मरकुस 5

भूतोकु आत्मा मुके म्या कोरो के सासजा

(मत्ती 8:28-34; लूका 8:26-39)

1जब यीशु दियागा चेलाकू गेल्ला समुद्रा गा हुधेळेन गिरासेनियो गाँव गा इलाकन आदिरजे, 2एठा जब यीशु डोंगा लिजेन टे आगोरोएन डो तुरुटो म्या कोरोन जो भूतोकु डा, गुफा जो मार्गोटो होय, #5:2 गुफा गा मतलब मार्गोटो होय देटेन नी यहूदी कुरकू म्हाळाके डोए डा देटे वोटजेडो दिएन घाटाएन। 3डी कोरो गुफान नी थंदळदन एठा कुरकू डिच्के जदा टेमो तोटोल बान दोडो डा, येदे टाएन लोखोंडो गा पक्का साकळी सथोन भी बाने। 4डीचके चोटोका बार सखीळी टे टोलकेनेच, एठा दियागा नंगाके लोखोंडो गा भेडीटे पक्काके पेनो डीचनी सखीळी के टयाके एठा भेडीके टुक्का-टुक्काके होय जेकाभी डीचके रोकेतिंजेज बान डा। 5दिन एठा रातो लगातार डीच गुफान एठा टुक्कीननी चिल्लातिंजू डा, एठा हेजे हेज्केका घोटा टे घायलू डा। 6दिकु यीशु के लांकिटे का धोटे सळुपके, एठा झुकातिंजटे दियागा नंगा साब्बे। 7-8डी कोरोनी येनोगो इनिघल्जी मंडीके चोयाकी यीशु नी डीचके पेलाका मंडीके, “हे भूतोकु, इनी कोरो टे बल्लान वोटजू!” मेटे डी कुरकू खट्टेका चिल्लातिंजके, “यीशु परमयाजक परमेश्वर गा कोण, आमेन इंजाटे चोच कामय? परमेश्वर गा वादाजीटे अमा इंज्के तखलिफ बन जिऊ।” 9यीशु दिजाटे कोम्बराके, “अमागा चोच जीमू होय?” डी कोरो डीचके मंडीके, “इंज जीमू सेना होय, चोयाकी आले इनी कोरो तलान घोनेचकु होय।” 10एठा डीचनी दियाटे भेबाव बिनती डावे, “आलेके इनी गिरासेनियो जिल्हा टे बल्लान बाकी कुकूल।” 11नका, देडेन सुकळीकु गा म्या खाट घोन्जा। 12भूतोकु नौरकु यीशु टे बिनतीटे मंडीके डा, “आलेके डी सुकळीकु तलान कुलकेमी, कि आलेनी दिकु तलान सेंजू होना।” 13यीशु नी भूतोकु डी कोरो टे बल्लान ओटकेकु एठा भूतोकु डी कोरो टे बल्लान हेन डो सुकळीकु ओले। डी गोंजान अंदाजोटे बरी हजार सुकळीकु डा। दिकु समुद्रा गा धुरान ओले एठा नामोएन। 14एठा दिकुगा चाचरा मिठाच सळुप जेडो पुरान एठा गाँवेन इनी खाबोर घाल्के, एठा कुरकू डी खाबोर के आजुमटे दोडो घांजी हेन। 15डी कुरकू यीशु गा मेरान हेन डो, डी कोरो के डोकेनेच दियाटे तलाटे भूतोकु ओटजे, जो आंगी उरीटे एठा सिधाटे सुबानटे डोके डा एठा दिकु हिगराएन। 16एठा कुरकू नी डी कोरो भूतोकु मुटे डोके डा, दिकुनी सुकळीकु गा घोंजा गा पूरा हाल दूसरा कुरकू के घाल्के जो देटेन हेन डा। 17एठा डी कुरकू नी जो दोडो घाल्जी हेन डा यीशु टे बिनती डाटे मंडी लज्जे, कि आलेगा ईरिया टे सेनजू। 18एठा जब यीशु एठा दियागा चेलाकू डोंगा लिंजेन पेळेच लज्जे, मेटे भूतोकुके कोरोनी यीशु टे बिनती दडा लज्जे, इंज्के भी अमा सेंग्गोन साकोम। 19पेनो यीशु नी दियागा बिनती आजुमडूका, एठा डीचके मंडीके, “आबु उरान सेनोडो अमा कुरकू के घाले, कि अमा लिंजेन दया डाटे प्रभु नी अमा घल्जी टोनोगो खाट कामय सुरुके होय।” 20मेटे डी कोरो हेजा उरा गा ईरिया न ओले। डाबोलटे देडेन सेने डो दिकापुलिस जिल्हा, नी इनी बातो गा गघाल लक्के डा कि यीशु नी इंज घल्जी चोफर खाट कामय डाके, एठा सेबाई कुरकू अचाम्बोएन डा।

याईर गा गोएन कोंजाई टे एठा म्या बिमारी जापाए

(मत्ती 9:18-26; लूका 8:40-56)

21म्या बार डबोलटे यीशु डोंगान गालील गा दूसरा देळेन ओले। जब दिकु देटेन आदिरजे डा, एठा धुरानका टेंगेनके डा। मेटे म्या खाट घोंजा यीशु गा मेरान घोलाएन होय। 22याईर जीमू गा आराधना जगा गा मुख्याकु तालटे म्याखोम हेन। यीशु के धोटे डीचके मान जिऊ गा घांजी दियागा सम्मान टोपेरे जेगाके। 23एठा डी मुख्याकुनी इनी मंडीटे बिनतीके, “इंजा सनी कोंजाई गुजू गा हालादेन होय, अमा इंजा उरान हेजे डो उठाएच, ताकी डीच बचातिंजू होना, एठा जीटाका थंदळकु।” 24मेटे डीच दिकु सथोन ओले। एठा खाट घोंजा दियागा टाऊटे ओले, येदे टाएन कि कुरकू यीशु टाऊटे हेजे एठा दियागा आसो-पासो खाट घोंजा जमाएन।

25घोंजा तलाटे म्या जापाएनी, दियागा पचना आडी बारह साल टे#5:25 जापाएनी, दियागा पचना आडी बारह साल टे मूसा गा नियम गा रोंगो (लैव्य. 15: 19-30) म्या जपाए जो दियागा लजाटे पचना आडीवा होय डीचके धर्मिक विधी रोंगो गिदळी मेन डा एठा देटेन दूसराकु गेल्ला बेल्लाऊ बान चोलाकाभी बान रुकातिंज्दुका। 26एठा डीचनी घोनेच खाट कासु टूलबे, एठा सजाऊ घल्जी डीचनी हेजा घोनेच डामा खार्चोके। पेनो दियागा हालत येठाभी खराबोएन। 27-28जब डी जपाएनी आजुम्के कि यीशु नी कुरकू के बचातिंजकुवा। मेटे दिच्नी बिचार के, “अगर इंज सिर्फ दियागा कुर्ताकेका उठाके, मेटे इंज सजायुवा।” इनिघल्जी डीच घोंजा तलाटे दियागा टाऊटे हेन एठा दियागा कुर्ता के उठाये। 29एठा डीका टेमो डी जपाए गा पचना आडी बांददोयेन। एठा डीचनी हेजा कोम्बोरेन नी चिनाए, कि डीच डी बिमारी टे सजाएन। 30यीशु नी गर्दी टाऊ कोने डोके एठा कोम्बराके, “इंजा कुर्ता जे उठाके?” यीशु नी एनोगो इनिघल्जी डाके चोयाकी डीच चिनाए डा कि देटे शक्ती ओटजे डा। 31दियागा चेलाकूनी दियाटे मंडीके, “अमा दोडोवा होय कि कुरकू अमा लिंजेन बोचो लक्के होय, एठा आमनी मंडीवाकी कि इंज्के जे उठाकेमी?” 32यानेकी यीशु डी कोरो के घगाटा घांजी इंगा-हुंगा दोडो लज्जे जे डीचके उठाकेनेच डा। 33डी जपाएनी चिनायेकी यीशु शक्तीनी डीचके सजाकेनेच होय। इनिघल्जी डी जपाएनी डीच यीशु गा मेरान हेन डो एठा कपार झुकातिंजटे दियागा सम्मान ठोपरे जेगाके। हिघराटे एठा कपतिंजटे दिच्नी यीशु के सेबाई घाल्के कि दिच्नी चोच डाके डा एठा डबोलटे दियागा चोच डाएन। 34मेटे यीशु नी डीचके मंडीके, “कोंजाई, इंज नी आमके सजाकेमी चोयाकी आमनी इंजा लिंजेन विश्वास डोके। अमा कासु बिमारी नका बान हिरा। अमा शांती टे सेंजू।” #लूका 8:48 35जब यीशु दियाटे जापाएटे बातो लक्के डा, अदा कुरकू याईर आराधना जगा गा मुख्या गा उरा टे हेन डो मंडीके, “नका गुरुके परीशान दडा गा जरुरात बाऊ होय, चोयाकी अमा कोंजाई गोएन होय।” 36जो बातो दिकु मंडी लक्के डा, डीचके यीशु नी आजुमटे ध्यान जिडुका, आराधना जगा गा मुख्या टे मंडीके, “हिगरा बाकी बस इंजा लिंजेन भरोसा डोए।” 37एठा डीचनी बस पतरस, याकूब एठा दियागा डाईटे यूहन्ना एठा याईरकेका हेजा सेंग्गोन हेजे गा हुकूम जीके। दिच्नी गर्दी तलाटे एठा जेकाकेका हेजे दाडुका। 38आराधना जगा गा मुख्या गा उरान ओलेडो, दिच्नी कुरकू के जामटेका। 39मेटे यीशु नी दिकुगा उरा तालान ओलेडो दिकुटे मंडीके, “सानी घोच्दुका होय, सिर्फ गिटीचका लक्के। इनिघल्जी आमेन जाम जरुरत बाऊ होय।” 40इनी आजुमटे गर्दी दिया लिंजेन लांद्दा लज्जे, पेनो यीशु नी दिकु सेबाईकु के बल्लान सेने मेंटो मांदिके सिर्फ तराई गा आंटे बाटे के एठा हेजा गा आफाई चेलाकूके सेंग्गोन साटे तराई गा मेरान उरान ओले। 41एठा तैराई गा टी उठाटे दियाटे मंडीके, “तलीता कूमी!” डेगा मतलब इनी होय, “हे तैराई, इंज अमाटे मंडीवा होय, बिडे।” 42एठा तैराई तुरुटो बिटजे डो सेंद्रा इखाट लज्जे। जब एनोगो डाएन दिकु कुरकू भेबाव बिचार लज्जे होय। 43मेटे यीशु नी शक्तीटे आंटे-बाटे के हुकूम जीके कि डीच इनी खाबोर के बाकी पैफालातिंज, कि दिच्नी तराईके गोएन मिठाजा टे जीटाकेनेच डा। एठा दियागा आंटे-बाटे टे मंडीके, इनीच के चोचकाभी जोजोम जे।

Currently Selected:

मरकुस 5: GOKNT

Highlight

Copy