1 RAJA-RAJA 16
16
1E maka ngerana TUHAN man Nabi Jehu, anak Hanani; itenahkenNa berita enda man Baasa arah ia nina, 2“Mbarenda labo lit kai pe ergandu, tapi enggo Kuangkat kam jadi peminpin bangsangKu Israel. Genduari kam enggo erdosa bali ras Jerobeam, janah enggo ibabaindu bangsangKu erdosa. Dosana erbahan keke rawangKu, 3e maka Kulesapken me kam ras keluargandu, bali ras si enggo Kubahan man Jerobeam. 4Kerina keluargandu si mate i bas kuta, ipan biang janah si mate i mbalmbal ipan kuliki.”
5Kerina si debanna si ilakoken Baasa ras kerina perbahanenna si nuduhken kinimbisanna isuratken i bas Sejarah Raja-raja Israel. 6Mate Baasa, janah ikuburken i Tirsa; e maka Ela, anakna jadi raja nggantiken ia.
7Berita pernembeh ate TUHAN man Baasa ras keluargana e ipeseh Nabi Jehu, sabap melala ibahan Baasa dosana man TUHAN. Ipekekena rawa TUHAN, labo saja erkiteken kejahaten si ibahanna, si bali ras kejahaten Raja Jerobeam, tapi pe erkiteken ibunuhna keluarga Jerobeam.
Ela raja Israel
8Ela anak Baasa jadi raja Israel i bas tahun si pedua puluh enemken pemerentahen Asa raja Juda. Lit dua tahun dekahna Ela ngerajai Israel i Tirsa nari. 9Simri pegawai Ela jadi puanglima setengah gereta perang raja, erpekat ngelawan ia. I bas sada wari i Tirsa, Ela mabuk i rumah Arsa; ia me si ertugas ngurus istana raja. 10Ibengketi Simri rumah e ibunuhna Ela, jenari igantikenna ia jadi raja. Si enda jadi i bas tahun si pedua puluh pituken pemerentahen Asa raja Juda.
11Kenca Simri jadi raja, minter ibunuhina kerina keluarga Baasa. Kerina kade-kade ras teman-temanna si dilaki pe ibunuh. 12Dage sue ras si enggo ikataken TUHAN arah Nabi Jehu kerna Baasa, ibunuh Simri kerina keluarga Baasa. 13Erkiteken isembahna berhala ibabaina Israel erdosa, Baasa ras Ela pekeke rawa TUHAN, Dibata bangsa Israel. 14Kerina si debanna si ilakoken Ela isuratken i bas Sejarah Raja-raja Israel.
Simri raja Israel
15Simri jadi raja Israel i Tirsa pitu wari dekahna i bas tahun si pedua puluh pituken pemerentahen Asa raja Juda. Tentera kalak Israel sangana ngepung kuta Gibeton i taneh Pilisti. 16Kenca ibegi tentera Israel maka Simri enggo erpekat ngelawan raja janah enggo ibunuhna pe raja e, minter imomoken tentera e pengangkaten puanglimana Omri, jadi raja Israel. 17Lawes Omri ras tenterana i Gibeton nari, jenari ikepungna kuta Tirsa. 18Kenca idah Simri kuta e enggo irebut musuh, lawes ia ku bas benteng si arah basna kal i bas istana, icilukna istana e, janah ia jine mate ipan api e. 19Si enda jadi erkiteken dosa-dosana man TUHAN. Bali ras Jerobeam si jadi raja ope denga ia, Simri pe nembeh ate TUHAN erkiteken dosa-dosana ibabaina Israel erdosa. 20Kerina si debanna si ilakoken Simri bage pe turi-turin kerna penghianatenna, isuratken i bas Sejarah Raja-raja Israel.
Omri raja Israel
21Kenca bage bangsa Israel erbelah-belah. Deba atena ngangkat Tipni anak Ginat jadi raja, deba nari Omri atena jadi raja. 22Dungna menang kalak si erpihak man Omri, mate Tipni, e maka Omri jadi raja. 23Dage kenca telu puluh sada tahun Asa jadi raja Juda, Omri jadi raja i Israel. Dekahna ia jadi raja lit sepuluh dua tahun; i bas si e enem tahun ia merentah i Tirsa nari. 24Kenca bage itukurna uruk Samaria i bas Semer nari enem ribu duit pirak. Ipajekken Omri benteng uruk e, jenari ipantekina sada kuta i je, janah ibahanna gelar kuta e Samaria, rikutken gelar empu uruk e ndube, e me Semer.
25Omri erdosa man TUHAN lebih asangken kerina si enggo leben jadi raja asa ia. 26Bali ras Jerobeam ipekekena rawa TUHAN, Dibata Israel, alu dosa-dosana dingen mabai bangsa e erdosa ras ersembah man berhala-berhala. 27Kerina si debanna si ibahan Omri ras kerina kinimbisanna isuratken i bas kitap Sejarah Raja-raja Israel. 28Mate Omri, jenari ikuburken i Samaria, janah anakna Ahap nggantiken ia jadi raja.
Ahap raja Israel
29Kenca Raja Asa menam genep telu puluh waluh tahun jadi raja Juda, Ahap anak Omri jadi raja Israel. Ia jadi raja Israel i Samaria dua puluh dua tahun dekahna. 30Erdosa ia man TUHAN lebih asa kerina raja-raja si leben asa ia. 31La iakapna cukup dosana bagi dosa Raja Jerobeam saja, e maka iempoina Isebel, anak Raja Etbaal i Sidon nari, jenari isembahna Baal. 32Ipajekkenna rumah sembah-sembahen man Baal i Samaria, ibahanna batar-batar, jenari itamakenna ku bas rumah sembah-sembahen e. 33Ibahanna pe gana-gana Dewi Asera. Tuhu buen perbahanenna si erbahanca nembeh ate TUHAN, Dibata Israel asangken kerina raja-raja Israel si leben asa ia.
34I bas masa pemerentahenna, Hiel anak kuta Betel majekken Jeriho ka mulihken. Sue ras si enggo leben ikataken TUHAN arah Josua anak Nun, Hiel kebenen kesah anakna sintua Abiram asum ipajekkenna palas kuta Jeriho, janah kebenen kesah anakna singuda Segup asum ipajekkenna pintu gerbang kuta e. #Jos 6:26
Currently Selected:
1 RAJA-RAJA 16: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
