Luka 6
6
Yeso ʉyaka moni ekoo ʉ ɓisi ɓʉ humuo
(Mat 12:1-14; Mak 2:23-28)
1Tiga nanɨ, yi꞉nye ɓisi ɓʉ humuo mʉngana ɓɔmʉ, ɔɔ Yeso ɨzɔ nʉ ɓakpataka ngiɓangɔ ɓi꞉nye kʉɓaa ati ʉ matɨnɨ kʉ nganʉ. Ɓakpataka ɓi꞉nye kʉbʉa lɨkaja lʉ nganʉ, nʉ kutindikio lɨpapɨ lɔngɔ nʉ dya mɨsɛɛ yɛngɔ. 2Kija Ɓafalisayɔ ngana ngana ɓa꞉ɓuɓukuo ɓɔ: « Jʉtanɨ nakʉkyɨa ɨkyɛmɛ ngia mapanʉ ka꞉gbʉma kʉkyɨa engo akʉ ɓisi ɓʉ humuo? »
3Yeso ambuɓutisio ɓɔ: « Ajʉ nambupopokokɔmʉ sina‑zʉ moni ngika Daudi a꞉kyɨa ati ngia a꞉kɔnɔ‑ɔɔ taa, ɛɓɔ nʉ ɓombi ngiɓa ɓi꞉nye ɨzɔ nayɔ? 4A꞉kumunio amati ʉ ɨkáa yɨ Asʉɓɨɨ tʉkʉ ɓʉ ngbuu, ambʉchɨka mikati ngia ɓi꞉nye ɓunzeni akʉ Asʉɓɨɨ, ambʉɨdya ambunzikio ɓombi ngiɓa ɓi꞉nye ɨzɔ nayɔ kʉ nzikioo. Ʉna tɔ, mikati ngiinanɨ yi꞉nye nʉ ʉpanʉ ɓɔ mombi nga kɔmɔ ɔɔɨdyakɔmʉ, tʉkʉ ɓakumu‑kumu ɓʉɨdya. »
5Yeso ambuɓusigio ɓata ɓɔ: « Mwana ngia ʉ Mombi a makʉʉ ʉ ɓisi ɓʉ humuo ɓʉ Ɓayuda. »
Yeso uhiiso mombi akʉ ɓisi ɓʉ humuo
(Mat 12:9-14; Mak 3:1-6)
6Ɓata akʉ ɓisi ɓʉ humuo nga ɓɔmɔ, Yeso ambukumunio amati ʉ ɨkáa yɨ nɨta ngia yɨ Ɓayuda kʉpanɨa. Mombi mʉngana i꞉nye nani iya i꞉nye ɨkɔndɔ iwe ɓʉ kpɔjɔ. 7Ɓapananakɨa ɓʉ mapanʉ nʉ Ɓafalisayɔ ɓi꞉nye nayɔ tii tʉkʉ kʉkpɨma ɓɔ atiga ahiiso gɔ mombi akʉ ɓisi ɓʉ humuo, ambʉ ɓʉnyɨa nɨngbaa yɨ moni ngia ɓamʉnapɨa nayɔ nʉ 'ʉkɔmbɔ. 8Ɨkyɛmɨngana, Yeso i꞉nye kʉmbɨa ɨkyɛmɛ ngia ɓi꞉nye kutunguo engo kʉtaa, kija a꞉sigio gue ngiinanɨ i꞉nye nʉ ɨkɔndɔ yɛɛ iwe ɓɔ: « Ʉngwa ɨkʉʉ! Maa na ati ʉ ɓombi kʉ ɓuɓomu. » Gue ngiinanɨ ambʉʉngwa ɨkʉʉ, ambʉmaa ati ʉndaɓʉ. 9Kija Yeso a꞉ɓuɓukuo ɓɔ: « Ajʉ mapanʉ ngikʉndɛsʉ kaabaya kʉkyɨa iɗo, gʉ kʉkyɨa ɓʉɓɨɓɨ akʉ ɓisi ɓʉ humuo bayanɨ ɓiɛ? Kuhiiso mombi, gʉ nayɔ kʉwa ɓiɛ? » 10Ambʉɓʉtɨna ɛɓɔ kʉ ɓuɓomu nʉ waja, ambusigio gue ngiinanɨ ɓɔ: « Yumo ɨkɔndɔ. » Gue ngiinanɨ ambuyumo ɨkɔndɔ, ya꞉mbʉhɨa. 11Ɓapananakɨa ɓʉ mapanʉ nʉ Ɓafalisayɔ ɓambupuno ɓʉkaɨ, ɓambufaniso yakanaka ati ʉndaɓʉ ɓɔ ɓʉkwanana kʉkyɨa Yeso tanɨ.
Yeso ʉchwa ɓakpataka kumi nʉ ɓapɨnɨ
(Mat 10:2-4; Mak 3:16-19)
12Ati ngiinanɨ, Yeso a꞉ɗito ekoo ʉ ɨkpangba kʉta Asʉɓɨɨ, kija a꞉kwaya ta kupi. 13Iya ɓisi ɓa꞉ya nayɔ kʉɓa, ambusoko ɓakpataka ngiɓangɔ. Ambumbomboko ɓakpataka kumi nʉ ɓapɨnɨ na ati ʉndaɓʉ, iɓa a꞉ɓʉsʉa tiga ino ɓɔ ɓatitima. 14Ɓi꞉nye ɓɔ: Simoni ngia a꞉mʉsʉa ino ɓɔ Pɛtɛlɔ, nʉ manye Andelea, Yakɔbɔ, Yʉanɨ, Filipo, Balatʉmayɔ, 15Matayɔ, Tʉma, Yakɔbɔ mwana ʉ Alʉfayɔ, Simoni ngia i꞉nye hata ɨndɨpandasɨ akʉ gɨpa ngiangɔ, 16Yuda mwana ʉ Yakɔbɔ, nʉ Yuda Ɨsɨkalɨɔta ngia a꞉gaba Yeso.
Yeso uhiiso ɓakwisikiso nʉ iso mɨtʉma yɨ ɓabɨa
(Mat 5:3-12)
17Ɔɔ Yeso ɨzɔ nʉ ɓatitima ngiɓangɔ ɓi꞉nye tiga kijo ɨkpangba, ambʉmaa aka mʉa wi꞉nye‑ɔɔ ɓʉ gbata gbata. Na akʉ mʉa nguʉnanɨ, ɓakpataka ngiɓangɔ ɓi꞉nye‑ɛɛ ɓaja, ɨzɔ nʉ ungbutu wɔɔ 'ʉja wʉ ɓombi ɓʉ gɨpa ʉ Yudɛa, ɓʉ Yelusalɛma, nʉ ɓʉ ɓagʉlʉ ɓʉ ɨtɛtɛtɛ yɨ yapuu yɛɛ ɨja, Tilo, nʉ Sɨdɔna. 18Ɓombi ngiɓʉnanɨ ɓa꞉ka kʉkɔ Yeso, aka ekoo ngia ɓɔ uɓuhiiso ɓakwisikiso ngiɓʉndaɓʉ. Ɓombi ngiɓa mɨtʉma yɨ ɓabɨa yi꞉nye naɓɔ kʉkyananaka ɓambʉhɨa. 19Mombi kʉ nangana nangana na amati ʉ ungbutu wʉ ɓombi i꞉nye kʉhata nayɔ tʉkʉ kuɓoto, jʉ angu ngia wʉ Yeso i꞉nye kʉɓʉa nʉ ndʉtʉ ngiangɔ i꞉nye tiga naɓɔ kuhiiso ɛɓɔ kʉ ɓuɓomu.
Mapanʉ kʉ di di di
(Mat 5:1-12)
20Iya Yeso a꞉kanga ɓakpataka ngiɓangɔ, ambusigo ɓɔ:
« Ɨgyagya ninu ɓombi ɓʉ ɓanangyɨa,
jʉ Ɓʉngama ɓʉ Asʉɓɨɨ ɓa ɓʉndɛnʉ!
21Ɨgyagya ninu ɓombi ngiɓa nanʉ taa ɨtakɨ‑takɨ ngiakɛ,
jʉ naɓio ɓisi ongo nʉ ihutu!
Ɨgyagya ninu ngiɓa na amati ʉ ndɨa ɨtakɨ‑takɨ ngiakɛ,
jʉ na꞊nʉa ɓisi ongo nʉaa!
22Ɨgyagya ninu ati ngia ɓombi ɓaɓio‑ɔɔ ninu kʉyaa, nʉ ninu kuɗongoko,
ninu kʉzɨaka, nʉ ninu kʉna ɨsʉkʉɓwanɨ ndʉ ɓombi ɓɔɔ ɓɨɓɨ,
jʉ na ɓakpataka ɓʉsɛmɛ Mwana ngia ʉ Mombi!
23Kweni ɨgyagya aka moni ngikʉnanɨ ka꞊nɨgbʉka‑ɔɔ, nambundalikio nʉ ɨgyagya, jʉ na꞊nyɨa sina nʉ ʉkʉa wɔɔ ʉja ekoo ɓisi. Jʉ ya ngbanga kʉ ɓwanɨ ndʉ iya ɓɨsʉngʉɛ ɓʉndaɓʉ ɓa꞉kyananaka jɛnɛ lɨgbɛ lʉ Asʉɓɨɨ.
24Ɨkyɛmɨngana, ya ikoko ninu ɓombi ɓʉ lɨkyɛmɛ,
jʉ majɨɔ nga kʉndɛnʉ tii tʉkʉ ɨkʉnanɨ na amati ɔngɔ!
25Ya ikoko ninu ɓombi ngiɓa nanʉ ihutu,
jʉ naɓio sina amati ʉ taa!
Ya ikoko ninu ɓombi ngiɓa na kʉnʉa ɨtakɨ‑takɨ ngiakɛ,
jʉ naɓio sina amati ʉ didima, kija na꞊ndɨa ndɨaa!
26Ya ikoko ninu, ndʉ ɓombi kʉ ɓuɓomu ɓaɓio ninu kʉbɨba, jʉ ɓɨsʉngʉɛ ɓʉndaɓʉ ɓi꞉nye kyɨa lɨgbɛ lʉ yakanaka kʉ ɓwanɨ! »
Kʉndeni ɓakwa ɓʉndɛnʉ
(Mat 5:39-47)
27Yeso ambusigo tiga ɓata ɓɔ: « Ɨkyɛmɨngana, maninu kusigio inu ngiɓa nanɛmɛ kʉkɔ ɓɔ: Kʉndeni ɓakwa ɓʉndɛnʉ. Kyɨeni ɓombi ngiɓa ɓaanɨyaa tʉkʉ iɗo. 28Mbuiseni ɓombi ngiɓa ɓaanigboso. Ɓombi ngiɓa ɓaanɨkyananaka, ɓʉtɨeni Asʉɓɨɨ tɨaa. 29Ndʉ mombi anaɓɛnda akʉ ingyengye, mʉnɨtanisio ɓata iya yɛmɔ kʉ nɨtanisioo. Ndʉ mombi a꞊nahɨnɨa kɔtɨ, ɔɔmʉgbʉmɨakɔmʉ simizi. 30Ndʉ mombi anata ɨkyɛmɛ, munzo ɛyɔ tʉkʉ nzoo. Ndʉ mombi achɨka ɨkyɛmɛ yɨsɔɔ, ɔɔmʉtakɔmʉ ɓɔ ʉnatuisio ɛyɔ. 31Moni ngika naakʉnda ɓɔ ɓangɛ ɓʉnɨkyɨa, inu ɓʉkyɨeni ɛɓɔ kʉ ɓwanɨ.
32Ndʉ naɓio kʉkʉnda tʉkʉ ɓombi ngiɓa ɓaanɨkʉnda inu, ɓa꞊nituisio tiga ɨbɨba tɨmanɨ? Jʉ ɓombi ɓʉ ɓʉɓɨɓɨ ɓaakʉnda kʉ ɓombi ngiɓa ɓaaɓʉkʉnda ɛɓɔ. 33Nʉ ndʉ naɓio kʉkyɨa iɗo tʉkʉ ɓombi ngiɓa ɓaanɨkyɨa inu iɗo, ɓa꞊nituisio tiga ɨbɨba tɨmanɨ? Jʉ ɓombi ɓʉ ɓʉɓɨɓɨ ɓaakyɨa kʉ ɓwanɨ! 34Nʉ ɓata, ndʉ nanzo ɨkyɛmɛ akʉ mabɨngɨa tʉkʉ ɓombi ngiɓa nakʉnapɨa itungwio ɓɔ ɓanituisio ɨkyɛmɛ kʉ tuisioni, ɓa꞊nituisio ɨbɨba tɨmanɨ? Jʉ abana ɓombi ɓʉ ɓʉɓɨɓɨ ɓaanzo kʉ ɓombi ɓʉ ɓʉɓɨɓɨ ɨkyɛmɛ akʉ mabɨngɨa, ambʉ ɓu꞊ɓutuisio ɨkyɛmɛ ngia ya ngbanga kʉndʉ iinanɨ. 35Ɨkyɛmɨngana, kʉndeni ɓakwa ɓʉndɛnʉ, nambuɓio naɓɔ kʉkyɨa tʉkʉ iɗo. Nzeni ɨkyɛmɛ akʉ mabɨngɨa, chʉkɔmʉ nambuɓio ɓata 'ʉtʉma ɓɔ ɓunituisio ɛyɔ. Na꞊nyɨa ɓisi ongo nʉ ʉkʉa ʉja, kija naɓio ɓana ɓʉ Asʉɓɨɨ ngia a ekoo nadɨndɨ. Jʉ iɗo ngia yɨ Asʉɓɨɨ ya ekoo ʉ ɓombi ngiɓa ɓambakamunzo ɨbɨba nʉ ɓombi ɓɔɔ ɓʉka‑ɓʉkaɨ. » 36Yeso ambusigo ɓata ɓɔ: « Ɓieni nʉ 'ʉtʉma wɔɔ nɨɛ ɓombi ikoko kʉndʉ uwa atɔ ʉndɛnʉ anawɔ.
Nɔɔtɨnakɔmʉ 'ʉkɔmbɔ wʉ ɓombi nga ɓɔmɔ
(Mat 7:1-5)
37Nɔɔtɨnakɔmʉ 'ʉkɔmbɔ wʉ ɓombi nga ɓɔmɔ, ambʉ Asʉɓɨɨ ɔɔtɨnakɔmʉ uwa wʉndɛnʉ kʉ ɓwanɨ. Nɔɔnapɨakɔmʉ ɓangɛ nʉ 'ʉkɔmbɔ, ambʉ Asʉɓɨɨ ɔɔnɨnapɨakɔmʉ inu nʉ 'ʉkɔmbɔ kʉ ɓwanɨ. Pɨeni ɓangɛ, ambʉ Asʉɓɨɨ ʉnɨpɨa inu kʉ pɨaa. 38Nzeni ɓangɛ nzoo ambʉ Asʉɓɨɨ uninzo inu ɨkyɛmɛ kʉ nzoo. Ya ipima yɛɛ iɗo iya ɓa꞊nitio amati ʉ kakpa, ɨkʉkʉmɨɛ, ɨdʉɨyɛ iɗo, ihue nʉ 'ʉkaa. Jʉ Asʉɓɨɨ a꞊ninzo kumbo ngiangɔ ngbanga ngbanga tʉkʉ nʉ ipima ngia inu naapimia ɓangɛ. »
39Kija Yeso a꞉nzo ɓata isisinio ngia: « Ajʉ mombi ngia ambakana aakɨndakiso mangɛ ngia ambakana kɨndakisoni ɓiɛ? Gʉ‑zʉ kʉ ɗɛkɛkɛ! Jʉ ɛɓɔ ɓapɨnɨ kʉ ɓuɓomu ɓabi kʉkwa tʉkʉ amati ʉ ʉpɨa ɓʉ bu. 40'Ʉkpataka gʉkʉ mungono wambakaɓaa mʉpananakɨa nguangɔ. Ɨkyɛmɨngana, 'ʉkpataka kʉ 'uɓomu ngua ɓa꞉mʉpanɨa iɗo kingono, aɓio ngbanga ngbanga kʉndʉ mʉpananakɨa nguangɔ.
41Jʉtanɨ ɔwɛ wakʉna tʉkʉ ambɛmbɛsʉ wʉ usoi ngua wa amati ʉ iso ngia yɨ mananʉ, wambikinye kʉna igbiti yɨ 'ʉkakaʉ ngia ya amati ʉ iso ngiisɔɔ? 42Wakusigio mananʉ tanɨ ɓɔ: ‹ Aya, kyɨa‑zʉ muniso ambɛmbɛsʉ wʉ usoi ngia a nɔwɛ akʉ iso, › wambikinye kʉna igbiti yɨ 'ʉkakaʉ ngia ya amati ʉ iso ngiisɔɔ? Ɔwɛ fili ngia! Ʉngwiso‑zʉ igbiti yɨ 'ʉkakaʉ ngia ya amati ʉ iso ngiisɔɔ, ambʉ na tiga ambɛmbɛsʉ wʉ usoi ngia a amati ʉ iso ngia yɨ mananʉ iɗo, nʉ kuungwiso engo. »
Mombi aambɨanɨa tʉkʉ akʉ ɨkyananakɨa
(Mat 7:16-20; 12:33-35)
43Yeso a꞉sigo ɓɔ: « Ɓʉtɨ ɓɔɔ ɓuɗo ɓambakamɔ lipumo lɔɔ ɓɨɓɨ, kʉndʉ ɓʉtɨ ɓɔɔ ɓɨɓɨ ɓambakamɔ lipumo lɔɔ manzanza. 44Ɓʉtɨ kʉ ɓuɓomu ɓaambɨanɨa tʉkʉ akʉ lipumo lɔngɔ. Ɓambakaɗʉka lipumo lʉ ɓʉtɨ ngiɓa ɓaaɓusoko ɓɔ figi ekoo ʉ ɓʉtɨ ɓʉ maɓʉ, nʉ ɓambakaɗʉka lipumo lʉ mijabibo ekoo ʉ wamboku. 45Mombi ɔɔ iɗo aakyɨa kʉ moni kɔɔ muɗo, jʉ 'ʉtʉma nguangɔ waɓio kʉ uɗo. Ɨkyɛmɨngana, mombi ɔɔ ɓɨɓɨ aakyɨa kʉ moni kɔɔ ɓɨɓɨ, jʉ 'ʉtʉma nguangɔ waɓio kʉ ɓɨɓɨ. Jʉ ʉɗaɗa ngua wʉ mombi waangaka tʉkʉ moni ngika kaakyɨa muhue amati ʉ 'ʉtʉma nguangɔ. »
Mombi ngia aakɔ mapanʉ nʉ nakɔ kʉkyananakɨa
(Mat 7:24-27)
46Kija Yeso a꞉sigo ɓata ɓɔ: « Naanasoko kina‑zʉ kɨmanɨ ɓɔ: ‹ Makʉʉɓɨɨ, Makʉʉɓɨɨ, › nambikinye kʉkyɨa moni ngika maninu kusigio engo? 47Mombi ngia a꞊ka andɛmɛ, ambʉkɔ mapanʉ ngikʉsɛmɛ, ambʉkʉkyananakɨa, manɨpana‑zʉ ɓɔ a ngbanga ndʉ anɨ. 48A ngbanga ngbanga ndʉ mombi ngia a꞉tɨa ɨkáa. A꞉kpanga‑zʉ pɛɛ tʉkʉ mba ʉpɨa wɔɔ ɗu kʉɓʉya tʉkʉ akʉ ikopi yɛɛ ɨja, kija a꞉tɨa 'ʉkʉpa wʉ mukopi ekoo ɔngɔ. Ati ngia ɓaɗei ɓaaka‑ɔɔ mepo, 'ukputu‑kputu wa꞉ka kʉɓɛndana akʉ ɨkáa ngiinanɨ, chʉkɔmʉ yambuɗukono jʉ ɓa꞉ɨtɨa ɓʉmʉ. 49Ɨkyɛmɨngana, mombi ngia aakɔ mapanʉ ngikʉsɛmɛ, chʉkɔmʉ ambʉkʉkyananakɨa, a ngbanga ngbanga ndʉ mombi ngia a꞉tɨa ɨkáa tʉkʉ ekoo ʉ ɨtaka ɨsʉkʉɓwanɨ, chʉkɔmʉ ekoo wʉ 'ʉkʉpa wʉ mukopi. Ati ngia ɓaɗei ɓa꞉ka‑ɔɔ mepo, 'ukputu‑kputu wa꞉ɓɛndana akʉ ɨkáa ngiinanɨ, yambʉhʉya tʉkʉ tio tʉkʉ akɛsɨ ɓʉ gbatata. »
Currently Selected:
Luka 6: BudKoya
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
