อามาลาคี 3
3
1เฌาพรา ปี วี ต็อห, “บัร เบ ยอด, โอว ดี จัร อามู อามาด โอว, แตห อัน วี แยต ดี อาต โอว. อัน เฌา ปี เหรต เบ ตึอน, อัน วี กาปลูห ตัห ดี โฮว เฌาพรา อู เฌณ. บัร เบ ยอด, อามู อามาด เฌาพรา อี แฮะ กาลาง ดี เบ ลอง กาดีก ซัดฌา เฌาพรา แปะ แฮะ หน็อะ อึณด็อะ เบ, อึณ ดี ตัห อาคัร หมาน.” เฌาพรา อี อึบ โตต ดอน โมยว แฮะ กาลาง ปาย ตี.
2อาเซ ดี บอ ปึอน คัม ซีแง ดี ตัห ฌัม อัน เฌา ตี? อาเซ ดี บอ ปึอน กอย ดี อาต อัน เฌา ซีแง ดี ตัห อัน ตี? โคว, อัน เฌา ดี บอ ปี เงา อี ทารอง รึอน บอ ซาปยา ปี ตา ดา อี ลัห ครึง แตห อึณ ลูย. 3อัน เฌา ดี บอ ตูต ปี ดูอี อี ทารอง รึอน แตห อึณ ซีงา. อัน ดี บอ ดัม หมาบ ดี เฆ ดูอี อาโมยว อาเลวี, แตห อึณ ปี อี ทารอง รึอน เฆ ครีว แตห อึณ แฌด. แตห เฆ ปึอน ดี หลู ปี ดี หลู อี ล็อะ น็อห เฌาพรา. 4ดอ อัน ตี ปี ดี หลู เฆ ดูอี อายูดา บอ ดูอี แคง มืง เยรูซาแลม ดี บอ วี ล็อะ น็อห เฌาพรา ปี ดอ มูห อาคราว ดอ มึอน.
5เฌาพรา ปี วี ต็อห, “ดอ อัน ตี โอว ดี บอ ตัห กอย กาตัด เบ, แตห โอว ซูงพยาด อามู เบ. โอว ดี แบน ซักเซ อี ลาย กาบัห ดี วี อี นับ ดี บูด กาทา บอ โบง อาดาด. วี อี ลูต อีบึณ อี เฮา, วี อี ดืง อี ตู มูห ตู หมาน, วี อี ตู ดัว รูห รัณ รูห ฌาง อี เฮา, วี อี คาหนาบ ยา ซีปรัห บอ เฆ ฆอน อี ตู มึห ฆูณ มา, วี อี โบง ดี ดูอี อาโมยว เฮา อี ตู โดบ ดารา นา หมาน โอว ดี โบง กาบัห ดี เฆ ดูอี ฌึร ตี. โคว, เฆ ตู โรวเซ รีมาด โอว.” เฌาพรา อี อึบ โตต ดอน โมยว แฮะ กาลาง ปาย ตี.
ลอง ปี ดี หลู ฆึร บูน อู บูน
6“โอว มูห เฌาพรา อี ตู นับ ดี กาปลูะ ตู นับ ดี บยอง. โคว, เบ หลูกหลาน อาโกบ, เบ หณัม ลึร ชึม โตต. 7จูห ซีณ โจว บาน ดา ดา เบ, เบ แฮะ แวน ดารา ปี ดัม อูน โอว บอ ตู โบง โดบ. ดอ ตี นี แตห เบ วี ตัห โดบ โอว, แฮะ ฮอต โอว มืร ดี ตัห โดง กอย เบ.” เฌาพรา อี อึบ โตต ดอน โมยว แฮะ กาลาง ปาย ตี. มาแล, เบ ยี วี ดีหมอด ต็อห, “เหมา เย ดี ปาย ดี วี ตัห โดง กอย แม เฌา?” 8“ดูอี ตู ปึอน กาโลว เฌาพรา. มาแล, เบ ยี แฮะ ฮอต กาโลว โอว. เบ ปี วี ดีหมอด ต็อห, ‘อา เหมา แปะ แฮะ กาโลว เย ดี แม เฌา?’ ‘เบ แฮะ กาโลว โอว ดอ ดึห เบ ฆึร บูน อู บูน บอ ตู ดัว ปี ดี โลว หลู เบ ดี โอว. 9เบ บอกาเฆลียด โลว คัม ดูก ตาง, คัม กาซัม ดืง. โคว, แคะ กอย เบ บอกาเฆลียด, เบ แฮะ พาด ดึห โกรว โอว. 10แตห เบ ดึห ฆึร บูน อู บูน, ฮับ อูน แคง ฌีดืก เฌาพรา, แตห ปี ดี โฮม ปี ดี ตา กอ โนะ แคง โฮว เฌาพรา. เซ เบ โบง ปาย ตี แตห เบ ยอด โยว โอว ดี วึห มาโลห ฆางหราว, แตห โอว ม็องการา ดัว นา บอด นา หมึอม, แตห อึณ กอ โนะ ลูต ดี เบ.’” เฌาพรา อี อึบ โตต ดอน โมยว แฮะ กาลาง ปาย ตี. 11“ปี ปีด ปี ซัม เบ, อึณ ดี เลห กืน กาเซา. โคว, โอว ตู แตห โดว ซัด โฮม ปี ปีด ปี ซัม เบ. บอ เบล มางูน เบ โอว ตู แตห เบล อัน ซีฆลูห โจห อาต ซีณ.” เฌาพรา อี อึบ โตต ดอน โมยว แฮะ กาลาง ปาย ตี. 12“ดูอี ดอน ฌึร ดอน โมยว ดี บอ ต็อห, เบ แฮะ มูห ดูอี อี แฮะ ปึอน ม็องการา ปี ดัว เฌาพรา. มืง เบ มืร ดี บอ แบน มืง บอด มืง หมึอม อี ล็อะ น็อห เบ.” เฌาพรา อี อึบ โตต ดอน โมยว แฮะ กาลาง อูน ปาย ตี.
ลอง เฌาพรา กาแซณ ดี วี ร็อก กาเว เฆ
13เฌาพรา ปี วี ต็อห, “เบ แฮะ ยัะ กาลาง โฆรห อี แฮะ ลาย กาบัห กาเซา ดี โอว.” มาแล, เบ ปี วี ดีหมอด ต็อห, “อา เหมา แปะ แฮะ กาลาง กาบัห เย ดี แม เฌา?”
14เบ มืร แฮะ ต็อห, “ลอง โบง ฆาน เฌาพรา, อาว มึห อาฆยึร มาเซ. เซ เย โบง โดบ ดารา บอ โฆรห ปี ดัม อัน เฌา, เซ เย บอ บยัะ ดี เฌาพรา อี อึบ โตต ดอน โมยว ลอง หมาบ แปะ แฮะ โบง เย, แกวะ แตห น็อห เย ดาคึย, อึณ ตู มึห อาฆยึร มาเซ. 15ดอ ตี นี เอ วี ต็อห, ‘วี อี ปีคึก ปีพูง อัน, อัน แฮะ ปึอน ม็องการา บอด. เฆ อี โบง นา ตู หมึอม บอ แบน ดูอี ครัม บอ เฆ อี ยัะ ต็อห, แตห เฌาพรา ดัม หมาบ ดี เฆ, เฆ ดี ลอด คัม ดูก มาเซ.’”
16วาย อัน ตี เฆ อี โรวเซ เฌาพรา บอ ลาย กามวน กาแต เฆ. อัน เฌา บอ โทม โฆรห เฆ. อึณ มืร มึห ดูอี อี แดม ฌาราง เฆ ดูอี อี โรวเซ อัน เฌา บอ อึง ดี เฌณฌา ลอง อัน.
17เฌาพรา อี อึบ โตต ดอน โมยว แฮะ ต็อห, “เฆ ตี ดี แบน ดูอี ปี อึบ โอว. ซีแง ดี โบง โอว แปะ แฮะ กาแซณ โอว, เฆ ดี ปี โกรวกราม อี ง็อห กาเซา ปี ยอด แมน โอว. โอว ดี บอ ร็อก กาเว เฆ, แตห อึณ ปี ฆูณ อี ร็อก กาเว ฆอน อี โบง ปี ซูต ปี จัร ฆูณ อัน.” 18ปัน ตี เบ ดี บอ ปึอน ดี ยึร ลอง ดูอี อี โบง นา ซืร นา หมาน บอ ดูอี อี ตู โบง นา ซืร นา หมาน อาว มูห อู โมยว. เบ ดี นับ ซีคยา, วี อี โบง ฆาน เฌาพรา บอ วี อี ตู โบง ฆาน เฌาพรา แฮะ ลาย บลืง แคะ เหมา.
Currently Selected:
อามาลาคี 3: pce
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
