ULANGEN 8
8
Banci bandu taneh si mehumur e
1“Ikutkenlah alu tutus kerina undang-undang si kubereken sendah man bandu, gelah banci kam nggeluh, dingen ertambah-tambah beliganndu, janah ngiani negeri si ipadanken TUHAN man nini-ninindu. 2Inget kuga TUHAN Dibatandu mabai kam i bas perdalanen si nggedang mentasi gurun pasir empat puluh tahun dekahna; i je iberekenNa melala kiniseran guna nguji kam, gelah ietehNa ukurndu, ntah iuekenndu perentahNa ntah lang. 3IpelepasNa kam kelihen, e maka iberekenNa manna man panganndu, pangan si langa pernah ipanndu tah ipan nini-ninindu. IlakokenNa e, guna ngajar kam, maka labo pangan ngenca si pegeluhken manusia, tapi manusia nggeluh erdandanken kasakai si ikataken TUHAN. #Mat 4:4; Luk 4:4 4Kidekah empat puluh tahun e, uisndu pe la merigat ras nahendu pe la besar. 5Ingetlah, maka TUHAN Dibatandu ngajarken ras ngukum kam bali ras sekalak bapa ngajarken anak-anakna. 6E maka nggeluhlah rikutken kai si enggo iperentahken TUHAN man bandu: nggeluh lah rikutken undang-undangNa janah mbiar man baNa. 7TUHAN Dibatandu maba kam ku taneh si mehumur, i ja melala ulu lau, lau, ras sumbul si erburak launa i bas baluren ras uruk-uruk. 8Taneh si mereken ulih gandum, jelai, buah anggur, buah ara, buah ndalima, saitun ras tengguli. 9I jah la banci kam kelihen, la banci kam kurang kai pe. Batu-batuna isin biji besi, i bas uruk-urukna banci ibuatndu tembaga. 10Idatndu kai atendu ipanndu. Erkiteken si e ngataken bujur me kam man TUHAN Dibatandu, kerna taneh si mehumur si iberekenNa man bandu.”
Pertenget gelah ola ngelupaken TUHAN
11“Jaga, maka ola ilupakenndu TUHAN Dibatandu. Ola silahken sada pe undang-undangNa si kubereken man bandu wari enda. #Hos 13:5-6 12Adi enggo idatndu kerina kai atendu si ipanndu, janah enggo ipajekkenndu rumah si mejile man inganndu, 13bage pe enggo ertambah-tambah lembu ras biri-birindu, emas ras pirakndu ras kerina erta-ertandu si deban, 14jaga maka ola meganjang ukurndu, jenari ilupakenndu TUHAN Dibatandu si enggo mulahi kam i Mesir nari sanga kam jadi budak mbarenda. 15Ibabaina kam mentasi gurun pasir si mbelang si dem kebiaren i ja melala nipe si erbisa ras kacip gelang. I bas taneh kerah si la lit lau e, ibahanNa lau erburak i bas batu nari man bandu.
16I bas gurun pasir e, iberekenNa manna man panganndu e me pangan si langa pernah ipan nini-ninindu pe. IberekenNa kiniseran lako nguji kam, gelah dungna banci ipasu-pasuNa kam alu kai-kai si mehuli. 17Erkiteken si e, ndigan pe ola kam rukur maka kinibayakenndu e, e me erkiteken kuasa ras gegehndu jine. 18Ingetlah maka TUHAN Dibatandu nge si mereken gegeh man bandu erbahanca kam bayak. Si enda ibahanNa sabap seh wari enda IA tetap setia nandangi perpadanen si ibahanNa man nini-ninindu. 19Ola kam lupa man TUHAN Dibatandu. Ola kam nilah jenari ersembah janah jadi suruh-suruhen dibata-dibata si deban. Adi bage, kupersingeti kam genduari, maka pasti kam ikernepkenNa. 20Adi la kam ngikutken TUHAN la banci lang ikernepkenNa kam, bali ras bangsa-bangsa si nandangi ikernepkenNa i lebe-lebendu.”
Currently Selected:
ULANGEN 8: BTX
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.