Jesusan Unicaman Ñu ꞌA 2

Nucën Papa Diosan Bëru Ñunshin Upí aín unicamanu uá

1Usa ꞌain ca Pentecostés cacë nëtë ucëbë Jerusalénu ꞌicë achúshi xubunu timë́ax axa Jesucristomi catamëcë unicama bucüacëxa. 2Anu bucuxun ca suñúan upí ꞌicësai banacuatsinia naínuax aia cuacëxa. Cuacëxbi ca anua bucucë xubu namë́ camabi tsitsiarati sharati banacëxa. 3Usai ꞌishi ca tsi ërë́nrucësa ꞌaish rëquiabati anu ꞌicë unicaman maxcánu cëñúruacëxa. 4Usacëbëshi ca Nucën Papa Diosmi cushii aín Bëru Ñumshin Upitan ꞌimicëx anu ꞌicë unicamax bëtsi bëtsi banan banacëxa.

5Usa ꞌain ca axa Nucën Papa Dios cuëëncësabi oi ꞌiisa tancë judíos unicama, ax bëtsi bëtsi menuax Judea menu uax Jerusalénu tsoócëxa. 6A unicamax ca xubunu bucüaxa bëtsi bëtsi banan axa Jesucristomi catamëcë unicama banaia cuabiani a xubunu timë́nux riquiancëxa. Riquiani bëbai timëcamëꞌëoquin a xubunu ꞌicë unicamaxa banaia, atun banasabi camaxunbi cuati ca ratuti sináncasmacëxa. 7Sináncasmai ca atun bëmánan pëqui ratuti canancëxa:

—¿Galilea menuaxa ucë unishima cara axa xubunu timë́ax banacë unicama ënëx ꞌic? 8¿Usa ꞌicëbi caranuna bëtsi bëtsi nëtënuax uá ꞌixunbi atun bana nun banasabi ꞌicë cuatin? ¿Uisa ꞌaish cara usa ꞌiti ꞌic? 9Nux cananuna Partia, Media, Elam, Mesopotamia, Judea, Capadocia, Pontus, Asia, a mecamanuax ucë ꞌain. 10ꞌImainun cananuna Frigia, Panfilia, Egipto, ꞌimainun Africa menu ꞌicë ëma raíri Cirene ꞌucëa ꞌicë anuax ucë ꞌain, ꞌimainun cananuna Roma ëmanu ꞌicë judíos unicama ꞌimainun raírinëx judíosma uni ꞌixunbia an usai judíos uni ꞌiti Moisésnën cuënëo bana quicësabi oquin ꞌacë ꞌain. 11ꞌImainun cananuna Creta cacë nasínu ꞌicë ꞌimainun Arabia cacë menu ꞌicë unicama ꞌain. Usa ꞌixunbi cananuna ënë unicaman, uisaira oquin cara Nucën Papa Diosan ñu ꞌaia quixuan ñuia nun banan quicësai quia cuatin.

12Usai ꞌicëbë ca camáxbi ratuti sináncasmai canancëxa:

—¿Uisa ꞌaish cara usa ꞌiti ꞌic?

13Usaia quicëbëbi ca raírinëx ami cuai —ñu bata xëaxbi sapi ca paë́ncanxa —quiax canancëxa.

Timëcamëꞌëocë unicama Pedronën ca

14Canancëbë ca Pedro abë ꞌicë mëcën rabë́ ꞌimainun achúshi unibë nirui munuma banaquin cacëxa:

—Judíos unibu ꞌimainun Jerusalénu ꞌicë unicama, mitsúnmi ꞌunánun ca ꞌën mitsu camainun cuat. 15Mitsun sináncëxa ënë unicamax paë́ncë ꞌaínbi ca bari xamárucëma pain ꞌain asérabi paë́ncëma ꞌicën, 16An Nucën Papa Dios quicë bana uni ñuixuncë uni, Joel cacë, an cuënëo bana quicësabi oi ca ësai ꞌia. A banax ca ësai quia:

17Nucën ꞌIbu Diosan ca caia: Mecama cëñúcëma pain ꞌain cana unicamanu ꞌën Bëru Ñumshin Upí atubë ꞌinun xuti ꞌain. Xucëxun ca Israel unicama, xanu ꞌimainun bëbu, anbi ꞌëx quia bana uni ñuixunuxun ꞌaia. ꞌImainun ca bënábu unicamanribi ꞌën ismicëxun ñu isnuxun ꞌaia. Caniacëcë unicamanribi ca ꞌën ꞌamicëxun namánuxun ꞌaia. 18Usaribi oquin cana an ꞌën bana cuacë bëbu ꞌimainun xanu, abëa ꞌinun ꞌën Bëru Ñumshin upí ꞌinánuxun ꞌain. ꞌInáncëxun ca ꞌë ñuiquin uni ñuixunuxun ꞌaia. 19-20ꞌËn ꞌimicëx mecama cëñúti nëtë ꞌicëma pan ꞌain cana a isia ratúti ñu naínua unicama ismiti ꞌain. Usonan cana menuaribi unin sináncëma ñu, imi ꞌimainun tsi ꞌimainun tsin cuin, acamaribi isminuxun ꞌain. ꞌImainun ca bari bëánquinuxun ꞌaia. Bari bëánquimainun ca ꞌuxë imisa ꞌinuxun ꞌaia. 21Usai ꞌicëbë ca uinu ꞌicë unicaman cara aín ꞌIbu Dios ꞌë ñucatia, acamax ca ꞌënan ꞌinux ië́cë ꞌinuxun ꞌaia.

Usai ca Joelnën cuënëo bana quia.

22Usaquin canan ca Pedronën ësaquinribi cacëxa:

—Israel unicama, ꞌën mitsu camainun ca cuat: Jesús Nazaretnu ꞌicë, an ca Nucën Papa Diosan ꞌamicëxun mitsúnmi ismainunbi, ax ca Nucën Papa Diosnuax uá ꞌicë quixuan unicaman ꞌunánun, uni itsían ꞌacëma ñuira ꞌaxa. An ꞌacë ñucama camina mitsun ꞌunan. 23Usoquian ñu ꞌacëbi camina mitsun unían ꞌináncëxun bixun ꞌaisama uni rabë́cëñun i curúsocënu matásmitancëxun bamamian. Usai ca ꞌiti ꞌicë quixuan, ënë nëtë unitisama pain ꞌain Nucën Papa Diosan mëníosabi oi ca ꞌiaxa. 24Usoquian unin ꞌacëbi ca Jesús a Nucën Papa Diosan baísquimiaxa, uisatimoia tsónun. Ax asaribi cushiira ꞌicëa uinu ꞌicë unínbi ashiquin bamamisama ꞌicë ca Nucën Papa Diosan aín Bëchicë baísquimiaxa. 25David ax ca Jesús ñui ësai quiacëxa:

ꞌËn cana Nucën ꞌIbu ꞌëbëbi ꞌia isan. ꞌËx racuëti masá nuitununma ca ax ꞌën mëqueu ꞌicën. 26-27Usa ꞌain cana chuámashirua tani cuëëni bana upitainshi banan. ꞌËx bamaxbi anu uni bamatancëx aín bëru ñumshin ꞌicë, anu ꞌën bëru ñumshin ꞌinun camina ëntima ꞌain. Usoquin camina, minan ꞌicë upí isquin bamacëbi ꞌën namicama chëquinun ꞌë ꞌimitima ꞌain. Usa cupí cana, bamaxbi cana baísquiti ꞌai quixun sinani mimi catamëti cuëënin. 28Min camina upí nuituñu ꞌaish chuámashirua tsónun ꞌë ꞌunánmian. Usa ꞌixun camina ꞌëbë ꞌixun chuámashirua tani cuëënun ꞌë ꞌimiti ꞌain.

Usai quiquin ca David an Jesús ñuiquin cuënëocëxa.

29ꞌËn xucë́antu, asérabi ca nucën rara, David, bamatancëx me quininu mëníocë ꞌiacëxa. Usoquian anu ꞌacan ax ca bërí nëtë́nbi anu ꞌicën. 30David, ax ca an Nucën Papa Dios quicë bana unicama ñuixuncë ꞌiacëxa. Usa ꞌixun ca paránuxunma Nucën Papa Diosan —min rëbúnqui achúshinëx ca judíos unicaman ꞌapu, Cristo, ꞌinuxun ꞌaia —quixun cá bana a ꞌunáncëxa. 31Usa ꞌixun ca David an bëráma ꞌunánxun ꞌacësoquin, aín rëbúnqui Cristo axa bamatancëx baísquiti a ñui, bamatancëxbi ca aín bëru ñumshin anu uni bamacëcama cuancë, anu ëncëma ꞌianan aín namicamaxribi chëquitima ꞌicë quixun ñuiacëxa. 32Davidnën cuënëo bana quicësabi oquin ca Nucën Papa Diosan Jesús bamacëbi baísquimiaxa quixun cananuna nucamanbi ꞌunan. 33A ca Nucën Papa Diosan abë ꞌApu ꞌiti aín cushínbi baísquimiquin an cásabi oquin aín Bëru Ñumshin Upí ꞌinánxa. Usa ꞌain ca ami mitsun isanan cuacë ñucama, ënëx aín Bëru Ñumshin Upitan ꞌimicëx ësai ꞌia. 34-35David ax ca naínu cuanma ꞌicën. Naínu cuanxunmabi ca an ësai quicë bana cuënëocëxa:

Nucën ꞌIbu Diosan ca ꞌën ꞌIbu Cristo caxa: Axa mimi nishcë unicama ꞌën mi ꞌibuamimainun camina ꞌën mëqueu ꞌianan ꞌëbë ꞌapu ꞌiti ꞌain.

36Usa ꞌain camina mitsux Israel unicama ꞌixun asérabi ꞌunánti ꞌain, mitsúnmi i curúsocënu matásmicë, a Jesúsbi ca Nucën Papa Diosan nucën ꞌIbu ꞌimianan axa utinu nun caíncë, Cristo, a ꞌimiaxa.

37Ësoquian cacëxun cuati —ꞌatimabi cananuna ꞌa —quixun sinani ratúquin ca Pedrocëñun abëa ꞌicë unicama ñucáquin cacancëxa:

—ꞌËn xucë́antu, ꞌatimabi cananuna usoquin a ꞌan. ¿Upí ꞌinux caranuna bërí uisai ꞌiti ꞌain?

38Cacëxun ca Pedronën atu cacëxa:

—ꞌAtimoquin sinánxunbi camina sinanaquin, upí oquin Nucën Papa Diosmi sinánti ꞌain. Usai ꞌitancëx camina mitsun ꞌuchacama tërë́ncë ꞌinun Jesucristomi catamëti nashimicë ꞌicanti ꞌain. Usai ꞌicëbëtan ca Nucën Papa Diosan aín Bëru Ñumshin Upí abëmi ꞌinun mitsu ꞌinánti ꞌicën. 39Ënë banacamax ca mitsu ꞌimainun mitsun bëchicëcama ꞌimainun bëtsi unicamanribi cuati oquin Nucën Papa Diosan mënío ꞌicën. Amia sinánmisa tancë unicamanribi cuati oquin ca usoquin mëníocëxa.

40Usoquin canan ca bana raíriribi ñuixunquin Pedronën ꞌësëquin cacëxa:

—Ënë nëtënu ꞌicë unían a ꞌunáncëma ꞌaínbi camina mitsux Jesucristomi sinanati Nucën Papa Diosnan ꞌinux ië́ti ꞌain.

41Usaquian Pedronën cacëxun cuaquin ca ꞌitsa unin —asérabi ca a bana ꞌicë —quixun sináncëxa. Sinani ca a nëtë́nbi nashimicë ꞌaish tres mil uniribishi axa Jesúsmi sináncë unicamabë ꞌiacëxa. 42Usai ꞌitancëx ca an bana ñuixunuan Jesusan caíscë unicaman bana ñuia cuaquin upí oquin sinani camáxbi nuibanancëxa. Nuibanani ca camabi nëtën timë́quin, ënima Nucën Papa Diosbë bananan pán tëcë́npaxun pi, camáxbi achúshinën sinánsashi ꞌaish a ëmanu bucüacëxa.

Axira pain Jesucristomi sináncë unicamaxa usai ꞌiá

43Usa ꞌain ca atun ꞌaia isía, a ëmanu ꞌicë unicamax ratúmainun aín bana ñuixunuan Jesucristonën caíscë unicaman uni itsin ꞌacëma ñu ꞌacëxa. 44Usomainun ca axa —asérabi ca Jesusan cushínbi ñu ꞌaia —quixun sinani Jesucristomi catamëcë unicamax bëtsibë bëtsibë nuibanani camáxbi ñuñu ꞌinux atun ñu ꞌinánani ꞌaquianancëxa. 45Usai ꞌiquin ca atun ñu maruanan aín me maruxun curíqui bixun ñuñuma unicama ꞌináncëxa. 46Camabi nëtën anuxun Nucën Papa Dios rabiti xubunu a rabinux timë́anan ca atun xubunuribi timë́xun Jesúsmi sinánquin tëcë́npaxun pán pianan bëtsi ñuribi piquianani cuëëni bëtsibë bëtsibë nuibanancëxa. 47Usaía ꞌia isquin ca axa atubë timë́cëma unicaman —atux ca asérabi upí nuituñu ꞌicë —quixun sináncëxa. Sinania ca uicamax cara ainan ꞌiti ꞌicë acamaxa Jesucristomi sinánun Nucën ꞌIbu Diosan ꞌimiacëxa.

Currently Selected:

Jesusan Unicaman Ñu ꞌA 2: cbrPB

Highlight

Copy