BILANGEN 22
22
Bilham itenahken raja Moap
1Iterusken bangsa Israel perdalanenna, jenari erkemah ia i kendit Moap arah Timur Lau Jordan, kepar-kepar Jeriho. 2Asum ibegi raja Moap, e me Balak anak Sipor kai si enggo ibahan bangsa Israel man kalak Amori janah kuga teremna bangsa Israel i je, 3ia ras kerina rayatna mbiar tuhu-tuhu. 4Nina kalak Moap kempak peminpin-peminpin bangsa Midian, “Kalak si bagi perkis teremna e la banci la ncedai kerina sinasa lit i sekelewetta desken sada jenggi lembu nggagati dukut i mbalmbal seh keri.” E maka Raja Balak 5nuruh piga-piga persuruhen ndilo Bilham anak Beor, si ringan i Petor, i tepi Lau Eprat i taneh Amaw. Berita si ibabana i bas Balak nari e me kap, “Kupebetehken man bandu maka sada bangsa enggo reh i Mesir nari; rayatna merap ijapa pe, janah iciatina atena kami. #2Pet 2:15-16; Jud 11 6Teremen ia asa kami, e maka ngarap aku gelah reh kam jenari sumpahilah ia kerina. Adi bage ngasup kami naluken ia ras pelawessa i bas taneh enda nari. Sabap kueteh maka adi ipasu-pasundu kalak, sangap ia, janah adi isumpahindu, kena sumpah ia.”
7E maka ibaba peminpin-peminpin bangsa Moap ras bangsa Midian duit penggalari sumpah e. Lawes ia njumpai Bilham, guna nehken berita i bas Balak nari. 8Nina Bilham man bana, “I jendalah kam erberngi sendah, janah pagi kuturiken man bandu kai si ikataken TUHAN man bangku.” E maka tading peminpin-peminpin bangsa Moap ndai ras Bilham.
9Reh Dibata ndahi Bilham nungkun nina, “Ise kalak si ras kam enda?”
10Erjabap ia nina, “Raja Balak i Moap nari enggo nuruh ia ngatakenca man bangku 11maka sada bangsa si reh i Mesir nari enggo merap i belang-belang taneh e. Atena gelah kusumpahi bangsa e, gelah ngasup ia merang bangsa e ras pelawessa.”
12Nina Dibata man Bilham, “Ola kam lawes ras kalak enda, janah ola isumpahindu bangsa Israel, sabap pasu-pasungKu Kubereken man bana.”
13Pepagina idahi Bilham persuruhen Balak, jenari nina, “Mulihlah ku kutandu; la ibere TUHAN aku lawes ras kam.” 14E maka mulih ia kerina ndahi Balak jenari iturikenna man bana maka Bilham la nggit reh.
15Jenari isuruh Balak peminpin-peminpin si teremen ras si terhagan asa si pemena ndai. 16Lawes ia njumpai Bilham jenari isehkenna berita i bas Balak nari nina, “Ngarap aku gelah ola lit kai pe alangenna maka reh kam ndahi aku! 17La banci la kubereken man bandu upah si mbelin janah kubahan kai pe si ikatakenndu. Ngarap aku maka rehlah kam jenari sumpahi bangsa e guna aku.”
18Tapi erjabap Bilham nina, “Aminna gia ibereken Balak man bangku kerina pirak ntah emas si lit i bas istanana, la banci kusimbak perentah TUHAN, Dibatangku, seh ku bas soal si kitik-kitikna pe. 19Tapi ngarap aku gelah erberngi kam, bagi perbahanen kalak si deban, gelah banci kueteh ntah lit denga ntah lang si deban ate TUHAN si man katankenNa man bangku.”
20I bas berngi e reh Dibata ndahi Bilham, jenari nina, “Adi kalak enda kerina enggo reh mindo gelah kam lawes ras ia, ersikap lah kam berkat, tapi kai si Kukataken e ngenca banci ibahanndu.” 21E maka pepagina ipasang Bilham pelana keledena, jenari berkat ia ras peminpin-peminpin kalak Moap ndai.
Bilham ras keledena
22Tapi merawa Dibata erkite-kiteken ia lawes, janah asum ia i bas perdalanen ngersak keledena, itemani dua kalak suruh-suruhenna, tedis malekat TUHAN i tengah dalan ngambati perdalanenna. 23Asum idah keledena tedis malekat i je njemak pedang, ndarat ia i bas dalan e nari jenari nilah ia ku juma-juma. Ipek-pek Bilham kelede ndai, igerana mulihken ku bas dalan. 24Kenca bage tedis malekat ndai i tengah-tengah dalan si sempit. Arah kawes ras arah kemuhen lit peken anggur si ertembok batu. 25Tupung kelede ngidah malekat ndai, idegeskenna man bana ku tembok batu e, e maka kicat nahe Bilham. Ipekpek Bilham ka kelede ndai. 26Lawes ka sekali nari malekat ndai ku lebe; tedis ia i bas ingan si sempit i ja la lit sitik pe dalan nilah ku kawes ntah ku kemuhen. 27Sekali enda, tupung idah kelede malekat ndai, gempang ia minter. Bene kesabaren Bilham, ipekpekina kelede ndai alu cikenna. 28E maka ibahan TUHAN maka beluh kelede ndai ngerana man Bilham nina, “Kai kin perbahanenku man bandu maka ipekpekndu aku seh telu kali?”
29Erjabap Bilham nina, “Sabap imain-mainkenndu aku! Bicara lit pedang i bas aku, enggo kam kubunuh.”
30Ngaloi ka kelede ndai nina, “Ma kin aku nge kelede si enggo iersakndu kidekah geluhndu? Ope denga si enda pernah kin bagenda perbahanenku man bandu?” “Lang,” nina Bilham.
31Kenca bage ibere TUHAN maka idah Bilham malekat ndai tedis i je njemak pedang; minter ia erjimpuh nembah, ayona seh ku taneh. 32Iorati malekat ndai ia nina, “Engkai maka ipekpekindu keledendu seh telu kali? Kuambati dalanndu sabap la kin patut perdalanenndu enda. 33Idah keledendu aku, e maka nilah ia telu kali. Adi la bage ibahanna, tentu enggo kubunuh kam janah kelede e kupelepas nggeluh.”
34Erjabap Bilham nina, “Enggo erdosa aku. La kueteh maka tedis kepe kam i tengah dalan ngelawan aku; tapi genduari adi salah kin iakapndu aku nerusken perdalanenku enda, banci aku mulih.”
35Tapi nina malekat, “Teruskenlah perdalanenndu ras kalak enda, tapi kai si kusuruh kam ngatakenca e ngenca banci ikatakenndu.” E maka iterusken Bilham perdalanenna ras kalak ndai.
Bilham ialo-alo Raja Balak
36Asum ibegi Balak maka Bilham enggo reh, lawes ia ngalo-ngalosa ku Ar, e me kuta i tepi Lau Arnon i perbalengen Moap. 37Ikataken Balak man bana nina, “Engkai maka la kam reh mbarenda i bas tenahku si pemena man bandu? Ntah iakapndu maka la aku ngasup mereken upah si cukup man bandu?”
38Nina Bilham njabapsa, “Genduari ma enggo aku reh? Tapi genduari lit kin kuasa i bas aku? Kai si isuruh Dibata, e ngenca banci kukataken.” 39E maka lawes me Bilham ras Balak ku kuta Husot. 40I je igeleh Balak lembu ras biri-biri man persembahen, janah iberekenna deba dagingna man Bilham ras peminpin-peminpin si ras ia.
Nubuat Bilham si pemena
41Pepagina ibabai Balak me Bilham ku das Bamot Baal. I jenari banci idah Bilham sada bagin bangsa Israel.
Currently Selected:
BILANGEN 22: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
