Matayɔ 18

Anɨ a mombi ɔɔ ʉja akʉ Ɓʉngama ngiɓa ɓa ekoo ʉ ɓisi

(Mak 9:33-37; Luk 9:46-48)

1Tʉkʉ ati ngiinanɨ, ɓakpataka ngiɓʉ Yeso ɓambʉka nayɔ kuɓukuo ɓɔ: « Amati ʉ Ɓʉngama ngiɓa ɓa ekoo ʉ ɓisi, anɨ‑zʉ a mombi ɔɔ ʉja kʉɓaa ɓangɛ? » 2Yeso a꞉soko tʉkʉ mwana ɔɔ ɗɛkɛkɛ, ambumumaiso ati ʉndaɓʉ ɓʉ gba. 3Gʉ ɛyɔ naɓɔ ɓɔ: « Maninu kusigio tʉkʉ kingono, ndʉ nambukunicho mɨtʉma ngiindɛnʉ kʉka ngbanga ndʉ ɓana ɓɔɔ ɗɛ ɗɛ ɗɛ, nambukukumunio akʉ Ɓʉngama ngiɓa ɓa ekoo ʉ ɓisi gʉkʉ ɗɛkɛkɛ. 4Akʉ Ɓʉngama ngiɓa ɓa ekoo ʉ ɓisi, mombi ngia a 'ʉja kʉɓaa ɓangɛ ya gwa ngia akijisiniso nɨsɨ, ambʉnɨtanaka kuɓio ngbanga ndʉ mwana ngia. 5Kʉ ɓwanɨ, mombi kʉ uɓomu ngia a꞊jananɨa mwana ndʉ iyakɛ akʉ ino ngiisɛmɛ, ʉnajananɨa tʉkʉ ɛmɛ mambɨnyɔngɔ. »

Kanganieni ɓɔ nɔɔkwisisokɔmʉ ɓangɛ akʉ ɓʉɓɨɓɨ

(Mak 9:42-48; Luk 17:1-2)

6« Ɨkyɛmɨngana, ndʉ mombi akwisiso mʉngana ʉ ɓana ngiɓa ɓanɛmɛ kʉbaya ɛmɛ, yɨkwanana ɓɔ ɓumunzinzo ikopi yɛɛ kpʉgʉɛ idyo akʉ ɨmɨɔ ɓʉ dɔɔ, ɓambumugiso amati ʉ ɗei ɔɔ 'ʉja ɓʉ ɗu. 7Ikoko akʉ ʉɓɨɨ ekoo ʉ lɨngbaa lɨja lɔɔ likwisise ɓombi akʉ ɓʉɓɨɓɨ ngila la amati ɔngɔ! Ikanzi yɨ moni ngiinanɨ ka꞊kyɨanɨa tʉkʉ kyɨanɨaa. Ɨkyɛmɨngana, ikoko akʉ mombi ngia akwisiso mangɛ akʉ ɓʉɓɨɓɨ! 8Ndʉ ɨkɔndɔ ngiisɔɔ, yɛmɔ 'ʉtɨndɨ nguʉsɔɔ waɓio nɔwɛ kukwisiso akʉ ɓʉɓɨɓɨ, ʉtɨna tɨnaa, wambuugiso danga nɔwɛ! Ya iɗo ɔwɛ kukumunio akʉ Ɓʉngama ngiɓa ɓa ekoo ʉ ɓisi, winyeni nʉ ɨkɔndɔ mɨngana gʉ yɛmɔ 'ʉtɨndɨ mungono. Chʉkɔmʉ pɛpɛ ɓɔ ɓanagiso tiga amati ʉ dyaa yɨ mɨtʉ yɨ ɨpá nʉ mɨtʉ yɨ ɨpá, winyeni nʉ lɨkɔndɔ dyepini kʉ liɓomu, nʉ mɨtɨndɨ ɓepini kʉ iɓomu. 9Iso ngiisɔɔ yɨnatiteni kʉkyɨa ɓʉɓɨɓɨ, wʉkwanana nayɔ kuiso wambuigiso danga nɔwɛ! Ya iɗo ɔwɛ kukumunio akʉ Ɓʉngama ngiɓa ɓa ekoo ʉ ɓisi winyeni nʉ iso mɨngana, chʉkɔmʉ pɛpɛ ɓɔ ɓanagiso tiga amati ʉ dyaa yɨ mɨtʉ yɨ ɨpá nʉ mɨtʉ yɨ ɨpá, winyeni nʉ mesu kapɨnɨ kʉ muɓomu. »

Isisinio yɨ kɔndɔlɔ ngia a꞉yangaa

(Luk 15:3-7)

10« Kanganieni iɗo! Mombi ɔɔnakɔmʉ mwana gʉkʉ mʉngana ati ɔɔ ɓana ngiɓa ɨsʉkʉɓwanɨ! Jʉ maninu kusigio ɓɔ ɓamalaika ngiɓa ɓaaɓʉpɨmakɨa ɛɓɔ, ɓa wati kʉ uɓomu apɛɛ ʉ Tidoo ngiasɛmɛ ekoo ʉ ɓisi. 11[Jʉ Mwana ngia ʉ Mombi a꞉ka kuhiiso ɓombi ngiɓa ɓa꞉yangaa.] 12Inu nʉna moni ngika tanɨ? Kʉchɨkeni‑zʉ ɓɔ mombi mʉngana anʉ ɓakɔndɔlɔ ɓangɔ mɨa mʉngana, kija mʉngana ɔngɔ ayangaa. Ajʉ mombi ngiinanɨ ambʉkʉkwanana‑zʉ kʉsɨa iɓa ɓɔmɔ makumi nʉɓɔkwɔngɔ nʉ nʉɓɔkwɔngɔ na ekoo ʉ ɨkpangba, ambʉsa‑zʉ kʉhata iya aɓio ɓɔ ʉyangaeni ɓiɛ? 13Maninu kusigio tʉkʉ kingono ɓɔ, ati ngia ana‑ɔɔ mʉngana ngia aɓio ʉyangaeni, a꞊kwa tiga ɨgyagya nadɨndɨ ekoo ɨnanɨ kʉɓaa ɓakɔndɔlɔ makumi nʉɓɔkwɔngɔ nʉ nʉɓɔkwɔngɔ ngiɓa ɓa꞉yangaakɔmʉ. 14Ngbanga kʉ ɓwanɨ, Atɔ ʉndɛnʉ ngia a ekoo ʉ ɓisi ambʉkʉbaya ɓɔ mwana ɔɔ ɗɛkɛkɛ gʉkʉ mʉngana ati ʉ ɓana ngiɓakɛ ʉyangaa. »

Ɨngbaa yɨ salɨa ayoo ngia akʉkyɨa ɓʉɓɨɓɨ

15« Ndʉ mwana ʉ anʉ anakyɨa ɓʉɓɨɓɨ, sa nayɔ kʉgbʉka wambʉmʉɓɨakɨa ɓʉɓɨɓɨ ngiɓangɔ ninyeni inu nayɔ tʉkʉ ɓapɨnɨ. Ndʉ anakɔ, ambʉ kɔnɔ yɨ꞉tʉa kʉmbise ati ʉndɛnʉ nayɔ tʉaa. 16Ɨkyɛmɨngana, ʉnakenikɔmʉ, chɨka mombi nga kɔmɔ mʉngana, gʉ yɛmɔ ɓapɨnɨ, jʉ ɓa꞉tɨndakɨa ɓɔ: ‹ Moni kʉ muɓomu kʉkwanana kʉtambanakɨa tʉkʉ akʉ ʉɗaɗa wʉ ɓatɛmʉ ɓapɨnɨ, yɛmɔ ɓaatʉ. › 17Ayoo asɔɔ ngiinanɨ ʉkʉndenikɔmʉ kʉkɔ ɓatɛmʉ ngiɓʉnanɨ, wambʉsa kʉɓɨa kanisa. Ndʉ ayaa kʉkɔ kanisa, mʉchɨka tii tʉkʉ ndʉ mombi ngia ambʉkɔmʉ kʉbaya Yeso, yɛmɔ ndʉ ndɔmbɛ ɔɔ lipise manzanza. 18Maninu kusigio tʉkʉ kingono, moni kʉ muɓomu ngika inu na꞊dɨkpa akʉ ɨtaka aka, ɓa꞊kʉdɨkpa ekoo ʉ ɓisi kʉ dɨkpanɨ. Nʉ moni kʉ muɓomu ngika inu na꞊ɓono akʉ ɨtaka aka, ɓa꞊kuɓono ekoo ʉ ɓisi kʉ ɓonoo. 19Nʉ ɓata maninu kusigio tʉkʉ kingono ɓɔ, ɓombi ɓapɨnɨ ati ʉndɛnʉ akʉ ɨtaka ngia, ɓʉkɔneni kʉta Asʉɓɨɨ ɨkyɛmɛ kʉ iɓomu ngia ɓakʉkʉnda, Tidoo ngiasɛmɛ ekoo ʉ ɓisi, aɓunzo ɛyɔ tʉkʉ nzoni. 20Jʉ akʉ izi ngia ɓombi ɓapɨnɨ, yɛmɔ ɓaatʉ ɓamʉmanɨa‑ɔɔ akʉ ino ngiisɛmɛ, ɛmɛ ma tʉkʉ ɨzɔ naɓɔ. »

Isisinio yɨ mombi ʉ kuu ngia a꞉yaa kʉpɨa mangɛ

21Mbise ngiinanɨ, Pɛtɛlɔ ambʉka anambamba ʉ Yeso, kija a꞉muɓukuo ɓɔ: « Makʉʉɓɨɨ! Ndʉ ayoo asɛmɛ anakyɨa ɓʉɓɨɓɨ, mʉkwanana nayɔ kʉpɨa nɨsɨ mʉpɨtanɨ? Ajʉ yaɓio nɨsɨ ʉmalɨanɨka ɓiɛ? » 22Gʉ Yeso nayɔ ɓɔ: « Manɔwɛ kusigio ɓɔ, chʉkɔmʉ tʉkʉ nɨsɨ ʉmalɨanɨka, ɨkyɛmɨngana yaɓio nɨsɨ makumi ʉmalɨanɨka nɨsɨ ʉmalɨanɨka.

23Kʉ ɓwanɨ, Ɓʉngama ngiɓa ɓa ekoo ʉ ɓisi ɓa ngbanga ndʉ ngama ɔɔ ʉja mʉngana ngia a꞉soko ɓombi ɓʉ kuu ngiɓangɔ kʉkpɨngba mabɨngɨa ngiangɔ ɛɓɔ ɓi꞉nye nayɔ. 24Ɛyɔ tʉkʉ kufaniso kʉkpɨngba ɓɔmʉ, ɓambʉka nʉ mombi ʉ kuu mʉngana apɛɛ angɔ, iya i꞉nye nʉ mabɨngɨa wangɔ falanga ʉja nadɨndɨ wʉ talata.#18:24 Talata: ya ino yɨ falanga nʉ ʉɗaɗa wʉ ɓagiliki, iya i꞉nye ngbanga ndʉ ɛlɛfʉ kumi wʉ falanga ngiʉndaɓʉ. 25Mombi ʉ kuu ngiinanɨ, ambikinye nʉ ɨkyɛmɛ ngia atuiso nayɔ mabɨngɨa nguʉnanɨ. Kʉ ɓwanɨ, ngama ʉ kuu ngiangɔ ambunzo ʉpanʉ ɓɔ ɓʉmʉgaba tʉkʉ ndʉ bayo ɨzɔ nʉ moi angɔ, nʉ ɓana ɓangɔ nʉ kumbo ngiangɔ kʉ 'uɓomu kutuiso mabɨngɨa nguʉnanɨ. 26Mombi ʉ kuu ngiinanɨ, ambʉgbʉkʉmɨa nʉ muwuu apɛɛ angɔ, ambumukikilikio ɓɔ: ‹ Nasiɓo ɓaka‑zʉ siɓoni, ma꞊nanzo kumbo ngiasɔɔ tʉkʉ kʉ 'uɓomu. › 27Kija ngama ʉ kuu a꞉mʉnɨa ikoko, ambʉmʉpɨa mabɨngɨa nguʉnanɨ, ambumunzo kɨnda. 28Ati ngia mombi ʉ kuu ngiinanɨ a꞉ʉngwa‑ɔɔ nanɨ, ɓambujono nʉ abangɔ mombi ʉ kuu nga kɔmɔ, iya i꞉nye nʉ mabɨngɨa wangɔ wʉ dinali mɨa mʉngana.#18:28 Dinali mɨa mʉngana akʉ falanga ngia wʉ ɓagiliki i꞉nye ɗɛkɛkɛ akʉ talata. Ambʉmʉfa, ambʉmʉnaminyo ɨmɨɔ, gʉ ɛyɔ nayɔ ɓɔ: ‹ Tuiso mabɨngɨa nguʉsɛmɛ tʉkʉ ɨtakɨ‑takɨ ngia! › 29Ɛyɔ mangɛ ambʉkwa nʉ muwuu nanɨ apɛɛ angɔ ɓʉ kpruu. Ambʉmʉndɨanɨa ɓɔ: ‹ Nasiɓo ɓaka‑zʉ tʉkʉ siɓoni, ma꞊nanzo kumbo ngiasɔɔ tʉkʉ nzoo. › 30Ɨkyɛmɨngana, ɛyɔ ambʉyaa tʉkʉ yaa. Ambʉsa nayɔ kufisiso akʉ ɨkáa yɨ boloko ɓɔ uɓio tʉkʉ nani, kʉɓʉya tʉkʉ aka a꞉tuiso‑ɔɔ mabɨngɨa nguangɔ. 31Iya ɓaba ɓangɔ, ɓombi ɓʉ kuu ngiɓɔmɔ ɓa꞉na moni ngikʉnanɨ, ɓambʉdya ikoko nadɨndɨ akʉ 'ʉtʉma. Kija ɓa꞉sa kʉɓɨa ngama ʉ kuu moni kʉ muɓomu ngika ka꞉kyɨanɨa. 32Kʉ ɓwanɨ, ngama ʉ kuu ambusoko mombi ʉ kuu ngiinanɨ, gʉ ɛyɔ nayɔ ɓɔ: ‹ Wa tʉkʉ mombi ʉ kuu ɔɔ ɓɨɓɨ! Ʉna‑zʉ wi꞉nye bɛ nʉ mabɨngɨa wʉsɛmɛ ʉja nadɨndɨ, mambʉnapɨa bɛ ʉwɔ tʉkʉ kʉ uɓomu, jʉ wa꞉nakikilikio bɛ! 33Jʉtanɨ wʉkʉndakɔmu piɛ kʉnɨa mangɛ ikoko, ngbanga kʉndʉ iya ma꞉nanɨa bɛ ɔwɛ ikoko? › 34Kʉ ɓwanɨ, ngama ʉ kuu ambuhuo nʉ ʉnganga, ambufiso mombi ʉ kuu ngiinanɨ akʉ boloko, ambunzo ʉpanʉ ɓɔ ɓʉmʉkyanaka kʉɓʉya tʉkʉ aka atuiso‑ɔɔ mabɨngɨa nguangɔ kʉ uɓomu. 35Yeso ambupipio tiga kusigo ɓɔ Tidoo ngiasɛmɛ a ekoo ʉ ɓisi a꞊nɨkyananaka sina inu kʉ ɓwanɨ, ndʉ inu kʉ nangana nangana nambʉkʉpɨa ɓangɛ 'ʉtʉma tʉkʉ mungono. »

Currently Selected:

Matayɔ 18: BudKoya

Highlight

Copy