Matayɔ 17

Mesu ngika kʉ Yeso kʉnɨtana tiga kʉ di

(Mak 9:2-13; Luk 9:28-36)

1Mbise ʉ makwaa ʉmalɨa, Yeso ambʉchɨka ɔɔ Pɛtɛlɔ nʉ Yakɔbɔ, nʉ Yʉanɨ manye ʉ Yakɔbɔ, ɓambuɗito naɓɔ ekoo ʉ ɨkpangba mɨngana yɛɛ ikongo. Ɓi꞉nye nani tʉkʉ ɛɓɔ. 2Tiga nanɨ, mesu ngikʉ Yeso kambʉnɨtana kʉ di gbɛgbɛ tʉkʉ ananɨ apɛɛ ʉ ʉndaɓʉ. Mesu ngikangɔ kambufaniso jɨa ndʉ ɨpá, lɨpʉkʉ ngilangɔ lambʉka tiga tu nadɨndɨ ndʉ wanga. 3Kʉ nɨma ngiinanɨ, ɔɔ Mʉsa nʉ Ɛlɨa ɓambʉɓwanɨa ɓʉ ngbaii, ɛɓɔ kʉyakanaka nʉ ɔɔ Yeso. 4Gʉ Pɛtɛlɔ nʉ Yeso ɓɔ: « Huu! Makʉʉɓɨɨ, ya gɔ piɛ iɗo isu kuɓio tii tʉkʉ aka. Ndʉ wabaya, ma꞊tɨa lɨhɨma dyeetu: yɨsɔɔ kʉ mɨngana, yɨ Mʉsa kʉ mɨngana, yɨ Ɛlɨa kʉ mɨngana. » 5Ati ngia Pɛtɛlɔ i꞉nye‑zʉ‑ɔɔ tʉkʉ kʉyaka, indindi yɛɛ ɨjɨyɛ yambʉka naɓɔ kukuto ɓʉ gbu. Na amati ɔngɔ, iyo yambʉkɔnɨɔ kusigo ɓɔ: « Mwana ngiasɛmɛ wʉ ɓʉkʉnda iyakɛ. Aanakataa nadɨndɨ. Mʉkeni ɛyɔ! » 6Ati ngia ɓakpataka ngiɓangɔ ɓa꞉kɔ‑ɔɔ iyo ngiinanɨ, ɓambʉkwa ʉɓa nadɨndɨ, ɓambʉgbʉkʉmɨa mesu akɛsɨ. 7Yeso ambʉka tinene naɓɔ, ambuɓuɓoto, gʉ ɛyɔ naɓɔ ɓɔ: « Ʉngweni ɨkʉʉ, nɔɔkwakɔmʉ ʉɓa! » 8Iya ɓa꞉zono waja nɨkʉʉ, chʉkɔmʉ ɓambʉna tii ɓata ɓombi nga ɓɔmɔ, ɓambʉna tii tʉkʉ Yeso kʉ nangana. 9Iya ɓi꞉nye tiga kijo ɨkpangba, Yeso ambʉɓʉgbʉma ɓɔ: « Nɔɔngakɨakɔmʉ mombi gʉkʉ mʉngana moni ngikʉnanɨ nʉna, kʉɓʉya tʉkʉ aka Mwana ngia ʉ Mombi a꞊jʉkana sina‑ɔɔ akʉ ingyo. » 10Mbise ɔngɔ, ɓakpataka ɓambuɓukuo Yeso ɓɔ: « Jʉtanɨ ɓapananakɨa ɓʉ mapanʉ ɓaasigo ɓɔ yɨkwanana ɓɔ Ɛlɨa ʉka‑zʉ pɛɛ? » 11Gʉ Yeso naɓɔ ɓɔ: « Ya kingono ɓɔ yɨkwanana Ɛlɨa kʉka kʉtambanaka moni kʉ muɓomu. 12Ɨkyɛmɨngana, maninu kusigio ɓɔ Ɛlɨa a꞉ka jɛnɛ kanɨ, chʉkɔmʉ ɓombi ɓambʉmʉmbɨa. Kija ɓa꞉mʉkyananaka tʉkʉ ndʉ aka ɓi꞉nye‑ɔɔ kʉkʉnda. Nʉ ɓa꞊kyananaka sina Mwana ngia ʉ Mombi kʉ ɓwanɨ. » 13Kija ɓakpataka ɓa꞉pimiso tiga ɓɔ Yeso a꞉ɓʉngakɨa moni ngikʉnanɨ ekoo ʉ Yʉanɨ ngia i꞉nye ɓatiso ɓombi.

Yeso uhiiso mwana ngia i꞉nye nʉ yapiki‑piki

(Mak 9:14-29; Luk 9:37-43)

14Iya ɓa꞉ɓʉya aka ungbutu wʉ ɓombi wi꞉nye‑ɔɔ, mombi mʉngana ambʉka anambamba ʉ Yeso, ambʉgbʉkʉmɨa nʉ muwuu na apɛɛ angɔ. 15Gʉ ɛyɔ nayɔ ɓɔ: « Kikiliki Makʉʉɓɨɨ, nɨa ɓaka mwana ngiasɛmɛ ɔɔ gue tʉkʉ ikoko. Aakwikwio yapiki‑piki nʉ a amati ʉ ɓʉka‑ɓʉkaɨ. Aakwa yɛmɔ akʉ dyaa tʉkʉ ɓʉ bu, yɛmɔ amati ʉ mepo. 16Ma꞉sa bɛ nayɔ ɔɔ ɓakpataka ngiɓʉsɔɔ ɓɔ ɓumuhiiso, ɨkyɛmɨngana, yambʉɓʉkyaka bɛ tʉkʉ ɨsʉkʉɓwanɨ. » 17Yeso ambuɓutisio ɓɔ: « Inu ɓombi ɓʉ ɨjɨjɨ ngia na ɓɨɓɨ, nʉ nambʉkɔmʉ nʉ baya! Wati ʉpɨtanɨ maɓio ɓata‑zʉ‑ɔɔ ɨzɔ ninu? Nʉ wati ʉpɨtanɨ ɓata ma꞊nɨpɨa‑ɔɔ? Ikeni tiga nayɔ aka! » 18Yeso ambʉngbaakɨa 'ʉtʉma wʉ abɨa nguʉnanɨ, wambʉɓʉa amati ʉ mwana ɓʉ pu, mwana ambʉhɨa gbɛgbɛ tʉkʉ ananɨ. 19Mbise ngiinanɨ, ɓakpataka ɓambʉka anambamba ʉ Yeso zʉ tʉkʉ ɛɓɔ, gʉ ɛɓɔ nayɔ ɓɔ: « 'Ʉtʉma wʉ abɨa nguʉnanɨ, wʉ꞉tɨkyaka piɛ‑zʉ isu kiso jʉtanɨ? » 20Gʉ ɛyɔ naɓɔ ɓɔ: « Jʉ baya ngiindɛnʉ ya ɗɛkɛkɛ. Maninu kusigio tʉkʉ kingono ɓɔ, baya ngiindɛnʉ yinyeni piɛ ɗɛkɛkɛ tʉkʉ ndʉ ipumo yɨ ɓʉtɨ ngiɓa ɓaaɓusoko ɓɔ aladali, ambʉ nakwanana sigio ɨkpangba ngia ɓɔ: ‹ Ʉngwa aka, wambʉsa oki ›, kija yakyananakɨa tʉkʉ ndʉ ananɨ. Ambʉ ɨngbaa yɨ moni ngia yanɨkyaka yambukuɓio gʉkʉ mɨngana. [ 21Ɨkyɛmɨngana, ɨkanzi yɨ 'ʉtʉma wʉ abɨa ngua wambʉkʉkwanana kʉɓʉa yambikinye tʉkʉ ɨngbaa kʉta Asʉɓɨɨ, nʉ taa idyo akʉ wati.] »

Yeso ʉɓɨanɨa ɓata ingyo nʉ jʉkana akʉ ingyo ngiangɔ

(Mak 9:30-32; Luk 9:43-45)

22Ɓisi mʉngana, ɔɔ Yeso ɨzɔ nʉ ɓakpataka ngiɓangɔ ɓi꞉nye anʉ Galilaya. Gʉ ɛyɔ naɓɔ ɓɔ: « Ɛmɛ Mwana ngia ʉ Mombi ɓabi nɛmɛ kʉgaba akʉ lɨkɔndɔ lʉ ɓombi. 23Kija ɓa꞊nawa. Ɨkyɛmɨngana, mbise ʉ makwaa kaatʉ, mambʉjʉkana akʉ ingyo. » Ɓakpataka ɓambʉdya ikoko nadɨndɨ akʉ 'ʉtʉma nadɨndɨ.

Yeso ulipa manzanza kʉ ɨkáa yɨ Asʉɓɨɨ

24Ati ngia ɔɔ Yeso nʉ ɓakpataka ngiɓangɔ ɓa꞉ɓʉya‑ɔɔ anʉ Kapelenaumu, ɓandɔmbɛ ngiɓa ɓi꞉nye lipisa manzanza kʉ ɨkáa yɨ Asʉɓɨɨ, ɓambʉka anambamba ʉ Pɛtɛlɔ, gʉ ɛɓɔ nayɔ ɓɔ: « Ajʉ Mʉpananakɨa nguʉndɛnʉ waalipa‑zʉ manzanza kʉ ɨkáa yɨ Asʉɓɨɨ kʉ lipanɨ ɓɨɛ? » 25Pɛtɛlɔ ambuɓutisio ɓɔ: « Oo, aalipa lipaa. » Iya Pɛtɛlɔ i꞉nye tiga kukumunio ambɛnɨ, kija Yeso a꞉kpanga nayɔ ɓukuo ɓɔ: « Simoni, wakʉna moni ngika tanɨ? Ɓangama ɓɔɔ ɓʉkpɔkpɔ ɓʉ ɨtaka ngia ɓaalipisa‑zʉ ɓaneni manzanza? Gʉ yɛmɔ ɓana ɓʉ ɨkʉmbʉ, gʉ yɛmɔ ɓɛɛka? » 26Pɛtɛlɔ ambumutisio ɓɔ: « Ɓaalipisa tʉkʉ ɓɛɛka. » Gʉ Yeso nayɔ ɓɔ: « Kʉ ɓwanɨ, ɓana ɓʉ ɨkʉmbʉ ɓambakalipa yɨndaɓʉ manzanza. 27Ɨkyɛmɨngana, jʉ isu kambʉkɔmʉ kʉkʉnda naɓɔ kukwisiso, kʉ ɓwanɨ, sa kuno upisa akʉ yapuu. 'Usipe ngua wa꞊kpanga fana, ʉgana moni wa꞊gbʉka 'ukpekpe wʉ falanga mungono na amati. Chɨka 'ukpekpe wʉ ʉfalanga nguʉnanɨ, wambʉsa kulipa nawɔ manzanza ngikʉsɛmɛ nʉ ika kʉsɔɔ. »

Currently Selected:

Matayɔ 17: BudKoya

Highlight

Copy