Jesusan Unicaman Ñu ꞌA 11

Judíosma unicamaxribi Jesucristomi catamëtia Jerusalénuxun ꞌunáncan

1Usa ꞌain ca Jesusan aín bana uni ñuixunun caíscë unicamabëtan Judea menuxun axa Jesucristomi catamëcë unicamanribi, judíos unishima judíosma unicamaxribi ca Nucën Papa Diosan bana cuati Jesúsmi catamëtia quixun ñuicania cuacëxa. 2A ñucama cuacamainun ca Pedro Jerusalénu cuantëcëancëxa. Cuanxa bëbacë ca axa Jesúsmi catamëcë judíos unicama an, judíosma uni Jesucristomi catamëcë ca nux ꞌicësaribiti ꞌunántiocë ꞌiti ꞌicë quixun sinánquin ami nishtisa tanquin Pedro ñu cacëxa. 3Ñuiquin ca cacëxa:

—¿Uisa ꞌixun caramina aín xubunu atsíanan judíosma unicamabëtan pian?

4Cacëxunbi ca uisai cara ñu ꞌiaxa upí oquin ñuixunquin atu ësoquin cacëxa: 5—Jope ëmanuax Nucën Papa Diosbë banaquinbi cana namáquin iscësa oquin naí panárabëcëbëa anuax chupa cha amácasa ꞌitánun aín rëbucamanu rabë́ ꞌimainun rabë́ oquin tëcërëcacë ꞌaish ꞌë ꞌurama ubutia isan. 6Usaria ñachaquin iscëxbi ca bëtsi bëtsi ñuina taën nicë ꞌimainun axa ꞌacanancë ñuina ꞌimainun men nirícë ñuina ꞌimainun pëchiu ñuina acamaribi anu ꞌiaxa. 7Anu ꞌicë isquinbi cana ësaía quia cuan: Pedro, niruxun ca rëxun pit. 8Cacëxun cana can: ꞌËn ꞌIbu, cana ꞌaiman. Pitima ñu cana ꞌën uisa ꞌixunbi picëma ꞌain. 9Cacëxun ca naínuxun ꞌë caxa: Nucën Papa Diosan upí ꞌimicë ñu camina ꞌatima ca quixun catima ꞌain. 10Usaía rabë́ ꞌimainun achúshiti quia cuacëbë ca a chupabëbi ñucama ax naínu cuantëcëanxa. 11Cuancëbëbi ca ꞌëx anu ꞌicë xubunu rabë́ ꞌimainun achúshi uni bëbáxa, Cesárea ëmanuxuan ꞌë barinun xucancëx. 12Acamaxa bëbamainun ca Nucën Papa Diosan Bëru Ñunshin Upitan, judíos unima ca quixun sinanima a unicamabë cuanun quixun ꞌë caxa. Usa ꞌain cana atubë cuan, ꞌimainun ca axribi Jesucristomi catamëcë ꞌaish mëcën achúshi ꞌimainun achúshi uni ënë́xribi ꞌëbë cuanxa. Cuanx cananuna an ꞌë camicë unin xubunu atsían. 13Atsinia ca ësaquin nu caxa: ꞌËn xubunu nicë cana ángel isan. Iscëxun ca ꞌë caxa: Jope ëmanu camina uni xuti ꞌain. Xucëx cuanxun ca uni achúshi Simón ꞌicëbia Pedro caquinribi anëcë, a ënu bëti ꞌicën. 14Bëcëx uxun ca uisai caramina min xubunu ꞌicë camabëbi Nucën Papa Diosnan ꞌaish abë ꞌinux ië́ti ꞌai quixun mi cati ꞌicën. 15Ësaquin ca ángelnën ꞌë caxa quixun an ꞌë camicë unin ꞌë cacëxun cana ꞌën Jesucristo ñuiquin anu ꞌicë unicama bana ñuixuan. Atu bana ñuixuncëbëbi ca Nucën Papa Diosan Bëru Ñumshin Upí nunua ucësaribiti atunu uaxa. 16Usai ꞌicëbëtan cana Nucën ꞌIbu Jesús axa ësai quiá sinan: Juanën ca uni ꞌunpaxan nashimiaxa. Usa ꞌaínbi camina axa mitsubë ꞌinux ucëbë Nucën Papa Diosan Bëru Ñumshin Upíñu ꞌiti ꞌain. 17Usa ꞌaían nu ꞌacësaribi oquin Jesucristomia catamëtia, atu aín Bëru Ñumshin Upí ꞌinania cana ꞌën ꞌinánxunma ꞌanun quixun Nucën Papa Dios catima ꞌain.

18Ësaquin Pedronën ñuia cuati ca a ñu catëcënima Nucën Papa Dios rabi quiacëxa:

—Bërí cananuna ꞌunanin, judíos unishima, judíosma unicamaribi ca Nucën Papa Diosan ꞌatimaquin sináncë ꞌaíshbi Jesucristomi catamëtia xënibua ꞌaínbi ainan ꞌinun sinanamia —quixun.

Antioquía ëmanuax Jesucristomi catamëcë unicama

19Esteban pain rëtancëxun ca Jesucristomi catamëcë unicama axa atumi nishcë unicaman bëtsi bëtsi ocëxa. Usocëx ca tsuáqui raírinëxa Fenicia menu cuantamainun raírinëxribia nasí cha, Chipre cacë, anu cuantamainun raírinëxribi Antioquía ëmanu cuancëxa. Cuanxun ca bëtsi unibuma judíos unibuishi, Jesucristomi catamëti ca uni Nucën Papa Diosnan ꞌiti ꞌicë quixun bana ñuixuancëxa. 20Ñuixunmainun ca Chipre ꞌimainun Cirene menuaxa Jesucristomi catamëcë uni raíri anribishi Antioquía ëmanu cuanx bëbaxun, Nucën ꞌIbu Jesúsmi catamëti ca uni Nucën Papa Diosnan ꞌiti ꞌicë quixun, judíosma uniribi bana ñuixuancëxa. 21Nucën ꞌIbu Diosan cushiocëxuan a unicaman aín bana ñuixuncëxun cuati ca ꞌitsa uni atúan bëráma ñu ꞌaisama ꞌacëcama ënquin sinanati, Nucën ꞌIbu Jesúsmi catamëacëxa.

22Usaía ꞌicëa ñuia ca axa Jesucristomi catamëcë unicaman Jerusalénuxun cuacëxa. Cuaxun ca Bernabé Antioquíanu cuantánun quixun xuacëxa. 23Xucëx cuanx bëbaquin, Nucën Papa Diosanbia atu judíos uni ꞌicëmabi chuámarua ꞌaísha upí nuituñu ꞌinun ainan ꞌimicë isi ca Bernabé cuëëancëxa. Cuëënquin ca ꞌësëquin cacëxa:

—Mitsúnmi bëráma ꞌacë ñu ꞌatëcëníma camina Nucën ꞌIbu Jesús ami ëníma catamëti ꞌain.

24Ax upí nuituñu ꞌianan Jesucristomi catamëcë ꞌaish Nucën Papa Diosan Bëru Ñumshin Upíñu ꞌixuan Bernabénën usaquin cacëxun cuati ca ꞌitsaira uni Nucën ꞌIbu Jesúsmi catamëacëxa.

25ꞌItsaira axa Jesucristomi catamëcë unicama ꞌain ca Tarso ëmanu, Saulo bari Bernabé cuancëxa. Cuanxun mëraxun ca Antioquíanu bëacëxa. 26Bëax achúshi baritian anu ꞌiquin ca Saulobëtan Bernabénën axa Jesucristomi catamëcë unicamabë timë́quin atu ꞌunánmiacëxa. Usa ꞌain ca Antioquíanuxun pain uni raírinën axa Jesucristomi catamëcë unicama Cristonën uni caquin anëacëxa.

27Saulobëa Bernabé Antioquíanu ꞌain ca an Nucën Papa Diosan sinánmicëxun unicama ñuixuncë uni raírinëx Jerusalénuax Antioquíanu uacëxa. 28Acama achúshinëx ca Agabo caquin anëcë ꞌiacëxa. An ca Nucën Papa Diosan Bëru Ñumshin Upitan ꞌunánmicë ꞌaish niruquin anu ꞌicë unicama cacëxa, camabi menu ꞌicë unix ca pitiñuma ꞌiti ꞌicë quixun. Axa usai quicësabi oi ca Claudio cacë uníxa ꞌapu ꞌain ꞌiacëxa. 29Usai ꞌicëbëa Judeanu ꞌicë axa Jesucristomi catamëcë unicamax atun piti ñuñuma ꞌicë ñuicania cuaxun ca Antioquíanu ꞌicë unicaman curíqui atu buánmiti sináncëxa, axa ꞌitsa curíquiñucaman uiti cara nainsa tania ꞌati nanmainun uicamax cara ꞌitsamashi curíquiñu ꞌicë acamanribi uiti cara nainsa tania ꞌati nantancëxun. 30Sinánxun achúshi achúshinën ꞌitsaira curíquiñu an ꞌitsa nanmainun ꞌitsamashi curíquiñu anribi ꞌitsamashi nantancëxun a curíquicama Saulocëñun Bernabé ꞌinánquin cacáncëxa:

—Ënë curíquicama camina Judeanuxuan an Jesucristomi catamëcë unicama bana ñuixuncë unicama a ꞌinánti ꞌai —quixun.

Currently Selected:

Jesusan Unicaman Ñu ꞌA 11: cbrPB

Highlight

Copy