Jesusan Unicaman Ñu ꞌA 1

Aín Bëru Ñunshin Upí Ñucën Papa Diosan unibë ꞌiti

1Teófilo, ꞌën mi a pain buánmicë quiricanu cana Jesusan naínu cuainsama pain ꞌixun ꞌá ñucama a ñuiquin mi cuënëoxuan. 2An ca naínu cuainsama pain ꞌixun Nucën Papa Diosan Bëru Ñunshin Upitan ꞌaquincëxun an aín bana unicama ñuixunun xuti unicama caísacëxa. Acamax ca aín ꞌunánmicë uni ꞌiacëxa. Caístancëxun ca añu cara ꞌati ꞌicë quixun ꞌunánmiacëxa. 3Usoquin ñu ꞌatancëx bamaxbi ca baísquiacëxa. Usai ꞌitancëxun ca, ax ca asérabi baísquiaxa quixuan an caíscë unicaman ꞌunánun, ꞌuxë achúshi ꞌimainun mëcën rabë́ nëtën nëtë́ax nëtë́ax atumi chiquiracëacëxa. Usai ꞌiquin ca uisairai cara uni Nucën Papa Diosnan ꞌiti ꞌicë quixun atu ꞌunánmiacëxa.

I. JERUSALENUAXA AN NUCËN PAPA DIOSAN BANA CUACË UNICAMA TIMËA (1.4-8.3)

4Naínu cuainsama pain ꞌixun ca Jesusan aín ꞌunánmicë unicama, an uni bana ñuixunun xutia caíscë, a cacëxa:

—Jerusalénuax cuanxunma pan ca anuxunbi ꞌën Papa Diosan cacësabi oquin ꞌën mitsu ñuixuncë a pain caín. 5Asérabi ca Juanën uni ꞌunpaxan nashimiacëxa. Usa ꞌaínbi ca ꞌitsama nëtë ꞌicëma ꞌaínshi Nucën Papa Diosan aín Bëru Ñumshin Upí mitsubëa ꞌinun xuti ꞌicën.

Jesús naínu cuan

6Usatancëxun ca bëtsi nëtën abë timë́ax bucuxun an uni bana ñuixunun xutia caíscë unicaman Jesús cacëxa:

—Nucën ꞌIbu, nux cananuna Israelnën rëbúnqui ꞌain, nun ꞌapu ꞌaíshbi ca nun aintsima ꞌicën. Usa ꞌain ¿caramina bërí nun aintsi achúshi nun ꞌapu ꞌinun mëníoti ꞌain?

7Cacëxunbi ca Jesusan atu cacëxa:

—ꞌËn Papa Diosan ca an sináncësabi oquin uinsaran cara usai ꞌiti ꞌicë quixun mëníocëxa. Uinsaran cara usai ꞌiti ꞌicë quixun camina mitsun ꞌunaniman. 8Usa ꞌaínbi camina Nucën Papa Diosan Bëru Ñumshin Upí mitsunu ucëbë aín cushiñu ꞌicanti ꞌain. Aín cushiñu ꞌixun camina mitsun ꞌën bana unicama ñuixunti ꞌain, Jerusalén ëmanu, Judea mecamanu, ꞌimainun Samaria menu, ꞌimainun camabi menu cuanquin.

9Ësaquin aín ꞌunánmicë unicama caíshi ca atun ismainunbi manámiquishi naí cuinan mapucëx istëcëntimoi nëtë́acëxa. 10Usai ꞌia manámi bësuquin isabacëbëbi ca uni rabë́ tari uxua pañucë atu nëbë́tsi ꞌiacëxa. 11Usa ꞌixun ca atu cacëxa:

—Galileanu ꞌicë unicama, ¿añuaquin caramina manámia isabatin? Jesús, axa bërí naínu cuancë, ënëx ca mitsúnmi cuania iscësa ësaribicuatsini utëcënuxun ꞌaia.

Jesusan caíscë unicaman atubë ꞌinun Matías caísa

12Ësaquian a uni rabëtan cacëx ca Olivete cacë matá anuaxa Jesús naínu cuancë, anuax aín ꞌunánmicë unicama Jerusalénu riquiancëxa. Olivete anuax Jerusalénu bëbati ca rabë́ kilómetrosa ꞌiacëxa. 13Riquianx Jerusalénu bëbatancëx ca anua atux ꞌicë xubunu atsíanx manámia ꞌicë cata itsi anu cëñúruacëxa. Atux ca Pedro, Jacobo, Juan, Andrés, Felipe, Tomás, Bartolomé, Mateo, Alfeonën bëchicë Jacobo, Simón axa aín aintsin rabanan nëëcë, a ꞌimainun Jacobonën xucën Judas, acama ꞌiacëxa. 14A unicamax ca atúxa ꞌicësabi oi ꞌi, Jesusan xucë́antu ꞌimainun aín tita María ꞌimainun bëtsi xanucamabëribi timë́ax ami sinani Nucën Papa Diosbë banacëxa.

Jesusan caíscë unicaman atubë ꞌinun Matías caísa

15Usa ꞌaish ca anu timë́ax Jesucristomi sináncë unicama ax ciento veinte xucë́nsa ꞌiacëxa. Usa ꞌain ca Pedronën atu nëbë́tsi niruxun cacëxa: 16—ꞌËn xucë́antu, ësaquin cana mitsu cain. Nucën Papa Diosan Bëru Ñumshin Upitan sinánmicëxuan Davidnën cuënëo bana quicësabi oi ca Judas, an Jesús uni bimicë, ax ꞌiaxa. 17Judas ax ca nucamacëñunbia Jesusan aín bana ñuixunun caístancëxun ꞌunánmicë ꞌiaxa. 18Usa ꞌixunbi ca Jesús unin binun ꞌaquintancëxun a cupía bicë curíquinën me bitancëxbi, aín ꞌatima ñu ꞌacë cupí axbi ñumi natë́quiquin aín pucucama antácai bamaxa. 19Usaía ꞌicë cuaxun ca Jerusalénu ꞌicë unicaman a me Acéldama caquin anëaxa, ax ca atun banan Imi Me quicë bana ꞌicën. 20Salmos quiricanua cuënëo bana axa ësai quicësabi oi ca ꞌiaxa:

Aín xubux ca ëncë ꞌiti ꞌicën, anu ca uíxbi ꞌitima ꞌicën.

ꞌImainun ca ësairibi quia:

Bëtsi unin ca an ëncë ñu mëëti ꞌati ꞌicën.

21Ënu ca an Jesusan nubë ꞌixun ñu ꞌaia nubëtan iscë uni raíri ꞌicën. 22Usa ꞌaish ca atux Juanëan nashimia ꞌaísha ax naínu cuantamainun nubë ꞌiaxa. Usa cupí ca a unicama achúshinëxa Jesús ax ca bamatancëx baísquitëcëanxa quixun nun ꞌacësaribi oquin unicama ñuixunux nubë birananti asábi ꞌicën.

23Pedronën ësoquin cacëxun ca anu ꞌicë unicaman rabë́ uni, José, Barsabás caquin anëcë ꞌicëbia Justo caquinribi anëcë, acëñun Matíasribi caísacëxa. 24-25Usotancëxun abë banaquin ca Pedronën Nucën ꞌIbu Dios cacëxa:

—An nubëtan mi ñu ꞌaxunun min caíscë ꞌaíshbi ca Judas mi ñu ꞌaxuanxmabi aín ꞌucha cupí anu ax cuanti anu cuanxa. Usa ꞌain camina camabi unían aín nuitunën sináncë ñu ꞌunáncë ꞌixun, min ënë uni rabë́ uiira caramina Judasnën ñu mëëti ꞌanun caísa quixun nu ismiti ꞌain.

26Catancëxun ca uix cara ꞌiti ꞌicë isnuxun ñuratsu pain niquin tancëxa, tancëxbi ca Matías ꞌiacëxa. Usaquian caíscë ꞌaish ca Jesusan aín bana ñuixunun caíscë uni mëcën rabë́ ꞌimainun achúshi, acamabë Matías biranancëxa.

Currently Selected:

Jesusan Unicaman Ñu ꞌA 1: cbrPB

Highlight

Copy