Jesusan Unicaman Ñu ꞌA 10

Cornelio isia Pedro cuan

1Cesárea ëmanu ca uni achúshi, Cornelio cacë, ꞌiacëxa. A unix ca cien suntárucama, Itálica cacë, aín cushi ꞌiacëxa. 2A unix ca aín xubunua ꞌicë aín aintsi ꞌibucamabëtan Nucën Papa Dios aín bana cuaquin rabicë ꞌiacëxa. Usai ꞌianan ca ñuñuma judíos unicama ꞌitsa oquin curíqui ꞌináncëxa. ꞌInánan ca camabi nëtën Nucën Papa Diosbë banacëxa. 3Usa ꞌixun ca bëtsi nëtën bari cuabutia, a las tres ꞌain, namáquin iscësoquin ángel achúshi Nucën Papa Diosan xucëx anu aia upí oquin isacëxa. Iscëx anua ꞌicënu atsínquin ca —Cornelio —caquin cuëancëxa. 4Cuëncëxun ami bësuquin isíbi racuëtan bamaquin ca cacëxa:

—¿Añu cat?

Cacëxun ca ángelnën cacëxa:

—Abë banaquinmi ñuñuma uni ñu ꞌináncëcama ca Nucën Papa Diosan asábi isaxa. 5Usa ꞌain camina min unicama Jope ëmanu xuti ꞌain, anu ꞌicë uni achúshi Simón ꞌicëbia Pedro caquinribi anëcë, a ënu bënun. 6Simón Pedro ax ca an ñuina xacá mëníoti ꞌunáncë uni, Simón caquin anëcëribi bëtsi uni, axa parúmpapa cuëbí tsócë, aín xubunu ꞌicën.

7Ësoquin catancëx ángel cuan ca Cornelionën, an ñu mëëxuncë uni rabë́cëñun ax ꞌicësaribitia ax Nucën Papa Diosmi sináncë suntáru achúshi aribi cuëancëxa. 8Cuënxun ca ángelnëan a cacëcama ñuixuntancëxun Jopenu cuantánun xuacëxa.

9Xucëx pëcaraquiani bain cuani Jope ꞌuramaquianmainun ca bari xamárucëbë Nucën Papa Diosbë banai Pedro tapitinën xubu mascuan cata itsi masapan oquin ꞌacë anu ꞌiruacëxa. 10Anu ꞌiruxun ca pitia ꞌaruxuncamainun panánxun piisa tanquin Pedronën namáquin iscësoquin isacëxa. 11Iscë́xa naí panarabë́cëbë ca anuax chupa chaira, amácasa ꞌitánun aín rëbucamanu rabë́ ꞌimainun rabë́ oquin tëcërëcacë ꞌaish meu ubúacëxa. 12A chupanu ca bëtsi bëtsi ñuina taën nicë, ꞌimainun axa men nirícë ñuina ꞌimainun pëchiu ñuina acama ꞌiacëxa. A ñuinacamax ca piti ꞌicëbia judíos unicaman pitima isa quixun cacë ꞌiacëxa. 13A ñucama ubutia isquinshi ca Pedronën ësai quia cuacëxa:

—Pedro, niruxun ca rëxun pit.

14Cacëxun cuaquin ca Pedronën cacëxa:

—ꞌËn ꞌIbu, cana ꞌaiman, pitima ñu cana ꞌën uisa ꞌixunbi picëma ꞌain.

15Ësoquin caquinbi ca ësaia quia cuatëcëancëxa:

—Nucën Papa Diosan upí ꞌinun mëníocë ñu camina ꞌatima ca quixun catima ꞌain.

16Usaía rabë́ ꞌimainun achúshiti quia Pedronën cuacëbë ca a chupabë ñucamaribi naínu cuantëcëancëxa. 17Usaía ꞌicëbë ca Pedro uisa cupí cara isa namáquin iscësoquin ñu isaxa quiax sináncasmacëxa. Usaía Pedro ꞌimainun ca Cornelionën xucë unicamax uinu cara Simonan xubu ꞌicë quixun ñucábianx aín xëcuënu bëbacëxa. 18Bëbaxun ca munuma banaquin, uni achúshi, Simón ꞌicëbia Pedro caquinribi anëcë, ax cara ënu ꞌicë quixun ñucácëxa. 19A baricamainuan namácësoquin iscë ñucama a sinan sinaniabi ca Pedro Nucën Papa Diosan Bëru Ñunshin Upitan cacëxa:

—Rabë́ ꞌimainun achúshi unin ca mi baria. 20Usa ꞌain ca ꞌibútancëx mëníocaquiani atubë cuantan. ꞌËn cana atu xuan. Usa ꞌain camina, judíos unima ꞌain cana abë cuantima ꞌai quima atubë cuanti ꞌain.

21Cacëx ꞌibúquin ca Cornelionëan xucë unicama Pedronën cacëxa:

—ꞌËx cana ami baricë a ꞌain. ¿Añuai caina uan?

22Cacëxun ca a unicaman Pedro cacëxa:

—Cornelio cacë suntárnunën cushi, ax upí uni ꞌianan an Nucën Papa Diosan bana cuacë ꞌicëa upí uni ꞌicë judíos unicaman ꞌunáncë, a ca Nucën Papa Diosan xucë ángelnën caxa, min bana cuanuxuan aín xubunumi cuanun mi caminun quixun.

23Ësaquian cacëxun atsínmicëx ca a unicamax Pedrobë a xubunu ꞌiacëxa. ꞌInëti pëcaracëbë ca Pedro mëníocaquiani, axa a buani ucë unicama a ꞌimainun Jopenuaxa Jesúsmi sináncë uni raíricamabëribi Cesárea ëmanu cuancëxa.

24Coonx ca Cesárea ëmanu bëbacëxa. Bëbamainun ca Cornelionën aín aintsi ꞌibucamacëñun an ꞌunáncë unicamaribi aín xubunu cuanun quixun camiacëxa. Camicë́xa timë́an ca acamabëtan Pedro caíancëxa. 25Caíncëx bëbax aín xubunu atsinia ëman chiquíquin bitsi, a tanáin rantin puruni tsóbuquin ca Cornelionën Pedro rabiacëxa. 26Rabicëxunbi ca Pedronën Cornelio biruquin, —ca nirut, ꞌëxribi cana misaribi unishi ꞌai —quixun cacëxa.

27Ësoquin catancëx Corneliobë banaquianx atsínquinbi ca Pedronën ꞌitsa uni timë́cë isacëxa. 28Isquin ca atu cacëxa:

—Mitsun camina ꞌunanin, ax quicësabi oía judíos unicama ꞌiti bana ca quia, judíos uníxa judíosma unibë timë́anan aín xubunu atsínti ca ꞌaisama ꞌicë quiax. ꞌËnribi a bana ꞌunáncë ꞌicëbi ca Nucën Papa Diosan uinu ꞌicë unibi, ꞌaisama ca quixun ñuixunma ꞌanun ꞌë ꞌunánmiaxa. 29Usa ꞌain cana min ꞌë camicëx, judío uni ꞌaish, cana cuanima quixun sinanima bënëtishi uan. Usa cupí cana uisoti caramina ꞌë camia quixun ꞌunántisa tanin.

30Cacëxun ca Pedro Cornelionën cacëxa:

—Rabë́ ꞌimainun rabë́ nëtë ca ꞌëx anun ësañuribi baria cuabúcëbë, ꞌëx ꞌicësabi ñubi piaxma ꞌën xubunuax Nucën Papa Diosbë banaëxancë ꞌicën. Banaquin iscëx ca uni achúshi aín chupa chaba chabaquicë ꞌaish ꞌën bëmánanu niracëxanxa. 31Niracëquin ca ꞌë caëxanxa: Cornelio, mixmi abë banacëcama ca Nucën Papa Diosan cuaxa. Cuanan ca minmi ñuñuma uni ñu ꞌináncë acamaribi ꞌunanx cuëënquin manuima. 32Usa ꞌain camina Simón ꞌicëbi Pedro caquin anëcë a bëtánun min uni Jopenu xuti ꞌain. Ax ca ñuina xacá mëníoti ꞌunáncë uni, Simón cacëribi, parúnpapa cuëbía tsócë, aín xubunu ꞌicën. Ax ca uax mibë banati ꞌicën. 33Cacëxun cana bënë́nquinshia mi bënun quixun uni xuëxan. Xucëxuan cacëx camina upí oquin sinánbëtsini atubë ënu uan. Usa ꞌain cananuna Nucën ꞌIbu Diosan nu ismainun ënu bërí ꞌain, an mi sinánmicëxunmi nu ñuixuncëxun cuanux.

Cornelionën xubunuxun Pedronën bana ñuixuan

34Ësoquian cacëxun ca Pedronën Cornelio cacëxa:

—ꞌËn cana bërí asérabi ꞌunanin, Nucën Papa Diosan ca judíosma unibu judíos unisaribi isquin camabi uni sënën isia. 35Usa ꞌixun ca an aín bana cuaquin ñu upíshi ꞌacë unicama camabi menu ainan ꞌimia. 36Nucën Papa Diosan ca Israel unicama aín bana ñuixunquian Jesucristo ax ca camabi unin ꞌibu ꞌixun an nu chuámarua ꞌimiti a ꞌicë quixun ñuixunun aín unicama xuaxa. 37Mitsun camina upí oquin ꞌunanin, Juanën pain ca Jesucristo ñuiquin Nucën Papa Diosan bana ñuixunquin uni nashimiacëxa. Usoquian Juanën ꞌa ñucama a ꞌunánan camina Galilea menuax cara uisai ꞌiacëxa quixun ꞌunanin. 38Camina ꞌunanin, Nucën Papa Diosan ca Jesús Nazaretnu ꞌicë a aín Bëru Ñunshin Upí abë ꞌinun ꞌinánquin aín cushiribi ꞌináncëxa. ꞌInáncëxun ca ñu upíshi ꞌanan ñunshin ꞌatimañu unicamaribi pëxcüacëxa, Nucën Papa Dios abë ꞌain. 39Jesusan Judea menu ꞌicë ëma chucúmaracamanuxun ꞌanan Jerusalénuxunribi ꞌacë ñucama a cananuna nun isacën. Usoquian ñu ꞌacëbi ca i curúsocënu matásquin unin ꞌacëxa. 40ꞌAcëbi ca Nucën Papa Diosan rabë́ nëtë ꞌiónxa pëcaracëbëtanshi baísquimiacëxa. Usaía ꞌia isnun ca nu mëníoxuancëxa. 41Jesús baísquicëbi ca camabi uníinra isama ꞌicën. Nun cuni cananuna Nucën Papa Diosan, Jesús ñuiquin unicama bana ñuixunun bëráma caísa ꞌixun, baísquicë isanan abëtan pianan xëacën. 42Usa ꞌicë ca aín bana unicama ñuixunun xuquin nu ësaquin cacëxa: Nucën Papa Diosan ꞌimicëxun cana ꞌën, uni bamacëmacama ꞌimainun bamacë unicamaribi, uisaira cara ënë menuax ꞌiaxa quixun ꞌunánquin, Nucën Papa Diosbë cara ꞌiti ꞌicë, cara ꞌitima ꞌicë quixun cati ꞌain. Usaquin camina unicama ñuixunti ꞌai quixun ca Jesusan nu cacëxa. 43An Nucën Papa Dios quicë bana uni ñuixuncë unicamaxribi ca Jesús ñui ësai quiacëxa, camabi uni axa aín bana cuati ami catamëcë, a ca aín ꞌuchacama Jesusan tërë́nxunia quixun.

Abë ꞌinúan judíosma unicama Nucën Papa Diosan aín Bëru Ñunshin Upí ꞌinan

44Usoquian Pedronën atu bana ñuixunmainun ca axa aín bana cuati Nucën Papa Diosmi sináncë unicamanu aín Bëru Ñunshin Upí uacëxa. 45-46Usa ꞌain ca aín Bëru Ñunshin Upitan ꞌimicëxun unin cuacëma banan banaquin Nucën Papa Dios rabicancëxa. Nucën Papa Dios rabicania cuati ca Pedrobëa ucë Jesúsmi sináncë unicama ax judíosma unicamaxribia Nucën Papa Diosan Bëru Ñunshin Upíñu ꞌicë isi ratuti sináncasmacëxa. 47Usaria ca Pedronën cacëxa:

—Nux ꞌicësaribitia Nucën Papa Diosan Bëru Ñumshin Upíñu ꞌicë cananuna ënë unicama, ꞌunpaxan nashimitima ca quixun catima ꞌain.

48Ësoquin catancëxun ca Pedronën a unicama Jesucristomi catamëcë ꞌaísha nashimicë ꞌinun cacëxa. Nashimicë ꞌixun ca Pedro a unicaman atubë pan isa ꞌinun quixun cacëxa.

Currently Selected:

Jesusan Unicaman Ñu ꞌA 10: cbrPB

Highlight

Copy