อาซาคารา 14
14
ลอง เฌาพรา ดี อึบ มืง เยรูซาแลม
1เบ ยอด, ซีแง ปี กาลาง เฌาพรา ดี ตัห ฌัม. ดอ อัน ตี เฆ ดี บอ ลาย กาซาง โกรวกราม แปะ แฮะ พาด เฆ ดี เบ.
2โอว ดี แตห ดูอี ดอน ฌึร ดอน โมยว ตัห กาฌูะ บอ ลาย กาบัห ดี มืง เยรูซาแลม. รันซู ดี บอ แป มืง ตี แตห เฆ พาด ดึห โกรวกราม แคง กาง เฆ บอ โบง นา ตู หมึอม ดี อีบึณ เฆ. เฆ ดี เหมต ฮาว ดูอี แคง มืง ตี อาดา อู กาแต. อาดา ปอ อู กาแต อี ซี ฆีด ซี กอย แคง มืง, เฆ ดี กอย แคง กาง อี แฮะ ราม แฮะ กาปยาต.
3ปัน อัน ตี เฌาพรา ดี บอ เลห โดง กอย อัน, กาโฆห ดี เฆ ดูอี ดอน ฌึร ดอน โมยว, แตห อึณ ปี ดอ แฮะ กาโฆห อัน ดอ มึอน. 4ซีแง ตี เปลา อัน เฌา ดี บอ จ็อง แดง นอน เฮ นามัน อี กอย บลาก นา เลห ซีแง ดี มืง เยรูซาแลม. นอน เฮ นามัน ดี บอ ดัห ดี กาแต อัน, แตห อึณ แบน ดีลัยะ อี จูห บลาก นา เลห ซีแง กอ ฌัม นา เฆต ซีแง. โคว, นอน ตี อาดา อู กาแต ดี บอ กาโทะ ฮาว บลาก นา กัว. นอน ปอ อู กาแต ดี กาโทะ ฮาว บลาก นา เตต. 5เบ ดี บอ ปึอน ดี เตา ฮาว โดบ อึณเตณ แคง ดีลัยะ ตี. โคว, อึณ ดี ฌัม ดี โดง จืร อาฌีลา. เบ ดี บอ กาดูห ดี เตา ดี มาอีม เยณ อี ดี ตัห ปี ดอ มูห โจว คูนดีคัม อาอูฌียา อี อึบ มืง ยูดา. ดอ อัน ตี เฌาพรา อี มูห เฌาพรา ปี กรึบ โอว, อัน ดี บอ ตัห บอ เฆ ดูอี อัน บอกาเฆลียด อี ซีงา บอด, เฆ ดี ตัห โดบ อัน.
6ซีแง ตี, อาว มึห บลาง ซีแง. อาว มึห ฆัด เฆียด. 7อึณ ดี แบน โตต กาแต ซีแง. แฮะ ฌัม บา ดี อับ อึณ ซี แนะ มึห บลาง.
8อาคราว ดอ อัน ตี อึม อี ดัว อาซาก ดี บอ โตห เลห แคง มืง เยรูซาแลม. บอ มูห อาคราว แหม อาว ต็อห, อาคราว ฆัด อาว ต็อห, อาดา อู กาแต ดี บอ แหล ฮาว ดี อึม ดึง ซัยะ ซ็อง บลาก นา เลห ซีแง. ปอ อู กาแต ดี บอ แหล ฮาว ดี อึม นัมมูกซารา บลาก นา เฆต ซีแง.
9เฌาพรา ดี บอ แบน คูนดีคัม อี อึบ โตต ดอน โมยว แดง กาดาย. ซีแง ดอ อัน ตี อึณ บอ มูห อัน เฌา อู กาดัง ปี กรึบ เฆ ดูอี. เฆ ดี ฆาว มี ปวน อัน เฌา อู กาดัง ตี.
10มืง ปี อึบ อัน เฌา บอ มืง, อึณ ดี บอ ฆลัง ซีคยา. ฆลัง ตี จูห ดี มืง ฆีบา กอ วี ฌัม ดี มืง รีมโมน อี กอย บลาก นา เตต มืง เยรูซาแลม. มืง เยรูซาแลม เฆ ดี บอ อึณปราย โดง บรีม อัน. อึณ บอ จูห ดี มาโลห อาเบนยาม กอ วี ฌัม ดี มาโลห บรีม. แฮะ ฮอต อึณ ดี บอ ฌัม ดี มาโลห ดี กาโตะ แรง, ฌัม บอ ดี โดง จา โดง เครียง เฆ ดา ซึก อี จืร โดง จา จีฮานาเนลา กอ วี ฌัม ดี โดง กรีด อี เบล มางูน คูนดีคัม. 11วาย อัน ตี เฆ ดูอี ดี บอ วี ตัห กอย แคง มืง เยรูซาแลม. เฆ มืร ปึอน กอย ซีคยา อาว ฮู โลว คัม อาเพ อาเร บอ โฆรห ปี ดืง อี.
12เฆ ดูอี บอกาเฆลียด อี แฮะ ดึอม ตัห กาโฆห ดี เฆ ดูอี แคง มืง เยรูซาแลม, เฌาพรา ดี แตห เฆ คัม เซา รอฆา. ดูอี เฆ ตี เฆ ดี เซา ปี ยัง เฆ อัม ลาต ดอ ซี อีม เฆ. คอ งาย เฆ ดี บอ อัม ลาต แคง กาเดา งาย เฆ. ซีดัะ เฆ มืร ดี บอ อัม ลาต แคง โมต เฆ. 13ดอ อัน ตี เฌาพรา ดี บอ แตห เฆ ดัด ซีนัน ซีนืง บอ โยว กาเซา. เฆ ดี วี ลาย เหมต ลาย กามัห ราง เฆ. 14เฆ ดูอี อายูดา ดี บอ กาโฆห ดี ดูอี แคง มืง เยรูซาแลม. โกรวกราม เฆ ดูอี อาโมยว เฮา อี กอย โคบ เฆ ดูอี อายูดา บอ ดูอี แคง มืง เยรูซาแลม ดี พาด ดึห กืน. อึณ บอ มูห ครีว บอ รึอน กืน กาเซา บอ ครึง ตา อี ชีด กาเซา. 15เซา รอฆา ปี ดี ดัม เฌาพรา ดี รันซู ดี บอ ดึก ดี มังปร็อง เฆ มาลา, มังปร็อง กาฮาต, มาโลว บอ โดว ซัดดาวา บอกาเฆลียด อี กอย โดบ รันซู เฆ.
16วาย อัน ตี, เฆ รันซู อี ตัห กาโฆห ดี มืง เยรูซาแลม เฆ อี แฮะ แกน ดี เซา รอฆา ตี, เฆ ดี ฮาว แคง มืง เยรูซาแลม ดอน ซีนัม ดอน ซีนัม, แตห เฆ กรึบ คูนดีคัม อี มูห เฌาพรา อี อึบ โตต ดอน โมยว. เฆ โบง บลอย อี โลว กอย แคง ทึบ. 17เซ ดูอี ตู ตัห ดี มืง เยรูซาแลม ดี กรึบ คูนดีคัม อี มูห เฌาพรา อี อึบ โตต ดอน โมยว, ฆลาย ตู โจห แคง กาดาย มืง เฆ ตี. 18เซ เฆ ดูอี แคง มืง แอฆึบ ยี ตู ตัห ลึบ บลอย ตี, เฌาพรา ดี แตห เฆ มึห เซา รอฆา ปี แปะ แฮะ ดัว อัน ดี เฆ ดูอี ดอน โมยว อี ตู ตัห ลึบ บลอย ตี. 19มืง แอฆึบ บอ เฆ อี ตู ตัห ลึบ บลอย ตี, เฆ โลว คัม หมาบ เฆ.
20ซีแง ตี, อึณ ดี บอ มึห โดว แปะ อี แดม ดึก ดี ฮีง อี ฮอย ดี แมง มังปร็อง ต็อห, “แฮะ ซีงา บอด ดี อาต เฌาพรา.” บอ กาโละ อี กอย แคง โฮว เฌาพรา ดี ซีงา บอด ปี ซีลัยะ อี กอย ดี กาโช็ง หลู. 21อาว วัน แคะ ตี. กาโละ อี กอย แคง มืง เยรูซาแลม บอ แคง มืง ยูดา, เฆ บอกาเฆลียด ดี ซีงา บอด ดี อาต เฌาพรา อี อึบ โตต ดอน โมยว. แคะ กอย เฆ อี ตัห หลู ดี เฌาพรา, เฆ ดี บอ ปึอน ตัห ดึห กาโละ เฆ ตี, วี ดัง ปี ดี หลู เฆ. จูห ซีณ ซีแง ตี, อาว มึห อี ตัห กาจึห กาย็อง แคง โฮว เฌาพรา อี มูห เฌาพรา อี อึบ โตต ดอน โมยว.
Currently Selected:
อาซาคารา 14: pce
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
