Juan 20

Bamaxbi Jesús baísquia

(Mt 28.1-10; Mr 16.1-8; Lc 24.1-12)

1Domingo nëtë pëcaracëma ꞌaínshi ca María Magdalena ax anua Jesús mëníoëxancë quini isi cuancëxa. Cuanx bëbaquin iscëxbi ca anúan quini xëpuëxancë mapara ax racanacë ꞌiacëxa. 2Usobiani bënëtishi abáquiani cuanxun ca aín ꞌunánmicë uni aira Jesusan nuibacë, acëñun Simón Pedro cacëxa:

—Unin sapi ca Nucën ꞌIbu quininua bibianquin buánxa, uinu cara buánxun racánxa cananuna ꞌunaniman.

3Cacëx ca Pedrobë Jesusan ꞌunánmicë uni itsiribi anua Jesús mëníoëxancë quininu abáquiani cuancëxa. 4Cuaníbi ca Pedro axa munu cuanmainun bëtsi axira pain rëcuë́nquiani cuanx quininu bëbacëxa. 5Bëbai xënirácëti tëtúbuquin quini naísquinbi ca ꞌaímonan anun rabúënxancë chupa ashi anua isacëxa. Isíbi ca quininu atsíanma ꞌicën. 6Atsíncëbëma ca Simón Pedro ax tsiáncuatsini aí ax pain quininu atsíancëxa. Atsínxun ca chupa anun Jesús rabúënxancë, ashi isacëxa. 7Isanan ca anun marábuënxancë pañun aribi bëtsi chupabëma capúncësa ꞌaish amo racácë isacëxa. 8Iscëbëbi ca ax paían rëcuë́ncuatsincë uni axribi quini mëu atsínxun —asérabi ca Jesús ënuma ꞌicë —quixun isacëxa. 9A ñu isquinbi ca a rabëtan Nucën Papa Diosan bana cuënëo, bamatancëx ca ax baísquiti ꞌicë quiáxa quicë, a uisai quicë cara quixun ꞌunánma ꞌicën. 10ꞌUnánquinmabi ca Jesús quininuma ꞌicë obiani aín xubunu cuancëxa.

María Magdalenanëan Jesús isa

(Mr 16.9-11)

11Usa ꞌain ca a uni rabëtaxa cuanmainun utëcëanx María quini rapasu niracëti aín namë́ isnux tëtúbuti aín bëunan mëscúacëxa. 12Usai ꞌiquinbi ca quini mëucüa ángel rabë́, chupa uxuira uxu pañuaxa, anu Jesús racáënxancënu aín maxcá ꞌicëu bëtsi ꞌimainun aín taë ꞌicëu bëtsiribishi tsócë isacëxa. 13Iscëxun ca ángelnën María cacëxa:

—¿Uisacatsi caramina ini bëunan mëscutin? —quixun.

Cacëxunbi ca Maríanën catëcëancëxa:

—Unin ca quininu atsínxun ꞌën ꞌIbu bacarubianquin buánxun amanu racánxa, uinu cara racánxa cana ꞌunaniman.

14Cai caxu bësui cuainacëquinbi ca Jesús a caxu nicë isacëxa, isquinbi ca —ax ca Jesús ꞌicë —quixun ꞌunánma ꞌicën. 15ꞌUnáncëxunmabi ca Jesusan María cacëxa:

—¿Uisacatsi caramina ini bëunan mëscutin? ¿Ui caramina barin?

Cacëxunbi ca an naë bërúancë uni isa quixun sinánquin Maríanën cacëxa:

—Min buánxun camina bitsi cuanun uinu caramina racan ꞌë cati ꞌain.

16Cacëxun ca Jesusan cacëxa:

—María —ësaquinshi.

Cacëx cuainacëquin ca Maríanën ratúquin, hebreo banan —Raboni —cacëxa. A banax ca an uni ñu ꞌunánmicë qui quicë ꞌicën. 17Usaquian cacëxun ca Jesusan María cacëxa:

—ꞌË ramëxunma pan ca ꞌat, ën Papanu cana cuancëma pain ꞌain. Cuantancëxun ca ësaquin ꞌën xucë́ncama catan: An ca ꞌë caxa, ꞌëx cana ꞌën Papa axa mitsun Paparibi anu cuanin. Ax ꞌën Papa Dios ꞌaish ca mitsun Papa Diosribi ꞌicën.

18Usoquian Jesusan cacësabi oquin ca María Magdalenanën aín ꞌunánmicë unicama atunu cuanxun:

—ꞌËn cana Nucën ꞌIbu isan —quixun canan Jesús quicë banacama atu ñuixuancëxa.

Aín ꞌunánmicë unicaman Jesús baísquicë isa

(Mt 28.16-20; Mr 16.14-18; Lc 24.36-49)

19Anúan Maríanën Jesús ispuncë domingo nëtë ñantánbucëbë ca aín ꞌunánmicë unicamax, xubu achúshinu timë́ax judíos unibumi racuëti ꞌaímaquin xëpuax ꞌiacëxa. Anua ꞌain, atu nëbë́tsi niracëquin ca Jesusan cacëxa:

—Cana uan, chuámashirua ca ꞌican.

20Ësoquin caquin ca aín mëcën rabë́ ismianan aín pichánpururibi ismiacëxa. Ismicëx ca aín ꞌunánmicë unicama Nucën ꞌIbu isi shimëniocati cuëëancëxa. 21Cuëënia ca amiribishi Jesusan atu cacëxa:

—Chuámashirua ca ꞌican. ꞌËn Papan amia sinánun unicama ꞌaquinun ꞌë xuásaribi oquin cana ꞌëmia sinánunmi unicama ꞌaquinun mitsu xutin.

22Canan ca cuëbitan atumi uínpuquin atu cacëxa:

—Nucën Papa Diosan Bëru Ñunshin Upíñu ca ꞌican. 23Mitsúnmi tërë́ncëx ca axa ꞌuchacë unin ꞌucha tërë́ncë ꞌia. Usa ꞌaínbi ca mitsúnmi tërë́ncëxma a unin ꞌucha tërë́ncëma ꞌia.

Tomásnëan Jesús baísquicë isa

24Anua Jesús atubë ꞌimainun ca aín ꞌunánmicë uni achúshi Tomás, ꞌicëbi rabë́ bacë́an ꞌicë Gemelo caquinribi anëcë, ax atubëma ꞌiacëxa. 25Usa ꞌain ca Jesús cuancë caxua aia, an Jesús iscëcaman Tomás cacëxa:

—Nucën ꞌIbu cananuna isan.

Cacëxun ca Tomásnën cacëxa:

—Aín mëcën rabë́ anua rabun matáscancë isquin anu ꞌën mëcën rëbun ticánan aín pichánpurunu ꞌën mëcën atsínmiquin tanxunma cana asérabi ca ax Nucën ꞌIbu ꞌicë quixun sinaniman.

26Jesús baísquixancëa achúshi semana ꞌain ca aín ꞌunánmicë unicama amiribishi achúshi xubunu timë́cë ꞌiacëxa. A nëtën ca Tomásribi atubë ꞌiacëxa. Usa ꞌain ca xubu xëpucë ꞌaínbi atu nëbë́tsi niracëquin Jesusan aín ꞌunánmicë unicama —Cana uan. Chuámashirua ca ꞌican —cacëxa. 27Atu catancëxun ca Tomásribi cacëxa:

—Min mëcën rëbun ca ënu ticat, ꞌën mëcën rabë́ribi ca is. ꞌËn pichánpurunu min mëcën atsínmiquin ca tan. ꞌËx cana ama ꞌai quixun sinánxunma ca ꞌëx cana asérabi Jesús ꞌai quixun sinan.

28Cacëxun ca Tomásnën —mix camina asérabi ꞌën ꞌIbu ꞌianan ꞌën Diosribi ꞌai —quixun cacëxa. 29Cacëxun ca Jesusan cacëxa:

—Tomás, bërí camina ꞌë baísquicë isquin, asérabi cana ꞌën Papa Diosnuax uá ꞌai quixun ꞌunanin. An ꞌë isquinmabi, asérabi cana ꞌëx a ꞌai quixun sináncë uni, a ca Nucën Papa Diosan chuámashirua tani cuëënun ꞌimia.

Añu cupí carana ënë bana cuënëo quiáxa Juan quia

30Usa ꞌain ca unin ꞌacëma ñu ꞌitsaira Jesusan aín ꞌunánmicë unicaman isnun ꞌacëxa, ënë quiricanu ca Jesusan ꞌá ñucama camaira cuënëocëma ꞌicën. 31Jesús ax ca asérabi Cristo, Nucën Papa Diosan Bëchicë ꞌicë quixun ꞌunanimi ami catamëti mitsux xënibua ꞌaínbi Nucën Papa Diosnan ꞌinun cana ënë banacama cuënëon.

Currently Selected:

Juan 20: cbrPB

Highlight

Copy