Juan 19

1Usa ꞌain ca Pilátonën xubunu atsíntëcënquin Jesús rishquinun quixun suntárucama cacëxa. 2Cacëxun rishquitancëxun ca ꞌapu isa quiax ami cuaiquin suntárunën muxa mañuti otancëxun mañumianan upí chupa minanën pucucësa aribi pañumiacëxa. 3Usotancëxun ca aín bëmánanu niracëquin ꞌusánquin —judíos unicaman ꞌapu ca chuámashi ꞌit —caquin tantáshcacëxa. 4Usocëbë chiquíquin ca Pilátonën judíos unicama cacëxa:

—ꞌËn iscëx ca ënë uni ꞌuchacëma ꞌicën. Usa ꞌicëmi mitsun ꞌunánun cana a bëtëcënin.

5Ësoquian cacëbë ca Jesúsribishi muxa mañutiocë mañuanan chupa minanën pucucësa pañucë ꞌaish chiquíacëxa. Chiquícëbëtan ca Pilátonën judíos unicama cacëxa:

—A cënë ꞌicën, a uni.

6Cacëx ca sacerdotenën cushicama ꞌimainun policíacamaxribi a isi munuma cuëncëni quiacëxa:

—I curúsocënu ca matas, i curúsocënu ca matas.

Cacëxun ca Pilátonën cacëxa:

—ꞌËn iscëx ca ënë uni ꞌuchacëma ꞌicën. Usa ꞌain ca mitsúnbi buántancëxun i curúsocënu matástan.

7Ësaquian cacëxun ca judíos unibunën Piláto cacëxa:

—Ënë unix ca ꞌëx cana Nucën Papa Diosan Bëchicë ꞌai quia. Usa ꞌain ca axa ësai banacë unix ca ꞌacë ꞌiti ꞌicë quiax Moisésnën cuënëo bana quicësabi oi bamati ꞌicën.

8Usa ꞌain ca ꞌëx cana Nucën Papa Diosan Bëchicë ꞌai quiax quia quixun judíos unicaman ñuia cuati Pilato aín bëmánan pëqui ꞌaisamaira racuë́acëxa. 9Racuëti aín xubunu atsíntëcënxun ca Jesús cacëxa:

—¿Uinu ꞌicë uni caramina ꞌain?

Cacëxunbi ca cáma ꞌicën. 10Cacëxunma ca Pilátonën cacëxa:

—¿ꞌËn mi ñucácëxunbi caramina ꞌëribi caiman? ꞌËx cuëënquin cana mi chiquínti ꞌain; ꞌëx cuëënquin cana unían mi i curúsocënu matásnun ꞌamiti ꞌain. ¿A caramina ꞌunaniman?

11Cacëxun ca Jesusan cacëxa:

—Naínu ꞌicë Nucën Papa Dios cuëëncëbëtanma camina min ꞌë uisabi otsíama. Usa ꞌain ca an mi ꞌë ꞌináncë unicama ax mix ꞌicësamairai ꞌuchaxa.

12Usoquian Jesusan cacëxuan Pilátonën Jesús chiquínti sinaniabi ca judíos unicaman munuma cuëníshoquin cacëxa:

—Min ënë uni chiquíanx camina Romanu ꞌicë ꞌapu Césarbë upí ꞌitima ꞌain. Uinu ꞌicë unix cara —ꞌëx cana ꞌapu ꞌai —quia, ax ca Césarbë nishanancësa ꞌiti ꞌicën.

13Usaquian judíos unicaman cacëxun Jesús ëman chiquímitancëx ca Pilato anuxuan ami uni manáncëxun cuacë anu tsóbuacëxa. Anu tsóti ax ca me mëníoquian anu maxax nancë ꞌaish hebreo banan Gabata cacë, ꞌiacëxa. 14Pascua nëtë imë́ishi ꞌinun a nëtën piti anun mëníoti nëtëan bari xamárumainun ca anu tsóxun Pilátonën judíos unicama cacëxa:

—A cënë ꞌicën, mitsun ꞌapu.

15Cacëxun ca cuëníshoquin cacëxa:

—Ca bamati ꞌicën, ca bamati ꞌicën. I curúsocënu ca matas.

Cacëxun ca Pilátonën cacëxa:

—¿ꞌËn carana mitsun ꞌapu i curúsocënu matásmiti ꞌain?

Quia ca sacerdotenën cushicaman cacëxa:

—Nun ꞌapu itsi ca ꞌaíma ꞌicën. Césarnëxëshi ca nun ꞌapu ꞌicën.

16Usaquian cacancëxun ca Pilátonën atúnbia i curúsocënu matásnun quixun cacëxa. Usoquian Pilátonën cacëxun ca judíos unicama cuëëncësabi oquin suntárucaman Jesús buáncëxa.

I curúsocënua Jesús matáscan

(Mt 27.32-44; Mr 15.21-32; Lc 23.26-43)

17Buáncëxun ca Jesusan abi anua matáscanti i curúsocë ꞌiábianquin Calvario cacë matá, hebreo banan Gólgota cacë, anu buáncëxa. 18Buanx bëbacë ca suntárucaman Jesús i curúsocënu matástancëxun nitsíancëxa. Usoquin ca rabë́ uniribi, bëtsi amo ꞌanan bëtsiribi amo i curúsocënu matástancëxun nitsíancëxa, Jesús a nëbë́tsi ꞌinun. 19Usocamainun ca Pilátonën cuënëomitancëxun i curúsocënu ësai quicë bana matásmiacëxa: “Jesús, Nazaretnu ꞌicë, judíos unicaman ꞌapu”. 20Usa ꞌain ca Gólgota matá anuxuan Jesús i curúsocënu matáscancë, axa Jerusalén ꞌurama ꞌain, raírinëxa umainun raírinëxribi cuanquin judíos unicaman a bana cuënëocë isacëxa. A banax ca hebreo banan ꞌanan, latín banan ꞌanan, griego banánribi cuënëocë ꞌiacëxa.

21Usoquian cuënëocë ꞌain ca judíos sacerdotenën cushicaman Piláto cacëxa:

—“Judíos unicaman ꞌapu ca” quixun cuënëoxunma ca ꞌat. Usoquinma ca “axa, ꞌëx cana judíos unicaman ꞌapu ꞌai quicë, a ca ënëx ꞌicë” quixun ꞌat.

22Cacëxun ca Pilátonën cacëxa:

—ꞌËn cuënëomicë bana ax ca usabi ꞌiti ꞌicën.

23Usaquian ꞌan ca rabë́ ꞌimainun rabë́ suntárunën Jesús i curúsocënu matástancëxun mëtícananquin aín chupa biacëxa. Aín chupa bitancëx ca chupa itsi cëxëquinma tëpë́xuinshi pañucë, 24a bitsi canancëxa:

—Tucatima ca. Uin cara a tari biti ꞌicë quixun isti cananuna ñuratsu pain niquin tanti ꞌain.

Nucën Papa Diosan bana cuënëo, axa ësai quiásabi oquin ca suntarucaman ꞌacëxa: “Ñuratsu pain niquin tantancëx ca ꞌën chupacama mëtícananxa”.

25Jesús usocamainun ca aín tita ꞌimainun aín titan xucën ꞌimainun Cleofásnën xanu María ꞌimainun María Magdalena, acamax anua Jesús mastáscë i curúsocë a ꞌurama ꞌiacëxa. 26Usa ꞌain ca Jesusan aín tita a ꞌuramanua isanan aín ꞌunánmicë uni achúshi aira nuibacë a, a rapasunua isquin cacëxa:

—Titan, ax ca min tuá ꞌiti ꞌicën.

27Canan ca aín ꞌunánmicë uni aribi cacëxa:

—Ca is, ax ca min tita ꞌiti ꞌicë —quixun.

Usoquian Jesusan cacësabi oquin ca an María aín xubunu ꞌinun buáncëxa.

Jesús bama

(Mt 27.45-56; Mr 15.33-41; Lc 23.44-49)

28Usa ꞌain ca Jesus, ꞌën ꞌati ñucama cana cëñua quixun ꞌunani Nucën Papa Diosan bana cuënëo quicësabi oi, —cana shimain —quiacëxa. 29Quia ca manë xanpanua vino cachacë buácacë ꞌain, tsatimi rënmencë xapusa ñu ami chabótancëxun buáruxun ꞌamiacëxa. 30ꞌAmicëx ca Jesús vino cachacë ꞌatancëx, —ꞌën ꞌati ñu cana cëñuan —qui tëtúbutishi bamacëxa.

Suntárunëan Jesús manë xëtocën aín pichánpurunu ꞌá

31Pascua nëtëa imë́ishi ꞌiti ꞌain ca a nëtë́xa bëtsi nëtësamaira anun ñu mëëtima ꞌain, i curúsocënu matáscë unicama anubi ꞌiti judíos unicaman cuëëanma ꞌicën. Usa ꞌixun ca Pilatonëan aín suntárucama i curúsocënu ꞌicë unicama aín xo tëcë́nmianan i curúsocënua biminun cacëxa. 32Cacëxuan xucëx cuanxun ca suntárunën Jesúscëñun matáscë uni rabë́ a bëtsi pain ꞌatancëxun bëtsiribi aín xo tëcë́ancëxa. 33Usobëtsini Jesúsribi ꞌai uxunbi ca asérabi bamacë isquin ꞌama ꞌicën. 34ꞌAiamabi ca suntáru achúshinëinshi aín pichánpuru amoshi manë xëtocën chachiacëxa. Usocëx ca imi ꞌunpáxbë mëscúcë ꞌibúacëxa. 35Asérabi ënë ñucama isá ꞌixun cana ënë bana cuënëoin. ꞌËn cuënëocë bana ënëx ca asérabi cëmëcëma ꞌicën. Usa ca quixun ꞌunánquin cana ënë banacama mitsu cuënëoxunin, mitsúnribimi asérabi ca usai ꞌiacëxa quixun ꞌunánun. 36Nucën Papa Diosan bana cuënëosabi oi ca ënë ñucama ꞌiacëxa. Ax ca ësai quia: “Aín xo achúshibi ca tëcë́ntima ꞌicën”. A bana quicësabi oquin ca uínbi aín xo achúshibi tëcë́anma ꞌicën. 37Ësairibi ca cuënëo bana quia: “Tarotancëxun ca an ꞌacëcaman isti ꞌicën”.

Jesús matá naëcënu mëníocan

(Mt 27.57-61; Mr 15.42-47; Lc 23.50-56)

38Arimatea ëmanu ꞌicë uni, José, an ca Jesusan bana cuacë ꞌixunbi judíos unicamami racuë́quin uíbi —ꞌëx cana Jesusan bana cuacë ꞌai —quixun cáma ꞌicën. Usa ꞌixun ca bamacë Jesús buántisa tanquin Piláto —¿asábi cara ꞌiti ꞌic? —quixun ñucácëxa. Ñucácëxun ca Pilátonën, —asábi ca, ca buántan —quixun cacëxa. Cacëxun ca bamacë bibianquin Jesús buáncëxa. 39Buánmainun ca Nicodemo axa imë́ cuanx Jesúsbë bana, anribi ꞌinínti ro mirra rocëñun áloe ro mëscucë, treinta kilosa bëacëxa. 40Usotancëxun ca Josébëtan Nicodemonën judíos unibunëan bamacë maínuxun uni ꞌacësabi oquin, Jesús ꞌinínti ro mëscucë anun ꞌacë chupa, anun rabúancëxa. 41Usoquian Jesús mëníocë ꞌain ca i curúsocë ꞌurama anu i ꞌapácë naëratsu matánu ꞌiacëxa. Anu ca me naëcë achúshi anu uni bamaia mëníoti ꞌacë ꞌaínbia anu uni mëníocëma pan ꞌiacëxa. 42A quiníxa ꞌurama ꞌain ca Pascua nëtë ꞌaían atux a nëtën tantiti cupí anu racántancëxun Jesús mëníocëxa.

Currently Selected:

Juan 19: cbrPB

Highlight

Copy