लूका 20

यहूदी कुरकू द्वारा यीशु टे प्रश्न

1म्या दिन येनोगो डायेन कि जब देटेन यरूशलेम गा मंदिर गेन कुरकू के शिक्षा जिऊ लक्के डा, एठा अच्छा खाबोर घागल लक्के डा, मेटे मुख्यायाजक एठा मूसा गा नियम इथूमिठाच एठा यहूदी जुना सनाकु दियागा मेरान हेंडो टेंगेनजे। 2एठा मंडी लज्जे, “आलेके घाले, आम इनी कामय के तुनी हाक टे दडावा होय, एठा देटेन जे होय, जोभी आमके इनी हाक जीके होय?” 3यीशु नी दिकुके जवाब जीके, “इंजभी आपेटे म्या बातो कोकाम्बारावा, इंज्के घाले, 4यूहन्ना गा बपतिस्मा स्वर्ग कोनेटे डा या कुरकू कोनेटे डा?” 5मेटे दिकु इकुका मंडी लज्जे, “अगर आले मंडे, ‘स्वर्ग गा कोनेटे,’ मेटे देटेन मंडेबा, ‘डाबोलटे आपेनी दिया लिंजेन विश्वास चोया बान दोडुका?’ 6एठा अगर आले मांडे ‘कुरकू गा कोनेटे, मेटे सेबाई कुरकू आलेके लेचाकोम्बा, चोयाकी दिकु सच्चोका हाडाई होय, यूहन्ना परमेश्वर गा कोनेटे मंडीमिठाच डा। 7इनिघल्जी दिकुनी जवाब जीके, “आले बान हाडाई, कि देटेन जे कोणटे डा।” 8यीशु नी दिकुटे मंडीके, “मेटे इंजभी आपेके बान घागल, कि इंज इनी कामय तुनी हाक टे दडावा।”

बेकार खिटी मिंकू गा उदाहरण

9मेटे देटेन कुरकू टे इनी उदाहरण मंडी लज्जे, म्या कोरोनी हेजा खिटीन अंगूर एंदाके, एठा खिटीके लागुन टे जीके, एठा घोनेच दिन गा घल्जी दूसरा गाँवेन ओले। 10साही टेमो लिंजेन डीचनी लागुन मिंकू गा मेरान म्या भग्याके कुल्केनेच, कि डी अंगूर गा बगीचा के अदा फाल गा भागो डीचके जे, पेनो लागुन मिंकुनी डीचके मुंडाटे खाली टी हिराकेनेच। 11डाबोलटे खिटी गा मालिकोनी म्या एठा भग्याके कुल्केनेच, एठा दिकुनी डीचके भी मुंडाटे एठा दियागा बेइज्जाति डाटे खाली टी हिराकेनेच। 12डाबोलटे डीचनी तिसरा के कुल्केनेच, एठा दिकुनी डीचके भी घायाल टे ओटकेनेच। 13मेटे अंगूर बागीचा गा स्वामी नी मंडीके, इंज चोच डाए? इंज इंजा लाळ कोण के कुलेच्बा चोच जाने दिकु दियागा मन डोएबा। 14जब लागुन मिंकुनी डीचके धोटे मेटे इकुका बिचार लज्जे, येटेन नी संपत्ति गा वारिश होय, हेजे, आबु डीचके घोजेज्बा, कि अंगूर गा बागीचा आबुगा आरुवा।’ 15एठा लागुन मिंकुनी डीचके अंगूर गा बागीचा टे ओटटे घोच्केनेच: इनिघल्जी अंगूर गा बागीचा गा स्वामी दिकुगा सेंग्गोन चोच डाएवा? 16देटेन हेजेवा डो डी लागुन मिंकूके नशोकुवा, एठा अंगूर गा बागीचा दूसराकु के जेबा।” इनी आजुमटे दिकुनी मंडीके, “परमेश्वर येनोगो बाकी दडा।” 17यीशु नी दिकु कोने धोटे प्रश्न डाके, “मेटे पवित्र ग्रंथ गेन ओल्के मिनी डी भागो गा मतलब चोच होय, देटेन इनी मंडीवा होय, जो घोटा गा राजमिस्त्रिकुनी बुरा ठहरातिंज्के डा डीका पैय्या गा मुख्या घोटा आरोएन। 18जो जेकाभी डी घोटा लिंजेन बोचोवा, देटेन चुराऊबा, एठा जे लिंजेन इनी घोटा बोचोवा, डीचके लेठेळेच्बा।”

मूसा गा नियम इथूमिंकू एठा याजक याजककु गा चाल

19डीका टेमो मूसा गा नियम इथूमिठाच एठा मुख्यायाजक कुनी डीचके उठा बिचार के, चोयाकी समझातिंजे डा, कि डीचनी दिकु खिलाफबेन उदाहरण मंडीके, पेनो डी कुरकू टे हिघराए। 20एठा दिकु दियागा घागाटा लज्जे एठा डोंगोरा सिटाकुके कुलकेकु, कि धर्म गा रुपोन आरुटे दियागा तुनिका न तुनिका बातो उठायु, कि डीचके राज्यपाल गा टी गेन हाक गेन जीकेच। 21दिकुनी दियाटे इनी कोम्बाराके, “हे गुरु, आले हाडाई कि आम साही मंडीवा एठा इथूवा भी होय, एठा जेका गा का पक्षपात बान पेनो परमेश्वर गा राज्य शिक्षा सच्चाई टे जेबा होय। 22चोच मूसा गा नियम आलेके रोमी सम्राट कैसर टेक्सा जिऊ गा हुकूम जेबा या बाने। 23डीचनी दिकुगा चतराएके ताखात टे दिकुटे मंडीके, आपे इंज्के चोया चिचनावा होय? 24म्या दिनार (म्या दिन गा मुंजीरी) इंज्के घाले, येने लिजेन जेका गा का मूर्ति एठा जीमू होय? डीचनी मंडीके, रोमी सम्राट कैसर गा, 25डीचनी दिकुटे मंडीके, मेटे जो रोमी सम्राट कैसर गा होय, देटेन कैसर के जे, एठा जो परमेश्वर गा होय देटेन परमेश्वर के जे।” 26डीच कुरकू गा सम्मान डी बातो के बान उठाडुका, बानकी दियागा जवाब टे अचम्बो बातो मेंटो कायोम जे।

डबोलटे हेजे एठा ब्याह

27डाबोलटे सदूकी कुरकू इनी विश्वास बान दडा डा, कि कुरकू गोएन गा बादोन डाबोलटे जीटाऊवा, दिकु तलाटे अदा सदूकी कुरकू नी यीशु गा मेरान हेंडो कोम्बाराके। 28“हे गुरु, मूसानी आलेगा घल्जी इनी ओल्के होय, अगर जेका गा डाईटे हेजा गा जापाएटे थंदळ टासो बिनाकोण गा गोयेनकी, मेटे दियागा डाईटे जापाएटे टे ब्याह डाए, एठा अमा डाई घल्जी कोणटे डाए। 29अखिरीन म्या टेमो आईय्या डाईकु डा सेबाईकु टे खाट मिठाच ब्याह डावे लेकिन बिनाकोण गा गोएन। 30एठा दूसरा नी डाईटेनी डी विधवा टे ब्याह डावे एठा डीच भी बिनाकोण गा गोएन। 31एठा तिसरा डाईटे एठा याईय्या डाईकु भी नी डी जापाएटे ब्याह डावे एठा बिनाकोण गा गोएन मेना। 32सेबाईकु गा टाऊटे जपाए भी गोएन मेना, 33नका आलेके घाले, डी टेमो जब गोएन मिठाच जाटे जीटाएन डा, मेटे डीच जेगा जपाए आरुवा? आले इनी इनिघल्जी कोम्बराके डीचनी डी आईय्याकु टे ब्याह डावे डा।” 34यीशु नी दिकुटे मंडीके, “इनी दुनिया गा कुरकू मेटे ब्याहनौर दडावा होय, 35पेनो जो कुरकू येने लायको थंदळवा कि डी जामाना गा एठा गोएन मिठाच जाटे जीटाएन घाटाऊवा डेनेन ब्याह घी बान डाऊ, 36दिकु गुजू भी बाने, चोयाकी दिकु स्वर्गदूतकु रोंगो आरुवा, एठा गोएन मिठाच जाटे जीटाएन गा कोण होंगा परमेश्वर गा भी कोण होंगा? 37पेनो गोयेन मिंकूटे जीटाऊ गा बारेन मूसानी जुलू मिनी झाळी गा भागोन ओल्के मेना होय कि मूसा प्रभु के अब्राहम गा परमेश्वर, एठा इसहाक गा परमेश्वर, एठा याकूब गा परमेश्वर मंडीवा होय। 38परमेश्वर नी मेटे गोयेन मिंकू गा बाने पेनो जीटामिंकू गा परमेश्वर होय चोयाकी दियागा सम्मान इंकू सेबाईकु जीटाका होय।” 39मेटे इनी आजुमटे मूसा गा नियम इथूमिठाच तलाटे घोनेचकुनी मंडीके, “हे गुरु, आमनी अच्छा मंडीके।” 40एठा दिकुनी डाबोलटे जेकान का यीशु टे चोचकाभी कोकाम्बारा गा हिम्मत बान दडुका।

मसीह दाऊद गा कोंटे या दाऊद गा प्रभु होय?

41एठा डीचनी दिकुके कोम्बाराके, “मसीह गा दाऊद गा कोनेटे चोया मंडीवा होय, 42दाऊद अमा बाजनसंहिता गा पुस्तक गेन मंडीवा होय, कि प्रभु नी इंजा प्रभु टे मंडीके, 43इंजा डाखुरी कोनेन सुबांके, जब टाएन इंज अमा दुश्मानकु के पूरा रोंगो टे ठहरातिंजू बान टायेन, 44दाऊद नी भी मसीह के प्रभु मंडीटे जीमू मेटे डीच दाऊद कोण टोनोगो डाऊवा होय।” यीशु इथू आजुमटे म्या खाट घोंजा खुशी ममानातिंज लक्के डा।

मूसा गा नियम इथूमिंकू गा खिलाफ यीशु गा चेतावनी

45जब सेबाई कुरकू आजुम लक्के डा, मेटे डीचनी हेजा गा चेलाकू टे मंडीके, 46“मूसा गा नियम इथूमिठाचकुटे ध्यान टे थांदळे जो लाम्बा महंगा आंगी उरिके टे इखाटबा एठा हाटीन गेन कुरकू टे आदर गा सेंग्गोन नमस्कार सा पपासंदबा, डीच आराधना जगा गेन एठा मुख्या जागा गें सेनेवा डो ऊँचा जगान सुबान पपासंदबा होय। 47दिकु धोकाटे जीटे विधवा जपाएकु गा डामा सैय्यावा होय। एठा पूरा पापो टे खाट टाएन प्रार्थना दडावा होय ताकी कुरकू इनी सोचातिंजे कि दिकु अच्छा होय। जरुरी होय परमेश्वर दिकुके खाट सजा जेबा।”

Currently Selected:

लूका 20: GOKNT

Highlight

Copy