อามาลาคี 1
1
ลอง ปี ปาย เฌาพรา ดี ร็อก ดูอี ปี อึบ อัน
1อานี มูห โฆรห ปี กาลาง เฌาพรา ดี อามาลาคี อี มูห ดา อี บยาน โฆรห อัน เฌา.
2เฌาพรา แฮะ ต็อห, “โอว แฮะ ร็อก กาเซา เบ บอกาเฆลียด.” มาแล, เบ ยี วี ต็อห, “เหมา อัน เฌา ปาย ดี ร็อก เอ?” เฌาพรา วี เวียะ โฆรห เบ ตี ต็อห, “โอว ร็อก อาโกบ อี มูห ฆูณ ดัง เบ. ปาย ตี โอว ร็อก บอ เบ. 3โอว ยี ฌ็อง อาโซว. โอว แฮะ แตห นอน โดง กอย อัน กาปยาต ลึร โตต. โอว แฮะ ดึห กาดาย อี แฮะ แบน คาฆูน อัน, แตห อึณ แบน แปร กาฮ็อห โดง กอย มาโซว แปร.”
4เฆ ดูอี แคง มืง เอโดม บอ นับ ดี ต็อห, “เย แฮะ ฮอต ลึร ชึม โตต. มาแล, เย ปี ดี วี อึณปราย กาซืร อี แฮะ กาปยาต ลึร เฆ ตี.” เฆ ปี บอ แฮะ ต็อห ปาย ตี มืร, เฌาพรา อี อึบ โตต ดอน โมยว ปี วี ต็อห, “เฆ ปี บอ วี ซัม, โอว ยี ดี ปยาต แวน, แตห เฆ ดูอี เฮา กอ ต็อห, ‘เฆ มูห ดูอี อี กอย แคง กาดาย มาน มืง อี ตู หมึอม บอ โบง แตห เฌาพรา รู ดี เฆ เซเซ.’” 5เบ ดี บอ ยึร ดี งาย เบ ลอง อัน ตี. เบ ดี บอ วี ต็อห, “เฌาพรา แฮะ มึห ปวน, มึห อาพูง ดังโคว ตาง กาเซา. นา เรต กาอูน กาดาย มืง อีซาเรลัะ มืร, ปวน อัน บอ ตาง กาเซา.”
ลอง เฌาพรา ดัม หมาบ ดี เฆ ดา อี หลู ดี เฌาพรา
6เฌาพรา อี อึบ โตต ดอน โมยว วี กาลาง ดี ดา อี หลู ดี เฌาพรา ต็อห, “ฆอน กาโณม บอ นับ ดี โรวเซ ฆูณ อัน. แดเจณ บอ นับ ดี โรวเซ ดา กาณา อัน. โอว ยี มูห ฆูณ เบ บอ ดา กาณา เบ, เหมา อึณ ปาย ปี ตู โรวเซ เบ ดี โอว?” ปาย ตี เฌาพรา อี อึบ โตต ดอน โมยว ดีหมอด เฆ อี มูห ดา อี หลู ดี เฌาพรา อี ลูกตาย ปวน อัน เฌา. มาแล, เบ ยี วี ดีหมอด ต็อห, “มาเซ ปี โบง เย ดอ ลูกตาย เย แม เฌา?”
7เฌาพรา ปี วี ต็อห, “เบ แฮะ ดึห ปี ดี โฮม อี หมึอม กาดาต หลู ดี โอว. เบ ยี วี ดีหมอด ต็อห, ‘เหมา เย แฮะ โบง แตห ปี ดี หลู เย กาดาต?’ โอว ต็อห ดี เบ, ‘เบ แฮะ ทาง กาโช็ง หลู ดี เฌาพรา แฮะ ปึอน ลูกตาย.’ 8เบ ยี หลู โดว ซัด อี งาย อับ บอ ทาง อาว แบน หมาบ. เบ บอ หลู โดว อี เปลา แฆะ บอ โดว อี มึห เซา รอฆา, เบ บอ ต็อห บอ ทาง อาว แบน หมาบ. เซ เบ เทว ดี ฮาว อาบ ดัว ดี ดา กาณา อี อึบ มืง, เบ ทาง อึณ ดี ล็อะ น็อห อัน. แตห เบ ยอด, อัน ดี ปาย เหมา ดี เบ อัน อึง ตู อึง.” เฌาพรา อี อึบ โตต ดอน โมยว แฮะ ต็อห ปาย ตี.
9แตห เบ ซาคึร หมาณ ดี เฌาพรา, แตห อัน เฌา มึห น็อห กาเว เบ. เซ เบ ยี หลู ปี ดี หลู อี กาดาต ตี, เฌาพรา ตู โลว บยัะ น็อห ร็อก อัน ดี เบ.
10โอว ซี แตห อึณ มึห คอ อู วี กาแต เบ, แตห อัน ฮาว กาบีด มาโลห โฮว เฌาพรา, แกวะ แตห เบ หลู โมยว อี กาดาต แดง กาโช็ง หลู โอว. เฌาพรา อี อึบ โตต ดอน โมยว แฮะ ต็อห, โอว ตู อึง ปี ปาย เบ ตี. โอว มืร ตู โหลห ปี หลู เบ ตี. 11เฆ ดูอี ดอน ฌึร ดอน โมยว ดี โรวเซ โอว จูห โดง เลห ซีแง กอ วี ฌัม โดง เฆต ซีแง. เฆ ดี บอ หลู ปี ดี หลู อี โดะ ดี เงา, บอ ปี ดี หลู อี ซีงา บอด ดอน โมยว. โคว, เฆ โรวเซ โอว อี บอด มยาด กาเซา กาแต เฆ ดูอี ดอน ฌึร ดอน โมยว. เฌาพรา อี อึบ โตต ดอน โมยว แฮะ กาลาง ปาย ตี. 12มาแล, เบ ตู โรวเซ โอว เซ เบ ต็อห กาโช็ง หลู ดี เฌาพรา อาว บอด. โคว, เบ ต็อห, โดง ดี หลู เบ ดี เฌาพรา แฮะ ปึอน โบง แตห อึณ กาดาต. ปาย ตี เบ บยัะ เบ ตู โรวเซ เฌาพรา. 13เบ มืร แฮะ ต็อห, อึณ หณาบ กาเซา ดี โดบ ปี ต็อห เฌาพรา. ปาย ตี เบ บอ ลูกตาย อัน เฌา. เฌาพรา อี อึบ โตต ดอน โมยว ปี วี ต็อห, “แตห เบ เฌณฌา ลอง ปี โบง เบ. เบ นับ ดี ปรา โดว ปี ซี หลู เบ บอ ดึห โดว อี เปลา โฆะ เปลา แฆะ, บอ โดว อี มึห เซา รอฆา, วี หลู ดี โอว. แฮะ ฮอต เบ ทาง โอว ดี ดึห โดว เฆ ตี บอ อึง ปี โบง เบ? ปาย ตี เฌาพรา วี ดีหมอด เบ. 14เซ วี อี มึห มาบู อาโล็ง อี ตู มึห โดง เช โดง แน แคง พึง มาบู อัน, อัน มืร แฮะ กาแซณ ดี หลู, อัน ยี ตู วี โบง โดบ ปี กาแซณ อัน ตี, วี หลู โดว อี มึห โดง เช โดง แน, อัน โลว คัม หมาบ อัน. โคว, โอว มูห คูนดีคัม อี ตาง กาเซา. เฆ ดูอี แบน โมยว แบน โมยว บอ โรวเซ โอว.”
Currently Selected:
อามาลาคี 1: pce
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
