मत्ती 22

ब्याह-आटा गा उदाहरण

(लूका 14:15-24)

1यीशु नी डाबोलटे दिकुटे उदाहरण गेन मंडी लज्जे। 2स्वर्ग गा राज्य इनी उदाहरण रोंगो होय। म्या राजा नी हेजा गा कोणटे गा ब्याह डाके। 3एठा राजा नी हेजा नेवता कुरकू के जीके ब्याह गा आटा जोमेन हाको घल्जी कुलके। पेनो दिकुनी हेजे बान मेना। 4डाबोलटे राजा नी अलग्गो भाग्यकु के इनी मंडीटे कुल्केकु, “आमंत्रित कुरकू टे मांडे, इंज्नी इंजागा ब्याह गा आटा गा सेबाई तैयारी डाके होय। अच्छा जोम गा चीजो आरुके होय। सेबाईका तैयारके होय, ब्याह गा आटा जोजोम हेजे।” 5पेनो आमंत्रित कुरकू नी एने लिंजेन जेकाभी ध्यान बान जिडुका बालके दिकु सेबाई इकु-इकुका कामय ध्यान के डा। जेका हेजा खिटीन जेका हेजा धंदान ओले। 6अलग्गो कुरकू कुनी जो बचातीन्जू लक्के डा, राजा गा भाग्यकु के उठाटे दिकुके बेईजती डाके एठा दिकुके घोच्केकु। 7मेटे राजा नी इनी आजुम्के मेटे राजान खीजो हेन, एठा डीचनी हेजगा सेनाकु के कुल्केकु, डी घोगेच मिन्कुके, नाशोकेकू, एठा दिकुगा पुराके जुलके। 8मेटे राजा नी हेजगा भाग्यकु टे मंडीके, “ब्याह गा आटा तैयारके होय, पेनो आमंत्रित कुरकू लायको बान ठहरातिंजू। 9इनिघल्जी जगा गेन सेने, एठा जोभी कुरकू आपेन घाटाएन, दिकुके ब्याह गा आटाजोम आमंत्रितकु।” 10इनिघल्जी डी भाग्यकु नी हार जगान ओलेडो चोच बुरा, चोच बाला, जोभी घाटाएन सेबाईकु के जमाकेकु। एठा ब्याह गा उरा पाओनामिंकू टे भेट्टेन।

11“मेटे राजा पाओना मिंकूके दोडो तलान हेन मेटे डीचनी देटेन म्या कोरो डोकेनेच जो ब्याह गा घल्जी साही खिजाटे आंगी बान उरीडुका डा।” 12राजा नी कोम्बराके, “हे सोपती, आमनी ब्याह अच्छा आंगी चोया उरीडुका?” लेकिन डी कोरोनी तुनिका जवाब बान जिडुका। 13मेटे राजा नी भाग्यकु के हुकूम जीके, “इनिजगा नंगा टी टोलटे बाल्लन सैय्याकेच एठा अंधरान येंडाकेच, देटेन भेबाव जाम एठा तिळीनज गा रिरीगिटबाका होय।” 14एठा यीशु नी बातो स्याटे इनी रोंगो मंडीके, हाकोके मिन्कुनी घोनेचकु का होय, पेनो कालाम्के मिंकू थोळाकु का होय।

परमेश्वर एठा कैसर गा टेकसा जिऊ

(मरकुस 12:13-17; लूका 20:20-26)

15मेटे फरीसि कुरकू नी ओलेडो दियाका शब्द गेन पपासातिंज गा योजना आरुके। 16डे मतलब दिकुनी हेजा चेलाकूके हेरोदेस राजा गा साथो दियागा मेरान इनी मंडी कुल्केकु, “हे गुरु, आले हाडाई कि अमा हमेशा सच्चो गघालबा होय। एठा परमेश्वर गा राज्य शिक्षा सच्चाई टे जेबा होय। एठा आम जेका परवाह बान दडा, चोयाकी आम कोरो गा म्वार धोटे बातो बाने। 17इनिघल्जी आलेके घाले आम चोच समझातिंजेवा होय? चोच मूसा गा नियम आलेके रोमी सम्राट कैसर टेक्सा जिऊ गा हुकूम जेबा या बाने?” 18यीशु नी दिकुगा पेनो बेकार मेंटो मंडीके, हे ढोंगोकु इंज्के चोया चिचनावा होय? 19टेक्सा गा दिनार (म्या दिन गा मुंजीरी) इंज्के घाले मेटे डीच दिया मेरान म्या दिनार सैय्ये मेना। 20डीचनी दिकुटे कोम्बाराके, “येटेन आकृति एठा जीमू जेगा होय?” 21दिकुनी डीचके मंडीके, “रोमी सम्राट कैसर गा।” मेटे डीचनी दिकुके मंडीके, जो रोमी सम्राट कैसर गा होय, देटेन कैसर जे, एठा जो परमेश्वर गा होय, देटेन परमेश्वर के जे। 22येटेन आजोम टे आचोम्बो डायेन, एठा डीचके आराटे ओले।

डबोला टे एठा ब्याह

(मरकुस 12:18-27; लूका 20:27-40)

23डीका टेमो सदूकी कुरकू जो ममानातिंज डा, गोएन मिंकुगा डाबोलटे जीटाऊ होयका बाऊ। दिकु यीशु गा मेरान हेंडो, एठा प्रश्न कोम्बाराए लज्जे, 24“हे गुरु, मूसानी मंडीके डा, अगर जेका कोरो बिनाकोण गा गोएन टासो, मेटे दियागा डाईटे दियागा जापाएटे ब्याह डाटे, आपना डाईके घल्जी कोण के डायेच। 25येनेका विषय गेन म्या इनी रोंगो होय। म्या खाटला गेन आईय्या डाईकु डा। पेला मिठाच गा ब्याह डायेन पेनो डीच गोयेन। इनिघल्जी कि देटेन बिनाकोण गा डा देटेन हेजा जापाएटे के हेजा डाईटे घल्जी आराकेनेच। 26इनिका रोंगो दूसरा, तिसरा डाईटे साटे आईय्या डाईटे टाएन येनोगो डायेन। 27सेबाईकु बादोन देटेन जापाए भी गोएन। 28नका आलेके घाले, डी टेमो जब गोएन मिठाच जाटे जीटाएन डा, मेटे डीच जेगा जपाए आरुवा? चोयाकी देटेन सेबाईकुका जापाए आरुके डा।” 29यीशु नी दिकुके जवाब जीके, “आपे पवित्र ग्रंथ एठा परमेश्वर गा शक्तीगा बारेन बान हाडाई, इनी वोजीटे भुल्लाएन मेना।” 30चोयाकी गोएन मिठाच जाटे जीटाएन बादोन ब्याह बान डाऊ, पेनो दिकु स्वर्गेन थंदळ मिंकू स्वर्गदूतकु रोंगो आरुवा। 31पेनो गोएन मिठाच जाटे जीटाएन गा बारेन चोच आपेनी मूसा पुस्ताक गेन डी भागो बान पडातिंज्दुका? जो भागो अब्राहम, इसहाक, याकूब गा गुजू काफी टेमो बादोन परमेश्वर नी मंडीके, 32“इंज अब्राहम गा परमेश्वर एठा इसहाक गा परमेश्वर एठा याकूब गा परमेश्वर होय? देटेन गोएन मिंकूके बाने, पेनो जीटा मिंकुगा परमेश्वर होय।” 33येटेन आजुमटे कुरकू दियागा इथूटे अचम्बोयेन मेना।

सबसे खाट हुकूम

(मरकुस 12:28-34; लूका 10:25-28)

34पेनो जब यीशु नी सदूकी कुरकू के सही जवाब जीटे कायोमकेकु, मेटे फरीसि कुरकू इनी आजुमटे म्याखठठा टे हेन। 35एठा दिकु तालाटे म्या मूसा गा नियम गा गुरूजीनी चिचना घल्जी दियाटे कोम्बाराके। 36“हे गुरु, मूसा गा नियम गेन तुनी हुकूम खाट होय?” 37यीशु नी डीचके जवाब जीके, आम आमगा प्रभु परमेश्वर टे अमा सेबाई मन एठा अमा सेबाई जान सेबाई दिमाग टे प्यार डोए। 38इनी पेला एठा सेबाई टे महत्वपूर्ण हुकूम होय। 39एठा येनोगोका दूसरा हुकूम होय, आपना मेराकुटे आपना रोंगो प्यार डोए। 40मूसा गा नियम सेबाई एठा परमेश्वर गा कोनेटे मंडीमिंकू गा सेबाई पुस्ताक गेन ओल्के मिनी बातो इनी बरी हुकूम गा लिंजेन आधरित होय।

मसीह दाऊद गा कोण या दाऊद गा प्रभु होय?

(मरकुस 12:35-37; लूका 20:41-44)

41मेटे फरीसि कुरकू जामाएन डा, मेटे यीशु नी दिकुटे कोम्बाराके? 42“मसीह गा बारेन आपेन चोच सामझातिंजूवा होय? देटेन जेगा कोणटे होय?” दिकुनी डीचके मंडीके, “दाऊद गा।” 43डाबोलटे यीशु नी दिकुटे कोम्बाराके, “मेटे दाऊद आत्मान मंडीटे डीचके प्रभु चोया मंडीवा होय?” 44“प्रभु नी, इंजा प्रभु टे मंडीके, इंजा डाखुरी कोनेन सुबने, जब टाएन इंज अमा दुश्मानकु के पूरा रोंगो टे हरातिंजकु बान टाएन। 45भला, मेटे दाऊद नी डीचके प्रभु मेंबा होय, मेटे देटेन दियागा कोणटे टोनोगो ठहरातिंज्के?” 46दियागा जवाब बेन जेकाभी म्या बातो बान मंडीडुका, पेनो डी दिनाटे जेकाकेका डाबोलटे दियाटे चोच्का कोकाम्बारा गा हिम्मत बान दडुका।

Currently Selected:

मत्ती 22: GOKNT

Highlight

Copy