Jesusan Unicaman Ñu ꞌA 3

Aín niti bëtsicë uni pëxcúa

1Usa ꞌain ca bari cuabúcëbë a las tres ꞌain camabi nëtë́an ꞌicësabi, Pedrobë Juan anuxun Nucën Papa Dios rabiti xubunu abë banai cuancëxa. 2Cuanx bëbaquin iscë́xbi ca uni achúshi aín niti bëtsicë, usabi bacë́an, anu tsoócëxa. Camabi nëtë́an bëxun bëxun tsóncancëxun ca anuxun Nucën Papa Dios rabiti xubu aín xëcuë Upíira cacë, anuxun unicama atsinia curíqui ñucácëxa. 3Usa ꞌixun ca anu tsóxun Pedrocëñun Juan atsini aia isquin, curíqui isa ꞌinánun quixun cacëxa. 4Cacëxunbi ca Juanbëtan isquin Pedronën cacëxa:

—Nu ca is.

5Ësaquian cacëxun ca —ꞌë sapi ca curíqui ꞌinánti ꞌicë —quixun sinani cuëënquin caíancëxa. 6Caíncëxunbi ca Pedronën cacëxa:

—Curíquiñuma cana ꞌain. Usa ꞌaínbi cana bëtsi ñun mi ꞌaquinti ꞌain. Jesucristo, Nazaretnu ꞌicë, an ꞌë ꞌamicëxun cana mi cain, niruquiani ca cuantan.

7Caxun ca aín mëcën mëquenën mëínquin biruacëxa. Usocëxëshi ca aín uxútucuru ꞌimainun aín taë cushi niisa ꞌinun pëxcúacëxa. 8Pëxcutishi munuma niruishi nitsi cuëëni chirini, Pedro ꞌimainun Juanbë anuxun a rabiti xubunu atsínquin ca Nucën Papa Dios rabiacëxa. 9Usai ꞌiquin Nucën Papa Dios rabia nitsia ca camabi unin isacëxa. 10Isi ca, ënë unix ca an anuxun Nucën Papa Dios rabiti xubu xëcuë Upíira cacë, anu tsóxun uni curíqui ñucácë a ꞌicë quixun ꞌunani atun bëmánan pëqui ratúcancëxa.

Anun uni nicë, Salomón cacë, anuxuan Pedronën bana ñuixuan

11A unin ca Pedrocëñun Juan ënquinma ꞌaracaraishiacëxa. Usa ꞌaísha anuxun Nucën Papa Dios rabiti xubu amo anun uni nicë, Salomón cacë, anu a rabë́bëbi cuania isi ca ratuti abáquiani cuanx anu timë́cancëxa. 12Usaria isquin ca Pedronën anu timë́cëcama cacëxa:

—Israel unicama, ¿uisacatsi caramina ënë isi ratutin? ¿Uisacasquin caramina nu ñachaira ñachain? Nun cushínbi isanuna ꞌa quixun sapi camina sináncanin. Nux upí ꞌixun isanuna ënë uni nimia quixun sapi camina sináncanin. 13Usama ca. Nucën Papa Dios, aira nucën rara Abraham, Isaac, Jacob acama ꞌimainun nucën raracama ꞌimainun nucën chaitiocëcaman rabia, an ca aín Bëchicë Jesús asaribi cushi ꞌinun ꞌimiaxa. Usa ꞌicëbi camina uni isa ꞌaminun quixun mitsun ꞌapucama ꞌináncan. ꞌInáncëa Pilatonën ëinsa tancëbëbi camina mitsux cuëëncëma ꞌain. 14Usai ꞌiquin camina axa ñu ꞌatima ꞌacëma ꞌaish upíira sinánñu, a chiquínun caquinma, an uni ꞌacë uni a chiquínun quixun mitsun Pilato can. 15Usoquin camina mitsun an unicama Nucën Papa Diosnan ꞌinúxa abë ꞌinun ꞌimiti, Jesus, a uni ꞌamian. Usoquinmi ꞌamicë́xa bamacëbi ca Nucën Papa Diosan a baísquimiaxa. Bamacëa baísquimicë cananuna nun asérabi isan. 16Usa ꞌain ca nux asérabi ami sináncë ꞌixun —Jesusan ca ënë uni pëxcuti ꞌicë —quixunu nun sináncëbë, mitsúnmi a iscë ꞌixun ꞌunáncë uni ënëx upiti pëxcúaxa. Jesucristonëan pëxcutisa tancëbëtan nun ꞌaquincëx ca upitiira pëxcúaxa quixun camina iscanti ꞌain.

17Ësoquin catancëxun ca Pedronën amiribishi cacëxa:

—ꞌËn xucë́antu, cana mitsu cain, ꞌën cana ꞌunanin, asérabi ca ax Nucën Papa Diosan Bëchicë ꞌicë quixun ꞌunánxunmaishi camina mitsun ꞌapucamabëtanbi, mitsun Jesús uni ꞌamian, 18Usa ꞌaínbi camina mitsun, an sinánmicëxun uni ñuixuncë unicama Nucën Papa Diosan usaia Cristo ꞌiti ñuiquian cuënëomia banaxa quicësabi oquin ꞌacan. A banax ca quia, Nucën Papa Diosan ënu unun xuá, Cristo, ax ca paë tani tëmërati ꞌicë quiax. 19Usa ꞌain camina ꞌatimaquin sinánxunbi sinanaquin mitsun ꞌuchacama tërë́ncë ꞌinun Nucën Papa Diosmi sinánti ꞌain. Ami sináncëxun ca Nucën ꞌIbu Diosan mitsun ꞌuchacama tërë́anan chuámarua ꞌinun mitsu cuëënmiti ꞌicën. 20Usonan ca Jesús, axbi Cristo ꞌicë, a Nucën ꞌIbu Diosanbi bëráma mëníosabi oi mitsun ꞌapu ꞌinun ënë menu utëcënun quixun xuti ꞌicën. 21Ucëma pan ꞌaísha Jesucristo anu ax ꞌicë anu ꞌimainun ca Nucën Papa Diosan, an ax quicë bana uni ñuixuncë unicaman cuënëosabi oquin, camabi ñu sënë́onti ꞌicën. 22Moisésnën ca bëráma nucën rara judíos unicama ësaquin cacëxa: “An ꞌë ꞌimicësaribi oquin ca Nucën ꞌIbu Diosan mitsun rëbúnqui achúshi an ax quia bana unicama ñuixunti ꞌimiti ꞌicën. ꞌImicëxuan an atu cacësabi oi ca mitsun rëbúnquicama ꞌiti ꞌicën. 23Uinu ꞌicë unin cara an ñuia, aín bana cuatima, ax ca Nucën Papa Diosnanma ꞌaish Israel unima ꞌiti ꞌicën”.

24Moisésnëan usaquin cuënëosabi oquin ca Samuelnën pan ꞌacëbëtan an Nucën Papa Dios quicë bana uni ñuixuncë uni raírinënribi, Cristo uti nëtë ñuiquin unicama ñuixuancëxa.

25Ësoquin canan ca Pedronën ësaquinribi cacëxa:

—A unicaman axa uti ñuia, ax ucë cupí camina mitsúnribi chuámarua ꞌinuxun aín bana cuati ꞌain. Usai ꞌiti oquin ca Nucën Papa Diosan bëráma mitsun rara Abraham ësaquin cacëxa: “Min rëbúnqui achúshi cupí ca camabi menu ꞌicë unicamax cuëënuxun ꞌaia”. 26Nucën Papa Diosan ca aín Bëchicë bamacëbi baísquimitancëxun judíos unicama mitsunu pain xuaxa, mitsúnmi a isi ami sinanaquin ñu ꞌatima ꞌati ënun quixun.

Currently Selected:

Jesusan Unicaman Ñu ꞌA 3: cbrPB

Highlight

Copy