BILANGEN 23
23
1Nina Bilham man Balak, “Pajekkenlah pitu batar-batar i jenda man bangku, jenari bereken man bangku pitu jenggi lembu ras pitu bajar biri-biri.”
2Minter ibahan Balak bagi si ikataken Bilham man bana, jenari ia ras Bilham erbahan persembahen sada jenggi lembu ras sada bajar biri-biri i bas tep-tep batar-batar. 3Jenari nina Bilham man Balak, “Tedislah i jenda deherken persembahen tutungenndu, janah aku lawes lebe ngenehenca ntah ijumpai TUHAN aku ntah lang. Kuturiken kari man bandu kerina si ipetangkasNa man bangku.” E maka lawes ia sisada ku das sada uruk-uruk, 4jenari ijumpai Dibata ia. Nina Bilham man baNa, “Enggo kupajekken batar-batar si pitu e ras kupersembahken sada jenggi lembu ras sada bajar biri-biri i bas tep-tep batar-batar.”
5Ituriken TUHAN man Bilham kai si man katanken jenari isuruhNa ia mulihken ndahi Balak nehken tenahna e. 6E maka lawes ia mulihken janah idahna Balak tedis denga deherken persembahen tutungenna, ras kerina peminpin-peminpin Moap.
7E maka ibelasken Bilham me nubuat enda,
“Balak raja Moap, enggo maba aku i Siria nari,
i bas deleng-deleng si arah kenjulu nari.
‘Mari, janah ngeranalah kam guna aku,’ nina.
‘Sumpahilah bangsa Israel.’
8Uga ningku numpahisa si la isumpahi Dibata,
ntah pe ngataken, ‘Kernep me kam,’ adi la bage nina TUHAN?
9I das batu si meganjang nari banci kuidah bangsa e,
banci kutatap ia idas uruk-uruk nari.
Ia me kap sada bangsa si nggeluh sada-sada;
itehna maka ia ipasu-pasu lebih asa bangsa si deban.
10Kesusuren Israel nterem desken abu,
lanai terbeligai perban teremna.
Adi mate pagi aku, mate bagi bangsa Dibata min;
mate i bas dame bagi kalak si benar.”
11Kenca bage nina Balak man Bilham, “Kai si enggo ibahanndu man bangku e? Kubaba kam ku jenda gelah isumpahindu musuhku, tapi ipasu-pasundu kepeken ia.”
12Nina Bilham erjabap, “Kai si isuruh TUHAN, e ngenca aku ngasup ngatakenca.”
Nubuat Bilham si peduaken
13Kenca bage nina Balak man Bilham, “Mari ras kita ku ingan si deban. I jenari sada bagin si kitik i bas kalak Israel ngenca banci idahndu. Sumpahilah ia i jenari.” 14Ibabana ia ku mbalmbal Sopim idas Deleng Pisga. I je ipajekkenna pitu batar-batar jenari ipersembahkenna sada jenggi lembu ras sada bajar biri-biri i bas tep-tep batar-batar.
15Nina Bilham man Balak, “Tedislah kam i jenda deherken persembahen tutungenndu, enta kujumpai lebe Dibata i jah.”
16Ijumpai TUHAN me Bilham, iturikenNa man Bilham kai si man katanken, jenari isuruhNa ia mulihken ndahi Balak nehken tenahNa. 17E maka mulih me ia, idapetina Balak tedis denga deherken persembahen tutungenna, ras peminpin-peminpin Moap. Isungkuni Balak minter kai si enggo ikataken TUHAN, 18jenari ibelasken Bilham me nubuat enda,
“Marilah, o Balak anak Sipor,
begikenlah kai si arus kukataken.
19Dibata labo bagi manusia, si perguak;
IA labo manusia si sambar-sambar ukurna.
Kai pe si ipadankenNa, pasti isehkenNa;
ngerana IA, e maka jadi me bagi si ikatakenNa e.
20Aku enggo isuruh masu-masu,
janah adi Dibata si masu-masuna,
la aku ngasup muat pasu-pasu e mulihken.
21Kerna kegeluhen Israel pagin, enggo kuidah genduari nari.
La banci reh man bana keguluten ntah pe kesusahen.
22 TUHAN, Dibatana ras kap ia;
ipebetehkenna kujapa pe maka IA me rajana.
Enggo ibaba Dibata ia ndarat i Mesir nari;
IA jine erperang guna bangsa e desken sada banteng si merawa.
23La lit guna-guna, bage pe kinigurun, si banci ipake guna ngelawan bangsa Israel.
Genduari ikataken kalak kerna Israel,
‘Nehenlah kai si enggo ibahan Dibata!’
24Bangsa Israel desken sada singa si merawa,
la ia medem adi langa kin icaing-caingna ras itelenna,
adi langa iinemna dareh kalak si enggo ibunuhna.”
25Kenca bage ngerana Balak man Bilham, “Adi la kam nggit numpahi bangsa Israel, ola ka ipasu-pasundu!”
26Nina Bilham erjabap, “Ma kin enggo ku kataken man bandu maka arus kulakoken kerina si ikataken TUHAN man bangku?”
Nubuat Bilham si peteluken
27Nina Balak, “Mari ras kita, gelah kubaba kam ku ingan si deban, ntah nggit maun Dibata mere kam numpahi bangsa e guna aku i jenari.” 28E maka ibabaina Bilham ku das Deleng Peor. I jenari teridah gurun pasir. 29Nina Bilham man bana, “Pajekkenlah pitu batar-batar man bangku jenari bereken man bangku pitu jenggi lembu ras pitu bajar biri-biri.” 30Minter ibahan Balak bagi si ikataken man bana. Jenari ipersembahkenna sada jenggi lembu ras sada bajar biri-biri i bas tep-tep batar-batar.
Currently Selected:
BILANGEN 23: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
