लूका 19

जक्कई गा उरा गेन यीशु

1यीशु नी यरीहो शहर गा तलाटे चेल्के। 2देटेन जक्कई जीमू म्या कोरो डा, जो टेक्सा सा मिंकू गा मुख्या एठा लकपाती डा। 3देटेन यीशु के दोडो चाहता डा। पेनो गर्दी वोजीटे डूगु बान डा, चोयाकी देटेन ठेगना डा। 4यीशु के दोडो घल्जी देटेन साम्मन साळूप जेडो म्या लोआ गा सिंजेन पेळेन, चोयाकी यीशु डीका कोरा टे सेने मिठाच डा। 5जब यीशु सिंज गा मेरान आदिरजे मेटे माठा धोटे दियाटे मंडीके, “हे जक्कई जल्दी इटान आगोरोए चोयाकी टैंज इंज्के अमा उरान थंदळ जरुरी होय।” 6देटेन तुरुटो सिंज टे इटान आगुरू के एठा यीशु हेजा उरान साईय्येनेच एठा खुशीटे दियागा स्वागत डाके। 7इनी धोटे सेबाई कुरकू कुरूकुरू लज्जे, “देटेन मेटे म्या पापी कोरो गा उरान ओले होय।” 8जक्कई जोम गा लठ्ठाका टेंगेनटे प्रभु यीशु टे मंडीके, “हे प्रभु, डोगे, इंज इंजगा अदा संपत्ति गिरबोकु के जेबा एठा अगर इंज्नी कुरकू टेक्सा सा टेमो धोका जीटे चोचका साईय्ये टासो, मेटे दिकुके उफुन गुण हिरागेवा।” 9मेटे यीशु नी डीचके मंडीके, “टैंज इनी उरा गा कुरकू तलान उध्दार हेन होय, इनिघल्जी कि येटेन भी अब्राहम गा सच्चो कोण होय। 10चोयाकी इंज, कोरो गा कोण हमेशा गा दण्डो टे बबाचातिंज एठा दिकुगा उध्दार दडा हेन मेना।”

गेल मुहरें

11जब कुरकू इनी आजोम लक्के डा, मेटे यीशु नी हेजा बातो चालुका डोके एठा दिकुके म्या उदाहरण घल्के, चोयाकी देटेन यरूशलेम शहर गा मेरान डा, एठा कुरकू लगातिंजे कि परमेश्वर गा राज्य सुरु लक्के होय, 12इनिघल्जी डीचनी मंडीके, “म्या लकपाती कोरो लेंक्की देशोन ओले ताकी राजपद घटाटे हिराबा। 13एठा डीचनी हेजा गा भाग्यकु तलाटे गेलकु के हाकोटे दिकुके गेल किमती चिक्खा (तीन साल मुंजीरी) जीके, एठा दिकुटे मंडीके, इंजा हिरा टाएन लेन-डेन डाए।” 14“पेनो दियागा पूरा गा थंदळ मिंकू दियाटे नफरात दोडो डा, एठा इनी मंडी घल्जी अदा उखुटे खाबोर जिऊ मिंकूके कुल्केकु, कि आले बान चाहतावा कि देटेन आले लिंजेन राजो डाए। 15जब देटेन राजपद घाटाटे हिराके होय, मेटे येनोगो डायेन कि डीचनी हेजा भग्याकु के दिकुके डामा जीके डा, हेजा मेरान हाकोलेकु ताकी मालूमजू कि दिकुनी लेन-डेन टे चोच-चोच कामाये। 16मेटे पेला भाग्य नी हेंडो मंडीके, ‘हे स्वामी अमा मोहरा टे दस एठा चिक्खा (चार महिना गा मुंजीरी) कामय के होय।’ 17डीचनी डीचके मंडीके, ‘हे कास भग्या, आम धन्य होय, आम घोनेचका थोळाकान विश्वास लायको ओटजे नका गेल पूरा गा अधिकार डोए।’ 18दूसरा भाग्य नी हेंडो मंडीके, ‘हे स्वामी, अमा मोहर टे मोनाई एठा चिक्खा (बीस महिना गा कामय) कामय के होय।’ 19स्वामी नी दियाटे मंडीके, ‘आम भी मोनाई पूरा लिंजेन हाक डोए।’ 20तिसरा भाग्य नी हेंडो मंडीके, ‘हे स्वामी डोगे, अमा चिक्खा (चार महिना गा मुंजीरी) येटेन होय, डीके इंज्नी बाऊळीन टोलटे डोके। 21चोयाकी इंज अमाटे हिगरा डा, इनिघल्जी कि आम जिद्दी कोरो होय, जो आमनी बान दोडुका डीके टूलेवा होय, एठा जो आमनी बान बिटडूका, डीके हिरेवा होय।’ 22डीचनी डीचके मंडीके, ‘हे बुरा भग्या, इंज अमागा का चाभु टे इंज्के दोषी ठहरातिंजकोम्बा, आम इंज्के हाडाई डा, कि जिददो कोरो होय, जो इंज्नी बान दोडुका डीके टूलेवा, एठा जो इंज्नी बान बिटडूका, डीके हिरेवा मेना। 23मेटे आमनी इंजा डामाके सोनारकुन चोया बान दोडुका, कि इंज हेजे डा, ब्याजो सथोन सेगे डा?’ 24एठा जो मेरान टेंगेन्के डा, डीचनी दिकुटे मंडीके, ‘देटेन मोहरा दियाटे सैईय्या, दियाटे आसे, एठा जे मेरान गेल मोहरा (तीन साल गा मुंजीरी) होय डीचके जिकी।’ 25दिकुनी दियाटे मंडीके, ‘हे स्वामी, दियागा मेरान मोहरा नी होय।’ 26इंज आपेटे मंडीवा कि जेगा मेरान होय, डीचके एठा जेबा मेना, एठा जेगा मेरान बाने, दियाटे देटेन भी जो दियागा मेरान होय सेगेवा होय। 27पेनो इंजा डी दुश्मनकु के जो बान चाहता डा, कि इंज दिकुगा राजा आरोए, दिकुके येटेन साटे इंजा सम्मान घोच्कु।”

यरूशलेम गेन जीटाऊटे मु

28इनी बातो मंडीटे यीशु यरूशलेम शहर गा कोनेन हेजगा चेलाकू सेंग्गोन ओले। 29एठा जब देटेन जैतून जीमू टुक्की लिंजेन बैतफगे एठा बैतनिय्याह गाँव गा मेरान आदिरजे, मेटे डीचनी हेजे चेलाकू तलाटे बार्खिंजके इनी मंडीटे कुल्केकिंज, 30“सम्मा गा गाँवेन सेने, एठा डेन आदिरुंका म्या गधा गा कोंटे दिया लिंजेन चोलाकाभी जेका सवारीके चुटडुका, टोल्टेका आपेन घाटाऊवा, डीचके ईटी टे सालेच। 31एठा अगर जेका आपेटे कोकाम्बाराकी कि चोया खुल्लायेच लक्के, मेटे इनी मंडीकी, कि प्रभु गेन इनिजगा जरुरत होय।” 32जो कुल्केकु डा, दिकुनी ओलेडो जैसा डीचनी दिकुके मंडीके, डेनोगोका घाटाएन। 33जब दिकु गधा गा कोंटे के इटेच लक्के डा, मेटे दियागा मालिकोनी दियाटे कोम्बराके, “इनी कोंटे के चोया इटेच लक्के?” 34दिकुनी मंडीके, “प्रभु गेन इनिजगा जरुरत होय।” 35दिकु गधा गा कोंटे के यीशु गा मेरान सालेनेच एठा हेजा आंगी डी कोंटे के लिंजेन येंडाटे यीशु दिया लिंजेन सुबनजे डो सावरीके डाके। 36डेनेगोका यीशु गधा लिजेन चुटाटे यरूशलेम शहर कोनेन चेल्के डा, घोनेच कुरकू नी दियागा सम्मान कोरान इकुगा कपडे बिंदिल टे मन जीके। अलग्गो कुरकू नी कोरान खजूर गा डांगोल बिंदिलके डा। 37जब देटेन यरूशलेम शहर गेन मेरान डी जगान हेन देटे टे सळाक्को इटान जैतून टुक्की गा कोनेन सेने डा, मेटे चेलाकू गा सेबाई घोंजा डी सेबाई शक्तीगा कामय गा वाजाटे जो दिकुनी डोके डा, कुशोटे खट आवाज टे परमेश्वर गा स्तुति दडा लज्जे : 38“धन्य होय, देटेन राजा, जो प्रभु गा जीमू टे हेजेवा होय। स्वर्ग गेन शांती एठा आकाश गेन माहिमा डायु।” 39मेटे गर्दी तलाटे चोटोका फरीसि कुरकू दिकुके मंडी लज्जे, “हे गुरु आमगा चेलाकूके काल्लाकू ताकी दिकु कायोम थंदळकु।” 40मेटे डीचनी दिकुके जवाब जीके, “इंज आपेटे मंडीवा, कि अगर इनी कुरकू कायोम थंदळे, मेटे घोटा इंजा महिमा दडा घल्जी चिल्लातिंजूवा।”

यरूशलेम गा घांजी जाम

41जब यीशु मेरान हेन, मेटे यरूशलेम शहर धोटे डे लिंजेन जाम्बे। 42डीचनी मंडीके, “चोचका भला डाऊवाकी, कि आम हां, आमका, इनिका दिन समझातिंजेवा कि शांती गा मतलब चोच होय, आमेन शांती गा कोरा घाटाऊवा। 43चोयाकी डी दिन अमा लिंजेन हेजेवा, कि अमा दुश्मनकु मोर्चा टोलटे आमके घेरा कोम्बा, एठा उफुन्भी कोनाटे आमके दबातींजकोम्बा। 44आमके एठा अमा सेंग्गोन चाफ्निकु के जो कासान मिलातींजकोम्बा, एठा आमके घोटा लिंजेन घोटा भी बान आरा, चोयाकी आमनी देटेन मौखा जब अमा लिंजेन ध्यान टे बान चिनाडुका।”

मन्दिर गा सफाई

45मेटे यीशु यरूशलेम गा मंदिर गेन ओलेडो किकीजीमिंकू के बल्लान ओठकु लज्जे। 46एठा दिकुटे मंडीके, “चोखरा ग्रंथन ओल्के होय, इंजा उरा प्रार्थना गा उरा मंडेबा, पेनो आमनी डीचके डाकु कु गा गुफा आरुके होय।” 47एठा देटेन हार दिन यरूशलेम गा मंदिर गेन इथू डा, एठा मुख्यायाजककु एठा मूसा गा नियम इथूमिठाच एठा कुरकू गा खापेटकु डीचके घोगेच गा अवसर घगाटा डा। 48पेनो दिकु तुनिका उपाय बान ओटडुका, कि येटेन तुनिरोंगो डाए, चोयाकी सेबाई कुरकू खाट इच्छाटे दियागा आजोम डा।

Currently Selected:

लूका 19: GOKNT

Highlight

Copy