1 RAJA-RAJA 17
17
Elia isampati TUHAN sanga perlego
1Lit sekalak nabi, Elia gelarna, asalna i Tisbe nari i daerah Gileat. Nina man Raja Ahap, “I bas gelar TUHAN, Dibata si nggeluh, Dibata Israel si kusembah, kukataken man bandu maka i bas dua ntah telu tahun si reh la lit embun ntah udan ndabuh, pala kusuruh.” #Jak 5:17
2Kenca bage nina TUHAN man Elia, 3“Tadingken ingan enda, to ku kenjulu cebunilah i tepi Lau Kerit, arah Timur Jordan. 4Lau e pagi man inemenndu, janah enggo Kuperentahken piga-piga kak naruhken nakanndu ku je.”
5Patuh Elia man perentah TUHAN, e maka lawes ia, jenari tading i tepi Lau Kerit. 6Lau e jadi inemenna, janah tep-tep erpagi-pagi ras karaben rehen kak maba roti ras daging man bana. 7La ndekahsa kerah me lau belin ndai sabap la lit udan ndabuh.
Elia nampati diberu balu-balu
8Kenca bage nina TUHAN kempak Elia, 9“To ku kuta Sarpat, deherken Sidon, tadinglah i jah. Enggo Kuperentahken sekalak diberu balu-balu si ringan i jah mere kam man.” #Luk 4:25-26 10E maka berkat Elia ku Sarpat. Kenca ia seh i gerbang kuta idahna sekalak diberu balu-balu sangana muat ranting. Iperkuanken Elia nina, “Enta sitik lau maka aku minem.” 11Muatna lawes ngelegisa ilebuhken Elia ia, “Baba pe sitik roti man bangku.”
12Ngaloi diberu e, “I bas gelar TUHAN Dibatandu si nggeluh tuhu kukataken man bandu maka la lit roti i bas aku, seakatan sengkerauk tepung tare mangkuk ras sitik minak tare botol. Enda kupepulung sitik ranting man babanku mulih ku rumah gelah banci kutasakken pangan si sitik e man bangku ras man anakku. E me pengkeri-kerinna kami man, janah kenca e mate la man me kami.”
13“Ola kam mbiar,” nina Elia. “Banci isikapkenndu panganndu, tapi ope denga si e bahan lebe roti si kitik, jenari baba man bangku. Kenca bage ibana banci itasakkenndu man panganndu ras anakndu. 14Sabap bage nina TUHAN, Dibata Israel, ‘Tepung bas mangkuk la keri-keri, minak bas botol pe la kurang-kurang seh Kupesusur udan ku taneh enda,’ bage nina TUHAN.”
15Lawes diberu balu-balu e ilakokenna bagi si ikataken Elia e maka cukup pangan kalak e guna paksa si ndekah sitik. 16Sue ras si enggo ikataken TUHAN arah Elia, tepung si i bas mangkuk la keri-keri janah minak si i bas botol e la kurang-kurang.
17La asa kai nari dekahna kenca si e, sakit anak diberu balu-balu ndai. Reh dekahna reh kelekna kedungenna mate. 18Nina diberu e man Elia, “O suruh-suruhen Dibata, ngkai maka bage perbahanndu man bangku? Kerehenndu ku jenda erbahanca inget Dibata ka mulihken dosa-dosangku, erkiteken si e mate anakku.”
19“Enta anakndu ena,” nina Elia. Ibuat Elia anak e i bas ampun nandena nari, iangkipna ku kamar si inganina i das loteng ipepedemna i bas ingan medem. 20Kenca bage ertoto ia alu sora megang nina, “O TUHAN Dibatangku ngkai maka iberekenNdu kiniseran si mberat man diberu balu-balu enda? Bage kal ulina perbahanna man bangku, tapi ibunuhNdu ka anakna!” 21Kenca bage iamparkenna bana telu kali i babo anak e ertoto ia, “O TUHAN Dibatangku pegeluhlah mulihken anak enda!” #2Raj 4:34-35 22Ibegiken TUHAN pertoton Elia, e maka mulai anak ndai erkesah janah nggeluh mulihi.
23Itegu Elia mulihken anak ndai ku teruh, iberekenna man nandena nina, “Nehenlah, anakndu nggeluh!”
24Ngaloi nandena, “Genduari kueteh kam suruh-suruhen Dibata, janah tuhu-tuhu TUHAN ngerana arah kam!”
Currently Selected:
1 RAJA-RAJA 17: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
