ดอ โฆว 26

ลอง อาคราว เอต โบม

1ปอ อู เฌณ อึณ วี ฌัม อาคราว เอต ปี ดี โฮม. อึณ ปี คา อาต นู, ดอ ซี กอย อาบราฮัม ตึอน. ดอ อัน ตี อาแซก ฮาว ฌัม มืง ฆีราด อี มูห โดง กอย คูนดีคัม อาบีเมน อี อึบ มืง ตาง อี จืร มืง พีลีที. 2อาต ฮาว อัน, เฌาพรา แฮะ กาปลูห, กาลาง โฆรห ดี อัน. อัน เฌา แฮะ ต็อห, “แม แกวะ โลง มืง แอฆึบ. แตห แม กอย แคง มืง ปี ดี กาลาง โอว ดี แม. 3แตห แม กอย แบน แคต แคง มืง ตี. เซ แม โบง ปาย ตี โอว ดี กอย รึม โดบ แม. โอว ดี ม็องการา ดัว ดี แม. โอว ดี ดัว มืง เฆ ตี ดี แม บอ ดี เฆ ดูอี อาโมยว แม อี ดี ตัห นา ปัน. โอว ดี โบง ปี ดึอม กาลาง โอว ดอ ดัว โอว กาดีก ซัดฌา ดี ฆูณ แม อี จืร อาบราฮัม. 4โอว ดี แตห หลูกหลาน แม กืน ปี ซีมัณ อี กอย แคง เบลณ. โอว ดี ดัว มืง เฆ นี ดี หลูกหลาน แม. โกบ หลูกหลาน แม ตี, โอว ดี ม็องการา แตห เฆ ดูอี ดอน โมยว อี กอย แดง กาดาย ดอน นา ดอน โปละ. 5โอว ดี โบง โตต ปาย ตี โกบ แฮะ ดึอม โทม อาบราฮัม ตึอน โฆรห โอว, โกบ โบง อัน ปี หมาณ โอว ดี อัน บอ โดบ ดารา โอว, โบง ปี จัร โอว, ตู ปีว ปี มาโนว โอว ดี อัน.” 6ปาย ตี อาแซก บอ กอย แคง มืง ฆีราด.

7ดอ กอย อัน แคง มืง ตี, เฆ ดูอี ดีหมอด อัน ลอง นาง แบก. อัน ต็อห, “อัน มูห วา โอว.” อัน ตู ยัะ กาลาง แตห อี นับ นาง แบก มูห อีบึณ อัน. อัน โยว, เซ เฆ อีมาย แคง มืง ตึอน แฮะ นับ ลอง นาง แบก มูห อีบึณ อัน, เฆ ดี ง็อห แวน อัน, แตห เฆ ปึอน ดี ลาย นาง แบก. โคว, นาง แบก แฮะ ชีด กาเซา.

8อาแซก แฮะ ฮอต กอย เหลณ แคง มืง ตึอน, อู ซีแง คูนดีคัม อาบีเมน ตึอน ยอด แคง มาโลห กาง อัน, ยึร อาแซก ฆาย นาง แบก ลาย ร็อก. 9ปัน ตี อัน วี ตึย อู วี แตห อัน แดะ อาแซก. อัน ต็อห, “นาง แบก มูห อีบึณ แม. เหมา อึณ ปาย ปี ต็อห แม, อัน มูห วา แม?”

อาแซก วี ต็อห, “โอว โยว เฆ ง็อห แวน โอว. โคว, อัน ชีด กาเซา.”

10คูนดีคัม วี ต็อห, “เหมา อึณ ปาย ปี กาโลว แม ปาย ตี? เซ อึณ มึห ดูอี อู วี อี ลาย อัน, อึณ บอ แบน หมาบ ตาง ดี เย.”

11ปัน ตี คูนดีคัม อาบีเมน วี ดัว อามีง ต็อห, “อาเซ โบง นา ตู หมึอม ดี อาแซก ฆาย อีบึณ อัน, เย ดี ง็อห แวน อัน.”

12อาแซก แฮะ ซัม โหงว แคง มืง ตึอน. ซีนัม ตี, อัน ปึอน หลึอม ปี ซัม อัน อู มาย็อห บูน. โคว, เฌาพรา แฮะ ม็องการา ดัว ดี อัน. 13ปาย ตี ปวน อัน แกร ดี ตาง แตห อัน กอ แบน ดูอี อี ครัม กาเซา บอ มึห ปวน ตาง กาเซา. 14อัน มึห มาบู บอ มาแป กืน. บอ มามัก บอ หมาย อัน, เฆ กืน กาเซา. อึณ บอ แตห เฆ ดูอี พีลีที ตู อึง, แบน น็อห รู ดี อัน, อูน น็อห ดี อัน. 15เฆ วี ปูน ฮับ กาดาย บอ กาอัห แคง กาเดา อึม คึม อี มูห แปะ แฮะ ฆึห หมาย ฆูณ อัน อี จืร อาบราฮัม.

16ปัน ตี คูนดีคัม อาบีเมน ตึอน วี ต็อห ดี อาแซก, “แตห แม เลห แคง มืง เย, ฮาว ปอ โปละ. ปวน แม แฮะ ตาง กาเซา. เย อาว ฮู ปึอน คัม.”

17ปัน ตี อาแซก เลห แคง มืง พีลีที ตึอน. อัน ฮาว คยัะ ทึบ บีก อัน แคง ฆลัง อี จืร ฆีราด. อัน วี กอย โดง ตี. 18โดง กอย อาแซก ตี, อึณ ยี มึห อึม คึม บรีม แปะ แฮะ ฆึห ฆูณ อาแซก อี จืร อาบราฮัม ตึอน. วาย แฮะ ฮอต ยัม อัน, เฆ ดูอี อาโมยว พีลีที แฮะ ปูน กาเดา แคง อึม คึม ตี. อาแซก ยี จัร หมาย อัน, แตห เฆ วี ฆึห อึม คึม ตี ดอน โปละ. อัน วี แตห อึณ จืร ปี ปี ดึอม ดาง ฆูณ อัน.

19เฆ หมาย อาแซก บอ ฮาว ฆึห แคง ฆลัง. เฆ วี ยึร โตห อึม อู โปละ 20ปัน ตี เฆ ดา อี เฮียง โดว ซัดดาวา แคง มืง ฆีราด ตึอน, เฆ วี ลาย กาแทณ ดี ดา อี เฮียง โดว ซัดดาวา อาแซก. เฆ ต็อห, “อึม ตี แฮะ มูห อึม เย.” ปัน ตี เฆ แตห อึม คึม ตี จืร ‘อึม คึม กาแทณ’ โคว, เฆ แฮะ ลาย กาแทณ แตห เฆ ปึอน อึม คึม ตี. 21แฮะ ฮอต, เฆ ปี วี ฆึห อึม คึม ปอ อู โปละ. เฆ วี ลาย กาแทณ ลอง อัน ตี. โคว อัน ตี, เฆ แตห อึณ จืร ซีดนา. ลอง ดาง อัน อึณ มูห อี ลาย พยาก. 22วาย อัน ตี เฆ วี ฆึห อึม คึม ปอ อู โบ็ง. เฆ อาว ฮู ลาย กาแทณ ลอง อัน ตี. ปัน ตี เฆ แตห อึม คึม ตี จืร เรโอวโบด. ลอง ดาง อัน มูห โดง กาว็อห. อาแซก วี ต็อห, “ดอ ตี นี เฌาพรา แฮะ ดัว เย มึห โดง กาว็อห แคง มืง นี, แตห เย ปึอน ดี แบร ดอน โปละ.”

23ปัน ตี อาแซก วี ฮาว โฮะ มืง บีราเซบา. 24แคง หมึร เฌาพรา วี กาปลูห ดี อัน ต็อห, “โอว มูห เฌาพรา ปี กรึบ ฆูณ แม, อี จืร อาบราฮัม. แกวะ โยว. โอว เฌาพรา กอย รึม โดบ แม. โอว ดี บอ ม็องการา ดัว ดี แม. โอว ดี บอ แตห หลูกหลาน แม แบร กืน. โคว, โอว แฮะ อึง อาบราฮัม อี มูห แดเจณ โอว.”

25โดง ตี อาแซก วี โบง กาโช็ง หลู ดี เฌาพรา. อัน บอ กรึบ เฌาพรา. ปัน ตี อัน วี คยัะ ทึบ บีก อัน ดี ตี. เฆ หมาย อัน วี ฆึห อึม คึม ดี ตี.

26คูนดีคัม อาบีเมน ตึอน ยี เลห มืง ฆีราด, ฮาว ฌัม โดง กอย อาแซก. บอ อามู อามาด อัน, อี จืร อาฮูซาด, บอ อาพีโคน อี มูห ดา อี อึบ ดา ซึก อัน, ฆาย โดบ อัน. 27อาแซก ตึอน ดีหมอด เฆ ต็อห, “เหมา อึณ ปาย แปะ แฮะ ตัห เบ? เบ แฮะ ดึอม มึห น็อห รู ดี โอว, แฮะ ซูต โอว เลห โดง กอย เบ.”

28เฆ วี ต็อห, “ดอ ตี นี, เย แฮะ วี นับ, เฌาพรา กอย รึม โดบ แม. โคว อัน ตี, เย ต็อห, บอ แม บอ เย, เอ โลว ลาย โพรม รึม. 29แตห เอ ลาย โพรม, แกวะ แตห แม โบง นา ตู หมึอม ดี เย. แตห แม โบง นา หมึอม ดี เย, แตห อึณ ปี แปะ แฮะ โบง เย นา หมึอม ดีโลย ดี แม. เย แฮะ แตห แม ฮาว เลห แคง มืง เย, ตู โบง มาเซ ดี แม อี มูห ดา อี ปี ม็องการา ดัว เฌาพรา.”

30เฆ แฮะ ฮอต กาลาง ปาย ตี อัน โบง ปี ดี โฮม, แตห เฆ กอย โฮม บอ เดียง แพ. 31ปา แคหณา เฆ เจว ยีต. เฆ วี ลาย ดัว กาดีก ซัดฌา. แฮะ ฮอต, อาแซก ตึอน ควาง เฆ ฮาว เลห โดง กอย อัน. เฆ มืร มึห น็อห ดาคึย, เลห ฮาว โดง กอย อัน. 32ซีแง อัน ตี เฆ หมาย อาแซก, เฆ อี แฮะ ฆึห อึม คึม ตึอน, เฆ วี ตัห โดง กอย อัน, เฆ ต็อห, “เย แฮะ กาตูณ อึม.” 33ปัน ตี อัน แตห อึม คึม ตี จืร เซบา. ลอง ดาง อัน อึณ มูห กาดีก ซัดฌา. โคว, กอ ฌัม อาตึร, มืง อี กอย โดง ตี, อัน จืร บีราเซบา.

34อาซาก อาโซว ตึอน ยี โนะ พวน ฆึร ซีนัม, อัน คัด ดึห อีบึณ อี จืร นาง ยูดีด. อัน มูห ฆอน อาเบเอรี อี มูห อาโมยว เฮทีด. อัน คัด ดึห อีบึณ ปอ อู วี อี จืร นาง บาเซมาด. อัน มูห ฆอน อาเอโลน, อี มูห อาโมยว เฮทีด. 35อีบึณ อาโซว อา วี ตึอน, ฆาย ตู แตห อาแซก ฆาย นาง แบก มึห น็อห ดาคึย.

Currently Selected:

ดอ โฆว 26: pce

Highlight

Copy