Jesaja 1
1
Visioen van Jesaja
1 Die visioen van Jesaja, seun van Amos, wat hy gesien het aangaande Juda en Jerusalem in die dae van Ussia, Jotam, Agas en Hiskia, konings van Juda.
2Luister, hemel,
en gee aandag, aarde,
want die Here praat:
“Kinders het Ek grootgemaak en opgevoed,
maar hulle het teen My
in verset gekom.
3 'n Bees ken sy eienaar
en 'n donkie die krip van sy besitter.
Israel het egter nie kennis nie,
my volk toon geen insig nie.”
4 Wee 'n sondige nasie,
'n volk swaar belaai
met sondeskuld,
'n geslag kwaaddoeners,
kinders wat hulle wangedra!
Hulle het die Here verlaat,
die Heilige van Israel verag,
Hom die rug toegekeer.
5 Waarom wil julle
nog geslaan word,
en hou julle vol
met julle onversetlikheid?
Elke kop is siek,
elke hart is swak.
6 Van die voetsool tot die kop
is daar nie 'n gesonde plek nie,
net hale en kneusplekke
en oop wonde.
Dit is nie gedreineer nie,
of verbind of versorg met olie nie.
7 Julle land is 'n woesteny;
julle stede is met vuur verbrand.
Julle landerye – voor julle oë
verteer vreemdes dit;
ja, dit is 'n woesteny,
asof vreemdes dit verwoes het.
8 Die dogter van Sion het oorgebly
soos 'n takskerm in 'n wingerd,
soos 'n oornagskerm
in 'n lappie komkommers,
soos 'n beleërde stad.
9 As die Here, Heerser oor alle magte,
nie vir ons 'n klein oorblyfsel
agtergelaat het nie –
soos Sodom sou ons geword het,
aan Gomorra sou ons
gelyk gewees het.
10 Luister na die woord van die Here,
•gesagvoerders van Sodom!
Gee aandag aan die wet van ons God,
mense van Gomorra!
11“Wat baat julle magdom
slagoffers My?”
vra die Here.
“Ek het genoeg gehad
van die •brandoffers van ramme
en die vet van gevoerde diere.
Die bloed van bulle,
lammers en bokramme
staan My nie aan nie.
12Wanneer julle kom
om voor My te verskyn –
wie eis dit van julle
om my voorhowe te vertrap?
13Hou op om waardelose
•graanoffers aan te dra!
Reukwerk – afstootlik is dit vir My.
Nuwemaansfeeste en Sabbatte,
die saamroep van byeenkomste –
Ek kan nie onreg én gewyde rusdae
verdra nie.
14Julle nuwemane en vaste feestye
haat Ek met my hele wese;
dit is vir My 'n las,
Ek is moeg daarvoor om dit te dra.
15 As julle julle hande uitstrek,
sluit Ek my oë vir julle.
Selfs as julle baie bid,
luister Ek nie.
Julle hande is vol bloed.
16Was julle! Reinig julle!
Verwyder julle bose dade voor my oë!
Hou op om kwaad te doen!
17 Leer om goed te doen!
Bevorder die reg!
Lê die onderdrukker aan bande!
Handhaaf die reg van die vaderloses!
Verdedig die weduwees se regsake!
18 “Kom tog,
laat ons die saak uitpraat!”
sê die Here.
“Al is julle sondes rooi soos karmosyn,
dit sal wit word soos sneeu;
al is dit rooi soos skarlaken,
soos wol sal dit word.
19 As julle gewillig is en luister –
die goeie van die land
sal julle geniet.
20Maar as julle weier en opstandig is –
deur die swaard
sal julle verteer word.”
Ja, die mond van die Here
het gespreek.
21 Helaas, sy het 'n prostituut geword,
die getroue stad!
Sy was gevul met die reg;
geregtigheid het in haar oornag,
maar nou net moordenaars.
22 Jou silwer het metaalskuim geword,
jou koringbier is met water verdun.
23 Jou •hoë amptenare is koppig
en span met diewe saam.
Hulle almal is lief vir omkoopgeld
en jaag belonings na.
Vaderloses se reg handhaaf hulle nie,
en weduwees se regsake
dien nie voor hulle nie.
24Daarom is dit die uitspraak
van die Here, die Heer,
Heerser oor alle magte,
die Magtige van Israel:
“Wee hulle!
Ek gaan voldoening ervaar
oor my teenstanders;
Ek gaan My wreek op my vyande.
25 Ek sal my hand teen jou draai,
jou metaalskuim uitsmelt
soos met potas,
al jou onsuiwerhede verwyder.
26 Ek sal jou regters tot inkeer
bring soos dit voorheen was,
en ook jou raadgewers
soos dit aan die begin was.
Daarna sal jy genoem word:
Stad van Geregtigheid,
Getroue Vesting.”
27Sion sal net deur reg
vrygekoop word,
en dié van haar wat terugkeer,
deur geregtigheid.
28 Sowel oortreders as sondaars
sal verpletter word;
wie die Here verlaat,
sal omkom.
29Ja, hulle sal beskaamd staan
oor die terebintbome
wat julle so begeer.
Julle sal verleë wees oor die tuine
waaroor julle so gaande is.
30Ja, julle sal wees soos 'n terebintboom
waarvan die blare verwelk,
soos 'n tuin wat geen water kry nie.
31Die sterke sal vlasvesel word,
en sy dade 'n vonk.
Beide sal saam verbrand,
terwyl niemand dit kan blus nie.
Currently Selected:
Jesaja 1: AFR20
Highlight
Share
Copy
Want to have your highlights saved across all your devices? Sign up or sign in
Bybel in Afrikaans 2020-vertaling © Bybelgenootskap van Suid-Afrika 2020. Digitale Weergawe © Bybelgenootskap van Suid-Afrika 2020. Alle regte voorbehou. www.biblesa.co.za.
Bybel in Afrikaans 2020-vertaling met Deuterokanonieke Boeke © Bybelgenootskap van Suid-Afrika 2020. Digitale Weergawe © Bybelgenootskap van Suid-Afrika 2020. Alle regte voorbehou. www.biblesa.co.za.
