อามาลาคี 2
2
1อึย เบ ดา อี หลู ดี เฌาพรา, โฆรห ปี กาลาง เฌาพรา ดอ ตี นี บอ มูห อามีง ปี ดัว อัน ดี เบ. 2เฌาพรา อี อึบ โตต ดอน โมยว แฮะ กาลาง ปาย นี. “เซ เบ ตู โรวเซ โอว, โอว ดี ดืง เบ, แตห เบ คัม อาเพ อาเร. แตห นา บอด นา หมึอม ปี ม็องการา ดัว โอว ดี เบ วี แบน โวด. โบ็ง หมาน อัน, โอว แฮะ ฮอต ดืง เบ. โคว, ดอ ดัม โอว ซาดีก ดี เบ, เบ ตู โทม โฆรห โอว.
3โอว ดี วี เอห หลูกหลาน เบ, อึณ ปี โอว ดี ดึห เอียง มาโดว ซัด อี มูห โดว ปี ดี หลู เฆ, วี พ็อห ดี นา เบ. โอว มืร ดี โฮว เตา เบ, แกวะ แตห โอว ซี ยึร เบ. 4ปัน ตี เบ ดี บอ นับ อึณ มูห โอว อี แฮะ ดัม ซาดีก ดี เบ, แตห กาดีก ซัดฌา ปี ดัว โอว ดี เฆ ดูอี ครึร อาเลวี ตู ลึร ดอ เหมา.” เฌาพรา อี อึบ โตต ดอน โมยว แฮะ กาลาง ปาย ตี. 5“กาดีก ซัดฌา ปี ดัว โอว ดี เฆ ดูอี ครึร อาเลวี ตี, โอว ซี แตห อึณ ดัว อาซาก ดี เฆ บอ แบน น็อห เฆียด น็อห เยน. แคะ ตี โอว มืร แฮะ ดัว อูน ดี เฆ. โคว, เฆ โรวเซ โอว บอ อาม โอว อี มึห ปวน ตาง. 6นา มูห นา หมาน แปะ แฮะ กาลาง โอว ดี เฆ, เฆ วี กาลาง ดี อี เฮา. เฆ มืร ตู กาโลว บอ ตู ปีหล็อก ดี อี บอ โดบ โอว. เฆ โบง นา มูห นา หมาน บอ จอย ดูอี กืน วัห หมาบ บอ แวน นา ตู หมึอม.
7โมต ดา อี หลู ดี เฌาพรา โลว กาลาง โฆรห อี มึห อางยาน. เฆ ดูอี กืน ดี บอ แตห ดา อี หลู ดี เฌาพรา มาโนว เฆ. โคว, เฌาพรา แฮะ แตห เฆ แบน อามู อามาด อัน อี มูห อัน เฌา อี อึบ โตต ดอน โมยว. 8มาแล, อี มูห เบ, เบ ยี ตู โบง ปาย ตี. เบ แฮะ วัห อึณเตณ อี โดบ เฌาพรา. เบ มืร โบง แตห ดูอี กืน กาลึบ โกบ โฆรห ปี มาโนว เบ. เบ แฮะ ปยาต แวน กาดีก ซัดฌา ปี ลาย กาแซณ โอว ดี เฆ ดูอี ครึร อาเลวี ตึอน.” เฌาพรา อี อึบ โตต ดอน โมยว แฮะ กาลาง ปาย ตี. 9“โกบ ตู โดบ เบ อึณเตณ ปี กาลาง โอว ดี เบ บอ มึห โดง ร็อก โดง ฌ็อง ดอ วี มาโนว เบ อี เฮา, โอว วี แตห เบ แบน ปี ลูกตาย ปี แนนัะ ดูอี กืน บอ แกวะ แตห เฆ โรวเซ เบ.”
ลอง ดูอี อีซาเรลัะ ตู มึห น็อห ซืร ดี เฌาพรา
10เอ บอกาเฆลียด มึห ฆูณ อู วี. เฌาพรา อู กาดัง แฮะ พาน เบลห เอ. เซ อึณ ปาย ตี, เหมา อึณ ปาย ปี วี ปยาต เอ กาดีก ซัดฌา ปี ดัว เฌาพรา ดี ฆูณ ดัง เอ บอ ตู โบง นา ซืร นา หมาน ดี บีนอง เอ?
11ดูอี อาโมยว ยูดา, เฆ ตู มึห น็อห ซืร น็อห หมาน. ดูอี อาโมยว อีซาเรลัะ บอ ดูอี แคง มืง เยรูซาแลม, เฆ บอ โบง อี หมึอม กาอีห หมึอม กาดาต. เฆ ดูอี อายูดา แฮะ โบง แตห โฮว เฌาพรา กาดาต. เฆ แฮะ คัด ดึห อีบึณ อี กรึบ เฌา ปี กรึบ ดูอี อาโมยว เฮา. 12กาแต ดูอี อีซาเรลัะ เฌาพรา ดี ดึห เลห ดอน อี อี โบง ปาย ตี. แกวะ แตห อัน ปึอน ดี ดึห ตัห ปี ดี หลู อัน, วี ฮาว หลู ดี เฌาพรา อี อึบ โตต ดอน โมยว.
13เบ มืร แฮะ โบง ปอ อึณปัว. เบ บอ ยาม บอ หงูน, แตห อึม งาย เบ กอ บีน โตต กาโช็ง หลู ดี เฌาพรา โกบ ตู อึง อัน เฌา ปี หลู เบ บอ อาว มึห อี ล็อะ น็อห อัน. อัน มืร ตู ดึห ปี หลู เบ. 14เบ วี ดีหมอด ต็อห, “เหมา อึณ ปาย ปี แวน แม เฌา ดี เย?” โอว แตห เบ นับ, อึณ มูห เฌาพรา อี แฮะ โทม แปะ แฮะ ลาย กาแซณ เบ บอ อีบึณ เบ ซีแง ดอ แฮะ คัด เบ ดอ ซี หนึม เบ. อีบึณ ตี มืร แฮะ มูห ฆึก เบ, แฮะ มูห อีบึณ เบ บอ แฮะ โดบ กาดีก ซัดฌา แปะ แฮะ ดัว เบ ดี อัน, เบ ยี ตู มึห น็อห ซืร น็อห หมาน ดี อัน บอ วี โบง อี กาลึบ.
15อัน เฌา ยี แฮะ พาน เบลห ฆาย อา วี, แตห ฆาย ปี อู วี. อึณ มูห อัน เฌา อี อึบ บอ โดว บอ น็อห พึอม เบ. โกบ มาเซ อัน เฌา แฮะ พาน เบลห ฆาย อา วี, แตห ฆาย แบน ปี อู วี? อัน เฌา ซี แตห ฆาย มึห ฆอน อี โรวเซ เฌาพรา. โคว, แตห เบ อึบ น็อห เบ, แกวะ โบง อี ตู กาซืร อี ตู หมึอม ดี อีบึณ แปะ แฮะ คัด ดึห เบ ซีณ ดอ ซี หนึม เบ.
16เฌาพรา อี มูห เฌาพรา ปี กรึบ เฆ ดูอี อีซาเรลัะ, อัน แฮะ ต็อห, “โอว กาอีห กาเซา เซ อี แวน อีบึณ เฆ. โอว บอ ฌ็อง กาเซา วี อี โบง นา ตู หมึอม ดี อีบึณ อัน, แตห อึณ ปี อัน ตา ครึง, กาบีด โดว อัน แกวะ แตห อี ยึร.” เฌาพรา อี อึบ โตต ดอน โมยว แฮะ กาลาง ปาย ตี. โคว, แตห เบ ซาดีก น็อห เบ, แกวะ โบง อี ตู กาซืร ดี อีบึณ เบ.
ลอง ซีแง ดี ซูงพยาด เฌาพรา ดารา แฮะ กาตัด ดี ฌัม
17เบ แฮะ แตห เฌาพรา นูน โกบ แฮะ กาลาง เบ โฆรห กืน. เบ ยี นับ ดี ต็อห, “เหมา เย ปาย ดี โบง, แตห อัน เฌา นูน?” อึณ บอ มูห โกบ แปะ แฮะ กาลาง เบ ต็อห, “เฌาพรา ตู ดัม หมาบ ดี เฆ อี โบง นา ตู หมึอม. โกบ อึง อัน ดี เฆ.” แฮะ ฮอต เบ บอ นับ ดี ต็อห, “เฌาพรา อี ดี ซูงพยาด ดารา ดี อี, อัน กอย ดี เหมา?”
Currently Selected:
อามาลาคี 2: pce
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
