मत्ती 21

यीशु गा यरूशलेमेन विजय मोएन

(मरकुस 11:1-11; लूका 19:28-40; यूहन्ना 12:12-19)

1मेटे डीच यरूशलेम शहर गा मेरान आदिरजे, एठा जैतून टुक्की लिंजेन बैतफगे गा मेरान हेन मेटे यीशु नी बरी चेलाकिंजके इनी मंडीटे कुल्केकु, 2सम्मा गा गाँवेन सेने, एठा डेन आदिरुंका म्या गधा गा कोंटे, डीचनी पेला चोलाकाभी तुनिका सवारीके चुटडुका, टोल्के आपेन घटाऊबा डीचके ईटी टे सालेच। 3अगर आपे तलाटे जेकाभी चोचका मांडे टासो, प्रभु गा प्रयोजन होय, मेटे देटेन तुरुटो कुलेच्बा मेना। 4येटेन इनिघल्जी डायेन, कि जो वचन परमेश्वर गा कोनेटे मंडीमिठाच गा वोजीटे मंडीके डा, देटेन पुरायु। 5सिय्योन गा कोंजाई टेके मंडे, डोगे, अमा राजा अमा मेरान हेजेवा होय, देटेन नम्र होय। एठा गधा गा कोंटे लिंजेन सुबानके होय।

6चेलाकू ओलेडो, जैसा यीशु नी दिकु मेरान ओलेडो मंडीके, डेनोगोका मंडीके। 7एठा गधा गा कोंटे के साटे, दिया लिंजेन हेजा गा आंगी येंडाके, एठा देटेन दिया लिंजेन सुबानजे। 8डेनेगोका यीशु गधा लिजेन चुटाटे यरूशलेम शहर कोनेन ओले। घोनेच कुरकू नी दियागा सम्मान कोरान इकुगा कपडे बिंदिल टे मन जीके। अलग्गो कुरकू नी कोरान सिंज टे डांगोल बिंदिलके एठा डीचके मान जीके। डीके दिकुनी कोरा गा आजू बजुगा सिंजाटे म्हाके डा। 9एठा जो गर्दी सम्मा-सम्मा सेनेवा एठा टाऊ-टाऊ हेजे मेना डा, हाको-हाकोटे मंडी डा, कि दाऊद गा कोनेटे #21:9 होशन्ना इब्रानी शब्द मतलब परमेश्वर आलेके बचातिंजकोम,परमेश्वर गा स्तुति डायु, धन्य होय, देटेन जो प्रभु गा जीमू टे हेजेवा होय, स्वर्ग गेन परमेश्वर गा स्तुति डायु, 10जब यीशु नी यरूशलेम शहर गेन मुएन,, मेटे सारा नगरेन हालचल मचातिंजे, एठा कुरकू मंडी लज्जे कि इनिज जे होय? 11कुरकू नी मंडीके, “एटेन गलील जिल्हा गा नासरत शहर गा परमेश्वर गा कोनेटे मंडीमिठाच यीशु होय।”

मंदिर गा सापा

(मरकुस 11:15-19; लूका 19:45-48; यूहन्ना 2:13-22)

12यीशु नी परमेश्वर गा मंदिरेन ओलेडो, दिकु सेबाईकु जो यरूशलेम गा मंदिरेन लेन-डेन लक्के डा, ओटकेकु डा, एठा धंधाकु गा टेबाल एठा कबूत्तर गा किकीजीमिंकू के चौफीली उलटाके डा। 13एठा दिकुके मंडीके, चोखरा ग्रंथन “ओल्के होय, कि परमेश्वर नी मंडीके कुरकू यरूशलेम गा मंदिर एनोगो जगा मेंबा देटेन सेबाई जाटो गा कुरकू प्रार्थना दडा घाल्जी हेजेवा होय। लेकिन आपेनी इनिज्के चुचीरी मिंकूटे भेटटीके गुफा रोंगो आरुके होय।”

14एठा अंधाकु के एठा लंगळा, यरूशलेम गा मंदिरेन दिया मेरान सालेकु एठा डीचनी दिकुके साजाकेकु। 15पेनो मेटे मुख्यायाजक एठा मूसा गा नियम इथूमिठाच इनी अचाम्बो कामाय के, जो डीचनी डाके, एठा चाफ्नीकुके यरूशलेम गा मंदिरेन दाऊद गा कोंटे गा परमेश्वर गा स्तुति डायु हाकोटे डोकेनेच मेटे डीच खिजोएन, 16एठा दियाटे मंडी लज्जे, “चोच आम आजोम्बा होय कि इनकू चोच मंडीवा?” यीशु नी दिकुके मंडीके, “हा, आपेन बान मालूम जो पवित्र ग्रंथ मेन्बा होय, सानिकु एठा दिडोम नुनू चफनीकू चभुटे आमनी स्तुति डाके।” 17जब देटेन दिकुके आराटे पूरा गा बाल्लन बैतनिय्याह गाँव गेन ओले, एठा देटेन रातो थंदळजे।

अंजीर गा सिन्ज टे इथू

(मरकुस 11:12-14,20-24)

18सिंगुरूप टे मेटे देटेन पुरान हिरा लक्के डा, मेटे यीशुन आटा रागेन। 19एठा अंजीर गा सिंज धोटे डेगा मेरान ओले। दियागा मेरान ओले, डी सिंजेन पालाके आराटे अलावा तुनिका फल बाऊ डा। चोयाकी फल गा टेमो बान डा। मेटे यीशु नी सिंजके सरापो जीटे मंडीके कि डेगा लिंजेन डाबोलटे चेलाकूभी फल बान हेजे। 20येटेन धोटे चेलाकू बिचारजे, एठा मंडीके, “येटेन अंजीर गा सिंज चोफारटे ळोखोळजे?” 21यीशु नी दिकुके जवाब जीके, “इंज आपेटे साच्चो मंडीवाकी, अगर आपे विश्वास डोए, एठा आपना दिलेन शक बाकी दोडो, मेटे न इनी डाएवा, जो इनी अंजीर गा सिंज टे मंडीके डा, पेनो अगर इनी टुक्की के भी मांडेवा, उखळातिंजू, एठा आपना खुदके समुद्रननी सेंजू डो बोचोयु मेटे येटेन डाऊवा। 22एठा जो चोचकाभी आपे प्रार्थना डाटे आसे डो एठा विश्वास डोएकी आमेन डी घटाऊबा।

यहूदी सम्मा कोरो गा लिजेन यीशु अधिकार गा लिजेन शक

(मरकुस 11:27-33; लूका 20:1-8)

23देटेन यरूशलेम गा मंदिरेन ओलेडो उदाहरण जिऊ लज्जे डा, कि मुख्यायाजक एठा कुरकू गा यहूदी जुना सनाकु दियागा मेरान हेंडो कोंकाम्बरा लज्जे दिकुनी यीशु टे मंडीके इनी चीजो के दडा गा घाल्जी अमा मेरान चोच हाक होय एठा जेनी आमके इनी रोंगो हाक सेंग्गोन कुल्केमी होय?” 24यीशु नी दिकुके जवाब जीके, कि इंजभी आपेटे म्या बातो कोकाम्बारावा होय अगर देटेन इंज्के घाले, मेटे इंजभी आपेके घालेवा कि इंज इनी कामय तुनी हाक टे दाडावा होय। 25यूहन्ना गा बपतिस्मा तुनगटे डा? स्वर्ग कोनेटे या कुरकू कोनेटे डा? मेटे दिकु हिंजमान लज्जे डा, “अगर आले जवाब जे कि स्वर्ग टे परमेश्वर गा कोनेटे मेटे डीच आलेटे कोम्बाराएबा डाबोलटे आपेनी दियागा विश्वास चोया बान दोडुका।” 26लेकिन अगर आले मांडे कुरकू कोनेटे मेटे डीच इनी रोंगो जवाब बान जिडुका। चोयाकी आलेन गर्दी टे हिगरा डा जो इनी आसी डा कि यूहन्ना परमेश्वर गा कोनेटे कुलके म्या सच्चो परमेश्वर गा कोनेटे मंडीमिठाच डा। 27मेटे दिकुनी यीशु के जवाब जीके, “आले बान हाडाई।” यीशु नी दिकुटे मंडीके, “कि इंजभी आपेके बान घागल कि इंज्के इनी चीजो के दडा गा हाक तुंगाटे घटाके होय।”

बरी कोण गा उदाहरण

28“आपेन इनी कहानी टे चोच सामझातिंजूवा होय? तुनिका कोरो गा बरी कोन्किंज डा, डीचनी खाट कोणटे टे मंडीके, ‘हे कोण टैंज अंगूर गा बगीचा गा कामयगे।’ 29डीचनी जवाब जीके, ‘इंज अंगूर गा बगिचान कामय दडा बान सेने’ पेनो अदा टेमो बादोन दिजेन हेजा बातोन मन बदलाके एठा देटेन अंगूर बागिचान कामय दडा ओले। 30बाटे दूसरा कोण गा मेरान ओलेडो डीचके भी इनिका मंडीके। डीचनी जवाब जीके, हा जरुर टेका इंज सेनेवा, पेनो देटेन बान सेनडुका। 31येटेन घालेकी तुनी कोण नी हेजा बाटे गा इच्छा पुराके?” दिकुनी जवाब जीके, “खाट कोण नी।” यीशु नी दिकुटे मंडीके, “इंज आपेटे सच्चो-सच्चो मंडीवा मेनाकी, टेक्सा सा मिंकू एठा आनोवा मिंकू आपेटे पेला परमेश्वर गा राज्यन मुवा। 32इंज इनी इनिघल्जी मंडीवाकी, चोयाकी मेटे यूहन्ना बपतिस्मा जिऊमिठाच आपेके साही तरीका टे जीवन बिबातातिंज इथूकेमी, मेटे आपेनी दिया लिंजेन विश्वास बान दोडुका। पेनो टेक्सा मिंकू एठा आनोवा मिंकू पश्चाताप डावे एठा विश्वास डावे। एठा आपे इनी दोडो गा बादोन भी बाकी पस्ताव एठा दियागा विश्वास बान दोडुका।”

बेकार खिटी मिठाच गा उदाहरण

(मरकुस 12:1-12; लूका 20:9-19)

33एनेगा बादोन यीशु उदाहरणेन आजुमे म्या स्वामी डा, “म्या कोरोनी हेजा खिटीन अंगूर एंदाके।” डीचनी खिटी गा उफुन भी कोनेन म्या घोटा गा दीवार आरुके। डीचनी उफुन भी कोनेन जानवरकु टे खिटी रखवाली दडा घल्जी ठुम्बी आरुके एठा डाबोलटे डीचनी खिटीके लागुन टे जीके एठा दूसरा गाँवेन ओले। 34मेटे जाऊ गा टेमो हेन, मेटे डीचनी हेजा गा भाग्यकु के डेगा जाऊ सा घांजी अंगूर गा खिटीन मिंकू मेरान कुल्केकु। 35पेनो खिटी मिंकू डी भाग्याकूके उठाकेकु डो, तुनिज्के का घोच्केनेच, एठा तुनिज्के का लेचा केनेच। 36एठा डीचनी एठा भाग्य के कुल्केकु, जो पेला घोनेच डा, एठा दिकुनी दिकुके भी डेनोगो केकु। 37आखरीन नी डीच हेजा कोण टेका दिकु मेरान इनी मंडीटे कुल्केनेच। कि दिकु इंजागा कोण गा मन डोएबा। 38पेनो खिटी मिंकू कोणटे के धोटे इकुका मंडी लज्जे, येटेन नी कोणटे होय, हेजे डीचका होय जो अंगुरा बगीचा गा मालिको होय, हेजे आबु इनिज्के घोजेज इनी खिटी आबुगा आरुवा। 39एठा खिटी मिंकू इनिज्के घोच्केनेच एठा लासोके अंगूर गा खिटी टे बल्लान टेप्पाके।

40इनिघल्जी मेटे अंगूर गा बागीचा गा स्वामी हेजेवा, मेटे डी खिटी मिंकू गेल्ला चोच डाएवा? 41दिकुनी डिच्के मंडीके, देटेन डी बुरा कुरकू के बुरा रिती टे नशोकुवा, एठा अंगूर गा टेका एठा खिटी मिंकू जेबा, टेमो लिंजेन फल जेबा मेना। 42यीशु नी दिकुके मंडीके, चोच आपेनी चोलाकाभी पवित्र ग्रंथ गेन इनी पळातिंजडूका, “जो घोटाके महेलेन कामय मिंकुनी बेकार समझातिंज्के डा, डीका पईय्या गा खाट घोटा आरोयेन। येटेन प्रभु कोनेटे डायेन, एठा आलेगा दोडो गेन ठायका आचोम्बो होय?”

43“इनिघल्जी इंज आपे सेबाईकु इनी सत्य ओडेवा, परमेश्वर गा राज्यन आपेटे रुटेवा होय, एठा येनोगो अलग्गो जाटो गा कुरकून जेबा, जो किमती फल सेगेवा। 44जो जेकाभी इनी घोटा लिंजेन बोचोवा, देटेन चुराऊबा, एठा जे लिंजेन इनी घोटा बोचोवा डीचके लेठेळेच्बा।” 45मुख्यायाजक एठा फरीसि कुरकू दियागा उदाहरण के आजुमटे सामझातिन्जे कि देटेन आबुगा विषय गेन मंडीके होय। 46एठा दिकुनी डीचके उठाएच लज्जे, पेनो कुरकू टे हिगराएन डा चोयाकी दिकु डीचके परमेश्वर गा कोनेटे मंडीमिठाच मेंटो मंडी डा।

Currently Selected:

मत्ती 21: GOKNT

Highlight

Copy