicën. 30Cacëxun ca ñuñu ꞌiá unin cacëxa: A bana cuatímabi ca unían anu uni bamacë ꞌicënuax cuanxun cacëxun cuati sinanati ꞌicën. 31Quiabi ca Abrahamnën cacëxa: Moisés ꞌimainun an Nucën Papa Dios quicë bana uni ñuixuncë unicaman cuënëo bana isquinbi cuaisama tancë ꞌixun ca anu uni bamacë ꞌicënuax cuancë unin banaribi cuaisama tanti ꞌicën.

Currently Selected:

Lucas 16: cbrPB

Highlight

Copy