1 RAJA-RAJA 2
2
Perentah Daud si perpudina man Salomo
1Asum Daud nandangi mate idilona anakna Salomo, jenari iberekenna man bana kata ajar si perpudi nina, 2“Genduari seh me paksana aku mate. Teklah janah tetaplah ukurndu. 3Bahanlah kai si isuruh TUHAN Dibatandu man bandu. Ikutkenlah kerina undang-undangNa ras pedahNa, bagi si tersurat i bas Undang-undang Musa, gelah kujapa pe kam lawes sangap kam i bas kerina si idahikenndu. 4Adi ikutkenndu kataNa, la banci lang isehken TUHAN padan si ibahanNa asum ikatakenNa man bangku maka kesusurenku tetap ngerajai Israel adi alu tutus ate ikutkenna pedah Dibata asa ukur ras gegehna lit.
5Tambah si e lit denga tole. Inget kai si ibahan Joap man bangku alu munuh dua kalak puanglima tentera Israel, Apner anak Ner, ras Amasa anak Jeter. Inget kuga ia duana ibunuhna asum musim dame, guna nehken elem-elem atena kerna kematen si ibahan Apner ras Amasa asum musim perang. Ibunuh Joap kalak si la ersalah janah genduari aku terpaksa mersan tanggung jawab ras akibat perbahanenna e. #2Sam 3:27; 20:10 6Itehndu kai arus ibahan man bana; la banci ipelepasndu ia nggeluh cawir metua.
7Tapi cidahkenlah perkuah atendu man anak-anak Barsilai i Gileat nari janah pekena-kenalah ia kerina, erkite-kiteken mehuli ia man bangku asum aku lompat erkite-kiteken seninandu Absalom. #2Sam 17:27-29
8Bage ka pe kerna Simei anak Gera anak kuta Bahurim i daerah Benyamin. Isumpahina aku alu mesangat asum aku lawes ku Mahanaim tapi arah pudi asum ijumpaina aku i Lau Jordan, erpadan aku man bana i bas gelar TUHAN maka la ia kubunuh. #2Sam 16:5-13; 19:16-23 9Tapi kam la banci la ngukum ia. Itehndu kai arus ibahan man bana, janah la banci la ibunuhndu ia.”
Kematen Daud
10Kenca bage mate Daud janah ikuburken ia i Kuta Daud. 11Dekahna ia jadi raja i taneh Israel empat puluh tahun, i Hebron pitu tahun janah i Jerusalem telu puluh telu tahun. #2Sam 5:4-5; 1Kro 3:4 12Salomo nggantiken bapana Daud jadi raja, janah kinirajanna pajek nteguh. #1Kro 29:23
Kematen Adonia
13I bas sada wari Adonia, (nandena Hagit gelarna), lawes ndahi Batseba nande Salomo. Isungkun Batseba ia nina, “Ma erkite-kiteken tedeh ate nge kerehenndu enda?”
“Ue,” nina Adonia ngaloi, 14janah kenca e itambahina, “Lit sitik pemindonku man bandu.”
“Kai kin e?” nina nungkun.
15Erjabap Adonia nina, “Itehndu maka aturna aku enggo jadi raja janah kerina kalak i Israel ngarapken si e. Tapi la bage jadina, janah seninangku enggo jadi raja, e me peraten TUHAN. 16Janah genduari lit sada pemindonku; ngarap aku maka ola itulakndu aku.”
17“Kai kin e?” nina Batseba nungkun.
Ngaloi Adonia, “Pindo min man Raja Salomo, sabap kueteh labo ia nggit nulak kam, gelah iberekenna man bangku Abisah, singuda-nguda i Sunem nari jadi ndeharangku.” #1Raj 1:3-4
18“Mehuli,” nina Batseba ngaloi. “Aku ncakapkenca man raja kerna pemindonndu e.”
19E maka lawes Batseba ndahi raja guna ercakap ras ia i bas gelar Adonia. Tedis raja ngalo-ngalosa jenari mungkuk ia man nandena. Kenca bage kundul ia i bas kursi kinirajanna janah isuruhna gelah ibaba sada nari kursi ku bas man ingan nandena kundul arah kemuhenna. 20Nina man raja, “Lit sitik pemindonku man bandu, ngarap aku maka ola min itulakndu.”
“Kai kin e, nande?” nina nungkun. “Labo kutulak.”
21Nina ngaloi, “Berelah seninandu Adonia gelah ibuatna Abisah man ndeharana.”
22“Engkai maka ipindondu man bangku gelah kubereken Abisah man bana?” nina raja nungkun. “Banci jadi kursi kinirajan enda pe ipindondu kang kari gelah ibereken man bana. Lang kin pe, ia nge kap seninangku si tuan asa aku janah Imam Abiatar ras Joap duana mihak ia!” 23Jenari ersumpah Salomo i bas gelar TUHAN, “Dibatalah si munuh aku adi la kari kupaksa Adonia nebusi pemindonna enda alu kesahna jine! 24TUHAN enggo netapken aku alu nteguh i bas kursi kinirajan bapangku Daud; enggo isehkenNa padanNa janah iberekenNa kerajan enda man bangku ras man kesusurenku. Ersumpah aku erkite-kiteken TUHAN si nggeluh maka Adonia la banci la mate i bas wari enda!”
25E maka ibereken Raja Salomo perentah man Benaya. Lawes minter Benaya ndarat jenari ibunuhna Adonia.
Abiatar ipelawes; Joap mate
26Kenca bage nina Raja Salomo man Imam Abiatar, “Laweslah ku kutandu jine, i Anatot. Situhuna patut kam mate, tapi la ateku nuruhsa gelah kam ibunuh genduari, sabap kam nai si ngurus Peti Perpadanen TUHAN sanga kam ras bapangku Daud, janah ras-ras kam ngenanami kiniseranna.” #1Sam 22:20-23; 2Sam 15:24 27Jenari ipengadi Salomo Abiatar ndahiken dahin-dahin imam TUHAN, janah arah si e isehkenna kai si enggo ikataken TUHAN i Silo kerna Imam Eli ras kerina kesusurenna. #1Sam 2:27-36 28Ibegi Joap kai si enggo jadi. (Enggo ikapitina Adonia, tapi Absalom lang.) E maka lompat ia ku bas Kemah Perjumpan jenari ijemakna tanduk batar-batar. 29Kenca seh berita man Raja Salomo maka Joap enggo lompat ku bas Kemah e janah sanga deher batar-batar, isuruh Salomo sekalak persuruhen ndahi Joap guna nungkuni ngkai maka ia lompat ku batar-batar. Erjabap Joap maka ia lompat ndahi TUHAN erkite-kiteken mbiar ia man Salomo. E maka isuruh Raja Salomo Benaya munuh Joap. 30Lawes ia ku Kemah Perjumpan jenari nina man Joap, “Iperentahken raja man bandu gelah kam ndarat.”
“Lang,” nina Joap ngaloi. “I jenda me aku mate.”
Lawes Benaya mulihken ndahi raja jenari iturikenna man bana kai si enggo ikataken Joap.
31“Bahanlah kai si ikataken Joap,” nina Salomo ngaloi. “Bunuh ia jenari kuburken. Kenca bage aku ntah ise i bas kesusuren Daud nari lanai ertanggung jawab kerna kai si enggo ibahan Joap asum ibunuhna kalak si la ersalah. 32TUHAN la banci lang ngukum Joap erkite-kiteken ia enggo munuh, si ilakokenna alu la betehen bapangku Daud. Ibunuh Joap dua kalak jelma si ulin asa ia: Abner, puanglima tentera Israel, ras Amasa, puanglima tentera Juda. 33Ukumen kerna pembunuhen puanglima si dua e la banci la idabuhken man Joap ras man kerina kesusurenna seh rasa lalap. Tapi la banci la ibereken TUHAN kesangapen man kerina kesusuren Daud si ngkunduli kursi kinirajanna.”
34E maka lawes Benaya ku Kemah Perjumpan munuh Joap, jenari ikuburkenna i tengah mbalmbal i bas kutana. 35Raja ngangkat Benaya jadi puanglima tentera nggantiken Joap janah itamakenna Imam Sadok nggantiken Abiatar.
Kematen Simei
36Kenca bage isuruh raja ngelegi Simei janah nina man bana, “Pajekkenlah rumahndu i Jerusalem enda. I je lah kam ringan, janah ola tadingken kuta. 37Adi sempat itadingkenndu ingan enda janah ikeparindu Lau Kidron, la banci la mate kam, janah salahndu jine nge e.”
38“Mehuli Raja,” nina Simei ngaloi. “Banci kubahan bagi si ikatakenndu.” E maka ndekah ia ringan i Jerusalem.
39Tapi telu tahun kenca si e, dua kalak budak Simei kiam nadingken tuanna, jenari idahina raja Gat, e me Akis anak Maaka. Kenca ibegi Simei duana ia enggo i Gat, 40ipasangna pelana keledena jenari lawes ia ndahi Raja Akis ku Gat, ndarami budak-budakna e. Kenca idatsa ibabana mulih. 41Kenca ibegi Salomo kai si enggo ibahan Simei, 42isuruhna ngelegi ia jenari nina, “Enggo kusuruh kam erpadan i bas gelar TUHAN maka la itadingkenndu Jerusalem. Janah enggo kupersingeti man bandu maka adi itadingkenndu Jerusalem, la banci la mate kam. Ma enggo isetujuindu e janah ikatakenndu maka atendu ngikutken katangku? 43Dage, ngkai maka ilanggarndu padanndu janah la kam patuh man perentahku? 44Tangkas ietehndu kerina kesalahen si ibahanndu man bapangku Daud. La banci la iukum TUHAN kam kerna si e. 45Tapi la banci la ipasu-pasuNa aku janah ipetetapNa kerajan Daud seh rasa lalap.”
46Jenari ibereken raja perentah man Benaya munuh Simei. Minter lawes Benaya ndarat munuh Simei. Genduari kerina kuasa enggo ijemak Salomo i bas tanna.
Currently Selected:
1 RAJA-RAJA 2: BTX
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.