Luka 7
7
Baya ngia yɨ ngama ʉ Ɓasʉda
(Mat 8:5-13)
1Iya Yeso a꞉pipo ngakɨa ungbutu wʉ ɓombi moni ngika i꞉nye kʉyaka engo kʉ muɓomu ɓʉ gba, ambʉsa anʉ Kapelenaumu. 2Nani, ngama ʉ ɓasʉda mʉngana wʉ Ɓalɔma, i꞉nye nʉ mombi ʉ kuu angɔ iya i꞉nye mʉkʉnda ɓʉkaɨ. Mombi ngiinanɨ i꞉nye 'ukwese ɓʉkaɨ nadɨndɨ tinene kʉtɨnɨa 'ʉtʉma. 3Iya ngama ʉ ɓasʉda ngiinanɨ a꞉kɔ nayɔ uduɓa wʉ Yeso, ambʉtʉma ɓʉkʉʉ ɓʉ Ɓayuda kʉndɨanɨa Yeso ɓɔ ʉka ɓaka‑zʉ nayɔ kuhiisio mombi ʉ kuu angɔ ngiinanɨ. 4Iya ɓombi ngiɓʉnanɨ ɓa꞉ɓʉya akʉ Yeso i꞉nye‑ɔɔ, ɓambʉmʉndɨanɨa ɓɔ: « Kikiliki, kɔ ɓaka nɨta yɨ ngama ʉ ɓasʉda ngiinanɨ tʉkʉ kɔɔ. 5Jʉ anʉ ɓʉkʉnda ekoo ɓombi ngiɓʉndɛsʉ Ɓayuda, nʉ kʉ ɛyɔ a꞉titiisio ɨkáa yɨ nɨta ngiindɛsʉ. »
6Kija Yeso a꞉sa izi mɨngana naɓɔ. Ɛɓɔ tii tʉkʉ tinene kʉɓʉya ɔɔ ngama ʉ ɓasʉda ngiinanɨ, ambʉtʉma ɓata ɓadii ɓangɔ ɓɔ ɓusigio Yeso ɓɔ: « Makʉʉɓɨɨ, ɔɔwo tii ɓata angu ngananɨ. Mambʉkɔmʉ 'ʉkwananakɛ ikanzi ngia wakumunio‑ɔɔ andɛmɛ ambɛnɨ. 7Iikwa mʉmbɨana ndʉ mʉkwananakɔmʉ kʉka ɛmɛ mambɨnyɔngɔ na akʉ wa‑ɛɛ. Sigo tʉkʉ ɨngbaa yɨ moni mɨngana, ambʉ mombi ʉ kuu ngiasɛmɛ ʉhɨa tʉkʉ hɨaa. 8Jʉ ɛmɛ ma kʉ ɛsɨ ʉ ʉpanʉ wʉ ɓombi ngiɓa ɓa ekoo asɛmɛ. Nʉ ma kʉ nʉ ɓasʉda ɛsɨ ʉ ʉpanʉ nguʉsɛmɛ. Ndʉ masigio mʉngana ɓɔ: ‹ Sa! › Kʉ nɨma ngiinanɨ ambʉsa. Ndʉ masigio wɔmɔ ɓɔ: ‹ Ɨka aka! › Kʉ nɨma ngiinanɨ ambʉka. Nʉ kʉndʉ musigieni mombi ʉ kuu ngiasɛmɛ ɓɔ: ‹ Kyɨa ɓɔ! › Akyɨa tʉkʉ ndʉ ananɨ. »
9Iya Yeso a꞉kɔ nayɔ moni ngikʉnanɨ ngama ʉ ɓasʉda a꞉yaka, kija ya꞉mʉmbangɨa nadɨndɨ. Kija a꞉nɨtana ambusigio ungbutu wʉ ɓombi ngiɓa ɓi꞉nye nayɔ kʉkpata ɓɔ: « Maninu kusigio ɓɔ, mambʉnakɔmʉ sina mombi ʉ baya ikanzi ngia ati ʉ ɓana ɓʉ Ɨsalaɛlɛ. »
10Iya ɓombi ngiɓʉnanɨ ɓa꞉tʉa nayɔ, kʉɓʉya ɔɔ ngama ʉ ɓasʉda, ɓa꞉gbʉka mombi ʉ kuu ngiinanɨ i꞉nye nʉ kweso ʉ꞉hɨeni hɨaa.
Yeso ʉjʉkaniso mʉnda wʉ mwana ʉ woko anʉ Naini
(Mak 5:21-24,35-43; Yʉa 11:1-44)
11Mbise ngiinanɨ, Yeso ambʉsa akʉ gʉlʉ mʉngana ino ɓɔ Naini. Ɓakpataka ngiɓangɔ nʉ ungbutu wʉ ɓombi ɓaja ɓa꞉sa ɨzɔ nayɔ. 12Ati ngia i꞉nye tiga‑ɔɔ kʉ tinene nʉ umongu wʉ gʉlʉ ngiinanɨ, kʉ nɨma ngiinanɨ ɓi꞉nye kʉsa kʉhʉna mwana ʉ woko ɔɔ gue 'ukpekpe wɔngɔ tʉkʉ mungono. Ungbutu wʉ ɓombi ɓaja ɓʉ gʉlʉ ngiinanɨ ɓi꞉nye ɨzɔ nʉ‑ɔɔ woko ngiinanɨ. 13Iya Makʉʉɓɨɨ Yeso a꞉mʉna nayɔ, ambʉmʉnɨa ikoko, ambumusigio ɓɔ: « Sɨa ndɨa! » 14Kija Yeso a꞉sɨngana, ambuɓoto sanda. Ɓombi ngiɓa ɓi꞉nye nayɔ 'ufuɓue ɓambʉmaa. Kija Yeso a꞉sigio mʉnda ɓɔ: « Mwana ɔɔ gue, manɔwɛ kusigio ɓɔ, ʉngwa ɨkʉʉ! » 15Mwana ɔɔ gue ngiinanɨ ambʉʉngwa ɨkʉʉ, ambufaniso yaka. Kija Yeso a꞉mutuisio inye.
16Moni ngikʉnanɨ ka꞉kiso ɓombi kʉ ɓuɓomu ʉɓa, ɓambufaniso tʉkʉa Asʉɓɨɨ, ɓi꞉nyeni kusigo ɓɔ: « Ɨgbɛ yɛɛ ɨja ya꞉choo bɛ ati ʉndɛsʉ! » Nʉ ɓata, « Asʉɓɨɨ a꞉tunguo bɛ ɓombi ɓangɔ tunguoo! »
17Uduɓa wʉ moni ngikʉnanɨ Yeso a꞉kyɨa, wa꞉nadaa gɨpa ʉ Yudɛa kʉ 'uɓomu nʉ ɓambamba ɓɔngɔ kʉ ɓuɓomu.
Yeso unzo mapanʉ ekoo ʉ Yʉanɨ ngia i꞉nye ɓatiso ɓombi
(Mat 11:2-19)
18Kija ɓakpataka ngiɓa ɓʉ Yʉanɨ ɓa꞉ngakɨa Yʉanɨ moni kɔɔ mʉmbangɛ ngikʉnanɨ kʉ muɓomu. Yʉanɨ ambusoko ɓombi ɓapɨnɨ ati ʉ ɓakpataka ngiɓʉnanɨ ɓangɔ. 19Ambʉɓʉtʉma ɔɔ Makʉʉɓɨɨ, nayɔ kuɓukuo ɓɔ: « Ajʉ ɔwɛ kʉ wa mombi ngia Asʉɓɨɨ a꞉mʉchwa kʉka ɓiɛ, gʉ ɓɔ kusiɓo ɓata mombi nga kɔmɔ? »
20Iya ɓakpataka ngiɓʉnanɨ ɓa꞉ɓʉya akʉ Yeso i꞉nye‑ɛɛ, ɓambʉmʉngakɨa ɓɔ: « Yʉanɨ ngia aaɓatiso ɓombi ʉtɨtʉma andɔɔ nɔwɛ kuɓukuo ɓɔ: ‹ Ajʉ ɔwɛ kʉ wa mombi ngia Asʉɓɨɨ a꞉mʉchwa kʉka ɓiɛ, gʉ ɓɔ kusiɓo mombi nga kɔmɔ? › »
21Kʉ ati ngiinanɨ, Yeso ambuhiiso ɓombi ɓʉ ɓakwisikiso kʉ di di di ɓaja, ɓombi ɓɔɔɓʉjʉnganakɛ, nʉ ɓombi ɓʉ mɨtʉma yɨ ɓabɨa, ambuhiiso ɓombi ɓaja ngiɓa ɓambikinye na. 22Mbise ɔngɔ, Yeso ambutisio ɓombi ngiɓʉnanɨ Yʉanɨ a꞉ɓʉtʉma ɓɔ: « Seni kʉngakɨa Yʉanɨ moni ngika inu nʉna nʉ mesu, nʉ ika nʉkɔ nʉ muchwei ngikʉndɛnʉ. Ɓombi ngiɓa ɓa꞉chwio mesu ɓa tiga kʉna, ɓombi ɓʉ mɨdɛɛ ɓakʉkɨndaka kʉ ngbii, ɓakeɓu‑keɓu ɓakʉjaɓanakɨa, ɓombi ngiɓa ɓambakakɔ ɓakʉkɔ, mɨnda yakʉjʉkana, ɓombi ɓʉ ɓanangyɨa ɓakʉkɔ Ɨsaʉ yɛɛ Iɗo. 23Ɨgyagya nʉ mombi ngia moni ngikʉsɛmɛ kambʉkɔmʉ kʉwa baya ngiangɔ! »
24Iya ɓakpataka ngiɓa ɓʉ Yʉanɨ ɓa꞉sa nayɔ, Yeso ambufaniso ngakɨa ungbutu wʉ ɓombi moni ekoo ʉ Yʉanɨ kusigo ɓɔ: « Nʉ꞉sa‑zʉ kʉna ɨmanɨ akʉ 'ukengu? Ajʉ nʉ꞉sa kʉna ʉmbamba ngua mahuo wakudimbiso engo ɓiɛ? Chʉkɔɔ! 25Tiga nanɨ, ajʉ nʉ꞉sa kʉna mombi mʉngana ɔɔ 'upinyonoke manzanza ɓiɛ? Jʉ ɓombi ngiɓa ɓaapɨnya lɨpʉkʉ lʉ ɨbɨba, ɓaadya ʉɓɨɨ wɔɔ uɗo nʉ ɓaakyɨa akʉ lɨkáa lʉ ɓangama. 26Naɓɨeni‑zʉ ɓɔ nʉ꞉sa‑zʉ kʉna ɨmanɨ? Ajʉ ɨgbɛ yɨ Asʉɓɨɨ ɓiɛ? Ya ɓwanɨ, ɛyɔ ʉɓaa ɨgbɛ. 27Jʉ Yʉanɨ ngiinanɨ, iiya Mubio kʉ Asʉɓɨɨ ka꞉ngaka moni aka ekoo angɔ ɓɔ: ‹ Ʉna, makʉtʉma titima ngiasɛmɛ kʉsa apɛɛ asɔɔ, nɔwɛ kʉtambanakɨa ɨngbaa. ›#Popoko Mal 3:1 28Maninu kʉɓɨa ɓɔ, ati ʉ ɓombi kʉ ɓuɓomu ngiɓa ɓa꞉ɓʉnʉta akʉ ʉɓɨɨ, yambʉkɔmʉ nʉ iya a 'ʉja nadɨndɨ kʉɓaa Yʉanɨ. Ɨkyɛmɨngana, mombi ɔɔ ɗɛkɛkɛ nadɨndɨ amati ʉ Ɓʉngama ɓʉ Asʉɓɨɨ, a mombi ɔɔ 'ʉja nadɨndɨ kʉɓaa Yʉanɨ. »
29Ɓombi kʉ ɓuɓomu, abana kʉndʉ ɓandɔmbɛ ɓɔɔ ɓulipise manzanza ɓa꞉mʉkɔ kʉ kɔɔ, ɓambupimiso ɓɔ Asʉɓɨɨ a ngbingbii. Kija ɓa꞉sa ɔɔ Yʉanɨ, ambuɓuɓatiso. 30Ɨkyɛmɨngana, Ɓafalisayɔ nʉ ɓapananakɨa ɓʉ mapanʉ ɓambʉyaa moni ngika Asʉɓɨɨ i꞉nye kʉkʉnda kʉkyɨa ekoo ʉndaɓʉ, jʉ ɓa꞉tata uɓatiso ngua wʉ Yʉanɨ tʉkʉ ɓʉ ɗa.
31Kija Yeso a꞉sigo ɓata ɓɔ: « Ma꞊sisono ti‑zʉ ɓombi ngiɓa ɓʉ ɓʉɓʉnɨ nʉ ɨmanɨ? Ɓa‑zʉ ngbanga nʉ ɨmanɨ? 32Ɓa ngbanga ndʉ ɓana ngiɓa ɓaɓuwuloke akʉ ɨmbaa ɓi꞉nyeni kʉtʉɓɨa ɓangɛ ɓɔ: ‹ Kʉ꞉nɨmbɨa mbáa, chʉkɔmʉ nambuɓuno ʉmbɔ gʉkʉ ɗɛkɛkɛ! Kʉ꞉nɨsʉɨa mʉmbɔ kʉ didima, chʉkɔmʉ nambʉndɨa kʉ ɓwanɨ! › 33Ya ngbanga kʉndʉ iya Yʉanɨ ngia i꞉nye ɓatiso ɓombi a꞉ka‑ɔɔ, ambikinye dyakaka ndʉ ɓangɛ, nʉ ambikinye mwa vinyo kʉ ɓwanɨ, nambusigo ɓɔ: ‹ Anʉ 'ʉtʉma wʉ abɨa! › 34Ɛmɛ Mwana ngia ʉ Mombi, mambʉka, makʉdyakaka nʉ kʉmwakanaka, na tiga nɛmɛ kusigio kʉ ɓɔ: ‹ Ʉneni mombi wʉ 'ʉhʉmʉ nʉ mombi ɔɔ mwakanakɛ ngia. Adii wʉ ɓandɔmbɛ ɓɔɔ ɓulipise manzanza nʉ ɓombi ɓʉ ɓʉɓɨɓɨ! › 35Ʉna tɔ, 'ʉtʉma wɔɔ pimise moni ngua wʉ Asʉɓɨɨ waambɨanɨa ɓɔ wa kingono ɨngbaa akʉ ɓombi ngiɓa ɓaamʉkpata. »
Moi yangaka yɛngɔ
(Mat 26:6-13; Mak 14:3-9; Yʉa 12:1-8)
36Kija 'Ufalisayɔ mungono wa꞉soko Yeso ɓɔ ʉsa kʉdyakaka andɔngɔ. Yeso ambʉsa ɔɔ gue ngiinanɨ andei, ɓambufaniso dyakaka. 37Amati ʉ gʉlʉ ngiinanɨ, moi mʉngana i꞉nye mombi ʉ ɓʉɓɨɓɨ. Iya a꞉kɔ ɓɔ Yeso i꞉nye kʉdyakaka ɔɔ 'Ufalisayɔ nguʉnanɨ, moi ngiinanɨ ambʉka nʉ uchupa wʉ ikopi uhue nʉ malazi wʉ ɨgabʉ yɛɛ ɓʉmʉ, nʉ wɔɔ mve tɨpɨ. 38Iya a꞉ɓʉya nayɔ, ambuwulo anambamba ʉ mɨtɨndɨ yɨ Yeso. I꞉nye kʉndɨa nʉ kʉnzɨlakiso musoi ngikangɔ akʉ mɨtɨndɨ ngia yɨ Yeso, nʉ bɨaka engo nʉ ndii ngiangɔ. Kija a꞉naputo mɨtɨndɨ ngia yɨ Yeso, ambuitio nʉ malazi wɔɔ mve tɨpɨ nguʉnanɨ. 39Iya 'Ufalisayɔ nguʉnanɨ wa꞉soko Yeso wa꞉na moni ngikʉnanɨ, ambufaniso yakanaka akʉ 'ʉtʉma kusigo ɓɔ: « Gue ngia inyeni piɛ ɨgbɛ kingono, ambʉ́ ʉmbɨa mbɨanɨ ɓɔ moi ngia anayɔ kuɓotoko a anɨ, nʉ ɓɔ a mombi ʉ ɓʉɓɨɓɨ. »
40Tiga nanɨ, Yeso ambutisio 'Ufalisayɔ nguʉnanɨ ɓɔ: « Simoni! Manʉ moni nɔwɛ kusigio. » Gʉ Simoni ɓɔ: « Sigo tɔ Mʉpananakɨa. » 41Kija Yeso a꞉musigio ɓɔ: « Ɓombi ɓapɨnɨ ɓi꞉nye nʉ mabɨngɨa wʉ mombi mʉngana ɓɔ. Mʉngana i꞉nye nʉ mabɨngɨa wʉ falanga mɨa ɓɔkɔ, iya wɔmɔ makumi ɓɔkɔ. 42Ati ʉ ɓombi ɓapɨnɨ ngiɓʉnanɨ, ya꞉mbikinye nʉ mombi gʉkʉ mʉngana iya i꞉nye ikanzi ngia amutuisio mabɨngɨa wʉ falanga ngiinanɨ wangɔ. Kʉ ɓwanɨ, a꞉ɓʉpɨa tii mabɨngɨa ɓepini ngiinanɨ kʉ iɓomu. Ati ʉ ɓombi ɓapɨnɨ ngiɓʉnanɨ, iikanɨ a꞊mʉkʉnda tiga nadɨndɨ? » 43Simoni ambumutisio ɓɔ: « Akʉ ɛmɛ, makʉna ndʉ ya mombi ngia ɓa꞉mʉpɨa mabɨngɨa ngua wɔɔ 'ʉja. » Gʉ Yeso nayɔ ɓɔ: « Ɛɛ, ya kingono ndʉ ananɨ wusigo‑ɔɔ. »
44Yeso ambʉnɨtana mesu akʉ moi ngiinanɨ i꞉nye‑ɛɛ, ambusigio Simoni ɓɔ: « Wʉna moni ngika moi ngia ʉkyɨa kʉtaa ɓiɛ? Aka mʉka‑ɔɔ aka andɔɔ aka, wʉnanzokɔmʉ mepo kɔɔ mʉjaɓanɛ mɨtɨndɨ. Ɨkyɛmɨngana, ɛyɔ ʉnajaɓa mɨtɨndɨ nʉ musoi ngikangɔ, ambʉnabɨaka mɨtɨndɨ nʉ ndii ngiangɔ. 45Wʉ꞉nʉnaputokɔmʉ kʉ ɓwanɨ kʉpananiso ɨgyagya ngiisɔɔ. Ɨkyɛmɨngana, tʉkʉ akʉ mʉka piɛ‑ɔɔ, moi ngia anɛmɛ tʉkʉ kʉnaputo mɨtɨndɨ. 46Wʉnatiokokɔmʉ umbundo akʉ 'ʉtʉ kʉ ɓwanɨ, ɨkyɛmɨngana ɛyɔ ʉnachichoko lɨgbata ngilʉsɛmɛ nʉ malazi.
47Iinanɨ ma nɔwɛ kʉɓɨa ɓɔ, ɓʉkʉnda ɓɔɔ ɓaja ngiɓʉnanɨ ɓangɔ ʉpananiso ekoo asɛmɛ ɓakumbiiso ɓɔ Asʉɓɨɨ ʉmʉpɨa ɓʉɓɨɓɨ ngiɓangɔ kʉ ɓuɓomu. Ɨkyɛmɨngana, mombi ngia ɓaamʉpɨa ɓʉɓɨɓɨ ɓɔɔ ɗɛkɛkɛ, aapananiso ɓʉkʉnda kʉ ɗɛkɛkɛ. » 48Kija Yeso a꞉sigio moi ngiinanɨ ɓɔ: « Asʉɓɨɨ ʉ꞉napɨa ɓʉɓɨɓɨ ngiɓʉsɔɔ pɨaa. » 49Ɓombi ngiɓa ɓi꞉nye kʉdyakaka ɨzɔ naɓɔ, ɓambufaniso ɓokono ati ʉndaɓʉ ɓɔ: « Mombi ngia a‑zʉ anɨ iya a tiga kʉ ikanzi ngia apɨa ɓombi ɓʉɓɨɓɨ? » 50Yeso ambusigio ɓata moi ngiinanɨ ɓɔ: « Baya ngiisɔɔ yɨnahiiso hiisoo, sa kʉ nʉ majɨɔ. »
Currently Selected:
Luka 7: BudKoya
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
