มท 2

ลอง เฆ ดูอี มึห อางยาน ตัห กรึบ เฌา เยซู

1เฌา เยซู แฮะ ฆึอด แคง มืง เบดแลม อี กอย แคง อืง ยูดา. ดอ อัน ตี อึณ มึห คูนดีคัม อาเฮโรด ตึอน. อัน อึบ แคง อืง ตี. อึณ บอ มึห ดูอี อี มึห อางยาน. เฆ ตัห นา เลห ซีแง, วี ฌัม แคง มืง เยรูซาแลม ตึอน. 2เฆ ดีหมอด อี เฮา ต็อห, “เหมา โดง กอย ฆอน อี แฮะ ตัห ฆึอด แบน คูนดีคัม ดูอี อายูดา? เย แฮะ ยึร ซีมัณ แฮะ เลห นา เลห ซีแง อี บยัะ ลอง อัน. ปัน ตี เย แฮะ ตัห ดี นี, แตห เย ปึอน ดี กรึบ อัน.”

3คูนดีคัม อาเฮโรด ตึอน บอ ยึร ลอง อัน ตี, อึณ แบน ดูก ตาง ดี น็อห อัน. บอ ดูอี ดอน อี แคง มืง เยรูซาแลม แฮะ แบน น็อห อาว ดาคึย. 4ปัน ตี อัน วี แดะ เฆ ดา ตาง อี แยต เฆ ดูอี อี หลู ดี เฌาพรา บอ เฆ ดา ซารา อี มาโนว ดารา ยูดา, แตห เฆ บอกาเฆลียด ตัห กาฌูะ โดง กอย อัน. แฮะ ฮอต, อัน วี ดีหมอด เฆ ลอง ดูอี ปี ร็อห ปี ตึย เฌาพรา อี ดี ตัห คยอด ดูอี, นา เหมา อัน ดี ฆึอด. 5เฆ วี ต็อห, “อัน ดี ฆึอด แคง มืง เบดแลม, อี กอย แคง อืง ยูดา.” โคว, แคง บับ เฌาพรา ดูอี อี บยาน โฆรห เฌาพรา แฮะ ดึอม แดม อูน ปาย นี. อึณ ต็อห,

6“แม มืง เบดแลม, แม กอย แคง อืง ยูดา. กาแต มืง อี กอย แคง อืง ยูดา, อาเร แม แฮะ ตาง. โคว, แคง มืง แม อึณ ดี มึห ดูอี อี ดี แบน ดา กาณา อี อึบ ดูอี อาโมยว อีซาเรลัะ. อัน ยี ดี ปี ดูอี อี เฮียง มาบู.”

7วาย อัน ตี อาเฮโรด ตึอน วี แดะ เฆ ดูอี อี มึห อางยาน, แตห เฆ ตัห โดง กอย อัน, แกวะ แตห อี ยึร. อัน วี ดีหมอด เฆ, แตห อัน นับ ซีคยา, ดอ เหมา เฆ แฮะ ยึร ซีมัณ ตึอน. 8อัน วี ตึย เฆ ฮาว มืง เบดแลม วี ดัม เฆ ต็อห, “แตห เบ ฮาว เหรต ซีคยา ฆอน ตี. เบ ฮี ยึร อัน, แตห เบ วี ตัห โดง กอย โอว, วี กาลาง ดี โอว, แตห บอ โอว ปึอน ดี ฮาว กรึบ อัน.”

9เฆ แฮะ ฮอต โทม โฆรห คูนดีคัม อาเฮโรด ตึอน, เฆ วี เลห ฮาว โดง กอย อัน. ดอ ฮาว เฆ โดบ อึณเตณ, ซีมัณ ปี ดึอม ยึร เฆ นา เลห ซีแง ตึอน, อัน วี แยต ดี อาต เฆ, แตห เฆ กอ ฌัม โดง กอย ฆอน ตึอน. เฆ แฮะ ฮอต ฌัม โดง ตึอน, ซีมัณ วี ฆืด นา แดง โดง กอย ฆอน ตี. 10เฆ บอ ยึร ซีมัณ ตึอน, น็อห เฆ บอ โคย กาเซา. 11เฆ วี ลึบ แคง กาง, วี ยึร บอ ฆอน บอ มา อัน, อี จืร นาง มารี. เฆ วี ฆึบ กรึบ ฆอน ตี. แฮะ ฮอต, เฆ บอ ดึห โกรวกราม เฆ, วี ดัว ดี อัน, แตห อึณ แบน ลักซอง. ลักซอง ปี ดัว เฆ ตี, อึณ มูห ครีว บอ กาณัน เลโบน บอ เดา มอรา. 12ดอ อีด เฆ, เฆ วี อึณบาว ลอง เฌาพรา จัร เฆ, แกวะ แตห เฆ วี เวณ โดง กอย อาเฮโรด. โคว, เฆ วี เวณ มืง เฆ, วี ฮาว โดบ อึณเตณ ปอ อู ณ็อง.

13เฆ ดา อี มึห อางยาน ตึอน แฮะ ฮอต ฮาว, อึณ มึห อามู อามาด เฌาพรา อู กาดัง วี ตัห กาปลูห ดี อาโยวแซบ ดอ อึณบาว อัน. อัน ต็อห, “อาเฮโรด ดี ตัห เหรต ดี ง็อห แวน ฆอน แม. โคว, แม โลว ยีต, ดึห บอ ฆอน บอ มา อัน, แตห เบ เตา ฮาว มืง แอฆึบ, แตห เบ กอย แคง มืง ตี, แตห กอ ฌัม อาคราว ดี วี กาลาง โอว ดี แม.”

14แคง หมึร ตี อาโยวแซบ บอ ยีต, วี ดึห ฆอน อัน ฆาย อีบึณ อัน, วี เตา ฮาว ฌัม มืง แอฆึบ. 15เฆ วี กอย แคง มืง แอฆึบ, แตห อาเฮโรด กอ ยัม. ปาย ตี อึณ แฮะ แบน ปี ดึอม กาลาง เฌาพรา. อัน แฮะ ดึอม จัร ดูอี อี บยาน โฆรห เฌาพรา แตห อัน แดม อูน, “โอว แฮะ แดะ ฆอน อีมาย โอว, แตห อัน เลห ตัะ มืง แอฆึบ.”

16อึณ ยี มูห คูนดีคัม อาเฮโรด ตึอน, อัน บอ นับ, เฆ ดา อี มึห อางยาน ตึอน แฮะ ปีหล็อก ดี อัน, อัน บอ รู กาเซา. อัน วี จัร ดา ซึก อัน, แตห เฆ ฮาว มืง เบดแลม บอ เรา เตต เรา ตัะ, แตห เฆ ง็อห แวน โตต ฆอน อีมาย ซีณ อาซาก อา ซีนัม โลง นา ครึม. อัน จัร เฆ โบง ปาย ตี โกบ ตีห อัน อาคราว ปี ดึอม กาลาง เฆ ดูอี อี มึห อางยาน ตึอน ดี อัน. 17ปาย ตี อึณ แฮะ แบน ปี ดึอม ต็อห ดูอี อี บยาน โฆรห เฌาพรา อี จืร อาเยเรมี. อัน แฮะ ดึอม ต็อห,

18“แคง มืง รามา อึณ ปึอน ยึร อี ยาม ตาง. เฆ บอ ยาม บอ กลึร กาเซา. อึณ มูห นาง ราเอน, อี ยาม โกบ แฮะ ยัม ฆอน อัน. อัน ตู แตห อาเซ แบน ฆึก อัน, เหลา น็อห อัน. อัน กลึร โกบ ตู มึห อัน ฆอน.”

ลอง เฌา เยซู บอ ฆูณ มา อัน วี เวณ มืง นาซาเรต

19คูนดีคัม อาเฮโรด ตึอน แฮะ ฮอต ยัม, อามู อามาด เฌาพรา อู กาดัง วี กาปลูห ดี อาโยวแซบ ดอ กอย อัน แคง มืง แอฆึบ. อัน วี ตัห กาลาง โฆรห ดี อาโยวแซบ ดอ อีด อึณบาว อัน. 20อัน ต็อห, “แตห แม ยีต, แตห แม ดึห บอ ฆอน บอ มา อัน, วี เวณ มืง อีซาเรลัะ. เฆ ดูอี อี ซี ง็อห ฆอน แม, เฆ แฮะ ฮอต ยัม.”

21ปัน ตี อาโยวแซบ วี ยีต, วี แดะ ฆอน อัน ฆาย อีบึณ อัน, วี วีว แคง มืง อีซาเรลัะ. 22อัน ยี ยึร ซาดาง ลอง คูนดีคัม อาเคดลาว แฮะ ปลูะ ฆูณ อัน, อึณ แตห อัน วี โยว. อัน ยี ตู ยัะ ฮาว มืง โดง กอย คูนดีคัม กามาย ตี. ดอ อึณบาว อัน, อามู อามาด เฌาพรา วี จัร อัน, แตห อัน ซาดีก. ปัน ตี อัน วี ฮาว กอย แคง อืง ฆาลีเล. 23อัน วี ฮาว กอย แคง มืง อี จืร มืง นาซาเรต. ปาย ตี อึณ บอ แบน ปี ดึอม ต็อห ดูอี อี บยาน โฆรห เฌาพรา ตึอน. อัน แฮะ ต็อห, “เฆ ดี แตห อัน จืร ดา อี ตัห มืง นาซาเรต.”

Currently Selected:

มท 2: pce

Highlight

Copy