ดอ โฆว 27

ลอง อาโกบ กาโลว ดี ฆูณ อัน

1วาย อัน ตี ดา อาแซก แฮะ กัด. งาย อัน แฮะ กาปยอย, อาว ฮู ปึอน ยึร. อู ซีแง อัน แดะ ฆอน อัน อี จืร อาโซว ตึอน, กาลาง โฆรห ดี อัน. อัน ต็อห, “อึย ฆอน โอว.” อาโซว วี ต็อห, “โอว กอย ดี นี.” 2อัน วี ต็อห, “อึย ฆอน โอว, โอว แฮะ ฮอต กัด. โอว ตู นับ ปัน เหมา โอว ดี ยัม. 3โคว, แตห แม ดึห โฆ็ง บอ อัะ บอ บลา แม, ฮาว แคง แปร, เหมต โดว แปร อาดา โอว. 4แฮะ ฮอต แตห แม ดัง ฮาบ ซีแงห ปี ม็อก โอว. แม ฮอต โตต, แตห แม ดึห ตึย ดี โอว, แตห โอว โฮม, แตห โอว ปึอน ดี ม็องการา ดัว ดี แม อาต ยัม โอว.”

5นาง แบก ตึอน แฮะ โทม โฆรห ปี กาลาง อาแซก ดี อาโซว. อาโซว มืร แฮะ ฮอต ฮาว แคง แปร, แตห อัน เหมต โดว แปร, แตห อัน ตึย ดี ฆูณ อัน. 6แฮะ ฮอต ปัน ตี นาง แบก วี กาลาง โฆรห ดี ฆอน อัน อี จืร อาโกบ. อัน ต็อห, “แตห แม โทม โฆรห โอว. โอว แฮะ โทม โฆรห ปี กาลาง ฆูณ แม ดี อาโซว. อัน แฮะ ต็อห, 7‘แตห แม ฮาว ดึห มาโดว แปร ดี โอว. แตห แม ดัง ฮาบ ซีแงห, แตห โอว โฮม. แฮะ ฮอต, แตห โอว ม็องการา ดัว ดี แม อาต ยัม โอว.’ 8โคว, แตห แม โทม บอ โบง ปี ต็อห โอว ดี แม. 9แตห แม ฮาว ดึห มาแป ปี เฮียง เอ อา โดว. โอว ดี ดัง ฮาบ ซีแงห ปี ม็อก ฆูณ แม. 10แฮะ ฮอต, แม โลว ฮาว ตึย ปี ดี โฮม ตี ดี ฆูณ แม, แตห อัน โฮม, แตห อัน ม็องการา ดัว ดี แม อาต ยัม อัน.”

11อาโกบ วี ต็อห ดี มา อัน, “แม นับ, อีกัด โอว มึห ฮึก กืน. ฮูน โอว ยี ฆลัะ. 12โอว โยว ฆูณ โอว ดี ปา โอว. เซ อัน นับ, โอว แฮะ กาโลว อัน, โอว โยว อัน ตู วี ม็องการา ดัว ดี โอว. โอว โยว อัน ดี ดืง โอว.”

13มา วี ต็อห, “เซ อัน ดืง แม, แตห อึณ ปี, อัน ดืง โอว. แกวะ โยว. แตห แม ฮาว โบง ปี จัร โอว, ดึห มาแป ตึอน.”

14ปัน ตี อาโกบ ฮาว ดึห มาแป, ดัว ดี มา อัน. มา อัน บอ ดัง ฮาบ ซีแงห ปี ม็อก ฆูณ อัน. 15มา อัน แฮะ ฮอต โบง ปี ดี โฮม, อัน ฮาว ดึห ครึง ชีด ปี อูน อาโซว แคง ทึบ บีก มา อัน. อัน บอ ดัว อาโกบ ชึบ ครึง อีกัด อัน ตี. 16อัน บอ ดึห ฮูน มาแป, กาบีด แด บอ โกม อาโกบ, อี มูห โดง ฆลัะ ดี โดว อัน. 17ปัน ตี อัน ดัว อาโกบ โฆ็ง ฮาบ ซีแงห ปี ดัง อัน, ดัว บอ คามูน ปี โบง อัน.

18อาโกบ ตึอน วี ฮาว โดง กอย ฆูณ อัน. อัน ต็อห, “อึย, ฆูณ โอว.” ฆูณ อัน วี ต็อห, “โอว กอย ดี นี. อาเซ แม มูห, ฆอน โอว?” 19อาโกบ วี ต็อห ดี ฆูณ อัน, “โอว มูห อาโซว, ฆอน ฆีณ แม. โอว แฮะ ฮอต โบง ปี หมาณ แม ดี โอว. แตห แม ยีต, ตูต ซีคยา, แตห แม โฮม ยัง โดว แปร ปี ตัห ดัว โอว ดี แม. แฮะ ฮอต, แตห แม ม็องการา ดัว ดี โอว.”

20อาแซก วี ดีหมอด ฆอน อัน ต็อห, “อึย ฆอน โอว, เหมา อึณ ปาย แม ปี ซอ นับ ดี ปึอน ครัน ครัน?”

อัน วี ต็อห, “เฌาพรา ปี กรึบ แม, อัน แฮะ จอย โอว, แตห โอว เจว ปึอน.”

21ปัน ตี อาแซก ต็อห, “แตห แม ตัห กอย เครียะ โอว, แตห โอว ปึอน ดี ปา แม, แตห โอว นับ, โยว อึณ หมาน อาว หมาน มูห แม ฆอน โอว อี จืร อาโซว.”

22อัน แฮะ ฮอต ต็อห ปาย ตี อาโกบ วี ฮาว กาตัด โดง กอย ฆูณ อัน ตึอน. อัน วี ปา โดว อาโกบ ต็อห, “โฆรห, อึณ มูห โฆรห อาโกบ. แด ยี มูห แด อาโซว.” 23อัน ตู นับ, อึณ มูห อาโกบ อี กาโลว อัน. อัน ทาง, แด แฮะ มูห แด อาโซว อี มูห อีกัด อาโกบ. แฮะ ฮอต อัน ต็อห ดี ม็องการา ดัว ดี อัน. 24ปอ อู เฌณ อัน วี ดีหมอด, “แฮะ หมาน, แม มูห ฆอน โอว อี จืร อาโซว?”

อาโกบ วี ต็อห, “แฮะ หมาน.”

25แฮะ ฮอต, อัน ต็อห, “แตห แม ดัว ปี ดี โฮม, แตห โอว ปึอน ดี ฮาบ ยัง โดว แปร ปี ดัง แม, แตห โอว ม็องการา ดัว ดี แม ปัน ตี.” อาโกบ บอ ดัว ปี ดี โฮม ดี ฆูณ อัน. อัน มืร โฮม. อาโกบ บอ ดัว อึม มางูน ดี ฆูณ อัน, แตห อัน บอ เดียง. 26ฆูณ อาโกบ แฮะ แพ โบม, อัน วี ต็อห ดี อาโกบ, “ฆอน โอว, แตห แม ตัห กอย เครียะ โอว, อูห โอว.”

27ดอ กอย อัน กาตัด, ฆูณ วี อูห ครึง อัน. แฮะ ฮอต อัน ม็องการา ดัว ฆอน อัน ตี. อัน ต็อห, “อึย ฆอน โอว, อูห แม อึณ ปี อูห แคง แปร ปี ม็องการา ดัว เฌาพรา.

28แตห อัน เฌา บอ ตึย อึม ดีงาน แคง ฆางหราว, โลง ดี โดง นา แม, แตห แม มึห กาดาย บอด แคง มาน แม, แตห แม มึห ดีฆาว บอ อึม มางูน กืน กาเซา.

29แตห บอ เฆ อาโมยว ดูอี เฮา ตัห แบน หมาย แม. แตห ครึร อี เฮา วี ตัห โฆม ดี อาต แม. แตห แม แบน ดา กาณา อี อึบ เฆ วอแว แม. แตห เฆ ฆอน มา แม วี โฆม ดี อาต แม. อาเซ ดี ดืง แม, แตห อัน เฌา บอ ดืง อัน ตี. อาเซ ดี ม็องการา ดัว ดี แม, แตห เฌาพรา ม็องการา ดัว บอ ดี อัน.”

30อาแซก แฮะ ฮอต ม็องการา ดัว ดี อาโกบ, อาโกบ ตึอน มืร แฮะ ฮอต เลห โดง กอย ฆูณ อัน, อู เฌณ อีกัด อัน อี จืร อาโซว ตึอน แฮะ ตัห แคง แปร. 31บอ อัน ดัง ฮาบ ซีแงห, ดัว ดี ฆูณ อัน ต็อห, “อึย ฆูณ โอว, แตห แม ยีต โฮม ยัง โดว แปร ปี ดัง โอว, แตห แม ม็องการา ดัว ดี โอว.”

32อาแซก วี ต็อห ดี อัน, “แม มูห อาเซ?”

อัน วี ต็อห, “โอว มูห ฆอน ฆีณ แม อี จืร อาโซว.”

33แฮะ ฮอต กาลาง, อาแซก ตึอน ดีเยณ บอ โดว. อัน ต็อห, “อาเซ แฮะ ตัห ดัว โอว โฮม ฮาบ ยัง โดว แปร อาต ตัห แม? โอว แฮะ ฮอต โฮม ปี ดัว อัน. โอว มืร แฮะ ฮอต ม็องการา ดัว ดี อัน.”

34อาโซว แฮะ ยึร โฆรห ฆูณ อัน ตี, อัน วี ยาม ตาง, น็อห อัน บอ กลึร กาเซา. อัน วี หมาณ ดี ฆูณ อัน, “อึย ฆูณ โอว, แตห แม ม็องการา ดัว บอ ดี โอว.”

35อาแซก ยี ต็อห, “วา แม แฮะ กาโลว โอว, ปรา ดึห ปี ดี โลว ม็องการา ดัว โอว ดี แม.”

36อาโซว วี ต็อห, “อัน แฮะ ฮอต กาโลว โอว อา เฌณ. จืร อัน แฮะ หมาน. อัน กาโลว เซเซ.#27:36 ‘อาโกบ’ แคง โฆรห แฮแบร มูห ลอง ดาง ‘ซีมา กาโลว’ คา อาต อัน แฮะ ปรา ปี ดี ปลูะ โอว โกบ มูห โอว ฆอน ฆีณ แม. ดอ ตี นี, อัน แฮะ วี ปรา ปี ดี ม็องการา ดัว แม ดี โอว.” อัน วี ดีหมอด ฆูณ อัน, “แม ตู มึห ดี อูน โฆรห อี ม็องการา ดัว บอ ดี โอว?”

37อาแซก วี ต็อห, “โอว แฮะ ฮอต ต็อห, แตห อัน แบน กาณา แม. โอว แฮะ ฮอต ดัว วอแว อัน ดอน อี ดี อัน, แตห เฆ แบน หมาย อัน. โอว แฮะ ฮอต ดัว ปี ดี โฮม ปี ดี เดียง ดี อัน. แดง ตี, มาเซ อึณ ซี มึห, ปี ปึอน โอว ดัว ดี แม, ฆอน โอว?”

38ปัน ตี อาโซว วี ต็อห ดี ฆูณ อัน, “อึย ฆูณ โอว, แม ตู มึห โฆรห ปี ม็องการา ดัว ปอ อู โมยว? หมาณ แตห แม ม็องการา ดัว บอ ดี โอว.” อัน แฮะ ฮอต ต็อห ปาย ตี อัน วี จูห ดี ยาม ตาง.

39ปัน ตี อาแซก วี กาลาง ดี อัน, “แม ดี กอย กาโต็ง ดี กาดาย บอด. โดง กอย แม บอ กาโต็ง ดี อึม ดีงาน อี เลห แคง ฆางหราว. 40แม ดี โฮม โดว ซัดดาวา แคะ ปี ง็อห แม ตา มาปัวะ ลาง แม. แม ดี บอ แบน หมาย วา แม. แม ยี แป ดี โบง แตห แม ลอด ดูก ตี, แกวะ แตห วา แม อึบ แม เซเซ.”

41อาโซว ตึอน ยี อูน น็อห ดี อาโกบ โกบ แฮะ ม็องการา ดัว ฆูณ อัน นา บอด ดี อาโกบ. อัน มืร คราม แคง น็อห อัน ต็อห, “อาว เหลณ ฆูณ โอว ดี ยัม. วาย อัน ตี อาคราว โลว กลึร ฮี ปูน, โอว ดี ง็อห แวน วา โอว.”

42อึณ ยี มึห ดูอี อี นับ ลอง น็อห อาโซว ตึอน. เฆ วี ตัห โดง กอย นาง แบก, กาลาง ดี อัน ลอง ปี คราม อาโซว. ปัน ตี อัน บอ แดะ อาโกบ อี มูห ฆอน เตียะ อัน, กาลาง โฆรห ดี อัน. อัน ต็อห, “อีกัด แม แฮะ รู กาเซา ดี แม. อัน คราม ดี ง็อห แวน แม. 43แตห แม โทม ปี ต็อห โอว ดอ ตี นี. แม โลว เลห โดง กอย เอ อู เฌณ, ฮาว โดง กอย อีกัด โอว แคง มืง ฮาราน. 44แตห แม กอย โดง กอย อัน, แตห รู อีกัด แม ดี แม กอ หราย. 45เซ อีกัด แม อาว ฮู รู ดี แม, เซ อัน ฮี ปีว ปี โบง แม ดี อัน, โอว ดี วี แดะ แม, แตห แม วี ตัห โดง กอย เอ. โอว ตู ซี แตห อาซาก ฆอน โอว บอ อา วี ชึม อู ซีแง.”

46ปัน ตี นาง แบก วี กาลาง โฆรห ดี อาแซก. อัน ต็อห, “โอว แฮะ ปึร อาซาก โอว. เฆ อีบึณ อาโซว, อี มูห อาโมยว ดูอี เฮทีด, เฆ โบง แตห น็อห โอว อาว ดาคึย. เซ อึณ มูห บอ อาโกบ ดี ดึห อีบึณ อี มูห อาโมยว ดูอี เฮทีด, อี กอย รึม โดบ เอ, โอว ตู คัม.”

Currently Selected:

ดอ โฆว 27: pce

Highlight

Copy