मरकुस 4

बीजो बिबीट मिठाच गा उदाहरण

(मत्ती 13:1-9; लूका 8:4-8)

1यीशु डबोलटे गलील समुद्र गा धुरान इथू लज्जे, एठा एगो खाट गर्दी दियागा मेरान घोलाएन। घोनेच गर्दी गा वोजीटे देटेन डोंगा लिंजेन पेळेन एठा सुबानजे। एठा कुरकू पूरा गर्दी वोटे लिंजेन समुद्र गा धुरान नी टेगेनके डा। 2एठा डीचनी दिकुके उदाहरणेन नी घोनेचका बातो इथूकु लक्के डा। एठा इथूनका गघाल लज्जे दिकुके मंडीके, 3“आजुमे!, म्या खिटी कोरो हेजा खिटीन बीजो बिबीट ओले। 4एठा बीजो बिबीट टेमो अदा बीजो कोरा गा धुरान बोचोयेन, एठा भूरिकुनी हेके डो डीके कलमजे। 5अदा बीजो मोरोम वोटेन लिंजेन बोचोयेन देडेन दिजेन घोनेच कासा बान घाटाडुका, चोयाकी कासा घोनेच बाऊ डा इनिघल्जी जलदिका वोट्जे। 6एठा मेटे घामो पेळेन डो कोम्बो ओठ्जेडो जुलजे, चोयाकी डेगा जळी इटान बान सेंडुका इनिघल्जी डेगा कोम्बो ळोखोळजे। 7अदा बीजो एगो जगान जानोम झाळीन बाळातिन्जू लक्के डा, एठा जानोम नी खाटजे डो डीके दबातिंजकेनेच, एठा देडेन जौ बाने। 8पेनो अदा अच्छा ओटेन बोचोयेन, एठा इनी बीजो वोट्जे एठा घोनेच बीजो वोटजे अदा तीसो गुना बीजो वोट्जे अदा साठो गुना, सौ गुना।” 9एठा दिच्नी मंडीके, “जो जेकाभी जो इनी बातो के आजुमबा होय जो इन्जा मंडीवा, डीके सामझातिन्जू गा कोशिश डाए।”

उदाहरण गा म्या लक्ष

(मत्ती 13:10-17; लूका 8:9-10)

10जब यीशु एकला थांदळे, अदा कुरकू, एठा दियागा बारह चेलाकू दिया मेरान हेन डो कोम्बाराके, उदाहरण गा चोच मतलब होय? 11डीचनी दिकुटे मंडीके “परमेश्वर नी हेजा राज्य गा बारेन सच्चाई आपेके घालके होय, पेनो दिकुके जो इन्जा लिंजेन विश्वास बान दोडो इनी सेबाई मंडी उदाहरणेन मांडेवा।” 12इनिघल्जी डेनोगोका चोखरा बईबाल मंडीवा होय,

“दिकु दोडो गेन डोके एठा दिकुन दोडुका

एठा मिठाच आजुमे एठा बान समजातिन्जदुका,

एंगो बाकी डाऊ दिकु पापो टे इखाडे, एठा मापोएबा।” #4:12 यशा 6:9, 10 यिर्म 5:21 योए

खिटी बिबीट मिठाच गा उदाहरण के घागल

(मत्ती 13:18-23; लूका 8:11-15)

13डबोलटे यीशु नी दिकुटे मंडीके, “अगर आपे इनी उदाहरण के बान समझातिंजू, डो आपे दूसरा उदाहरण के भी बान समझातिंज डाये।” 14खिटी बीजो बिबीटवा होय जो परमेश्वर राज्य गा वचन गा खाबोर गघाल गा रुपोन डेका रोंगो होय, 15अदा कुरकू एनोगो होय दियागा रोंगो डी बीजो टे डाएवा होय जो कोरा गा धुरान बोचोके, डीच परमेश्वर गा वचन जारूर टेका आजोम्बा पेनो शैतान हेजेवा एठा डीचके टूलटे सेगेवा। 16अदा कुरकू डेका रेंगो डी बीजो टे डायेबा होय जो मोरोम ओटेन बोचोएन होय, जो चोटोका बार वचन के आजुमटे खुशीटे मनातिंजेज्बा। 17पेनो वचननी दिकु तालान ठायका जळी बान उठाडुका इनीघांजी जब वचन गा वोजीटे दिकु लिंजेन मुश्किल हेजेवा मेटे दिकु खेडा जोम्टे बोचोवा। 18अदा कुरकू रोंगो डी दाना टे डाएवा जो जानोम झाळीन बोचोएन, जो कोरो परमेश्वर गा वचन आजुम्के, 19पेनो इनी जीवन गा चिंतान, एठा डामा घाल्जी प्यार एठा अलग्गो चीजो चाहतावा दिकुगा जीवनेन मुवा होय एठा परमेश्वर गा वचन गेन मुश्किल येंडाएवा इनिघल्जी डीच फल गा गेल्ला जीवन बान बिबातातिंज्बा। 20अदा कुरकू रोंगो डी कोरो गेल्ला डाके जो अच्छा ओटेन बोचोके, जो परमेश्वर वचन रोंगो फल सेगेवा होय, तुनिका तीसो गुना, तुनिका साठो गुना, तुनिका सौ गुना।

दिवा गा उदाहरण

(लूका 8:16-18)

21यीशु नी म्या एठा उदाहरण घालटे मंडीके, “चोच जेकभी म्या दिवा के जुलटे डीके म्या टोपला इटान डोएबा एनोगोका उजालाके उखोएवा? बिलकुल बाऊ। म्या दिवा के म्या कोंडाळन डोएबा होय, एनेटे दिज्यागा उजाल चामकतिंजूवा। 22इन्जा इनी मंडी गा मतलब होय, परमेश्वर हरेका डी मंडीके वोड़ेवा देगो कुरकू बान हाडाई डी डीके मंडीके एसास जेबा जो आय टाएन उखुके होय। 23जेकाभी जो इनी बातो के आजुमबा होय जो इंज मंडीवा, डीके सामझातिंजू गा कोशिश डाए।”

24डबोलटे यीशु नी दिकुटे मंडीके, “ध्यान टे आजुमे! डिकारोंगो आपे दूसराकु गेल्ला व्यवहार दडावा होय डिकारोंगो आपेगा सेंग्गोन व्यवहार डाएवा एठा देटेभी बुरा व्यवहार डाएवा।” 25चोयाकी दियागा तालान समझातिंजू गा इच्छा तक होय, परमेश्वर डीचके एठाभी समझातिंजे गा जेबा। मेटेनी इनी समझातिंजू गा इच्छा बान दोडो, कि इंज चोच इथूलक्के होय, डो दियागा मेरान जो समजा होय, परमेश्वर दियाटे डी भी सेगेवा।

वोट मिनी बीजो गा उदाहरण

26मेटे यीशु नी मंडीके, “परमेश्वर गा राज्यन एगो होय देगोका म्या खिटी मिठाच खिटीन बीजो के बिडेवा होय, 27रातोभर डी खिटी मिठाच गिटीच्बा होय एठा दिनभर डीच कामयवा। एठा बीजो कोम्बोउवा होय एठा दिनभर झटटोका, एठा देडेन बीजो एगो वोट्जे एठा खाट्जे कि देडेन बान हडाई। 28एटेन ओटेका होय जो बीजो के ओडेवा होय एठा सिंज खाडेवा होय मेटे देटेन आनाजो डाऊवा, पेला कोम्बो, मेटे गुं गेलेन, एठा दाना घाठेन। 29अखिरीन, जब आनाजो सेबाई रोंगो टे कराएन होय, तुरुटो खिटी मिठाच कुरकू के आनाजोके हिर घाल्जी कुल्कुवा होय चोयाकी हिरगा टेमो हेन होय।” मेटे दाना कराएन होय, मेटे देडेन तुरुटो दठोम घाटाऊवा होय, चोयाकी आनाजो हिर घांजी हेके। #4:29 योए 3:13

राई गा दाना गा उदाहरण

(मत्ती 13:31-32,34; लूका 13:18-19)

30डबोलटे यीशु नी मंडीके, “इंज परमेश्वर गा राज्यन गा डे रोंगो इनी तुनी चीजो टे डाए? इनी उदाहरण गा वोजीटे एनेगा बराबोर डाएवा। 31परमेश्वर गा राज्य एगो होय म्या कोरो सनी राई गा दान साटे ओटेन बिबीटवा होय। 32पेनो जब बीजो ओटे बिटके मेना, मेटे खिटीन सेबाई सिंजाटे डी ठायका खाटबेळे सिंज आरोएन, डेगा एगो खापेट डांगोल वोटजे, बदळा भूरिकु भी डेगा सहलीन थंदळ मिंकू डांगोलेन दिकुगा बुदिली हारोय सकतावा।” 33एठा यीशु नी दिकुके एगो-एगो घोनेचका उदाहरण घल्के देटोका दिकुगा समझातिंजे डा। 34डीच गर्दी बस उदाहरण वोजीटे का इथू डा, पेनो हेजे चेलाकूके सेबाई मंडी गा मतलब एकलान घाले डा।

यीशु गा कोयो धुंदळ के शान्तेवा

(मत्ती 8:23-27; लूका 8:22-25)

35डी दिनेन मेटे सिंगुरूप गा टेमो यीशु नी हेजा चेलाकू टे मंडीके, “हेजे गलील गा समुद्र गा हुधेळेन बो।” 36एठा चेलाकूनी गर्दी के सेने मेंके एठा दिकु यीशु सेंग्गोन डोंगान सुबानजेडो ओले। एठा चोटोका डोंगा लिंजेन कुरकू दिया टाउन ओले। 37जब दिकु समुद्र टे हुधेळेन चेल्के डा, म्या खाट कोयो धुंदळ हेके, एठा डा लपा डोंगा लिंजेन घाई लज्जे डोंगा डा टे भेटटेन एठा डोंगा नामुजू डा। 38एठा यीशु डोंगा गा टाऊ देळेन म्या गद्दी लिजेन गिटीचके डा, एठा मेटे चेलाकूनी यीशु के बिटकेनेच डो मंडीके, “हे गुरु, डोंगा नामुजू लक्के होय एठा आमेन चोचका चिंता बाऊ।” 39मेटे डीचनी बिटजे डो तूफान के कल्लाकेनेच, एठा डा लपा के मंडीके, “कायोमे, डो टेगेनजे!” मेटे तूफान सेन्द्रा बानदोएन, एठा समुद्रा कायोम जे। 40एठा यीशु नी चेलाकू टे कोम्बाराके, “आपे चोया हिघरावा? चोच आपेन आए टाएन भी विश्वास बाऊ?”#4:40भज 107:29 41एठा चेलाकू भेवा हिगराएन हिकुका मंडीके, “इनीच तुनी कोरो होय? येदे टाएन कि कोयो एठा लपा भी दियागा हुकूम गा रोंगो दडावा होय।”

Currently Selected:

मरकुस 4: GOKNT

Highlight

Copy